Israel runakunapa janan shärinanpä Esterta Mardoqueo rugakunqan
4
Tsay ordinta maytsaymanpis apayanqanta musyaykurmi Mardoqueo pasaypa llakikurnin latsapantapis rachir usharqan. Nirkurmi qachqa latsapata jatikurkur uchpata umanman wiñakur waqarnin cällikunapa purirqan. 2 Tsaynö waqaraykarmi reypa palaciun punkuyaq charqan. Tsaynö latsapashqa palaciuman pipis mana yaykuptinmi ruriyaqqa yaykurqantsu.3 Mardoqueo llakikunqannöllami maytsay provinciakunachöpis rey Asuero apatsinqan ordinta musyaykur Israel runakuna pasaypa llakikuyarqan. Tsaynö llakikur waqarmi qachqa latsapankuna jatishqa uchpa jananman jitakaykur ayunayarqan.
4 Esterpa wätaynin warmikuna y payta cuidaq eunucukunami Mardoqueuta rikayarqan qachqa latsapan jatishqa puriykaqta. Tsayta willayaptinmi reina Ester pasaypa llakikurnin latsapata apatsirqan Mardoqueo jatikunanpä. Tsaynö apatsiptinpis manami jatikuyta munarqantsu.
5 Tsaymi Atacta qayaykatsir Ester kacharqan Mardoqueo imanir tsaynö puriykanqanta tapunanpä. Hatacqa Esterta cuidaq wardiakunapa capitanninmi karqan. 6 Tsaymi reypa palaciu frentin kaq pläzaman Hatac aywarqan Mardoqueuwan parlananpä.
7 Hatac tapuptinmi Mardoqueo willarqan Israel runakunata maytsaychöpis ushakätsiyänanpä ordinta Amán apatsinqanta. Tsaynöpis willarqan gastukunapä ayka qellayta Amán kamaripänanpä ninqanta. 8 Nirkurmi Israel runakunata ushakätsiyänanpä kaq ordinta Ester liyinanpä Hatacta Mardoqueo apatsirqan. Entregaykurmi Hatacta nirqan: “Esterta niykullay Israel runakunata mana ushakätsiyänanpä rey Asueruman rugakuq aywananpä”.
9 Tsaymi Hatac kutiykur Esterta willarqan Mardoqueo ninqanta.
10 Tsaynö willaptinmi Hatacta Ester yapay kacharqan Mardoqueuta ninanpä: 11 “Rey Asuero mana qayatsiptinqa manami pipis palaciu ruricho kaq patiuman yaykuntsu paywan parlananpä. Mana qayaykätsiptin yaykuqtaqa warmitapis ollqutapis wanutsinmi. Tsaytaqa reypa yanapaqninkuna y provinciacho taq runakunapis musyayanmi. Wanunanta mana munar qori väranwan rey toqinqan kaqtami itsanqa pitapis wanutsintsu. Estertaqa juk killanashi qayatsishqatsu”.
12 Hatac tsaynö willaptinmi Mardoqueo 13 yätsirqan Esterta ninanpä: “Qampis Israel casta kaykarqa ama yarpaytsu reina kanqaykipita japallayki salvakunaykipä kanqanta. 14 Rey Asueruta mana rugakuptikiqa Israel runakunata salvananpä jukläpitami shamunqa. Noqantsiktami itsanqa llapantsikta ushakätsimäshun. Capazchi Israel runakunapa favornin rugakunaykipäpis reina kayman chashqayki”.
15 Tsaynö willaptinmi Esterqa Hatacta yapay kacharqan Mardoqueuta willananpä: 16 “Susa markacho taq llapan Israel runakunata qoriy kimsa junaq y kimsa paqas ayunayänaykipä. Tsaynöllami noqapis wätaynïkunawan ayunayäshä. Tsaypitanami mana aywanäpä ley niptinpis rey Asueruman aywashä. Wanutsimaptinqa jina wanutsishqachi kashä”.
17 Tsaymi Mardoqueuqa Ester ninqannölla llapanta rurarqan.