Ïdulukunata adorayanqanpita castigananpä ninqan
8
“¡Marka täpaqkuna, cornëtata tukayay!¡Kuyanqä runakunata atacayänanpämi contrankuna ankanö shamuykäyan!
Paykunawan pactu ruranqäta y leynïkunata mana cumpliyanqanpitami Israel runakunata castigashä.
2 Israel runakunami mañakamar nikäyäman:
‘¡Taytay, yanapaykallämay!
¡Qammi kanki Tayta Diosnï!
¡Noqakunaqa kuyanqayki Israel runakunami kaykäyä!’
3 Tsaynö mañakayämarpis alli kaqta manami chaskikuyantsu.
Tsaymi castigaptï chikiqninkuna atacar qatikachäyanqa.
4 Paykunaqa mana tapukayämarninmi mandaqnin reykunatapis churayashqa.
Mana mañakamayllapami autoridäninkunatapis churayashqa.
Yuraq qellaypita y qoripitami ïdulukunatapis rurayashqa.
Tsaynö rurayanqanpitami ushakäyanqa.
5 “Samaria runakuna, qoripita torïtuta rurayanqaykita adorayaptiki pasaypami melanä.†
Tsaynö rurayanqaykipitami pasaypa ajashqa kaykä.
¡Imayyaqrä penqakuypä jutsasapa kayanki!
6 ¡Israel runakuna, wiyakuyay!
Tsay adorayanqayki torïtuqa manami Diostsu, sinöqa runa ruranqallanmi.
Tsaymi pakir chipyaq ushakätsishä.
7 “Israel runakunaqa wayrata muruqnö karmi shukukuyllata cosechayanqa.a †
Muruyanqankunapis mana wayuptinmi aqatsikuyänanpäpis kanqatsu.
Ichikllata cosechayanqantapis jäpa runakunami mikuyanqa.
8 ¡Israel nación ushakanqami!
Juklä nación runakunaqa mana sirviq uyllutanömi rikayanqa.
9 Israel runakunaqa chucaru ashnunö karmi Asiria nación runakunaman aywaykäyan.
Paykunaqa waynäkuq warminömi kaykäyan.
10 Asiria nacionta y wakin nacionkunata tsaynö pägayaptinpis tsay nacionkunatami qorishä atacayänanpä.
Munayyuq reypa munaynincho karmi juk tiempuyaq ñakayanqa.
11 “Efraín runakunaqa atska altarkunatami rurayashqa tsaycho perdonta mañakayämänanpä.
Tsay altarkunacho ïdulukunata adorarmi mas jutsata ruraykäyan.
12 Paykunapä atska leykunata qellqatsishqa kaptïpis manami cäsukuyantsu.
13 Sacrificiukunata altarcho rupatsirmi aytsata kushishqa mikuykäyan.
Tsaynö rurayaptinpis tsay sacrificiukunaqa manami shonqüpänötsu kaykan.
Jutsata rurayanqantaqa manami imaypis qonqäshätsu.
Perdonanäpa trokin castigaptïmi Egiptuman kutiyanqa.b
14 Kamaqnin Tayta Dios kaykaptïpis Israel runakunaqa manami yärakayämantsu.
Yärakayämänanpa trokinmi amparakuyänanpä palaciukunata shäriykätsiyan.
Judá runakunapis jinchi murallashqa markankunamanmi yärakuykäyan.
Nina rupar ushanqannömi murallashqa markankunata y alli shäritsinqan palaciunkunatapis ushakätsishä”.†