Wawqin Esaúwan Jacob tinkunqan
33
Chusku pachak (400) runakunawan Esaú yaykuykaqta rikaykurmi tsurinkunata Jacob rakirqan wakinta Leawan aywayänanpä, wakinta Raquelwan aywayänanpä, wakinta Bilhawan aywayänanpä y wakintana Zilpawan aywayänanpä. 2 Ñöpata aywayänanpämi ishkay wätaynin warminkunata wawankunatawan kacharqan. Paykunapa qepanta aywayänanpämi Leatapis wamrantinta kacharqan. Tsaypita mas qepanta aywayänanpänami Raquelta wamran Josétawan kacharqan. 3 Jacobnami paykunapa puntanta aywarqan. Wawqinpa ñöpanman chanqanyaqmi qanchis kuti qonqurikuraykar aywarqan. 4 Tsaynö aywaykaptinmi wawqin Esaúqa cörrilla aywaykur makallakurkur mutsarqan. Tsaymi ishkan makallanakurkur waqayarqan.5 Warmikunata y wamrakunata rikaykurmi Esaúqa tapurqan: “¿Pitä paykunaqa?”
Tsaynö tapuptinmi Jacob nirqan: “Papä, Tayta Dios qaramanqan wamräkunami kaykäyan”.
6 Nirkurnami Jacobpa wätaynin ishkan warminkuna wawankunawan witiyarqan. Paykunapis Esaúta respitarmi urkunkunapis patsaman töpanqanyaq qonqurikuyarqan. 7 Tsaynöllami Leapis chaykur wawankunawan Esaúpa ñöpanman qonqurikuyarqan. Tsaypitanami Raquelpis chaykur wawan Joséwan Esaúpa ñöpanman qonqurikuyarqan.
8 Tsaypitanami Esaú nirqan: “¿Wawqi, imanirtä atska atskaman uywaykikunata rakiykur qatiykätsimunki?”
Tsaynö niptinnami Jacob nirqan: “Papä, wallkallatapis qampämi qatitsimushqä”.
9 Esaúnami nirqan: “Wawqi, noqapapis atskami uywäkuna. Qaramänaykipä kaq kikikipä kakutsun”.
10 Tsaynö niptinnami Jacob nirqan: “Papä, qaranäpä qatitsimunqä uywakunata chaskiykallämay. Chaskimaptikimi musyashä alli shonquykiwan chaskimanqaykita. Alli chaskimanqaykipitami Tayta Diosta rikaqnörä kushishqa kaykä. 11 Qampä apamunqä uywakunata chaskiykallämay. Tayta Dios yanapamaptinmi imaykayuq kaykä”.
Jacob kutin kutin rugaptinmi Esaúqa qaranqan uywakunata chaskirqan.
12 Chaskiskirnami Esaúqa nirqan: “Aywakushunna. Noqa aywashä qamkunapa puntaykikunata”.
13 Jacobnami nirqan: “Rikanqaykinöpis wamräkuna pishillarämi y uywäkunapis wawayuqmi kaykäyan. Juk junaqllacho qatiptïqa üshäkuna y cabräkuna capazchi pishipar wanuyanmanpis. 14 Papä, mas allimi kanman puntakuptiki. Noqaqa uywäkuna y wamräkuna japayanqan päsullamanmi shamushä tanqayki Seirman chäyämunqäyaq”.
15 Tsaynö niptinmi Esaúpis nirqan: “Tsaynö kaptinqa wakin pushamunqä runakunata jaqipäshayki yanapayäshunaykipä”.
Tsaynö niptinnami Jacob nirqan: “Papä, ama yarpachakuytsu. Alli chaskimanqaykillawanmi kushishqa kaykä”.
16 Tsay junaqllami Esaúqa Seirman kutikurqan. 17 Jacobnami Sucotman aywarqan. Tsaycho täyänanpä wayita ruraskirmi uywankunapäpis ramädakunata rurarqan. Tsay partipa jutintanami churarqan Sucota jutin kananpä.
18 Tsaynöpami Padan-arampita kutimur Canaánman yamaylla chäyarqan. Siquem marka wak tsimpanman chaykurmi patsakuyarqan. 19 Tsay patsakuyanqan sitiutami Jacob rantirqan juk pachak (100) qellaywan Hamor runapa tsurinkunapita. Hamorpa jukaq tsurinpa jutinmi karqan Siquem.† 20 Tsaychömi altarta Jacob pirqarkur jutinta churarqan El-Elohe-Israelb jutin kananpä.