Israelcho altarkunata ushakätsinanpä ninqan
10
Israel runakunaqa imaykayuq karmi pasaypa wayuq üvanö kaykäyan.Imaykayuq rikakurmi manakaq dioskunapä altarkunatapis ruraykäyan.
Mikuyninkuna alli wayuptinpis adorayanqan wanka rumikunatami kuyayllapäta adornaykäyan.
2 Tayta Diosllata sirviyänanpä awnirpis manami cumpliyantsu.
Kananqa Tayta Diostami cuentata qoyanqa.
Paymi altarninkunata y ichïtsiyanqan wankakunatapis pakir ushakätsinqa.
3 Tsaymi Israel runakuna niyanqa:
“Tayta Diospita mana mantsapakunqantsikpitami mandamaqnintsik reypis kannatsu.
Rey karpis ¡imanörä yanapamäshun!
4 Reynintsikkunaqa yärakatsimänallantsikpämi imatapis awniyan.
Pactuta rurarpis manami cumpliyantsu.
Mana alli qewa chakracho miranqannömi nacionnintsikcho mana alli ruraykunapis atska kaykäyan”.
5 ¡Samaria runakunaqa mantsakashqami kaykäyan!
¡Bet-avénchoa adorayanqan qori torïtuta apakuyänanpä kanqantami tantiyaykäyan!
Sacerdötikunapis y runakunapis waqaykäyan kuyayanqan ïdulu manana kananpä kanqanta musyarmi.
6 Soldädukuna tsay ïduluta aparmi Asiria nacionpa mandaqnin reyta qaraykuyanqa.
Tsaynöpami Efraín runakunab pasaypa penqakushqa kayanqa.
Ïduluman yärakuyanqanpitami penqakushqa umpuräyanqa.
7 Samariacho reytapis shakllita yaku apaqnömi prësu apayanqa.
8 Avéncho kaykaq altarkunatapis llapantami juchutsiyanqa.
Tsay altarkunachömi Israel runakuna ïdulukunata adorar jutsata ruraykäyan.
Juchutsir ushayaptinmi tsay altarkuna kanqancho kashakuna y shirakakuna wiñayanqa.
Tsay witsanmi runakuna pasaypa ñakar jirkakunata niyanqa:
“¡Juklla ushakäyänäpä janäkunaman juchumuy!”
Tsaynöllami qaqakunatapis niyanqa:
“¡Juklla ñitiskayämay!”†
Israel runakuna mana cäsuyanqan
9 Tayta Diosmi nin:
“Israel runakuna, unay castaykikuna Gabaa markacho† jutsata rurayanqanpita patsa kananyaqpis jutsa rurayta manami kachariyankitsu.
Tsaymi mana alli runakuna Gabaacho unay ushakäyanqannö qamkunapis ushakäyanki.
10 Imaypis munanqä hörami castigayäshayki.
Penqakuypä jutsata rurayanqaykipita castigaptïmi maytsay nacionpita runakuna shayämunqa atacayäshunaykipä.
11 “Manshuyashqa töru trïguta kushishqa jarunqannömi Israel nacionpis kaykan.
Kananqa kuyayllapä matankanman yügutanami churashä.
Judá nacionpis aräduta sutaq törunömi kanqa.
Jacobpita aywaraqkunaqa rastrïlluta qarachaqnömi kayanqa.
12 “Munanqänö alli kawayay.
Tsaynö kawarqa chakrata alli muruwan muruqnömi kaykäyanki.
Tsaymi cosëchata qorir kushikuyanqaykinö qamkunata kuyapanqäta tantiyar kushikuyanki.
Tsaynö kaptinqa mana muruna chakrata kichaqnö shonquykikunata kichapäyämay.
Höra chämushqanami llapan shonquykikunawan ashiyämänaykipä.
Mana ajayaypa mañakayämay shamur salvanqäyaq.
13 “Qamkunaqa jutsata rurallarmi kawayashqayki.
Jukniki juknikipis llullapänakurmi mana alli kawaykäyanki.
Guërra carrëtaykikunaman y atska soldäduykikunamanmi yärakuykäyanki.
14 Tsaymi nacionnikicho guërrallana kanqa.
Amparakuyänayki wayikikunapis juchutsishqami kanqa.
Bet-arbelcho guërra kaptin Salmán runakunata ushakätsinqannömi qamkunatapis warmikikunatapis y wamraykikunatapis ushakätsiyäshunki.
15 Bet-el runakuna, alläpa jutsata rurayanqaykipita qamkunatapis tsaynömi rurayäshunki.
Israel nacionta atacarmi mandaqnin reytapis patsa manarä waraptin wanutsiyanqa”.