Félixpa ñöpancho Pablo parlanqan
24
Tsaypita pitsqa junaqtanami juk ishkay Israel mayor runakunata y Tértulo jutiyuq abogäduta pushashqa mas mandaq sacerdöti Ananías Cesareaman charqan. Pablupa contran parlayänanpämi Félixpa despächunman aywayarqan. 2 Despächuman Pabluta chaykatsiptinnami Tértulo nirqan: “Tayta Félix, qam alli mandaq kaptikimi noqakuna alli kawayä. Tsaynöpis shumaq tantiyakur kay nacioncho alli kaqkunatami ruratsishqayki. 3 Tsayta rikarmi maytsaychöpis kushishqa agradëcikuyä.4 “Tiempuykita alläpa mana oqratsinäpä rätulla wiyamänaykipä rugakushayki. 5 Kay prësu apayämunqan runaqa shukukuq qeshyanömi kaykan. Payqa Nazareno sectapa mandaqnin karmi maytsaychöpis Israel runakunata chikinakaykätsin. 6 Jerusaléncho templutapis manakaqmanmi churayta munashqa. Tsaymi prësu tsarir [leynïkuna ninqannö arreglayta munayashqä. 7 Prësuraykätsiyaptïmi Lisias chaykamur maqa maqaykur qechuyämashqa. 8 Nirkurmi niyämashqa qampa ñöpaykichörä ima jutsan kanqantapis shimpiyänäpä kanqanta.] Llapan niyanqäkuna rasun kaq kanqanta musyanaykipä kanan kikiki tapuykullay”.
9 Tértulo ninqannöllami paywan kaykaq Israel runakunapis niyarqan.
10 Tsaymi parlamunanpä Félix sëñasta ruraptin Pablo nirqan: “Tayta Félix, atska watanami kay nacioncho runakuna quejakuyanqanta arreglashqayki. Tsaymi manakaqkunapita conträ shäriyanqanta mana mantsariypa willashayki. 11 Tayta Diosta adoraq Jerusalénman chanqä tsayrämi chunka ishkay junaq. Tapukuptikiqa pïmaypis ninqänöllami willayäshunki. 12 Templuchöpis ni sinagögakunachöpis ni markachöpis manami piwanpis rimanakuykaqtatsu ni pitapis ajanaykätsiqtatsu tariyämashqa. 13 Tumpayämanqannö llutanta rurashqa kaptïqa kanan mayqanpis shimpimätsun.
14 “Itsanqa Diospa Nänina ninqannöllami unay castäkuna adorayanqan Tayta Diosta sirvï. Diospa Nänin juk secta kanqanta paykuna niyaptinpis Moisés llapan qellqanqan leykunaman y profëtakuna llapan qellqayanqanmanmi criyï. 15 Alli runakunatapis mana alli runakunatapis Tayta Dios kawatsimunanpä kanqanta paykuna criyikuyanqannömi noqapis criyï. 16 Tsaymi Tayta Diospa ñöpanchöpis y runakunapa rikananchöpis allikunallata imaypis rurayta munä.
17 “Atska watatami qellayta apar Jerusalénman kutishqä muchuqkunata yanapanäpä y Tayta Diospä sacrificiuta rupatsinäpä. 18 Sacrificiukunata sacerdötikunaman templucho entregaykaptïmi [Asia provinciapita shamuq Israel runakuna] templucho purificakushqa kaykaqta tariyämashqa. Manami atskaq runakunatawantsu ni pitapis büllata ruraykätsiqtatsu tariyämashqa.† 19 Imatapis manakaqkunata rurashqa kaptïqa ñöpaykicho shimpiyämänanpämi tsay runakuna shayämunman karqan. 20 Sanedrín juezkunapis manami ima jutsä kanqantapis tariyashqatsu. Tapuptiki kay runakunapis tsaynö kanqantami niyäshunki. 21 Tsay autoridäkunapa ñöpanchömi nirqä: ‘Wanushqakunata Tayta Dios kawatsimunanpä kanqanta criyiptïmi juzgaykäyämanki’.† Tsay imachi jutsä kaykan”.
22 Tsaynö ninqanta wiyaykurmi Félix nirqan: “Comandanti Lisias shamur willamaptinrämi arreglayäshayki”.
Félix shumaqmi tantiyarqan Diospa Näninta qatiraqkunab imata criyikuyanqantapis.
23 Nirkurmi Pablo täpaq capitanta nirqan: “Carcelman Pabluta kutitsiy. Imallatapis aparkur pipis watukaq shamuptin ama michankitsu”.
24 Tsaypita warayninkunanami warmin Drusilawan despächunman Félix kutiykur Pabluta qayatsirqan. Drusilaqa Israel warmimi karqan. Pablo chaykurmi paykunata parlaparqan Jesucristuman yärakuyänanpä. 25 Tsaynöllami tantiyatsirqan Dios munanqannö kawayänanpä, jutsata mana rurayänanpä y juiciu finalcho Tayta Dios juzgananpä kanqanta. Tsayta wiyaykurmi Félix mantsakashqa nirqan: “Wichqaranqaykiman kutikuyna. Tiempü kanqan hörami yapay qayatsimushayki”.
26 Pakayllapa pägananta munarmi Pabluta atska kuti Félix qayatsir paywan parlarqan. 27 Tsaypita ishkay watatanami Félixpa trokin gobernador kananpä jukna yaykurqan. Paypa jutinmi karqan Porcio Festo. Félix yarqukur alli autoridä kanqanta Israel runakuna niyänanta munarmi carcelcho Pabluta kacharqantsu.