Israel runakunata Tayta Dios kuyapanqan
11
“Israel runakunata unaypita patsami kuyaykä.Tsurï kaptinmi Egiptupita qayamurqä.†
2 Pasaypa kuyaykaptïmi noqapita witikuykäyan.
Baal dioskunapäpis sacrificiukunatami rupaykätsiyan.
Ïdulukunatami inciensiuwan qoshniykätsiyan.
3 “Wamrata makinpita jancharkur puriyta yachatsinqannömi Efraín runakunata yachatsirqä.
Tsaynö yachaykätsiptïpis yanapaykanqäta manami tantiyakuyantsu.
4 Paykunata pasaypa kuyarmi shullwapayllapa ñöpäman pushamurqä.
Imayka llullu wamrata marqarkur qaqllanta qaqlläman laqaykur kuyaqnömi kuyarqä.
Tsaynö kuyarmi mikuytapis kikï qararqä.
5 “Tsaynö kuyaykaptïpis paykunaqa manami yachanäyämantsu.
Tsaynö kayanqanpita manami Egiptuchötsu yapay wätay kayanqa, sinöqa Asiria runakunapa munayninchönami kayanqa.
6 Markacho taqkunataqa espädawanmi wanutsiyanqa.
Markankuna murallashqa kaptinpis ushakätsiyanqami.
Tsaynö ushakätsiyanqa tsapakuyta yarpäyaptinpis.
7 Kuyanqä runakunaqa noqapita witikushqami kaykäyan.
Munayyuq Dios kanqäta nirpis janan shonqullami sirviyäman.
8 “Efraín runakuna, ¡imanöpatä qamkunata qonqaskïman!
Israel runakuna, ¡imanöpatä qamkunata jaqirïman!a
¿Adma markata y Zeboim markata ushakätsinqänötsurä qamkunatapis ushakaykatsïman?†
Qamkunata kuyapaptïmi shonqüpis pasaypa tiktikyanrä.
9 Ajanätsiyämaptikipis llapaykikunataqa manami ushakätsiyäshaykitsu.
Castigarpis llapaykikunataqa manami wanutsiyäshaykitsu.
Noqaqa manami runatsu kä, sinöqa qamkunawan kaykaq santu Diosmi.
Manami chipyaqtsu ushakätsiyäshayki.
10 “Qamkuna tantiyakurmi qatiräyämanki.
Leonnö qayaraptïmi rupay jeqanan kaqläpita tsuktsukyarrä kutiyämunki.
11 Pishqukuna ras pajayanqannömi Egiptupita ras kutiyämunki.
Palumakuna ras pajayanqannömi Asiriapita ras kutiyämunki.
Wayikikunacho yapay täyänaykipämi yanapayäshayki”.
Tayta Diosmi tsaynö nin.
Israel runakuna jutsata rurayanqan
12 (12.1) “Israel runakunaqa imaykanöpami llullapaykäyäman.
Judá runakunapis mana cäsukamarmi ïdulu adorayman churakäyashqa.b