Gaza markacho Sansón kanqan
16
Juk kutichömi Sansón aywarqan filisteo runakunapa markan Gazaman. Tsaychömi prostitüta warmipa wayinman aywar paywan punurqan. 2 Markankunacho kaykanqanta musyarmi Gaza runakuna jiruruypa churanakur markaman yaykuna punkucho täpaqnö willanakuyarqan: “Patsa waraskiptinmi wanuratsishun” nir.3 Sansónqa pullan paqasyaq punuskir yarqunqanchömi tarirqan markaman yaykuna sawan punku wichqaraykaqta. Tsaymi punkuta jipiskir marcuntinta cerröjuntinta umrukurkur Hebrón tsimpan jirkanyaq aparqan.a
Dalilata Sansón kuyanqan
4 Tsaypita manarä unaytami Sansónqa Sorec pampacho taq Dalilatana kuyakurkurqan. 5 Tsayta musyaskirmi filisteo runakunapa mandaqninkuna Dalilata niyarqan: “Sansónpa kallpan imanö tsayjinanpa kanqanta y payta imanö vincinantsikpä kanqantapis musyanantsikpä kuyaqnölla tapumuy. Willayämaptikiqa imanöpapis prësu tsariykurmi watayäshä. Nirkur cada ünükunami juk waranqa juk pachak (1,100) siclo qellaytab pägayäshayki”.
6 Tsaymi Sansónta Dalila tapurqan: “¿Imanöpatä kallpayuq kanki? ¿Imawan watayäshuptikitä kallpaynaq tikrankiman?”
7 Sansónnami nirqan: “Flëchapä rurashqa qanchis manarä tsakiq awriwan watayämaptinmi kallpä manana kanmantsu. Tsaynöpami wakin runakunanöllana käman”.
8 Sansón ninqanta willaykuptinmi filisteo runakunapa mandaqninkuna payman apayarqan manarä tsakiq qanchis awrikunata. Tsaywanmi Sansónta Dalila watarqan. 9 Manarä watarmi Dalilaqa runakunata wayinman pakarqan. Tsaymi Sansónta wataskirnin jinchi nirqan: “¡Sansón, filisteo runakuna janaykichönami!”
Tsaynö niptinmi Sansónqa lliptashqa jïlutanö awrikunata rachiskirqan. Tsaymi filisteo runakunaqa musyayarqantsu imanöpa kallpan kanqantapis.
10 Nirkurnami Sansónta Dalila nirqan: “¡Imanirtä llullapämashqayki! Kananqa rasun kaqta willamay. ¿Imanö watayäshuptikitä qeshpinkimantsu?”
11 Tsaymi Sansón nirqan: “Manarä imatapis watayanqan mushuq waskakunawan watayämaptin kallpä manana kaptinmi wakin runanöllana kashä”.
12 Tsaymi Dalilaqa mushuq waskakunawan watarkur jinchi nirqan: “¡Sansón, filisteo runakuna janaykichönami!”
Tsay hörapis Dalilaqa runakunata wayinchömi pakaraykätsirqan. Filisteo runakuna janancho kanqanta niptinmi Sansónqa llanu jïluta rachiqnö waskakunatapis rachiskirqan.
13 Nirkurnami Sansónta Dalila yapay nirqan: “¡Yapaymi engañamar llullapämashqayki! Kananqa rasun kaqta willamay. ¿Imanö wataptïtä qeshpinkimantsu?”
Sansónnami nirqan: “Kallwawan awanqaykiman qanchis pillta aqtsäta shumaq awarkunki. Nirkurqa jawiraykaq estäcaman awata shumaq watanki”.
14 Tsaynö niptinmi estäcaman wataskir jinchi nirqan: “¡Sansón, filisteo runakuna janaykichönami!”
Tsaynö niptinmi Sansónqa punuykanqanpita shärir jawiraykaq estäcantinta telarta sutarirqan.
15 Tsaymi Dalila nirqan: “Rasun kaqta mana willaykämarqa ¿imanirtä ‘kuyämi wayllümi’ nimanki? Kimsa kutinami llullapämar willamankitsu imanöpa kallpayki tsayjinanpa kanqanta”.
16 Qoyay qoyay Dalila tsaynö tapupaptinmi Sansónqa wanuyparä llakikurqan. 17 Tsaymi Dalilata rasun kaqta willar nirqan: “Manarä yuriptïmi nazareo† kanäpä Tayta Dios akramashqa. Tsaymi llullu kanqäpita patsa aqtsäta pipis rutumashqatsu. Aqtsäta pipis rutuptinqa mananami kallpä kanqanatsu. Tsaymi wakin runakunanöllana kashä”.
18 Rasun kaqta willanqanta musyaskirmi filisteo runakunapa mandaqninkunaman Dalila willakatsirqan: “¡Kanan itsanqa llapayki shäyämuy! ¡Rasun kaqtami Sansón willamashqa!”
Tsaymi mandaqkuna awniyanqannölla qellayta apakurkur Dalilaman aywayarqan. 19 Nirkurnami millqaynincho Sansónta Dalila punukätsirqan. Punukaskiptinmi juk runata qayaskir Sansónpa qanchis pilltankunata ruturatsirqan. Tsaymi Sansón kallpaynaq tikraskiptin 20 jinchi nirqan: “¡Sansón, filisteo runakuna janaykichönami!”
Tsaymi Sansónqa rikchaskamur yarparqan imaypis salvakunqannölla salvakuyta. Manami musyarqantsu Tayta Dios manana yanapanqanta. 21 Tsaynami filisteo runakunaqa tsay höra Sansónta prësu tsariskir ñawinkunatapis oqtiskiyarqan. Gaza markaman prësu apaykurmi bronci cadënawan watayarqan carcelcho rumi mulinuta tumatsinanpä. 22 Tsaycho prësu kaykaptillanmi aqtsan yapay wiñarqan.
Sansón wanunqan
23 Tsaypitanami filisteo runakunapa mandaqninkuna qorikarnin diosninkuna Dagónpä sacrificiukunata rupatsiyarqan. Tsaycho kushikurmi tsay mandaqkuna niyarqan: “¡Contrantsik Sansóntami diosnintsik Dagón makintsikman churamushqa!”
24 Sansónta rikaykurmi diosninkunata alabar runakuna niyarqan: “¡Mikuynintsikta ushakätsiq y wanutsimaqnintsik Sansóntaqa diosnintsik Dagónmi makintsikman churamushqa!”
25 Tsaynö kushikurninmi niyarqan: “¡Sansónta pukllapänantsikpä carcelpita apayämuy!”
Tsaymi carcelpita apaykuyaptin pasaypa burlakurnin templu tukmaraq ishkay jorcun chawpinman ichitsiyarqan.
26 Tsaymi janchaqnin jövinta Sansón nirqan: “Templu tukmaraq columnakunata tukmakunäpä yatatsimay”.
27 Tsay hörami templu rurincho filisteo runakunapa mandaqninkunawan atska runakuna kaykäyarqan. Templu jananchönami Sansónta burlakuyanqanta rikäkur warmipis ollqupis kimsa waranqanö (3,000) kaykäyarqan.
28 Tsaymi Sansónqa Tayta Diosta mañakur nirqan: “Tayta Dios, kananllana kallpä yurinanpä yanapaykallämay. Tsaynöpami ishkan ñawïta jipiyanqanpita filisteo runakunata juklla ushakäratsishä”.
29 Tsaynö mañakuskirmi templuta tukmaraq ishkan columnakunaman tukmakurqan itsuq makinwan jukninman y derëcha kaq makinwan jukninman. 30 Nirkurmi jinchi nirqan: “¡Filisteo runakunawan juntu ushakäshä!”
Tsaynö nir llapan kallpanwan columnakunata tanqaskiptinmi templu juchur llapan runakunatawan mandaqninkunata ñitirqan. Filisteo runakunata ñöpata wanutsinqanpitapis tsay hörami mas atska runakunata Sansón wanutsirqan.
31 Tsaypitanami Sansónpa wawqinkunawan llapan castankuna aywar ayanta pampayänanpä apakuyarqan. Taytan Manoa pamparanqan kaqman apaykurmi Sansónta pampayarqan. Tsayqa Zora y Estaol markakuna chawpinchömi kaykan. Sansónqa Israel runakunapa juezninkuna karqan ishkay chunka (20) watami.