Micaíapa ïdulunkuna y sacerdötin kanqan
17
Efraín jallqakunachömi juk runa Micaía jutiyuq tarqan. 2 Paymi juk junaqcho mamanta nirqan: “¿Yarpankiku juk waranqa juk pachak (1,100) siclo qellayniki suwapäshuqniki runata maldicionanqaykita? Noqami kä tsay suwapäshuqniki runa”.Tsaynö niptinmi maman nirqan: “¡Hïju, Tayta Dios bendisaykulläshuy!”
3 Qellayta kutiykatsiptinmi maman nirqan: “Kananqa kay qellay Tayta Diospämi kanqa. Tsaymi kay qellaywan juk ïduluta ruratsir qamta entregashayki”.
4 Tsaynö nirmi wamran kutitsinqan ishkay pachak (200) qellayta ïdulu ruraq runata entregarqan. Ïduluta rurar ushaskiptinnami Micaíapa wayinman churarqan. 5 Micaíanami tsaycho takshalla wayita rurarqan ïdulunta tsayman churaykur adorananpä. Efodta y wakin ïdulukunatapis ruraskirmi juk tsurinta sacerdöti kananpä churarqan.
6 Tsay witsan Israel runakunapa mandaqnin rey mana kaptinmi juknin juknin imatapis munayanqannö rurayaq.†
7 Tsay witsanmi Leví trïbupita juk jäpa chölu Judácho kaykaq Beléncho taykarqan. 8 Paymi juk junaq Belénpita aywakurqan maychöpis tänanpä sitiuta ashir. Efraín jallqakunapa puriykanqanchömi Micaíapa wayinman charqan. 9 Chaykuptinmi Micaía tapurqan: “¿Maypitatä shamuykanki?” nir.
Chölunami nirqan: “Judácho kaykaq Belénpitami shamuykä. Leví trïbu runami kä. Maycho tänäpäpis sitiuta ashirmi puriykä”.
10 Micaíanami nirqan: “Noqapa sacerdötï y taytänö kanaykipä kaycho täkushun. Chunka siclo qellaytami watacho pägashayki. Tsay jananmanpis latsapatawan mikuytami kamaripäshayki”.