Esterta reina kananpä churanqan
2
Ajanaynin qallquskiptinnami rey Asueruqa shonqunpis nanayparä warmin Vastipä yarpakurkurqan. Tsaynöpis yarpaskirqan ñöpanman mana kutinanpä juk leyta ruranqantami. 2 Tsaynö llakikunqanta musyaykurmi mandashiqninkuna niyarqan: “Vastipa trokinta akranaykipä maytsaypitapis qoritsimushun kuyayllapä piwanpis manarä kakushqa jipashkunata. 3 Cada mandanqayki provinciakunacho runakunata churashun tsay jipashkunata akraykur pushayämunanpä. Susaman chaykatsimur pushayätsun munaynikicho kaq warmikuna täyanqan palaciuman. Tsaycho täyaptinnami yärakunqayki eunucu Hegaipa makinman churashun wakin warmikikunata cuidanqannölla paykunatapis cuidananpä. Tsay jipashkuna mas kuyayllapä kayänanpä ima ministinqantapis Hegai kamaripätsun. 4 Paykunapitami mayqan jipashtapis kuyayllapä kaqta akranki Vastipa trokin reina kananpä”.Tsaynö niyaptinmi rey Asuero kushikur yätsiyanqannölla jipashkunata qoriyämunanpä nirqan.
5 Susa markachömi Israel runa Jairpa tsurin Mardoqueo täkurqan. Jairpa taytanmi Simei karqan. Simeipa taytanmi Cis karqan. Paykunaqa Benjamín trïbu runakunami kayarqan. 6 Mardoqueutami rey Nabucodonosor Jerusalénpita atska runakunatawan Babilonia nacionman prësu aparqan. Paykunatawanmi Judá nacionpa mandaqnin rey Jeconíastapis prësu apayarqan.
7 Mardoqueupami Hadasa jutiyuq prïma panin jipash karqan. Paypa jukaq jutinmi karqan Ester. Payqa kuyayllapä alli jipashmi karqan. Esterpa mamanwan taytan wanushqa kaptinmi Mardoqueuqa legitimakurnin tsurintanö wätakurqan.
8 Rey Asuero ninqannömi Susa markaman jipashkunata qoriskir reypa palaciunman apayarqan. Nirkurmi tsay jipashkunatawan Estertapis Hegaipa makinman churayarqan cuidananpä. 9 Esterwan yachanänakurmi Hegaiqa mas kuyayllapä kananpä ima ministinqankunatapis y alli mikuykunatapis kamariparqan. Nirkurmi Esterta shumaq atiendiyänanpä mas yärakunqan qanchis warmikunata ordenarqan. Tsay qanchis warmikunatawanmi Esterta pusharqan palaciucho kaykaq mas allinnin kaq cuartukunaman tsaycho täyänanpä. Tsay cuartukunaqa reypa warminkuna y concubïnankuna täyanqan palaciuchömi karqan.
10 Mardoqueo yätsinqannömi Israel warmi kanqanta Ester willakurqantsu.
11 Ester imanö kaykanqantapis musyananpämi warmikuna täyanqan palaciu patiu punkuman Mardoqueo aywaq.
12 Tsay palaciuchömi llapan jipashkunata kuyayllapä kayänanpä juk wata shumaq katsiyarqan. Tsaymi soqta killa mïrrawan tallushqa aceitiwan shupakuyaq. Tsaypitanami soqta killa mas crëmakunawan y perfümikunawanpis shupakuyaq. Tsaypita turnun töcaptinnami rey Asueruman aywayaq. 13 Täyanqan wayipita reypa palaciunman aywaptinmi mas shumaq kayänanpä latsapatapis y alhäjakunatapis kamaripaq.
14 Rey Asueruwan pununqanpita waraynin tutanami reypa concubïnankuna täyanqan kaq cuartukunamanna jipash aywaq. Tsaychömi Saasgaz jutiyuq eunucu runana paykunata cuidaq. Payqa rey yärakunqan runami karqan. Rey Asuero mana qayatsiptinqa tsaypita manami mayqan jipashpis kutiqtsu. Kuyanqan kaqllatami mayqan jipashtapis qayatsiq.
15 Tsaypitanami Mardoqueupa prïma panin Esterta töcarqan rey Asuerupa ñöpanman aywananpä. Esterqa Abihailpa tsurinmi karqan. Tsaynö töcaptinmi mas shumaq kananpä Esterqa jatikurqan eunucu Hegai yätsinqan kaqkunallata. Estertaqa alli jipash kaptinmi llapanpis kuyayaq. 16 Tsaymi qanchis watana rey kaykaptin chunka kaq killacho Esterta apayarqan rey Asuero kaqman. Tsay killapa jutinmi kaykan Tebet. 17 Esterta rikaykurmi rey Asueruqa pasaypa kuyakurkurqan. Paytanöqa manami mayqan jipashtapis kuyarqantsu. Tsaymi Estertana Vastipa trokin reina kananpä corönata jatitsirqan.
18 Reina kananpä Esterta churarmi rey Asueruqa fiestata rurarqan. Tsay fiestamanmi mandashiqninkunatapis qayatsirqan. Tsaynöllami mandanqan provinciakunacho impuestuta urätsirqan y atska qaraykunatapis runakunata aypurqan.
19 Concubïnankuna täkuyänan cuartukunacho täyänanpä jipashkunata pushaykanqan witsanmi reypa mandashiqninkuna jamaräyanqan punkucho Mardoqueo jamaraykarqan. 20 Mardoqueo yachatsinqannöllami Israel warmi kanqanta Ester willakurqantsu. Mardoqueupa makincho kaykar cäsukunqannöllami imaypis Esterqa payta cäsukuq.
Rey Asuerupa contran willanakuyanqanta Mardoqueo musyanqan
21 Juk junaqmi reypa mandashiqninkuna jamaräyanqan punkucho jamaraykar Mardoqueo wiyarqan rey Asueruta wanutsiyänanpä ishkay runakuna pasaypa ajanashqa willanakuykäyanqanta. Tsay runakunaqa Bigtawan Teresmi kayarqan. Paykunaqa tsay punkuta täpaq soldädukunapa capitanninkunami kayarqan. 22 Tsaynö willanakuyanqanta wiyaykurmi Mardoqueuqa Esterta willarqan. Tsaytanami Esterqa rey Asueruta willar nirqan: “Wanutsiyäshunaykipä willanakuykäyanqantami Mardoqueo willamashqa”.
23 Tsaynö willanakuyanqanta shumaq musyaskirnami rey Asuero tsay ishkay runakunata wanuskatsir ayankunata qeruman toqritsirqan. Nirkurmi Mardoqueo tsaynö willanqanta acta libruman qellqatsirqan.