4 Tsaypita waraynin tutanami altarta ruraskir rupatsina sacrificiukunata y alli päsakuy sacrificiukunata rupatsiyarqan. 5 Nirkurmi niyarqan: “Benjamín trïbu runakunawan manarä pelyar Mizpacho qorikashqa ¿mayqan marka runakunatä noqantsikwan qorikäyashqatsu?”

(Mizpachömi Israel runakunaqa Tayta Diospa jutincho jurar niyarqan mayqanpis tsayman mana qorikaq runakunata wanutsiyänanpä.)

6 Benjamín trïbu runakuna ushakäyanqanpita llakikurmi Israel runakuna niyarqan: “Kanan junaqmi Israelpita juk trïbu entëru ushakäyashqa. 7 Kawaykar quëdaq Benjamín trïbu runakuna warmiyuq kayänanpä ¿imatatä rurashwan? Noqantsikqa Tayta Diospa jutinchömi jurashqantsik warmi tsurintsikkunawan paykunata mana tätsinantsikpä”.

8 Tsaynö niskirninmi niyarqan: “Mizpacho sesionta rurashqa ¿mayqan marka runakunatä Tayta Diospa ñöpancho noqantsikwan qorikäyashqatsu?”

Tsaymi Jabes-galaadpita mayqanpis mana aywayanqanta yarpaskiyarqan. 9 Tsay sesioncho listata qayayaptinmi Jabes-galaadpita pipis contestarqantsu. 10 Tsaymi Israel runakunaqa chunka ishkay waranqa (12,000) allinnin soldädukunata Jabes-galaadman kachar niyarqan: “Jabes-galaadman aywar tsaycho kaq runakunata, warmikunata y wamrakunatapis espädawan llapanta wanutsiyämuy. 11 Piwanpis manarä kakushqa jipashkunata itsanqa ama wanutsiyankitsu”.

12 Tsaynö niyaptinmi Jabes-galaadman aywar llapanta wanutsir chusku pachakta (400) piwanpis manarä kakushqa jipashkunata tariyarqan. Tsay jipashkunatami Silo markacho kaykaq campamentuman apayarqan. Siluqa Canaánchömi kaykan.

13 Nirkurmi Rimón qaqacho kaykaq Benjamín trïbu runakunaman aywaykur Israel runakuna alli shimillankunapa niyarqan markankunaman kutiyänanpä. 14 Tsaymi markankunaman kutiyaptin Jabes-galaadpita apayanqan jipashkunata warminkunapä entregayarqan. Tsaypis manami llapan runakunapäqa ayparqantsu.

15 Benjamín trïbu runakunata wanutsiyänanpä Tayta Dios yanapaptin cäsi llapanta ushakaskatsirmi Israel runakuna pasaypa llakikuyarqan. 16 Tsaymi mayor runakuna niyarqan: “¿Imanöpatä warmita tarishun wakin Benjamín trïbu runakunapä? Paykuna castaqa warmikunapis chipyaqmi ushakäyashqa. 17 Wakin quëdaq Benjamín trïbu runakunapa tsurinkuna mana kaptinqa Israel runakunapita chipyaqmi illakanqa. 18 Tsaynö kaptinpis llapantsikmi Tayta Diospa jutincho jurar willanakushqantsik Benjamín trïbu runakunata warmi tsurintsikwan tätsirqa maldicionashqa kanantsikpä. Tsaymi warmi tsurintsikkunata entregashwantsu warminkuna kayänanpä”.

19 Tsaynö nikäyanqanchömi yarpaskiyarqan Silucho^† Tayta Diosta adorayänanpä jatun fiesta chaykämunqanta. Siluqa karqan Bet-elpita norti kaqläpa, Lebonapita sur kaqläpa y Bet-elpita Siquemman näni aywaqpa rupay yarqamunan kaqläpami. 20 Tsaymi warmiynaq kaq Benjamín trïbu runakunata mayor runakuna niyarqan: “Siluman aywar üva chakrakunaman pakakuykur 21 rikachakuqnölla shuyaräyanki. Silo marka jipashkuna tushuyta qallaykuyaptin cada ünuyki jukta apakurkur chaskiyanqayki herenciaykikunaman aywakuyanki. 22 Jipashpa maman o taytan o turinkuna noqakunaman quejakayämuptinqa kaynömi niyäshä: ‘Paykunata perdonaykuyällay ari. Jabes-galaadcho pelyayarnï noqakunaqa warmita manami llapanpäqa tariyashqätsu. Tsaynöpis paykunapa warminpä kikikikuna mana entregaykarqa jurashqa karpis manami jutsayuqtsu kayanki’ ”.

23 Israel mayor runakuna yätsiyanqannöllami Benjamín trïbu runakunaqa llapantapis rurayarqan. Tsaymi tushuykäyanqanman aywar cada ünun juk jipashta suwaskir warminpä apakuyarqan. Nirkurmi chakrankunaman kutirnin juchutsishqa kaykaq markankunata shärirkatsir tsaychöna täyarqan.

24 Tsaypitaqa Israel runakunapis juknin jukninmi kutikuyarqan trïbunkunaman, castankunaman y chakrankunamanpis.

25 Tsay witsanqa Israel runakunapa mandaqnin rey manami karqanrätsu. Tsaymi imatapis yarpäyanqanta rurakuyaq.^†