Mardoqueuta Amán wanutsiyta munanqan
3
Tsaypitanami rey Asuero churarqan Hamedatapa tsurin Amánta mandanqan kaq provinciakunacho llapan mandaqkunapa mandaqnin kananpä. Amánqa Agag casta runami karqan.a 2 Tsaynö churarkurmi rey Asuero ordenarqan palaciucho aruqkuna qonqurikuykur y umpukuykur Amánta winchikuyänanpä. Tsaynö mandaykaptinpis Mardoqueuqa manami qonqurikurqantsu ni umpukurqantsu.3 Tsaymi palaciu punkucho aruqkuna Mardoqueuta tapur niyarqan: “¿Imanirtä rey Asuero ordenanqanta cäsukunkitsu?”
4 Qoyay qoyay niyaptinpis Mardoqueuqa manami Amánta winchikunanpä qonqurikurqantsu. Israel runa kanqanta Mardoqueo willaykuptinmi Amánman aywaykur willayarqan: “Mardoqueuqa Israel runa karshi winchikushunaykipä qonqurikuntsu” nir. Tsaynö willayarqan Amán imata rurananpä kanqantapis rikayta munarmi.
5 Mardoqueo mana qonqurikunqanta y mana umpukunqanta rikarmi Amánqa pasaypa ajanarqan. 6 Israel runa kanqanta musyaykurmi yarpachakur nirqan: “Kay runallata wanutsinäpa trokinqa llapan Israel casta kaqta maytsaychöpis rey Asuero mandanqan kaqcho wanutsishä”.
Israel runakunata wanutsiyänanpä ordinta maytsaypapis apatsinqan
7 Chunka ishkay watana rey Asuero mandaq kaykaptinmi punta kaq killab Amánpa ñöpancho suertita jitayarqan. Tsay suerti jitaypa jutinmi karqan Pur. Punta kaq killapa jutinnami karqan Nisán. Tsaynö sortiyayarqan mayqan junaqcho y mayqan killachöpis Amán yarpanqannö Israel runakunata wanutsiyänanpämi. Suertita jitayaptinmi chunka ishkay kaq killa kimsa kaq junaq yarqamurqan.c Chunka ishkay kaq killapa jutinmi karqan Adar.
8 Tsaymi Amánqa rey Asuero kaqman aywaykur nirqan: “Tayta rey, mandanqayki provinciakunachömi juk casta runakuna kayan wakin runakunawan mana takukaq. Paykunaqa kikinkunapa leyninkunallata cäsukurmi mandanqaykitapis cäsukuyantsu. Tsay casta runakunataqa llapanta wanutsishun. 9 Awniptikiqa tsay casta runakunata ushakätsinantsikpä maytsaymanpis ordinta apatsishun. Noqami gastukunapäqa kamarimushä kimsa pachak kimsa chunka waranqa (330,000) kïlu yuraq qellayta”.
10 Amán tsaynö niptinmi rey Asueruqa sellakunan sortïjanta jipiskir Israel runakunapa contran Amánta entregarqan paypa jutincho ordinta sellananpä. 11 Nirkurmi nirqan: “Kamarimunaykipä kaq yuraq qellaytaqa kikikipä churakuy. Tsay casta runakunataqa yarpanqaykinö ushakätsiy”.
12 Tsaymi punta kaq killa chunka kimsa kaq junaqchod rey Asuerupa secretariunkunata Amán qayaykatsir ordinta qellqatsirqan. Rey mandanqan provinciakunacho y markakunacho atska idiömata parlayaptinmi tsay ordinta qellqayarqan llapan idiömakunacho y runakuna imanöpis qellqayanqan estïluncho. Qellqaskatsirmi apatsirqan reyta mandashiqninkunapä, llapan provinciakunapa mandaqninkunapä y rey mandanqan nacionkunapa autoridäninkunapäpis. Ordincho ninqanta cumpliyänanpämi rey Asuerupa jutinta qellqaykur anïllunwan sellayarqan.
13 Tsay qellqayanqan ordintami maytsay mandanqan provinciakunaman apatsirqan. Tsay ordinchömi nirqan juk junaqllacho awkintapis, chölutapis, wamratapis, warmitapis llapan Israel runakunata wanutsiyänanpä. Tsaynöllami nirqan wanutsiyanqan Israel runakunapa llapan imaykantapis apakuyänanpä. Tsaynö wanutsiyänanpä jitapanqan junaqmi karqan chunka ishkay kaq killacho kimsa kaq junaq.e Tsay killapa jutinmi karqan Adar.
14 Tsay ninqanta cumpliyänanpämi maytsaymanpis ordinta apatsiyarqan. Tsaymi rey mandanqan llapan provinciakunacho y markakunachöpis musyayarqan. Tsaynöpami maytsaychöpis runakuna kamarikuyarqan jitapanqan junaq Israel runakunata wanutsiyänanpä.
15 Ordinta apayänanpä rey niptinmi mandanqan runakuna jinan höra aywayarqan. Tsaynöllami Susa markachöpis tsay ordincho ninqanta llapan runakuna musyaykur pasaypa mantsakäyarqan. Rey Asueruwan Amánmi itsanqa kushikurnin upyayarqan.