Tsaynö niptinmi suegrunqa yaykunanta mana munar 2 nirqan: “Noqaqa yarparqä tsurïta mana kuyarnin jaqirinqaykitami. Tsaymi jukwanna warmikita tätsishqä. Tsaynö kaptinpis qepa ñañan paypita mas kuyayllapämi kaykan. Mayor kaqpa trokin paywan täkuy”.

3 Tsaynö niptinmi Sansón nirqan: “Kananqa kikikikunami achäquita ashipäyämashqayki qamkunata y filisteo mayikikunata perjuiciuta ruranäpä”.

4 Tsaypita aywakurmi tsarirqan kimsa pachak (300) atuqkunata. Nirkurmi ishkay ishkay chupanpita shinriskir chupanman watarqan aceitiwan ushmashqa ratashta. 5 Ratashkunata tsariskatsir filisteo runakunapa chakrankunaman atuqkunata qarquskiptinmi ruparqan chakracho trïgu seganni kaykaqta, achushqa qoturaykaqta, üva chakrakunata y olïvus jachakunatapis.

6 Tsaynö rupanqanta rikaykurmi filisteo runakuna niyarqan: “¿Pitä kayta ruraykushqa?”

Tsaymi niyarqan: “Timna runapa mashan Sansónmi rupatsishqa juk runawan warminta suegrun tätsinqanpita”.

Tsaymi filisteo runakunaqa Sansónpa warminta taytantinta rupaskatsiyarqan. 7 Tsayta musyaskirmi filisteo runakunata Sansón nirqan: “Tsaynö rurayanqaykipita qamkunata mana ushakätsirqa manami jutïtapis aparäshätsu”.

8 Tsaynö nirmi pasaypa ajanarnin tsaytsika filisteo runakunata wanutsir usharqan. Nirkurnami Etam qaqacho kaykaq machayman taq aywakurqan.

9 Tsaymi filisteo runakuna Judá trïbu runakuna täyanqan partiman aywaykur campamentunkunata rurayarqan. Nirkurmi Lehi marka ñöpankunacho churanakuyarqan Israel runakunata atacayänanpä. 10 Tsaymi Judá trïbu runakuna tapur niyarqan: “¿Imanirtä atacayämaq shäyämushqayki?”

Filisteo runakunanami niyarqan: “Sansónta prësu tsariyänäpämi shayämushqä. Marka mayïkunata wanutsinqannömi kikintapis wanutsiyäshä”.

11 Tsaynö niyaptinmi kimsa waranqa (3,000) Judá trïbu runakuna Etam qaqacho kaykaq machayman aywayarqan. Chaykurmi Sansónta niyarqan: “¿Manaku musyanki filisteo runakuna mandamaqnintsik kayanqanta? ¿Imanirtä paykunata tsaynö ajanätsishqayki?”

Tsaynö niyaptinmi Sansón nirqan: “Paykuna rurayämanqannöllami noqapis rurashqä”.

12 Tsaymi Judá trïbu runakuna niyarqan: “Noqakuna shäyämushqä qamta prësu apaykur filisteo runakunaman entregayänäpämi”.

Sansónnami nirqan: “Prësu tsarimarpis itsanqa ama wanutsiyämaytsu”.

13 Tsaynö niptinmi niyarqan: “Manami wanutsiyäshaykitsu, tsaypa trokinqa filisteo runakunaman entregayänäpämi apayäshayki”.

Tsaynö nirmi ishkay mushuq waskawan wataskir pakaranqan machaypita Sansónta jipiyarqan.

14 Lehi markaman chätsiyaptinmi filisteo runakuna pasaypa kushikur taripäyarqan. Tsaymi tsay höra Tayta Diospa Espïritun yanapaptin Sansónqa wataraykanqan waskatapis rachirirqan lliptashqa jïlutanölla. 15 Nirkurmi ashnupa quijädan manarä shumaq tsakiqta jitaraykaqta aptaskir tsayllawan wanutsirqan juk waranqa (1,000) filisteo runakunata. 16 Nirkurmi nirqan:

17 Tsaynö nirmi aptaranqan quijädata jitaskirqan. Tsaypitami tsay partipa jutin kaykan Ramat-lehi.^a

18 Filisteo runakunata wanuskatsirmi Sansónqa pasaypa yakunar Tayta Diosta mañakurnin nirqan: “¿Tsaytsika runakunata wanutsinäpä yanapaykämarku yakunaypita wanunäta munaykanki? Wanunaykaqtachi mana yärakushuqniki runakuna tsariyämanqa”.

19 Tsaynö mañakuptinmi ukrucho yakuta Tayta Dios pashtatsimurqan. Tsayta upuskiptinmi Sansónpa kallpan yapay yuriskirqan. Tsaypitami Lehicho kaykaq yaku pashtaqta kananyaq reqiyan En-hacore jutiwan.^b

20 Ishkay chunka (20) watami Israel runakunapa jueznin Sansón karqan. Tsayqa karqan filisteo runakuna munayyuq kayanqan witsanmi.