Bet-elcho Jacobta Tayta Dios bendisanqan
35
Tsaypitanami Jacobta Tayta Dios nirqan: “Imaykaykita apakurkur Bet-elcho tänaykipä aywakuy. Wawqiki Esaúpita qeshpir aywakuptiki yuripanqä† Bet-elman chaykur altarta pirqanki adoramänaykipä”.2 Tayta Dios tsaynö niptinmi tsurinkunata, warminkunata y wätayninkunatapis Jacob nirqan: “Ima dioskunatapis tsarararqa llapanta jitariyay. Tsaynölla purificakurnin bäñakuskir latsapaykikunata trukakuyay. 3 Kananqa Bet-elmannami aywakushun. Tsaychönami altarta pirqashä imaypis yanapamaq Tayta Diosta adoranapä. Paymi pasaypa ñakar maypa puriptïpis yanapamashqa”.
4 Tsaynö niptinmi tsararäyanqan ïdulukunata y arëtikunataa jipiskir Jacobta entregayarqan. Tsaykunatami Siquem cercancho kaykaq encina jacha chakinman pamparqan.
5 Taykäyanqanpita aywakuyaptinmi tsay particho taq runakunapa shonqunkunata Tayta Dios mantsaritsirqan mana qatipäyänanpä. 6 Tsaymi Jacobwan aywaqkuna llapanpis chäyarqan Canaáncho kaykaq Luz markaman. Tsay markapa jukaq jutinmi Bet-el. 7 Tsaycho altarta Jacob pirqaskirmi jutinta churarqan El-Bet-elb jutin kananpä. Tsaynö jutinta churarqan wawqinpita qeshpir aywakuykaptin Tayta Dios tsaycho yuripanqanpitami.
8 Bet-elcho Jacob kaykaptinmi Débora wanurqan. Rebecataqa Déborami pishinpita wätarqan. Wanuskiptinmi pampayarqan Bet-el marka cercancho encina jacha chakinman. Tsay partipa jutintami churarqan Alón-bacut.c
9 Padan-arampita kutiykämuptinmi Jacobta Tayta Dios yapay yuripaskir bendisar nirqan: 10 “Kananpitaqa mananami Jacobnatsu jutiki kanqa, sinöqa Israelnami”.† Tsaynö nirmi jutinta trukatsirqan.
11 Mastami Tayta Dios nirqan: “Noqami kaykä El-Shaddai.d Qampita aywaraqkuna atskaman mirayätsun. Paykunamanmi bendicionnïta churashä tsaytsikaman mirar atska nacionkuna kayänanpä. Paykunapitami reykunapis kayanqa. 12 Abrahamta Isaacta rikatsinqä jallqakunata y raqrakunatami qamta rikatsishayki. Wanuptikipis qampita aywaraqkunatami rikatsishä”.†
13 Jacobwan parlaskirnami Tayta Dios aywakurqan.
14 Jacobnami Tayta Dioswan parlanqan kaqcho wanka rumita jawirqan. Nirkurmi Tayta Diosta adorar tsay rumi jananman vïnutawan aceitita wiñaparqan. 15 Tayta Dioswan parlanqanpitami tsay partipa jutinta Jacob churarqan Bet-ele kananpä.†
Raquel wanunqan
16 Bet-elcho taykanqanpitami Efrataman Jacob aywakurqan. Efrataman manarä chäyaptinmi Raquelpa killan tinkushqana kaptin qeshyakunanpä nanay tsarirqan. Qeshyakuyta mana kamäpakurmi pasaypa ñakarqan.
17 Tsaynö ñakaptinmi Raquelta partëra nirqan: “Valorta tsariy. Kanan yuriq wawaykipis ollqumi”.
18 Wanukunanpä antsa kaykarnami Raquel nirqan: “Benonif kay wawäpa jutin katsun”. Taytannami tsay tsurinpa jutinta churarqan Benjamíng kananpä. 19 Pasaypa ñakar qeshyakuskirmi Raquelqa wanurqan. Wanuskiptinnami Efrataman aywaq näni ñöpanman pampayarqan. Tsay partitami kananqa Belén niyan. 20 Raquelta pampayanqan jananmanmi señal kananpä wanka rumita Jacob jawirqan. Tsay rumimi kananyaqpis musyatsimantsik maynincho Raquel pamparanqanta.
Jutsata Rubén ruranqan
21 Raquelta pampanqan kaqpita aywakurmi Israelh patsakurqan Edar törri washa ñöpanman. 22 Tsaycho taykaptinmi Jacobpa tsurin Rubén taytanpa concubïnan Bilhawan punurqan. Tsurin tsaynö ruranqanta musyaykurmi taytan pasaypa rabyakurqan.
Jacobpa tsurinkuna
Israelpa ollqu tsurinkuna chunka ishkaymi kayarqan.
23 Leapa mayor wawanmi karqan Rubén.
Paypa qepanman yuriqkunami kayarqan Simeón, Leví, Judá, Isacar y Zabulón.
24 Raquelpa wawankunanami kayarqan Joséwan Benjamín.
25 Raquelpa wätaynin Bilhapa wawankunanami kayarqan Danwan Neftalí.
26 Leapa wätaynin Zilpapa wawankunanami kayarqan Gadwan Aser.
Jacobpa llapan tsurinkunami Padan-aramcho yuriyarqan.
Isaac wanunqan
27 Tsaypitanami Mamre partiman Jacob aywarqan taytan Isaacta watukaq. Mamriqa karqan Arba cercanchömi. Arbapa jukaq jutinmi Hebrón. Tsaychömi Abrahampis unay tarqan.† 28 Juk pachak puwaq chunka (180) watami Isaac kawarqan. 29 Pasaypa awkinyashqa wanuskirnami unay castankunawan tinkuq aywakurqan. Ayantanami Esaúwan Jacob pampayarqan.