Esaúwan tinkuyänanpä Jacob kamarikunqan
32
(2) Tsaypita aywakuptinmi Tayta Diospa angelninkuna Jacobwan tinkuq aywayarqan. 2 (3) Angelkunata rikaykurmi Jacob nirqan: “Kayqa Tayta Diospa soldädunkunapa campamentunmi”.Tsaynö nirmi tsay partipa jutinta churarqan Mahanaima jutin kananpä.
3 (4) Tsaypitanami willakuqninkunata Jacob kacharqan kutiykanqanta wawqin Esaúta willayänanpä. Esaúqa tarqan Seircho kaykaq Edomchömi. 4 (5) Manarä kacharmi tsay willakuqninkunata yätsirqan kaynö niyänanpä: “Tayta Esaú, wawqiki Jacobmi nin: ‘Aywakunqä junaqpita patsami Labánpa makincho tashqä. 5 (6) Kananqa kannami wäkäkuna, ashnükuna, üshäkuna y cabräkunapis. Tsaynöllami ollqupis warmipis wätaynïkuna kaykäyan. Tsaynö willakatsimü kuyapämänaykipämi’ ”.
6 (7) Kachanqan willakuqninkuna kutimurnami Jacobta niyarqan: “Wawqiki Esaúta willayanqäpitanami kutiyämushqä. Chaskishunaykipämi chusku pachak (400) runakunata pushakurkur shamuykan”.
7 (8) Tsaynö willayaptinmi Jacobqa pasaypa mantsarirnin yarpachakurqan. Tsaymi paywan kaykaq runakunata ishkay grüpuman rakirqan. Tsaynöllami ishkay manädaman üshankunata, cabrankunata, wäkankunata y camëllunkunatapis rakirqan. 8 (9) Jacob tsaynö rurarqan Esaú jukaq grüputa atacaptin jukaq grüpullapis qeshpiyänanpä kanqanta yarparmi.
9 (10) Tsaynö ruraskirnami Tayta Diosta mañakur nirqan: “Awilü Abrahamwan taytä Isaac yärakunqan Tayta Dios, kikikimi nimarqayki castäkuna täyanqan partiman kutikamunäpä. Tsaynöllami nimarqayki yanapamänaykipä kanqanta. 10 (11) Mana cäsukuq kaptïpis kuyapämarmi yanapamashqayki. Kaypita aywakur Jordán mayuta tukrü aptashqallami päsarqä. Kananqa uywäkuna y noqawan aywaqkuna ishkay grüpuman rakinäpäpis aypannami. 11 (12) Taytay, wawqï Esaúpita salvaykallämay. Pasaypami mantsarï warmïkunata wamräkunatawan juntu wanutsimänanpä kanqanta yarpar. 12 (13) Taytay, qammi nimarqayki yanapamänaykipä kanqanta. Tsaynöllami nimarqayki lamar kuchuncho yupaytapis mana atipaypä aqushanörä noqapita aywaraqkunapis kayänanpä kanqanta”.†
13 (14) Tsay paqas tsayllachömi Jacob punurqan. Patsa waraskiptinnami uywankunapita rakirqan wawqin Esaúta qarananpä. 14 (15) Wawqinpä rakinqan uywakunami karqan ishkay pachak (200) cabrakuna, ishkay chunka (20) chïvukuna, ishkay pachak (200) üshakuna, ishkay chunka (20) carnërukuna, 15 (16) kimsa chunka (30) camëllukuna wawankunantin, chusku chunka (40) wäkakuna, chunka torïtukuna, ishkay chunka (20) china ashnukuna y chunka orqu ashnukunapis. 16 (17) Tsaynö rakiskirmi uywakunata qatiyänanpä wätayninkunata nirqan: “Rakinqä uywakunata karu karu qatikurkur puntayay”.
17 (18) Punta qatiq kaqta yachatsirmi nirqan: “Capazchi Esaú tapushunkiman: ‘¿Pitä patronniki? ¿Maypatä aywaykanki? ¿Pipa uywantatä qatiykanki?’ 18 (19) Tsaynö tapushuptiki ninki: ‘Tayta Esaú, wawqiki Jacobmi kay uywakunata qampä qatiykätsiman. Qepatami kikinqa shamuykan’ ”.
19 (20) Punta aywaq wätayninta yachatsinqannöllami wakin kaq wätayninkunatapis Jacob yachatsirqan.
20 (21) Jacobmi yarparqan apatsinqan uywakunata rikaykur wawqin Esaúpa ajanaynin qallquptin kushishqawanna tinkunanpä kanqanta. Tsaynöllami wätayninkunata Jacob yätsirqan Esaúwan tinkur “qepatami Jacob shamuykan” niyänanpä.
21 (22) Tsaymi Esaúta qarananpä rakinqan uywakunata puntanta qatitsirqan. Despachaskirnami Jacobqa patsakunqan kaqllacho quëdakurqan.
Angelwan Jacob pelyayanqan
22 (23) Tsay paqasmi Jacobqa ishkan warminkunata, ishkay wätaynin warminkunata y chunka juk tsurinkunata Jaboc mayu vädupa tsimpatsirqan. 23 (24) Tsaynöllami llapan imaykantapis tsimpatsirqan. 24 (25) Nirkurmi kikillanna quëdakurqan. Tsay paqasmi Jacobwan juk runa warat pelyayarqan. 25 (26) Jacobta imanöpapis vinciyta mana kamäpakurmi tseqllaman tinkuq raku chanka moqunta moqaskatsirqan. 26 (27) Tsay runanami Jacobta nirqan: “Patsa waraykannami. ¡Kachämayna!”
Tsaynö niptinmi Jacob nirqan: “Bendicionta manarä qomaptikiqa manami kachäshaykitsu”.
27 (28) Tsaymi Jacobta tapurqan: “¿Imatä jutiki?”
Tsaymi nirqan: “Noqapa jutï Jacobmi”.
28 (29) Tsay runanami nirqan: “Kananpitaqa manami Jacobnatsu jutiki kanqa, sinöqa Israelnami.b Tsaynö jutiki kanqa Dioswanpis runakunawanpis pelyarnin vincinqaykipitami”.†
29 (30) Nirkurnami Jacob tapurqan: “Taytay, qampaqa ¿imatä jutiki?”
Tsaynö tapuptinmi tsay runa nirqan: “¿Imapätä jutïta tapumanki?”
Nirkurnami Jacobta bendisarqan.
30 (31) Aywakuptinnami Jacob nirqan: “Tayta Dioswanmi urku urku tinkushqä. Tsaynö tinkuykarpis manami wanushqätsu”.
Nirkurmi tsay partipa jutinta churarqan Peniel kananpä.c 31 (32) Peniel partipita Jacob aywaykaptinmi rupay yarqamurqan. Raku chankan moqashqa kaptinmi weqruyllapa aywaykarqan. 32 (33) Tsaynö moqatsishqa kaptinmi Israel runakunaqa uywata pishtar kananyaqpis tseqllanman tinkuq anku aytsanta mikuyantsu.