12
(2) Efraín runakunaqa pasaypa llullakuyllaman y wanutsinakuyllaman uman churakashqa karmi Asiria runakunawan pactuta ruraykäyan.Egipto nacionwanpis pactuta rurarmi aceitita apaykätsiyan.
Tsay nacionkunawan pactuta rurarqa wayrallawan pachan juntananpä kanqanta yarpaqnömi manakaqllapä ruraykäyan.
Rupay yarqamunan kaqläpita shamuq achaq wayrata qoyat qatipaqnömi manakaqkunata ruraykäyan”.
2 (3) Judá runakunawanpis ajashqami Tayta Dios kaykan.
Tsaymi jutsata rurayanqanman tupu castiganqa.
3 (4) Unay castantsik Jacobpis wawqinpa ankun aptashqami yurirqan.†
Poqukaykurnami Tayta Dioswan pelyarqan.
4 (5) Angelwan pelyara vinciskirmi bendicionninta qonanpä waqapar rugakurqan.†
Tsaypitanami Bet-elcho Tayta Dios yuripaykur parlaparqan.†
5 (6) Paymi llapanta mandaq Tayta Dios kaykan.
¡Paypa jutinpis Yahwehmi kaykan!
6 (7) Tsaynö kaykaptinqa jutsaykikunata kacharir Tayta Diosta perdonta mañakuyay.
Tayta Diosta awniyanqaykinölla leyninkunata cäsukur kawayay.
Kuyayäshuqniki Tayta Diosman imaypis yärakuyay.
7 (8) Tayta Diosmi nin:
“Qamkunaqa cananeo runakunanömi runa mayikikunata pësuwan engañaykäyanki.
Runa mayikikunata engañaymi gustayäshunki.
8 (9) Tsaynö engañarmi kushishqa nikäyanki:
‘Imaykayuqmi rikakuyashqä.
Negociupä suertï kanmi.
Runakunata engañanqäta manami pipis cuentata qokuntsu’
9 (10) Tsaynö nirpis tantiyakuyay unay castaykikuna Egiptucho kayanqanpita patsa Tayta Diosnikikuna kanqäta.
Tsaymi castigaptï toldukunallacho täyanki Ramäda fiestata rurar täyanqaykinö.†
10 (11) “Jutsa ruraynikikunata kachariyänaykipämi profëtakunawan willakatsimurqä.
Willayäshunaykipämi suëñuyninchöpis kutin kutin revelarqä.
Imamanpis tinkutsiypa tantiyatsiyäshunaykipämi kachamurqä.
11 (12) “Galaad particho taq runakunaqa manakaqllapämi ïdulukunata sirviyan.
Gilgalcho taq runakunapis törukunata pishtarmi juk dioskunapä sacrificiukunata altarkunacho rupaykätsiyan.
Tsaymi altarninkunatapis llapanta pakir ushashä.
Pirqayanqan rumikunapis chakrakunachömi mashtaräyanqa”.
12 (13) Unay castantsik Jacobqa Aram partimanmi qeshpir aywakurqan.
Tsaychömi üshata mitsipakuypa warmita ashirqan.
13 (14) Tsaypita unayllatanami Israel runakunata Egiptupita juk profëtawan Tayta Dios jipimurqan.†
Tsay profëtawanmi paykunata cuidatsirqan.
14 (15) Tsaynö kaykaptinpis qamkunaqa Tayta Diosta pasaypami ajanaykätsiyanki.
Pasaypa jutsayuq kayanqaykipitami Tayta Dios castigayäshunki.
Castigashqa kayänaykipäqa kikikikunami jutsayuq kaykäyanki.