Dan trïbu runakunami rikatsinqan herenciankunaman yaykuyta mana kamäpakur maynincho täyänanpäpis rikapakur puriykäyarqan.^† 2 Tsaymi Zora markapita y Estaol markapita pitsqa allinnin runakunata kachayarqan maynincho täyänanpäpis rikapakayämunanpä. Tsay pitsqa runakuna aywarmi chäyarqan Efraín jallqakunaman. Micaíapa wayinman chaykurmi tsaycho patsakuyarqan.

3 Micaíapa wayinchöna kaykarmi Leví trïbu chöluta parlakuyninpa reqiskiyarqan. Tsaymi tsay chöluta tapuyarqan: “¿Pitä kayman pushamushushqayki? ¿Imatatä kaychöqa ruraykanki? ¿Imata ashirtä shamushqayki?”

4 Tsaynö tapuyaptinmi willarqan Micaíawan conträtuta rurashqa kar paypa sacerdötin kanqanta.

5 Tsaymi niyarqan: “Tayta Diosta tapupaykallämay. Mä allipäkush puriyämushä”.

6 Tsaynö niptinmi sacerdöti nirqan: “Ama llakikuyaytsu. Maypa aywarpis alli puriyämunaykipämi Tayta Dios yanapayäshunki”.

7 Tsaypita yarqurnami tsay pitsqa rikapakuq runakuna Lais markaman chäyarqan.^a Sidón markacho runakuna añaw täyanqannömi Lais markacho taq runakunapis añaw täyarqan. Manami imapis paykunapä pishirqantsu. Sidón runakunapita karuchörämi täyarqan. Manami pipis cercacho karqantsu imapis kaptin yanapayänanpä.

8 Tsaynö kaykaqta rikaykurmi pitsqa rikapakuq runakunaqa Zora y Estaol markankunaman kutikuyarqan. Chäyaptinmi tapur niyarqan: “Rikapakamur ¿imanö kanqantatä rikayämushqayki?” nir.

9 Tsaymi niyarqan: “Rikapakamur puriyämunqä partikunaqa llapanpis pasaypa shumaqmi kaykan. Juklla aywashun tsay partikunata tsarinantsikpä. Kayllachöqa ama täkushuntsu. 10 Tsayman chaykurqa añaw kaykaq runakunatami tarishun. Paykunapaqa chakrankuna atska kaptinmi imankunapis pishintsu. Paykuna täyanqan partikunataqa Tayta Diosmi rikatsimäshun”.

11 Tsaynö niyaptinmi kamarikuskir Zora y Estaol markakunapita soqta pachak (600) runakuna pelyayänanpä aywayarqan. Tsay aywaqkunaqa Dan trïbu runakunami kayarqan. 12 Judá trïbu runakuna täyanqan partiman chaykurmi Quiriat-jearimpita rupay jeqanan kaqlächo patsakuyarqan. Tsaypitami kananyaqpis tsay partipa jutin Mahané-dan^b kaykan. 13 Tsaypita yarqurnami Efraín jallqakunapa päsar Micaíapa wayinman chäyarqan.

14 Lais partita rikapakuq pitsqa runakunami niyarqan: “Kay wayichömi kaykan sacerdötipa efodnin, qellaypita rurashqa juk ïdulu mas wakin ïdulukunapis. Tsaykunata ministishunmi”.

15 Tsaynö nirninmi pitsqa rikapakuq runakunaqa Micaíapa wayinman chäyarqan. Tsaycho taq Leví chöluwan tinkurmi kushikur winchikuyarqan. 16 Soqta pachak (600) Dan trïbu runakunanami punkullacho pelyayänanpä kamarikushqa shuyaraykäyarqan. 17 Tsayyaqmi tsay pitsqa rikapakuq runakunaqa ïdulukunapä ruranqan wayiman yaykuskir efodta, qellaypita rurashqa ïduluta y wakin ïdulukunatapis jipiyämurqan. Micaíapa sacerdötinnami soqta pachak runakunawan waqtacho ichiraykarqan.

18 Ïdulukunata y efodta jipiyämuptinmi sacerdötiqa nirqan: “¿Imapätä jipiykäyämunki?”

19 Tsaynami niyarqan: “¡Upällalla noqakunawan aywashun! Sacerdötïkuna y taytäkunanö kanaykitami munayä. ¿Manaku mas alli kanman juk runallapa sacerdötin kanqaykipita juk trïbu Israel runakunapa sacerdötin kaptiki?”

20 Tsaynö niyaptinmi sacerdötiqa kushikur ïdulukunatawan efodta apakurkur Dan trïbu runakunawan aywakurqan. 21 Tsaypita aywakurnami Dan trïbu runakunaqa puntankunata aywayänanpä churayarqan tsurinkunata, uywankunata y qepi apaqkunatapis.

22 Karutana aywakuykäyaptinmi vecïnunkunawan qorinakuskir Micaíaqa qepankunata aywar qatipäyarqan. 23 Qayaykachar taripäyaptinmi Dan trïbu runakunaqa tikraykur Micaíata tapuyarqan: “¿Imatä kashqa? ¿Imanirtä tsaytsika runakunata qoriskir qepäkunata shäyämushqayki?” nir.

24 Tsaymi Micaía nirqan: “Qamkunaqa ruratsikunqä diosnïkunata apamur y sacerdötïtapis pushamur jinayllatami jaqiykayämashqayki. Tsaynö ruraykämarpis ¿‘imanankitä’ niyämankiräku?”

25 Tsaymi Dan trïbu runakunaqa niyarqan: “Ama parlapäyämaytsu. Tsaynölla qayapäyämaptikiqa noqakunawan aywaq wakin runakuna ajanarnin paqtä qamtapis y qamwan shamuq runakunatapis wanutsir ushayäshunkiman”.

26 Tsaynö niskirmi Dan trïbu runakuna aywakuyarqan. Paykuna atska kayaptinmi mantsarirnin Micaíaqa minkakunqan runakunawan wayinpa kutikuyarqan.

27 Micaíapa ïdulunkunata apashqa y sacerdötita pushashqami Dan trïbu runakunaqa Laisman chäyarqan. Tsaycho taq runakuna añaw kakuykaqta llapanta espädawan wanuskatsirmi markatapis rupatsir ushayarqan. 28 Sidón markapita karucho täyaptinmi paykunata washänanpä pipis karqantsu. Lais markaqa Bet-rehob cercan pampachömi karqan.

Dan trïbu runakunami tsay rupatsiyanqan markata yapay sharkarkatsir tsaychöna täkuyarqan. 29 Tsay markapa ñöpa kaq jutin Lais kaptinpis paykunaqa jutitsiyarqan Dan jutin kananpämi. Tsaynö jutitsiyarqan Israelpa tsurin Danpita aywaraq trïbu karmi.

30 Tsaymanmi apayanqan ïduluta respitarnin adorayänanpä churayarqan. Sacerdöti kananpänami Moiséspa tsurin Gersón casta Jonatánta churayarqan. Tsaypitaqa Jonatánpita aywaraq runakunallanami Dan trïbu runakunacho sacerdöti karqan hasta juklä nacionman Dan trïbu runakunata prësu apayanqanyaq. 31 Tinkuna Toldu Silucho kanqan witsanmi Dan trïbu runakuna Micaíapa ïdulunta adorayarqan.