4 Tsaymi wanuq warmipa runan nirqan: “Benjamín trïbu runakuna täyanqan Gabaa markamanmi patsakuyänäpä concubïna warmïwan chäyarqä. 5 Tsay paqasmi tsaycho taq runakuna wanutsimayta yarpar patsakuyanqä wayiman qorikäyämurqan. Mana yarquptïmi concubïna warmillätana fuerzarnin wanutsiyashqa. 6 Tsaynö pasaypa penqakuypä jutsata rurayanqanta musyayänaykipämi ayanta pedäzu pedäzu roquskir entëru Israel nacionpa apatsimushqä. 7 Llapantsikpis Israel runa kaykarqa kanan yarpachakushun imata ruranantsikpäpis”.

8 Tsaynö niptinmi llapan runakuna juk yarpaylla kar niyarqan: “Kayta manarä arreglarqa ni mayqantsikpis manami wayintsikman kutishwantsu. 9 Kananqa suertita jitashun Gabaa markata mayqan kaq trïbupis puntata atacananpä. 10 Tsaynöpis cada chunka runapita juk runata akrashun mikuyta qorir apapämänantsikpä. Nirkur Gabaaman aywashun Israel nacioncho penqakuypä jutsata rurayanqanpita tsay runakunata wanutsinantsikpä”.

11 Tsaynö nirmi Israel runakuna llapanpis tsay yarpaylla Gabaa markata atacayänanpä kayarqan. 12 Tsaymi Benjamín trïbu runakuna täyanqan partikunaman willakuqkunata Israel runakuna kachayarqan kaynö niyänanpä: “¿Imanirtä tsayläya jutsata qamkuna rurayashqayki? 13 Juklla entregayämay Gabaa markacho taq jutsasapa runakunata wanutsiyänäpä. Tsaynöparämi Israelcho jutsa ruraqkunata illakätsiyäshä”.

Israel runakuna tsaynö niyaptinpis Benjamín trïbu runakunaqa manami cäsuyarqantsu. 14 Tsaypa trokinqa Israel mayinkunawan guërrata rurayänanpä markankunapita aywarmi Gabaa markaman qorikäyarqan. 15 Guërraman aywayänanpä qorikaq Benjamín trïbu runakunaqa ishkay chunka soqta waranqami (26,000) kayarqan. Tsayqa karqan Gabaa markacho taq qanchis pachak (700) alli pelyay yachaq runakunata mana yupayllapami. 16 Tsaynöpis Benjamín trïbu runakunachöqa kayarqan qanchis pachak (700) runakunami itsuq kaq makinwan warakakuy yachaqkuna. Tsay runakunaqa juk aqtsallatapis mana fällaypami warakakuyaq. 17 Wakin trïbu Israel runakunanami guërracho pelyay yachaqllantä chusku pachak waranqa (400,000) qorikäyarqan.

18 Manarä guërraman aywarmi Israel runakuna Tayta Diosta tapukuyänanpä Bet-elman aywayarqan. Tsaychömi mayqan trïbu runakuna Benjamín trïbu runakunata puntata atacayänanpäpis tapukuyarqan. Tsaymi Tayta Dios nirqan Judá trïbu runakuna puntata atacayänanpä. 19 Tsaymi Israel runakunaqa tutalla aywar Gabaa markapa tsimpancho campamentunkunata shäritsiyarqan. 20 Nirkurnami tsay tsimpallanman guërracho pelyayänanpä churanakuyarqan. 21 Tsaynö kaykäyaptinmi Benjamín trïbu runakunaqa markapita yarqur Israel runakunata tsay junaq ishkay chunka ishkay waranqata (22,000) wanutsiyarqan.

22 Wanutsiyaptinpis Israel runakunaqa waraynin junaqmi shakyätsinakuyarqan pelyayanqan kaqman kutiykur Benjamín trïbu runakunawan yapay pelyayänanpä. 23 Manarä pelyarmi Bet-elman yapay aywaykur Tayta Diospa ñöpancho patsa tsakanqanyaq waqayarqan. Tsaychömi Tayta Diosta tapukurnin niyarqan: “¿Yapayku Benjamín trïbu Israel mayïkunawan pelyayäshä?”

Tsaynö tapukuyaptinmi Tayta Dios nirqan: “Yapay paykunata atacayay”.

24 Tsaynö niptinmi Benjamín trïbu runakunawan pelyayänanpä aywayarqan. 25 Atacayaptinmi Benjamín trïbu runakunaqa Gabaapita yapay yarqamur chunka puwaq waranqa (18,000) Israel runakunata wanutsiyarqan.

26 Tsaymi Israel runakunaqa Bet-elman yapay kutiykur Tayta Diospa ñöpancho llapanpis waqayarqan. Qoyat ayunarninmi rupatsina sacrificiukunata y alli päsakuy sacrificiukunata Tayta Diospä rupatsiyarqan. 27 Israel runakuna tsaynö Bet-elman aywayarqan Tayta Diospa Pactu Babulnin tsaycho kaptinmi. 28 Tsaynöpis Aarónpa willkan y Eleazarpa tsurin Fineesmi Tayta Diosta sirvir tsaycho kaykarqan. Tsaymi Israel runakuna tapukuyarqan: “Benjamín trïbu Israel mayïkunawan ¿yapayku pelyayäshä o manaku?” nir.

Tsaymi Tayta Dios nirqan: “Pelyayänaykipä yapay aywayay. Waraymi yanapayäshayki qamkuna vinciyänaykipä”.

29 Tsaynö niptinmi Israel runakunaqa aywar wakinkuna Gabaa marka ñöpankunapa pakakuyarqan. 30 Wakinkunami atacayänanpä puntata churanakuyanqannölla Gabaa tsimpanman yapay churanakuyarqan. Tsayqa pelyayta qallayanqanpita kimsa junaqchömi karqan. 31 Yapaymi Benjamín trïbu runakunaqa markapita yarqur Israel runakunata wanutsir qallaykuyarqan. Chakrakunapa y Gabaapita Bet-elman aywaq nänikunapa qatipar kimsa chunka (30) Israel runakunata wanutsirmi 32 Benjamín trïbu runakunaqa yarpäyarqan puntata vinciyanqannölla yapaypis vinciyanqanta. Israel runakunaqa karu niraqman qeshpiq tukuyarqan Benjamín trïbu runakuna qatipäyänanta munarmi.

33 Baal-tamar partiman chaykurnami Israel runakunaqa tikrapämur Benjamín trïbu runakunata atacayämurqan. Tsaynöllami Gabaa marka ñöpankunacho pakaraqkunapis yarqurnin markacho quëdaq runakunata atacayarqan. 34 Tsay atacaq runakunaqa chunka waranqa (10,000) alli chölu runakunami kayarqan. Tsay junaq pelyar pasaypa tsarapänakurnin Benjamín trïbu runakunaqa vincikäyänanpä kanqanta manami musyayarqantsu. 35 Tsaynöpami Israel runakunata Tayta Dios yanaparqan Benjamín trïbu runakunata vinciyänanpä. Tsay junaqmi Benjamín trïbu runakunata ishkay chunka pitsqa waranqa juk pachakta (25,100) wanutsiyarqan. Llapanpis tsay runakuna espädata alli manijaqmi kayarqan. 36 Tsaynö wanutsiyaptinmi Benjamín trïbu runakuna cuentata qokuyarqan pelyacho perdiyanqanta.

Benjamín trïbu runakunata tsaynö vinciyänanpä Israel runakuna paykunapita qeshpiq tukuyarqanmi. Benjamín trïbu runakuna paykunata qatipaykäyaptinnami Gabaa marka ñöpankunaman pakakuq runakuna 37 markaman illaqpita yaykur espädawan llapanta tsaycho kaqta wanutsiyarqan. 38 Manarä atacarmi Israel runakuna willanakuyarqan: “Wakinnintsik marka ñöpankunacho pakakunqantsikpita markaman yaykur wayikunata rupatsishun. Wakinnintsiknami markapita qoshni shäriykaqta rikar Benjamín trïbu runakunata tikrapar atacashun” nir.

39 Willanakuyanqannöllami wakin Israel runakuna qeshpiptin Benjamín trïbu runakuna qatipäyarqan. Qatiparnin kimsa chunkatanö (30) Israel runakunata wanutsirmi Benjamín trïbu runakuna kushikur niyarqan: “Puntata vincinqantsiknöllami kananpis vinciykantsik”.

40 Tsaynö nir qatipaykäyanqanchömi tikraykur rikayarqan qoshnipis ninapis lunyaypa lunyar markapita shäriykaqta. 41 Israel runakunapis tsayta rikaykur tikrapaptinmi Benjamín trïbu runakunaqa mantsakarnin ima ruraytapis kamäpakuyarqantsu. 42 Tsaymi tsunyaqman aywaq nänipa qeshpiyarqan. Nänipa qeshpiykaqtami Israel runakuna markapita yarqur wanutsiyarqan. 43 Tsaymi Benjamín trïbu runakunata tsapa tsapaykur Menúhapita Gabaa washaqninyaq Israel runakuna wanutsir ushayarqan.

44 Tsaynöpami Benjamín trïbu runakunata chunka puwaq waranqa (18,000) alli pelyay yachaq runakunata wanutsiyarqan. 45 Tsunyaq jirkacho kaykaq Rimón qaqaman qeshpiykaq runakunatapis pitsqa waranqatami (5,000) wanutsiyarqan. Tsaynöllami wakin runakunatapis hasta Gidomyaq qati qatiykur ishkay waranqata (2,000) wanutsiyarqan.

46 Tsay junaqmi Benjamín trïbu runakuna ishkay chunka pitsqa waranqa (25,000) mas allinnin pelyaq runakuna wanuyarqan. 47 Soqta pachakllanami (600) Benjamín trïbu runakunaqa Rimón qaqaman qeshpiykur chusku killa tsaycho täyarqan. 48 Israel runakunanami Benjamín trïbu runakuna täyanqan markakunaman aywar tsaycho kaykaq runakunatapis tariyanqan kaqta llapanta wanutsir ushayarqan. Tsaynöllami uywankunatapis wanutsirnin markankunatapis kayar ushayarqan.