ïdulu Ïdulukunaqa qoripita, qellaypita, rumipita o qerupita rurashqami kayarqan. Wakin ïdulu kayarqan runa niraq y wakinnami kayarqan uywa niraq. Wakin runakunaqa Tayta Diosnintsikta adorayänanpa trokinmi ïdulukunata adorayaq. Tsay runakunaqa yarpäyarqan ïdulupa jutincho uywata pishtayaptin yanapananpä kanqantami. Tsaynöllami ïdulupa jutincho fiestata rurar tsay aytsata mikuyaq (Hech. 7.41; 1Cor. 8.1-13).

iglesia Iglesiaqa manami Diosta alabana wayillatsu, sinöqa Jesucristuman yärakuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).

impuestu; impuestu cobraq Impuestuqa autoridäkunata runakuna pägayanqan qellaymi kaykan. Jesucristo kawanqan witsan Israel runakuna Roma nacionpa munayninchömi kayarqan. Tsaymi Roma autoridäkuna Israel runakunata churayarqan marka mayinkunata impuestuta cobrayänanpä. Pägayta mana munaq kaqtaqa Roma soldädukunawanmi amälas cobratsiyaq. Tsaymi impuestu cobraqkunata Israel marka mayinkuna pasaypa chikir “jutsasapakuna” niyaq. Discïpulun kananpä Jesucristo manarä qayaptin Mateupis impuestu cobraqmi karqan (Mat. 9.9-13; 22.15-22; Luc. 15.1).

impüru Liyinki pürupita tantiyatsikuyta.

isla Islaqa lamar chawpincho tsaki allpami kaykan. Wakin islakunachöqa markakunapis kaykanmi. Islakunamanmi apóstol Pablupis büquiwan charqan Jesucristupa alli willakuyninta willakunanpä (Sal. 72.10; Hech. 13.4).

Israel runakuna Israel runakunaqa Abrahampa willkan Jacobpita aywaraqkunami kaykäyan. Jacobpa jukaq jutinmi karqan Israel (Gén. 32.28). Tsaymi paypita aywaraqkunaqa Israel runakuna kaykäyan. Israel runakunawanmi Tayta Diosnintsik conträtuta rurarqan yanapananpä (Gén. 17.3-8). Tsaymi mandamientunkunata Moisésta qorqan Israel runakunata tantiyatsinanpä (Éxo. 20.1—23.19; 25.1—31.18). Jesucristupis Israel runami karqan.