Tayta Diosman yapay yärakuyänanpä willakunqan
14
(2) Israel runakuna, jutsata rurayanqaykipitami castïguman chäyashqayki.Tsaynö kaykarqa kuyashuqniki Tayta Diosman kutikuyay.
2 (3) Tayta Diosman kutikur payta mañakur niyay:
“Taytay, llapan jutsäkunata perdonaykayämay.
Kuyapäyämar chaskiykayällämay.
Alabayanqämi qampä ofrenda kanqa.†
3 (4) Asiria runakunaqa manami salvayämanqatsu.
Ni cawallukunata muntarkur pelyarpis manami vinciyäshätsu.
Runa ruranqankunataqa ‘Diosnïmi kanki’ nir manami adorayäshänatsu.
Qamman yärakuyaptinmi waktsakunatapis kuyapanki”.
Israel runakunata perdonananpä Tayta Dios ninqan
4 (5) Tayta Diosmi nin:
“Ajanaynï qallquskiptinmi imaypis cäsukayämänaykipä yanapayäshayki.
Jutsata rurashqa kayaptikipis perdonayäshaykimi.
5 (6) Bendicionnïta churamur shullyanömi qamkunapä kaykäshä.
Qamkunanami liriu wayta tuktur kuyayllapä kanqannö kayanki.
Líbanucho jatusaq cedrukuna shumaq michïkuqnömi kayanki.
6 (7) Olïvu jachakunapa llimllankuna atskaman mashtakanqannömi qamkunapis atskaman mirayanki.
Líbano munticho cedru mushkuptin kushikuypä kanqannömi qamkunapis kushikuypä kayanki.
7 (8) Qamkunaqa yapaymi noqapa makïcho kawayanki.
Trïgu espigaraykaqnö y üva sheqlliraykaqnömi kayanki.
Líbanucho wayuq üvapita rurashqa vïnu alli kanqanta maytsaychöpis parlayanqannömi qamkunapäpis alli kawayanqaykita maytsaychöpis parlayanqa.
8 (9) Noqami qamkunata rikaykä.
Noqami llimllasapa pïnu jachanö llantupänäpä kaykä.
Noqami llapanchöpis yanapanäpä kaykä.
Tsayta tantiyaskirmi niyanki: ‘¡Ïdulukunaqa manami imapäpis välintsu!’ ”
9 (10) Yachaqkuna y alli yarpayyuqkuna kay willakuyta tantiyakuyätsun.
Tayta Diospa näninqa derëchumi.a
Tsaymi alli runakunaqa tsay nänipa purir ishkiyantsu.
Jutsasapakunami itsanqa tsay nänicho ishkiyan.