3 Kimsa wata mandaq kaykarmi fiestata rey Asuero ruratsirqan llapan mandashiqninkunapä, Persiacho y Mediacho soldädukunapa capitanninkunapä y provinciakunapa autoridäninkunapäpis. 4 Tsay fiestatami soqta killantin ruratsirqan pasaypa imaykayuq y munayyuq kanqanta runakuna musyayänanpä.

5 Fiesta rurayta ushaskirnami Susa markacho taq runakunatana rey Asuero qayatsirqan palaciunpa patiuncho qanchis junaq fiestata rurar mikuyänanpä. Tsaymi imaykayuqpis imaynaqpis tsayman aywayarqan. 6 Palaciupa patiunchömi juk ramädata yuraq y azul fïnu toldukunawan qatayarqan. Lïnupita rurashqa granäti cordonkunawanmi tsay toldukuna watararqan yuraq qellaypita rurashqa argöllakunaman. Tsay argöllakunami marmolpita^a rurashqa paradorkunacho laqaräyarqan. Tsaynöllami qoripita y qellaypita rurashqa kuyayllapä bancakunapis tsaycho karqan. Tsay patiupa pïsunmi adornararqan kuyayllapä läja rumikunawan, pórfido rumikunawan y yuraq y yana marmolkunawan.

7 Rey Asueruqa vïnutapis jina jinami qoripita rurashqa cöpakunawan qarakatsirqan. Cada cöpami juk niraq juk niraq rurashqa karqan. 8 Vïnu qarakuqkunatami rey Asuero nirqan upuyta mana munaq kaqtaqa pitapis mana obligayänanpä, sinöqa upuyta munaq kaqlla upuyänanpä.

9 Tsay qayatsinqan runakunapa warminkunapämi reina Vastipis mikuyta kusinatsirqan. Paykunaqa rey Asuerupa palaciun rurinchönami mikuyarqan.

10 Fiesta qallaykunqanpita qanchis junaqtami rey Asuero shinkatashqa kar yärakunqan kaq qanchis eunucu runakunata qayatsirqan. Paykunami kayarqan Mehumán, Bizta, Harbona, Bigtán, Abagta, Zetar y Carcas. 11 Chaykuyaptinmi tsay runakunata kacharqan warmin Vastita corönan jatishqata pushayämunanpä. Vasti kuyayllapä kanqanta común runakunapis y autoridäkunapis rikayänanpämi tsayman pushayänanpä nirqan.

12 Pushayänanpä qanchis eunucu runakunata rey kachaykaptinpis Vastiqa manami aywayta munarqantsu. Aywayta mana munanqanta willayaptinmi rey Asueruqa pasaypa ajanarqan.

13 Tsay witsanmi imapis kaptin ley yachaqkuna reyta imaypis yätsiyaq. Tsaymi paykunata rey qayatsirqan imata rurananpä kanqantapis tantiyatsiyänanpä. 14 Ley yachaq runakunacho rey Asuerupa mas amïgunkunami kayarqan Carsena, Setar, Admata, Tarsis, Meres, Marsena y Memucán. Tsay runakunaqa Persiacho y Mediacho respitashqa runakunami kayarqan. Paykunami reypa yätsiqninkuna y mandashiqnin autoridäninkuna kayarqan. 15 Paykunata tapurmi rey Asuero nirqan: “Kachanqä eunucu runakunawan qayaykätsiptï Vasti manami cäsumashqatsu. ¿Imata ruranäpätä ley nikan?”

16 Tsaymi mandashiqnin autoridäkunapa ñöpancho rey Asueruta Memucán nirqan: “Tayta rey, warmiki Vasti manami qamllatatsu penqakuyman churashushqayki, sinöqa mana cäsushurniki maytsaycho mandar yanapashuqnikikunatapis y mandanqayki provinciakunacho taq runakunatapis manakaqmanmi churashqa. 17 Reina Vasti ruranqanta wakin warmikuna musyaykurqa paykunapis tsaynömi runankunata cäsuyanqatsu. Mana cäsurmi niyanqa: ‘Rey Asuero qayatsiptinpis reina Vasti manashi aywanätsu’. 18 Persiacho y Mediacho mandar yanapashuqniki autoridäkunapa warminkunapis reina Vasti tsaynö ruranqanta musyaykurqa runankunata mananami cäsuyanqatsu. Tsaynö ruraptinqa rimanakullarmi kawayanqa.

19 “Tayta rey, tsaynö mana kananpä juk leyta rurashun mandanqayki kaqchöqa llapanpis cumpliyänanpä. Tsay leyta imaypis cumpliyänanpä Persiacho y Mediacho kaq wakin leykuna qellqaranqan librucho qellqashqa katsun. Tsay ley katsun warmiki Vasti imaypis ñöpaykiman mana kutimunanpä y mas cäsukuq kaq alli warmina paypa trokin reina kananpä. 20 Tsay leyta maytsaychöpis mandanqayki kaqcho musyatsishun. Musyarmi warmikuna mantsapakur runanta imaykayuq o muchuq kaptinpis respitayanqa”.

21 Memucán tsaynö niptinmi rey Asuero y yanapaqninkunapis “tsay ninqaykiqa allimi kaykan” niyarqan. Tsaymi tsay yätsinqannölla llapanta qellqaykur 22 ordinta apatsirqan mandanqan maytsay provinciakunaman. Tsay ordin qellqararqan kikinkunapa idiömankunacho y imanöpis qellqayanqan estïlunchömi. Tsay ordinmi nirqan llapan runakuna warminta munaynincho tsararäyänanpä.