5 Jacobnami musyaskirqan tsurin Dinata Siquem fuerzanqanta. Tsaynö musyaykarpis tsurinkuna uywankunawan jirkacho kaptinmi paykuna kutiyämunqanyaq upälla kakurqan. 6 Tsayyaqmi Siquempa taytan Hamor aywarqan Jacobwan parlananpä. 7 Jacobpa tsurinkuna jallqapita kutiskamurmi musyayarqan paninta Siquem fuerzanqanta. Tsayta musyaykurmi pasaypa rabyakuyarqan. Tsaynö fuerzanqan pasaypa penqakuypämi karqan. Tsaytaqa imaypis manami ruranmantsu karqan.

8 Tsaymi paykunawan parlar Hamor nirqan: “Tsurï Siquemmi panikikunapä pasaypa turbashqa puriykan. Tsaymi shamushqä tsurïwan panikita tätsinantsikpä. 9 Tsaynöpami compädrita rurar juk castanöllana kashun. Tsaymi tsurïkunapis qamkunapa warmi tsurikikunawan täyanqa y qamkunapapis noqakunapawan täyanqa. 10 Tsaynöpami kayllachöna täkushun. Täyänaykipä munayanqaykita maynintapis akrakuyay. Tsaynölla ima negociullatapis rurayay. Chakratapis kikikikunapana kananpä rantiyay”.

11 Tsaynöllami Siquempis Dinapa taytantawan turinkunata nirqan: “Taytakuna, panikita awniykayällämay. Awniyämaptikiqa imatapis munayanqaykitami qarayäshayki. 12 Panikita awniyämaptikiqa costumbrintsikpita masta mañayämaptikipis pägayäshaykimi. Imaykanöpapis panikita awniyämänaykitami munä”.

13 Tsaynö niptinmi paninta fuerzanqanpita Jacobpa tsurinkuna pasaypa rabyashqa kar Siquemtawan taytan Hamorta janan shonqulla awniyarqan. 14 Tsaymi niyarqan: “Noqakunaqa manami panïta awnikuyämantsu señalakunni runataqa. Señalakunni runa mashäkuna karqa penqakuypämi kanman. 15 Noqakuna señalakushqa kayanqänö qamkunapis llapan ollqu kaqkuna señalakuyaptikiqa panïwan tänaykipä awniyäshaykimi. 16 Señalakuyaptikiqa tsurikikunatapis warmi tsurïkunawan tätsishunmi. Tsaynöllami warmi tsurikikunawan tsurïkunatapis tätsishun. Tsaynöpami llapantsikpis tsay castanölla kashun. 17 Niyanqänö mana señalakuyaptikiqa panïta pushakurkurmi aywakuyäshä”.

18 Tsaynö niyaptinmi Hamorwan tsurin Siquem paykuna niyanqannö señalakuyänanpä awniyarqan. 19 Tsaypita aywakurmi Dinata kuyarnin Siquemqa cuerpunta juklla señalakurqan. Payqa taytanpa castancho mas respitädu chölumi karqan. 20 Nirkurmi taytan Hamorwan marka yaykuna punkuman aywayarqan. Tsaychömi runakunata niyarqan: 21 “Jacob casta runakunaqa alli runami kayan. Paykuna kaycho täyänanpä jallqantsikkunapis chakrantsikkunapis jäkuykanmi. Tsaynö kaykaptinqa kaycho täkur ima negociutapis rurayätsun. Tsaynöpami warmi tsurinkunawan tsurintsikkuna täyanqa. Warmi tsurinkunana tsurintsikkunawan täyanqa. 22 Tsaynö kaptinpis tsay castanölla kanantsikpämi paykuna señalakushqa kayanqannö noqantsikpis ollqu kaqkuna señalakunantsikta munayan. 23 Paykuna niyanqanta awnishqami noqantsikwan quëdayanqa. Tsaynöpami llapan imaykankunapis uywankunapis noqantsikpana kanqa”.

24 Tsaynö niptinmi tsaycho qorikaq runakuna awniyarqan Hamorwan Siquem niyanqanta. Tsaymi llapan ollqu kaqkuna cuerpunta señalakuyarqan.

25 Tsaypita kimsa junaqtami Dinapa turinkuna Simeónwan Leví tsay markaman yaykuyarqan. Cuerpunkunata señalakuyanqanpita nanaywan karmi washäkuyänanpä valorninkunapis karqantsu. Tsaynö kaykaqtami espädawan llapanta wanutsiyarqan. 26 Tsaynöllami Hamortawan tsurin Siquemtapis espädawan wanutsiyarqan. Nirkurnami Siquempa wayinpita Dinata pushakurkur aywakuyarqan.

27 Tsaypitami Jacobpa wakin kaq tsurinkunapis markaman yaykur llapan runakuna wanushqa jitaraykaqta tariyarqan. Paninta fuerzanqanpita rabyashqa karmi tsay markacho tariyanqan kaqtaqa imaykantapis apakuyarqan. 28 Tsaynöllami apakuyarqan üshakunata, cabrakunata, wäkakunata, ashnukunata y imaykatapis markacho y chakracho tariyanqan kaqtaqa. 29 Wayikunacho tariyanqan kaqta llapanta aparmi wamrakunatapis warmikunatapis apakuyarqan.

30 Tsaynö rurayanqanta musyaykurmi Simeónta y Levíta Jacob nirqan: “¿Imamantä jitarpayämashqayki? Wanutsiyanqaykita musyaskirqa cananeo runakunawan ferezeo runakuna pasaypami chikiyämanqa. Paykuna willanakur shamurmi llapantsikta wanutsimäshun. Sirvimaqnintsik runakunapis paykunata ichipänapä wallkallami kaykäyan”.

31 Tsaynö niptinmi paykuna niyarqan: “Tsayöraqa ¿jinachi imayka prostitüta warmitanöpis panïkunata fuerzanman karqan?”