Amán yarpanqankuna mana kamakanqan
6
Tsay paqas rey Asuero punuyta mana tarirmi yanapaqninkunata nirqan mandanqan nacioncho ima päsanqantapis qellqayanqan libruta apaykamur liyipäyänanpä. 2 Tsaychömi qellqararqan palaciu punku täpaq Bigtawan Teres rey Asueruta wanutsiyänanpä willanakuyanqan. Tsaynöllami qellqararqan tsay willanakuyanqanta Mardoqueo willanqanpis. 3 Tsaynö ninqanta wiyarmi rey Asuero liyipaqninkunata tapurqan: “Mana wanutsiyämänanpä tsaynö willamanqanpita ¿ima recompensatatä Mardoqueo chaskishqa?”Tsaymi yanapaqninkuna niyarqan: “Taytay, manami ni imatapis chaskishqatsu”.
4 Tsaynö parlaykäyaptinmi palaciu patiuman Amán charqan. Tsay patiuläpami reypa cuartunkuna karqan. Tsaymanmi Amán charqan Mardoqueuta jinan höra wanuskatsir jawitsinqan qeruman ayanta toqritsinanpä ordin jipiq.
Tsaymi yanapaqninkunata rey Asuero nirqan: “¿Pitä patiucho puriykan?”
5 Yanapaqninkunanami niyarqan: “Taytay, Amánmi tsaycho puriykan”.
Tsaymi rey nirqan: “Kayman yaykamunanpä niyay”.
6 Amán yaykuskiptinmi rey Asuero tapur nirqan: “¿Imatatä rurashun alliman churayta munanqä runata?”
Tsaynö niptinmi Amán yarpachakurqan: “Noqata alliman mana churamarqa ¿pitatä alliman churanman?” nir.
7 Tsaynö yarparmi nirqan: “Tsay runapäqa 8 juk tünicaykita y muntakunqayki cawalluta apayämutsun. Cawallupa umanmanpis corönata jatitsiyätsun. 9 Tsay alliman churanqayki runataqa mandanqaykicho mas respitashqa kaq runa tünicaykita jatitsitsun. Jatirkatsirna tsay cawalluman muntarkatsir pläzapa puritsir niyätsun: ‘¡Kaynömi puritsiyä rey alliman churanqan runata!’ ”
10 Tsaynö niptinmi Amánta rey Asuero nirqan: “Ninqaykinölla palaciu punkucho jamaraykaq Mardoqueuta tünicäta jatirkatsir y cawallüman muntarkatsir puritsimuy. Ninqaykinölla mana qonqaypa llapanta juklla ruray”.
11 Tsaynö niptin aywarmi reypa tünicanta Mardoqueuta jatitsirqan. Nirkurmi cawalluman muntarkatsir pläzapa Amán puritsirqan: “¡Kaynömi puritsiyä rey alliman churanqan runata!” niraykar.
12 Tsaynö purirkatsiptinmi palaciu punkuman Mardoqueo kutirqan. Amánnami pasaypa penqakushqa jinan höra wayinpa llakishqa aywakurqan. 13 Wayinchönami warmintapis amïgunkunatapis llapan päsanqankunata willarqan. Willaptinmi niyarqan: “Israel runa kaptinmi Mardoqueutaqa wanutsiyta kamäpakunkitsu. Payta wanutsiyta munaptikiqa kikikitami tikrapäshurniki wanutsishunki”.
14 Parlayta manarä ushaptinmi rey Asuerupa wätayninkuna chäyarqan Ester kusinatsinqan mikuyta mikuq aywananpä Amánta qayaq.