Gabaa runakuna warmita fuerzaypa wanutsiyanqan
19
Israel runakunacho rey manarä kaptinmi Efraín jallqakunacho Leví trïbupita juk runa tarqan. Payqa wakin runakunapita karuchömi tarqan. Juk kutimi Judá particho kaykaq Belén markaman aywaykur concubïna warmin kananpä warmita aparqan. 2 Taykanqanchömi tsay warmiqa runanta jaqiriykur taytan kaqpa Belénman kutikurqan. Taytan kaqchömi chusku killa tarqan.3 Tsaymi runanqa juk sirviqninta pushakurkur y ishkay ashnunta qatikurkur alli shimillanpa parlapar kutitsimunanpä aywarqan. Chäyaptinmi warminqa taytanpa wayinman yaykatsirqan. Mashanta rikaykurmi suegrunpis kushikurqan. 4 Quëdananpä niptinmi suegrunpa wayincho mikurnin upurnin kimsa junaq quëdayarqan.
5 Chusku junaqchönami kutikuyänanpä tutallana sharkuyarqan. Yarqukuykäyaptinnami suegrunqa nirqan: “Mallaqlla aywayankimanräku. Imallatapis mikurkushunrä”.
6 Tsaymi jamaykur ishkan mikuyarqan upuyarqan. Tsaychömi tsay paqaspis quëdananpä suegrun rugarqan. 7 Tsaynö rugaptinmi aywakunanpäna kamarikushqa kaykarpis tsay paqaspis tsaycho quëdakurqan.
8 Pitsqa junaqchönami aywakunanpä tsaka tsakallana sharkurqan. Tsay junaqpis suegrun yapay rugarmi nirqan: “Mikur upur jamarishunrä. Mas tardinami aywakuyanki”.
Tsaymi mikur upur jamaräyarqan. 9 Tsaypita concubïna warmintawan sirviqninta pushakurkur aywakuyänanpä kamarikuptinmi suegrun nirqan: “Taytay, rupaypis jeqaykannami. Kayllacho quëdakuyay. Waray tutanami tsaka tsakalla kutikuyanki”.
10 Tsaynö niptinpis Leví trïbu runaqa tsaycho punuyta mana munarmi concubïna warminta y sirviqninta pushakurkur y ishkay sillashqa ashnunkunata qatikurkur aywakuyarqan. Tsaynö aywakurmi Jerusalén niyanqan Jebús marka frentinman chäyarqan.
11 Jebús markaman tardina chaykarmi sirviqnin nirqan: “Taytay, ¿manaku jebuseo runakunapa markallanmanna patsakuykushwan?”
12 Tsaymi patronnin nirqan: “Jäpa runakuna täyanqanmanqa manami may markamanpis yaykushwantsu. Tsaypa trokinqa Gabaa markayaqrämi chäshun. 13 Juklla apurashun Gabaacho o Ramácho karpis patsakunantsikpä”.
14 Tsaynö aywarmi rupay jeqaykaptinna Benjamín trïbu runakuna täyanqan Gabaa marka ñöpanman chäyarqan. 15 Tsaymi nänipita yaqar patsakuyänanpä Gabaa markaman yaykuyarqan. Pipis mana patsatsiptinmi pläzallaman jamaykuyarqan.
16 Patsa tsakaykaptinnami chakracho arunqanpita kutir juk awkin runa päsaykarqan. Tsay awkinqa Efraín jallqakunapita karpis tsay witsan Gabaa markachönami taykarqan. Gabaa markachöqa Benjamín trïbu runakunami täyarqan. 17 Pläzacho jamaraykaq runata rikaykurmi awkinqa nirqan: “¿Maypitatä shamuykäyanki? ¿Maypatä aywaykäyanki?”
18 Leví trïbu runanami nirqan: “Judácho kaykaq Belénman aywanqäpitami kutiykämü. Wayï kaykan Efraín karu jallqakunachörämi. Tsaymi wayïpa kutikuykä. Pipis mana patsatsimaptinmi kayllacho jamaraykä. 19 Ashnükuna mikuyänanpä qewatapis päjatapis apaykämi. Kikïkunapäpis kaykanmi tantapis vïnupis. Manami imapis pishïyämantsu”.
20 Tsaynö niptinmi awkinqa nirqan: “Imanö kaptinpis manami kay pläzallachöqa waräyankimantsu. Wayïman aywakushun patsakuyänaykipä. Noqanami imata ministiyanqaykitapis kamaripäyäshayki”.
21 Tsaynö nirmi awkinqa wayinman pushaykur ashnunkunata qewata qararqan. Qorpankunanami chakinkunata mayllakuskir mikuyarqan y upuyarqan.
22 Kushishqa kaykäyaptinmi tsay markacho taq runakuna mana alli kar wayiman juntapaykuyarqan. Nirkurmi punkuta jinchi takakurnin awkinta niyarqan: “¡Wayikiman patsakamuq runakunata waqtaman qarqamuy! Tsay runakunata fuerzaytami munayä”.
23 Tsaymi wayiyuq yarquskir nirqan: “Taytakuna, wayïcho patsakushqa kaykaptinqa ama ari tsayta ruraykuyällaytsu. Tsayqa pasaypa penqakuypä jutsami kaykan. 24 Munayaptikiqa piwanpis manarä kakushqa warmi tsurïta y qorpäpa concubïna warminta jipipäyämushayki munayanqaykita rurayänaykipä. Kay runata itsanqa ama fuerzaykuyällaytsu”.
25 Tsay runakunaqa imata niptinpis awkinta manami cäsuyarqantsu. Tsaymi Leví trïbu runaqa concubïna warminta waqtaman qarqaparqan. Paytami runakuna warat fuerzarnin patsa waraskiptin jaqiskir aywakuyarqan. 26 Jaqiskiyaptinnami warmiqa runan patsaraykanqan wayi punkuman kutiykur wanuskirqan.
27 Aywakuyänanpä punkuta tutalla kichanqanchömi runaqa concubïna warminta tarirqan punku marcunman makin churashqa jitaraykaqta. 28 Tsaymi nirqan: “Sharkuy. Aywakushunna”.
Tsaynö niptinpis warminqa mananami parlarqannatsu. Tsaymi wanushqata ashnunman chaqnakurkur wayinman apakurqan.
29 Wayinman chaykatsirmi chunka ishkay pedäzuman roqurqan. Nirkurnami entëru Israel runakuna täyanqan kaqpa cada trïbuman juk pedäzuta apatsirqan. 30 Tsayta rikaykur warmita runakuna fuerzaypa wanutsiyanqanta musyarninmi llapanpis niyarqan: “Egiptupita yarqamunqantsikpita patsa manami imaypis wiyashqantsiktsu tsaynö jutsata rurayanqanta. Tsaynö rurayanqanpita imata ruranantsikpäpis shumaq yarpachakushun”.