Israel runakuna castigashqa kayänanpä ninqan
13
Ñöpataqa Efraín runakuna yätsiyaptin Israelcho wakin trïbukuna chaskikuyaqmi.Tsaynö kaykarpis Baal diosta adorarmi Efraín runakunaqa wanushqanöna kaykäyan.
2 Jutsa ruraytaqa manami kachariyantsu.
Yuraq qellayta fundiskatsirmi munayanqanmannö ïdulukunata ruraykätsiyan.
Nirkurnami niyan: “Ïduluntsikpä llapantsik sacrificiuta rupatsishun”.
Tsaynö nirmi torïtu niraq ïduluta mutsayan.
3 Tsaymi patsa waraskiptin pukutaypis y shullyapis illakaskiqnö illakäyanqa.
Tsaki oqshata wayra apakunqannö y jornupita qoshni yarqur aywakuqnömi illakäyanqa.†
4 Tayta Diosmi nin:
“Egiptucho unay castaykikuna kayanqanpita patsami Tayta Diosnikikuna kaykä.
Noqallami salvashuqnikikuna kaykä.
Tsaynö kaykaptïqa imamanpis ama ‘diosnï’ nir yärakuyaytsu.†
5 “Unay castaykikuna tsunyaq jirkapa puriyaptin noqami rikarqä.
6 Qamkunatapis pacha junta mikuyänaykipä mikuyta kamaripaptïmi orgullösu tikrayashqayki.
Tsaymi qonqaykamar cäsukayämashqaykinatsu.†
7 Tsaynö kayanqaykipitami imayka leonnö y nänicho tigri pakakuykur atacaqnö atacayäshayki.
8 Wawankunata suwapaptin ösu atacar ushanqannömi qamkunatapis ushakätsiyäshayki.
Imayka león atacar ushaqnömi chipyaq ushakätsiyäshayki.
Imayka fiyu uywanömi chipyaq ushakätsiyäshayki.
9 “Israel runakuna, yanapaykaptïpis conträ rikakuyanqaykipitami ushakätsiyäshayki.
10 Mandayäshuqniki reykuna kayänanpämi unay castaykikuna autoridäninkunata mañakuyarqan.†
Kananqa ¡maychötä tsay rey kaykan salvayäshunaykipä!
Autoridänikikunapis ¡maychötä kaykäyan yanapayäshunaykipä!
11 Mandayäshuqniki reykunata churanäpä mañakayämaptinmi ajashqa karpis reyta churaparqä.†
Kananqa qamkunawanpis ajashqa karmi mandayäshuqniki reyta illakätsishä.†
12 “Qamkuna jutsata rurayanqaykiqa llapanmi librucho qellqaraykan.
13 Warmita wachay nanay tsarinqannömi qamkunapis ñakayanki.
Wachay nanay tsariptinpis yurinanpä jatikashqa caprichüdu wamranömi kaykäyanki.
Tsay wamra jatikashqa kar mamanpa pachallancho wanunqannömi qamkunapis wanuyanki.
14 “¿Wanuypita salvashaykitsurä?
¡Manami!
¡Ä wanuy! ¡Ushakätsikuq kaynikiwan yarqamuy!
¡Ä sepultüra! ¡Mikukuq kaynikiwan shamuy!
Tsay runakunata manami kuyapäshänatsu.†
15 “Israel runakuna, imaykayuq rikakurnin kuyayllapä waytanö kayaptikipis ushakätsiyäshaykimi.
Achaq wayra tsunyaq jirkapita shamur yakuta y pukyukunata tsakitsinqannömi qamkunatapis ushakätsiyäshayki.
Contraykikuna shamurmi riquëzaykikunata y alhäjaykikunata qechuyäshurniki apakuyanqa.
16 (14.1) Samaria marka ushakanqami.
Conträ rikakuyanqaykipitami espädawan wanutsiyäshunki.
Tsurikikunatapis tsapirmi wanutsiyanqa.
Qeshyaq warmikunapa pachantapis qashariyanqami”.