Rey Asuero kaqman Ester aywanqan
5
Tsaypita kimsa junaqtanami Esterqa reina kay latsapanta jatikurkur rey Asuerupa palaciun ruri kaq patiuman aywaykur rey qayananta shuyararqan. Tsay patiuqa rey jamaranqan trönun frentinchömi karqan.2 Ester ichiraykaqta rikaykurmi reyqa kushikur qori väranwan pay kaqpa toqirqan. Tsaymi yaykuskirnin väranpa puntanta juklla Ester yataykurqan. 3 Yataykuptinmi rey Asuero tapur nirqan: “Ester, ¿imatä kashqa? ¿Imallatatä ministiykanki? Mañakamaptikiqa hasta pullan mandanqä nacionkunacho mandayta munaptikipis awnishaykimi”.
4 Esternami nirqan: “Tayta rey, mikuy kusinatsinqäta mikunantsikpä Amánta pushakurkur shamuykuyällay”.
5 Tsaynö niptinmi wätayninta rey Asuero nirqan: “Ester inkitamanqanman aywayänäpä Amánta juklla ashimuy”.
Nirkurnami rey Asueruqa Amánwan aywayarqan Ester kusinatsinqan mikuyta mikuyänanpä. 6 Mikuykäyanqanchömi Esterta rey Asuero nirqan: “Mañakamanqaykitaqa imatapis kamaripäshaykimi. Hasta pullan mandanqä nacionkunata mandayta munaptikipis awnishaykimi”.
7 Esternami nirqan: 8 “Tayta rey, kuyamarqa mañakunqäta awniykallämay. Waraypis Amánwan kutiyämuy yapay kaycho mikunantsikpä. Tsaychönami imata munanqätapis mañakulläshayki”.
Mardoqueuta wanutsinanpä Amán kamarikunqan
9 Mikuyta ushaskirnami Amán pasaypa kushishqa yarqurqan. Tsay hörami Mardoqueuqa palaciu punkucho jamaraykarqan. Amán päsaykaqta rikarpis manami sharkurqantsu, ni winchikurqantsu. Tsaymi Amánqa pasaypa ajanarqan. 10 Ajanarpis Mardoqueuta manami imatapis nirqantsu.
Wayinman chaykurmi Amán qayatsirqan amïgunkunata y warmin Zeresta. 11 Tsaychömi parlarqan imaykayuq kanqanpita, wamrankuna atska kanqanpita y llapan mandashiqninkunapita mas alli rikashqa kananpä rey churanqanpitapis. 12 Nirkurmi mastapis nirqan: “Noqallatami reina Esterpis rey Asueruwan mikuq aywayänäpä qayatsimashqa. Tsaynöpis waray junaq yapay rey Asueruwan mikuq kutinäpämi nimashqa. 13 Tsaynö kaptinpis palaciu punkucho Israel runa Mardoqueo jamaraykaqta rikarmi shonqü pasaypa ajanan”.
14 Tsaynö niptinmi warmin Zeres y amïgunkunapis niyarqan: “Ishkay chunka ishkay (22) metrutanö qeruta jawitsiy. Nirkur waray tuta reyta mañakuy Mardoqueuta wanuskatsir ayanta tsayman toqritsinanpä. Tsaynö ruraskirmi itsanqa reina Ester kusinatsinqan mikuyta mikuq kushishqana aywanki”.
Paykuna tsaynö yätsiyaptinmi qeruta Amán jawitsirqan.