Adivinanzata Sansón ninqan
14
Juk junaq Timnat markaman Sansón aywarmi filistea jipashta rikaykur pasaypa kuyakurkurqan. 2 Tsaymi wayinman kutiykur mamantawan taytanta nirqan: “Timnat markachömi kuyayllapä filistea jipashta rikashqä. Tsay jipashta warmïpä ashipäyämay”.3 Tsaynö niptinmi mamanwan taytan niyarqan: “¿Imanirtä filistea jipashta warmikipä munanki? Filisteo runakunaqa manami Tayta Diosman criyiyantsu. ¿Manaku Israel mayintsikcho jipashkuna kan?”
Tsaymi Sansón nirqan: “Tsay jipashtami kuyä. Warmïpä ashipäyämay”.
4 Sansónpa mamanwan taytanqa manami tantiyayarqantsu filisteo runakunata wajupänanpä Tayta Dios tsay yarpayta Sansónman churaykanqanta. Tsay witsanqa filisteo runakunapa munayninchömi Israel runakuna kayarqan.
5 Mamanwan y taytanwan Timnatman aywar üva chakrapa päsaykaptinmi Sansónta juk malta león qayararrä atacarqan. 6 Tayta Diospa Espïritun yanapaptinmi mallwa cabrata rachiqnö ishkayman rachiskirqan. Tsaynö wanutsinqanta manami mamanta ni taytanta willarqantsu. 7 Timnatman chaykurnami kuyanqan jipashwan parlar Sansón kushikurqan.
8 Markanman kutiskirnami juk ishkay junaqta Timnatman yapay aywarqan jipashta jipinanpä. Nänipa aywaykanqanchömi Sansónqa yaqarqan wanutsinqan leonta rikaq. Yaykurmi leonpa cuerpuncho tsaytsika abëjata y mishkinta tarirqan. 9 Tsay mishkita jipiskirmi mikuraykar aywarqan. Mamanta y taytanta taripaykur yawatsirpis manami willarqantsu maypita mishkita jipinqanta.
10 Timnatman chaykurnami Sansónpa taytan jipashpa wayinman aywarqan. Tsaychömi paykunapa costumbrinkunamannö majatsakay fiestata chölu mayinkunawan Sansón rurarqan. 11 Sansónta rikaykurmi filisteo runakuna kimsa chunka (30) chölukunata qayatsiyarqan paywan mikur upur kayänanpä. 12 Fiestaman chäyaptinmi tsay chölukunata Sansón nirqan: “Juk adivinanzata niyäshayki. Qanchis junaq fiesta kanqanyaq ninqäta adivinayaptikiqa cada ünuykitami fïnu lïnupita rurashqa latsapata y fiestaman aywayänaykipä latsapatapis qarayäshayki. 13 Mana adivinarmi itsanqa cada ünuyki fïnu lïnupita rurashqa latsapata y fiestaman aywanäpä latsapata qarayämanki”.
Paykunanami niyarqan: “Mä niyämay tsay adivinanzata”.
14 Tsaymi Sansón nirqan:
“¿Imatä imatä kallä?
Mikukuq kaptïpis noqachömi mikuy yurishqa.
Kallpayuq kaptïpis noqapitami mishkita jipishqa”.
Tsay adivinanza ima kanqanta kimsa junaqchöpis tsay chölukuna manami tantiyayarqantsu. 15 Chusku junaq kaqchönami Sansónpa warminta niyarqan: “Runayki Sansónta tapuy tsay adivinanza ima kanqantapis willayämänaykipä. Mana willayämaptikiqa taytaykita y wayincho kaqkunata llapaykitami rupatsiyäshayki. ¡Qamkunaqa kay fiestaman qayatsiyämashqayki imaynaqta jaqiyämänayki raykuqmi!”
16 Tsaynö niyaptinmi Sansónta waqaparnin warmin nirqan: “¡Manami kuyamankitsu! ¡Chikimankimi! Rasunpaypa kuyamarqa marka mayïkunata ninqayki adivinanzata willamankimanmi”.
Niptinmi Sansón nirqan: “Mamätapis taytätapis manami willashqätsu. ¿Tsaytsurä qamta willäman?”
17 Adivinanza ima kanqantapis mana willaptinmi warmiqa fiesta ushakanqanyaq qoyay qoyay waqaparqan. Kutin kutin tapupaptinmi fiesta ushay qanchis junaqcho ima kanqantapis änir Sansón willarqan. Willaykuptinmi warmin juklla aywarqan marka mayinkunata willananpä.
18 Tsaymi fiesta ushanan qanchis junaqchöqa rupay manarä jeqaptin filisteo chölukuna Sansónta niyarqan:
“Abëjapa mishkinpitaqa imapis manami mishkintsu.
Ni leonpita mas kallpayuqqa manami imapis kantsu”.
Sansónnami nirqan: “¡Ternëräta mana arutsirqa manami musyayankimantsu karqan!”
19 Tsaypitanami Tayta Diospa Espïritun yanapaptin Ascalón markaman aywaykur kimsa chunka (30) runakunata wanutsirqan. Tsay runakunapa latsapankunata apaykurmi adivinanza ima kanqantapis niq chölukunata qararqan. Tsaynö ruraskirnami pasaypa ajanashqa taytanpa wayinman kutikurqan. 20 Tsayyaqmi jipashpa taytanqa Sansónpa warminta tätsirqan tsay fiestaman aywaq chöluwan. Tsay chöluqa Sansónpa amïgunmi karqan.