H
Hades Hadesqa jutsallancho wanuq runakunapa almankuna ñakaykäyanqan sitiumi kaykan. Jesucristo kutimur wanuqkunata kawarirkatsimurmi (Juan 5.28-29; Hech. 24.15) Hadescho kaqkunata juzgar nina qochaman qaykunqa (Mat. 11.23; Luc. 16.23; Apoc. 20.14).
Herodes Herodesqa Jesucristo yurinqan witsanmi Israel nacioncho mandaq rey karqan (Mat. 2.1). Rey kananpämi Romacho mandaq César payta churarqan. Herodes wanuptinnami tsurin Antipas mandaq karqan Galilea y Perea provinciakunacho. Herodes casta kaptinmi paytapis Herodes niyaq. Antipasmi Bautizaq Juanpa umanta roqutsirqan (Mat. 14.1-12). Tsaynöpis paymanmi Israel autoridäkuna Jesucristuta juzgananpä apayarqan (Luc. 23.8-12).
Tsaypitanami Herodespa willkan Agripana rey kayman yaykurqan. Paytapis Herodes casta kaptinmi Herodes niyaq. Paymi Jesucristupa apostolnin Santiaguta wanutsirqan (Hech. 12.1-2). Apóstol Pedrutapis wanutsiyta munarmi carcelman wichqatsirqan (Hech. 12.3).
Agripa wanuskiptinmi tsurinna mandaq kayman yaykurqan. Paypapis jutin karqan Agripami (Hech. 25.13—26.32).
hiena Hienaqa allqu niraq jatun jirka uywami kaykan. Itsanqa kunkan mas jatun y rakumi kaykan (Isa. 13.22; 34.14).
hisöpu Hisöpuqa kanllä jachanömi kaykan. Israel runakuna impüru kayanqanpita püru kayänanpämi hisöpu jachata yawarman tullpurkur tsaqtsuyaq (Éxo. 12.22; Núm. 19.18; Sal. 51.7; Heb. 9.19).