Israel runakunata nacionninpita qarqunanpä ninqan
9
Israel runakuna, runanta mañösa warmi jaqiriqnömi qamkunapis Tayta Diosta kachariykuyashqayki.Cosëchaykikuna alli kananta munar juk diosmanmi yärakuykäyanki.
Päguta chaskinanpä prostitüta warmi juk runawan pununqannömi qamkunapis kaykäyanki.
Tsaynö kaykarqa cosëchata qoriyanqaykipita ama kushikuyaytsu.
Wakin nación runakunanöqa kushikuypita ama saltaykachäyaytsu.
2 Trïgupis mikuyänaykipä ni vïnupis upuyänaykipä manami aypanqatsu.
3 Tayta Dios rikatsiyäshunqayki nacioncho täyänaykipa rantinqa Egiptumanmi kutiyanki.a
Asiriacho tarnami mana mikuyänaykipä kaq impüru mikuykunata mikuyanki.
4 Tsaychöqa Tayta Diospä vïnuta manami altarman wiñayankinatsu.
Sacrificiuta rupatsiyaptikipis manami chaskiyäshunkinatsu.
Ayata yataq runa impüru kanqannömi mikuynikikunapis impüru kanqa.
Tsay mikuyta pipis mikurqa impürumi rikakunqa.
Manami Tayta Diospa templunman apayänaykipänötsu kanqa, tsaypa trokinqa kikikikuna mikuyänallaykipämi kanqa.
5 Tsaynö kaptinqa ¡imatarä rurayanki Tayta Diosta adorar fiestata rurayänayki junaq!
6 Asiria runakuna mana ushakätsiyäshunaykipä qeshpirmi Egiptuchöna täyanki.
Wayikikunapita raslla yarqurmi qellaynikikunatapis jaqiriyanki.
Qellayniki kanqanchöqa ishankallami jeqanqa.
Wayikikunachöpis kashallanami wiñanqa.
Egiptucho wanuyaptiki Menfis jäpa markamanmi pampayäshunki.
Profëtakuna willakuyanqanta Israel runakuna mana chaskiyanqan
7 Israel runakunata Tayta Dios castigananpä kaq junaqkuna chämushqanami.†
Jutsaykikunaman tupumi juzgayäshunki.
Pasaypa ñakarrämi Tayta Dios castigayäshunqaykita tantiyakuyanki.
Qamkunaqa nikäyanki profëtakuna mana tantiyakuq kayanqantami.
Tsaynöpis nikäyanki Tayta Diospa willakuqninkuna löcu kayanqantami.
Tsaynö nikäyanki pasaypa jutsasapa y chiki karmi.
8 Kikin Tayta Diosmi profëtata churashqa Israelcho rikachakuqnö kayänanpä.†
Tsaynö kaptinpis mana alliman churakänanpä trampata churapaqnömi kaykäyanki.
Profëtakunata chikir Tayta Diospa templunchöpis contranmi shäriykäyanki.
9 Gabaacho unay runakuna pasaypa jutsasapa kayanqannömi† qamkunapis jutsasapa kaykäyanki.
Tsaynö kayanqaykitaqa Tayta Dios yarparaykanmi.
Paymi llapan jutsaykikunapita castigayäshunki.
Israel runakunapa wamrankuna ñakayänanpä ninqan
10 Tayta Diosmi nin:
“Tsunyaq jirkacho üvata tariykur kushikuqnömi unay Israel runakunata tariykur kushikurqä.
Unay castaykikunaqa punta poquq hïgusnömi kushikuypä kayarqan.
Baal-peor partiman chaykurmi itsanqa tsaycho adorayanqan diosta adorar pasaypa penqakuypä rikakuyarqan.†
Adorayanqan dios mana väliq kanqannömi paykunapis mana väliq rikakuyarqan.
11 “Pishqukuna illaqpita pajar aywakuqnömi noqapis paykunata jaqiriykur aywakushä.
Tsaymi warmikunapis qeshyaq mana rikakuyaptin wamrankunapis kanqanatsu.
12 Yuriqllantapis chipyaqmi wamrakunata ushakätsishä.
¡Allaw! Paykunata kachariptï kuyapaypämi ñakayanqa.
13 Israel naciontami rikashqä kuyayllapä Tiro markatanö.
Tsaynö kaptinpis mana cäsukamarmi tsurinkunata castïguman apaqnö kaykäyan.
Castigaptïmi tsurinkunapis wanutsishqa kayanqa”.
14 Tayta Dios, jutsankunaman tupu Israel runakunata castigay.
Warminkunapis qolluq rikakuyätsun.
Wawan yuriptinpis lichin ama katsuntsu.
15 Tayta Diosmi nin:
“Gilgalchömi jutsa rurayta qallaykuyarqan.†
Tsaychömi Israel runakuna ajanätsiyämarqan.
Tsaynölla jutsata rurayaptinmi wayinpita pitapis qarqunqannö noqapis nacionnïpita qarqushä.
Autoridäninkunapis mana cäsukayämaptinmi Israel runakunata manana kuyashänatsu.
16 Efraín runakunaqa qarwashtashqa jachanömi kaykäyan.
Michinb tsakishqa jacha manana wayunqannömi paykunapa wamrankunapis kanqanatsu.
Wamrankuna kaptinpis llapantami wanutsir ushashä”.
17 Efraín runakuna mana cäsukuq kayanqanpitami Tayta Dios kacharinqa.
Nacionninpita qarqushqa karmi jukläman jukläman purikullar kayanqa.†