Risö́l-lëꞌë Jesús bönniꞌ usëda queëꞌ tsöjéngaquiëꞌ libán
9
Níꞌirö butubëꞌ Jesús idxínnutëꞌ bönniꞌ usëda queëꞌ,
ateꞌ budödëꞌ lu náꞌagaquiëꞌ yöl-laꞌ huáca,
en yöl-laꞌ unná bëꞌ para uluꞌbéajëꞌ böꞌ xihuiꞌ yúꞌugaca bönachi,
en uluꞌúnëꞌ nupa teꞌe.
San Lucas 9:1-27
2 Gusö́l-lëꞌë légaquiëꞌ tsöjéngaquiëꞌ libán ca rinná bëꞌë Dios,
en tsöjhuéngaquiëꞌ nupa teꞌe.
3 Jesús gudxëꞌ légaquiëꞌ:
―Bitiꞌ bi guáꞌaliꞌ para laꞌ nöza,
calëga xiyágadoꞌ,
en calëga yöxaj,
en calëga yöta,
en calëga dumí,
en bitiꞌ ixóa yenliꞌ chopa lariꞌ.
4 Bítiꞌtës yuꞌu ga tsúꞌuliꞌ,
guliꞌsóa niꞌ cateꞌ uzáꞌaröliꞌ yödzö naꞌ.
5 Gátiꞌtës ga bitiꞌ ilún bönachi libíꞌiliꞌ bal,
buliꞌrúaj yödzö naꞌ,
en guliꞌcuíbi bëchtö daꞌ lëꞌe lábaliꞌ,
le uluíꞌi légaquiëꞌ nagáꞌana xíguiaꞌ nabágaꞌgaquiëꞌ.
6 Níꞌirö bilaꞌrúajëꞌ bönniꞌ usëda queëꞌ naꞌ.
Gulaꞌdödëꞌ yúguꞌtë yö́dzödoꞌ,
tunëꞌ libán que didzaꞌ dxiꞌa,
en tuꞌúnëꞌ nupa teꞌe yúguꞌtë lu yödzö naꞌ.
Ca gútiëꞌ Juan, bönniꞌ buquilëꞌ bönachi nisa
7 Biyönnëꞌ Herodes,
bönniꞌ rinná bëꞌë,
ca naca yúguꞌtë le runëꞌ Jesús,
ateꞌ guröꞌë böniga,
tuꞌ taꞌnná bönachi:
―Juan naꞌ chibubanëꞌ lu yöl-laꞌ guti.
8 Iaꞌbal-lëꞌ taꞌnnë́ꞌ:
―Chibulë́ꞌë Elías,
bönniꞌ naꞌ bëꞌë didzaꞌ uláz queëꞌ Dios.
Iaꞌbal-lëꞌ taꞌnnë́ꞌ:
―Chibubanëꞌ tu bönniꞌ bítsëꞌë yuguꞌ bönniꞌ guluꞌë didzaꞌ uláz queëꞌ Dios dza niꞌte.
9 Herodes naꞌ gunnë́ꞌ:
―Juan naꞌ burixaꞌ yenëꞌ.
¿Nuzxi caz bönniꞌ ni,
riyöndaꞌ queëꞌ runëꞌ yuguꞌ lë ni?
Rizóa riböꞌë Herodes iléꞌenëꞌ Jesús.
Rugahuëꞌ Jesús chi-un gayuáꞌ bönachi
10 Cateꞌ buluꞌdxinëꞌ bönniꞌ gubáz nasö́l-lëꞌë Jesús ga zoëꞌ Lëꞌ,
buluꞌsiyönnëꞌ Lëꞌ yúguꞌtë le gulunëꞌ.
Níꞌirö guchë́ꞌë Jesús légaquiëꞌ quez.
Yöjáquiëꞌ tu lataj cáꞌasö lu xiyú yödzö Betsaida.
11 Cateꞌ chinö́ziguequi bönachi lë ni,
yöjnóguequi Lëꞌ,
ateꞌ Jesús benëꞌ léguequi bal,
en bë́ꞌlenëꞌ léguequi didzaꞌ ca rinná bëꞌë Dios,
ateꞌ bunëꞌ nupa teꞌe.
12 Cateꞌ chizáꞌ ral-la dza naꞌ,
idxínnutëꞌ bönniꞌ gubáz queëꞌ Jesús gulaꞌbíguëꞌë ga zoëꞌ,
en tëꞌ Lëꞌ:
―Busöl-laꞌ bönachi ni tsöjaca gapa dë yö́dzödoꞌ,
en gapa dë yúꞌudoꞌ idú gásibiꞌilö para tsöjtíljagaquiëꞌ gapa uluꞌgáꞌanëꞌ,
en bi ilahuëꞌ,
tuꞌ naca lataj cáꞌasö ga ni zóaruꞌ.
13 Níꞌirö Jesús rëꞌ légaquiëꞌ:
―Guliꞌguꞌë libíꞌiliꞌ le ilahuëꞌ.
Tëꞌ Lëꞌ:
―Gáyuꞌsö yöta xtíladoꞌ dë,
en chópasöbaꞌ böla dëbaꞌ queë́tuꞌ,
o ¿naruꞌ huayéajtsatuꞌ tsöjö́ꞌöutuꞌ le ilágugaca bönachi zián ni?
14 Nacuꞌë ca chi-un gáyuꞌë bönniꞌ ga naꞌ.
Níꞌirö Jesús gudxëꞌ yuguꞌ bönniꞌ usëda queëꞌ,
rnnëꞌ:
―Guliꞌgún ga ilaꞌböꞌë tu cöꞌ huéajgaquiëꞌ,
ilaca ca chi-un huéajgaquiëꞌ.
15 Caní gulunëꞌ,
ateꞌ gulaꞌböꞌë yúguꞌtëꞌ.
16 Níꞌirö gudélëꞌë Jesús gayuꞌ yöta xtila naꞌ,
en chópabaꞌ böla naꞌ,
ateꞌ guchisa lahuëꞌ ruyúëꞌ lúzxiba,
en rëꞌ Dios:
“Xclenuꞌ.”
Níꞌirö buzxuzxjëꞌ léguequi,
en bëꞌë quégaquiëꞌ bönniꞌ usëda queëꞌ para uluꞌcuꞌë lógaca bönachi naꞌ.
17 Gulahuëꞌ yúguꞌtëꞌ,
en buluꞌhuö́ljanëꞌ.
Gudödi naꞌ buluꞌtubëꞌ yuguꞌ bizxaj bugáꞌana,
ateꞌ buluꞌlíëꞌ idú chinnu gaꞌböra.
Rnnëꞌ Pedro Jesús náquiëꞌ Cristo
18 Tu dza tsanni niꞌ zoëꞌ quez Jesús,
rulidzëꞌ Dios,
bilaꞌdxinëꞌ bönniꞌ usëda queëꞌ ga zoëꞌ,
ateꞌ gunábinëꞌ légaquiëꞌ,
rnnëꞌ:
―¿Nuzxi taꞌnná bönachi nacaꞌ nedaꞌ?
19 Buluꞌbiꞌë didzaꞌ,
taꞌnnë́ꞌ:
―Taꞌnná bal-la bönachi nacuꞌ Juan,
bönniꞌ buquilëꞌ bönachi nisa.
Taꞌnná iaꞌbal-lëꞌ nacuꞌ Elías,
ateꞌ taꞌnná iaꞌbal-lëꞌ nacuꞌ tu bönniꞌ bítsëꞌë yuguꞌ bönniꞌ guluꞌë didzaꞌ uláz queëꞌ Dios dza niꞌte,
en nubanëꞌ lu yöl-laꞌ guti.
20 Níꞌirö Jesús gunábinëꞌ légaquiëꞌ,
rnnëꞌ:
―Názxi libíꞌiliꞌ,
¿nuzxi rnnaliꞌ nacaꞌ?
Bubiꞌë didzaꞌ Pedro,
rnnëꞌ:
―Nacuꞌ Cristo nasö́l-lëꞌë Dios.
Riguíxjöꞌë Jesús ca siꞌ ilútiëꞌ Lëꞌ
21 Níꞌirö Jesús gúdxidëꞌë légaquiëꞌ,
en gunná béꞌenëꞌ légaquiëꞌ cuntu nu ilë́ꞌ Nu náquiëꞌ Lëꞌ.
22 Níꞌirö rëꞌ légaquiëꞌ:
―Run bayudxi quiꞌi sacaꞌa nedaꞌ,
Bönniꞌ Guljëꞌ Bönachi,
zián le gaca quiaꞌ.
Uluꞌcáꞌanëꞌ nedaꞌ cáꞌasö yuguꞌ bönniꞌ gula tuꞌzéajniꞌinëꞌ,
en yuguꞌ bixúz unná bëꞌ,
en yuguꞌ bönniꞌ yudoꞌ usedi.
Ilútiëꞌ nedaꞌ,
pero dza tsonna dza Dios usubanëꞌ nedaꞌ lu yöl-laꞌ guti.
23 Gudxëꞌ caꞌ yúguꞌtëꞌ:
―Channö rë́ꞌënëꞌ nu bönniꞌ tëꞌë nedaꞌ,
ral-laꞌ uzóëꞌ tsöláꞌalö le dë queëꞌ,
en gáquiëꞌ ca tu bönniꞌ saꞌyéajëꞌ söjtë́ꞌë lëꞌe yaga cruz,
ateꞌ níꞌirö gaca tëꞌë nedaꞌ.
24 Nútiꞌtës bönniꞌ ruíꞌi ládxëꞌë gun chiꞌë yöl-laꞌ naꞌbán queëꞌ,
unítiëꞌ le,
pero channö unítiëꞌ yöl-laꞌ naꞌbán queëꞌ tuꞌ dëꞌë nedaꞌ,
bönniꞌ ni gataꞌ yöl-laꞌ naꞌbán idú queëꞌ.
25 Bitiꞌ bi uziꞌë xibé tu bönniꞌ channö utubëꞌ queëꞌ yúguꞌtë le dë yödzölió ni,
pero unítiëꞌ tsaz yöl-laꞌ naꞌbán queëꞌ.
26 Nu bönniꞌ rutuíꞌinëꞌ nedaꞌ,
en rutuíꞌinëꞌ caꞌ xtídzaꞌa,
lëscaꞌ nedaꞌ,
Bönniꞌ Guljëꞌ Bönachi,
utuíꞌidaꞌ bönniꞌ naꞌ cateꞌ huödaꞌ idinná bëꞌa,
dzágagaca nedaꞌ yöl-laꞌ zxön queëꞌ Xuzaꞌ,
en yöl-laꞌ zxön quégaquiëꞌ gubáz láꞌayi queëꞌ Dios.
27 Le nácatë reaꞌ libíꞌiliꞌ,
nacuáꞌ bal-lëꞌ bönniꞌ ni bitiꞌ ilátiëꞌ cateꞌ ilaꞌléꞌerönëꞌ dza idinná bëꞌë Dios.
Ridzáꞌ ca rináꞌ lahuëꞌ Jesús
28 Cateꞌ bizáꞌa xunuꞌ gubidza gudödi bëꞌë Jesús yuguꞌ didzaꞌ ni,
níꞌirö guchë́ꞌë Pedro,
en Juan,
en Jacobo,
ateꞌ gurenëꞌ tu lu guíꞌadoꞌ,
ga naꞌ bulidzëꞌ Dios.
San Lucas 9:28-62
29 Tsanni niꞌ ruíꞌilenëꞌ Dios didzaꞌ,
bidzáꞌ ca rináꞌ lahuëꞌ,
ateꞌ böáca chiguíchidoꞌos lariꞌ nácuëꞌ,
en guyëpi yösa beníꞌ.
30 Níꞌirö buluꞌluíꞌi lógaquiëꞌ chopëꞌ bönniꞌ ga zoëꞌ Lëꞌ tuíꞌilenëꞌ Lëꞌ didzaꞌ.
Nácagaquiëꞌ Moisés,
en Elías.
31 Chopëꞌ ni gulaꞌyëpëꞌ yösa beníꞌ,
ateꞌ tuíꞌilenëꞌ Jesús didzaꞌ ca siꞌ uzë́ꞌë yödzölió ni,
gátiëꞌ lu yödzö Jerusalén.
32 Sal-laꞌ chirácadaꞌ ilásiëꞌ Pedro,
en nupa nacuáꞌlen lëꞌ,
bayudxi gulaꞌnáꞌasëꞌ,
ateꞌ bilaꞌléꞌenëꞌ yöl-laꞌ beníꞌ queëꞌ Jesús,
en chopëꞌ naꞌ nacuáꞌlenëꞌ Lëꞌ.
33 Cateꞌ buluꞌzë́ꞌë chopëꞌ naꞌ ga naꞌ zoëꞌ Jesús,
níꞌirö Pedro gudxëꞌ Lëꞌ:
―Bönniꞌ Usedi,
dxiꞌa naca zóaruꞌ ni.
Gúntsöcaꞌtuꞌ tsonna yuꞌu lágaꞌdoꞌ,
tu quiuꞌ,
iaꞌtú queëꞌ Moisés,
en iaꞌtú queëꞌ Elías.
Bitiꞌ réquibeꞌenëꞌ Pedro bi naꞌ rnnëꞌ.
34 Tsanni niꞌ ruꞌë didzaꞌ ni,
laꞌ gurö́ꞌötë böaj le bugacu légaquiëꞌ,
ateꞌ guládxinëꞌ tuꞌ nacuꞌë lu böaj naꞌ.
35 Níꞌirö biyö́n chiꞌi Nu ruíꞌi didzaꞌ lu böaj naꞌ,
rnna:
―Bönniꞌ ni náquiëꞌ Zxíꞌinaꞌ.
Nadxíꞌidaꞌ Lëꞌ.
Buliꞌzë́ nágaliꞌ didzaꞌ guꞌë.
36 Cateꞌ budxi bëꞌ didzaꞌ chiꞌi naꞌ,
tuzëꞌ Jesús nagáꞌanalenëꞌ légaquiëꞌ.
Taꞌcuáꞌ dxíëꞌ bönniꞌ usëda queëꞌ,
ateꞌ dza naꞌ cuntu nu gulë́ꞌ ca naca le bilaꞌléꞌenëꞌ.
Ruúnëꞌ Jesús biꞌi bönniꞌ yuꞌu böꞌ xihuiꞌ lëbiꞌ
37 Cateꞌ zaꞌ reníꞌ iaꞌtú dza buluꞌhuötjëꞌ Jesús,
en bönniꞌ naꞌ dzágagaquiëꞌ Lëꞌ lu guíꞌadoꞌ naꞌ,
ateꞌ bilaꞌrúaj bönachi zián dutságagaca Jesús.
38 Níꞌirö bëꞌë zidzaj didzaꞌ tu bönniꞌ nútsëꞌë ladaj bönachi zián naꞌ.
Bulidzëꞌ Jesús,
rnnëꞌ:
―Bönniꞌ Usedi,
rátaꞌyuaꞌ loꞌ duyúꞌ-biꞌ biꞌi bönniꞌ quiaꞌ tuꞌ nácabiꞌ biꞌi laꞌs dui quiaꞌ.
39 Yuꞌu böꞌ xihuiꞌ lëbiꞌ le run ga ribö́dxiꞌabiꞌ,
en ruxízidaꞌ lëbiꞌ.
Run ga ribía bidxinaꞌ zxönaꞌ ruáꞌabiꞌ,
en rurixi rutúludaꞌ lëbiꞌ,
ateꞌ catu caz rusán lëbiꞌ.
40 Gútaꞌyuaꞌ lógaquiëꞌ bönniꞌ usëda quiuꞌ uluꞌbéajëꞌ le,
pero bitiꞌ gulaꞌzéquiꞌnëꞌ.
41 Bubiꞌë didzaꞌ Jesús,
rnnëꞌ:
―Libiꞌiliꞌ,
bitiꞌ réajlëꞌëliꞌ,
en nachixi ícjaliꞌ.
¿Gácaꞌxte ral-laꞌ sóalenaꞌ libíꞌiliꞌ,
en guáꞌ ilenaꞌ queë́liꞌ?
Dijuáꞌa-biꞌ biꞌi bönniꞌ quiuꞌ ni.
42 Cateꞌ niꞌ záꞌabiꞌ ribígaꞌbiꞌ ga naꞌ zoëꞌ Jesús,
burixi butúludaꞌ böꞌ xihuiꞌ naꞌ lëbiꞌ.
Jesús gudil-lëꞌ böꞌ xihuiꞌ naꞌ,
en bunëꞌ-biꞌ biꞌi bönniꞌ naꞌ.
Níꞌirö buguꞌë-biꞌ lu nëꞌë xúzibiꞌ.
43 Buluꞌbani yúguꞌtë bönachi niꞌ ca naca yöl-laꞌ huáca zxön queëꞌ Dios.
Jesús ruꞌë didzaꞌ leyúbölö ca siꞌ ilaꞌzönëꞌ Lëꞌ
Tsanni niꞌ tuꞌbani yúguꞌtë bönachi ca naca le zxön runëꞌ Jesús,
Lëꞌ gudxëꞌ yuguꞌ bönniꞌ usëda queëꞌ,
44 rnnëꞌ:
―Guliꞌcúꞌu icja nágaliꞌ didzaꞌ ni,
tuꞌ siꞌ uluꞌdödëꞌ nedaꞌ,
Bönniꞌ Guljëꞌ Bönachi,
lu náꞌagaca bönachi.
45 Bitiꞌ gulaꞌyéajniꞌinëꞌ bönniꞌ usëda queëꞌ didzaꞌ ni,
tuꞌ cabí ruíꞌinëꞌ Dios légaquiëꞌ lataj ilaꞌyéajniꞌinëꞌ,
pero bitiꞌ buluꞌrúguinëꞌ ilaꞌnábinëꞌ Jesús ca naca didzaꞌ ni.
Nu naca lo
46 Níꞌirö gulaꞌsí lógaquiëꞌ bönniꞌ usëda queëꞌ Jesús tuꞌë didzaꞌ.
Taꞌnábini luzáꞌagaquiëꞌ tuëꞌ iaꞌtúëꞌ núzxilëꞌ gáquiëꞌ lo.
47 Réquibeꞌenëꞌ Jesús le taꞌzáꞌ ládxiꞌgaquiëꞌ,
ateꞌ gudélëꞌë-biꞌ tubiꞌ bíꞌidoꞌ,
en buzóëꞌ-biꞌ cuitëꞌ.
48 Níꞌirö rëꞌ légaquiëꞌ:
―Nútiꞌtës bönniꞌ gunëꞌ bal tu bíꞌidoꞌ caní tuꞌ néquibiꞌ quiaꞌ nedaꞌ,
nedaꞌ caz gunëꞌ bal,
ateꞌ nu bönniꞌ gunëꞌ nedaꞌ bal,
gunëꞌ caꞌ bal Xuzaꞌ nasö́l-lëꞌë nedaꞌ.
Que lë ni naꞌ bönniꞌ nútsëꞌë ládjaliꞌ nácarëꞌ nöxaj ladxiꞌ,
bönniꞌ ni náquiëꞌ lo.
Nu bitiꞌ ridáꞌbagaꞌ rëꞌu, rácalen rëꞌu
49 Níꞌirö Juan bulidzëꞌ Jesús,
rnnëꞌ:
―Bönniꞌ Usedi,
biléꞌetuꞌ-nëꞌ tu bönniꞌ rugunëꞌ dxin Loꞌ rubéajëꞌ böꞌ xihuiꞌ,
ateꞌ gunná béꞌetuꞌ-nëꞌ tuꞌ cabí dëꞌë rëꞌu.
50 Jesús rëꞌ lëꞌ:
―Bitiꞌ inná béꞌeliꞌ-nëꞌ,
tuꞌ rácalen rëꞌu nu bitiꞌ ridáꞌbagaꞌ rëꞌu.
Jesús ridil-lëꞌ Jacobo, en Juan
51 Cateꞌ chizáꞌ gal-laꞌ dza ral-laꞌ gátiëꞌ Jesús,
en huëpëꞌ yehuaꞌ yubá,
benëꞌ bayudxi tsejëꞌ Jerusalén.
52 Gusö́l-lëꞌë yuguꞌ bönniꞌ gubáz queëꞌ ilaꞌnö́ruëꞌ ca Lëꞌ,
ateꞌ yöjáquiëꞌ tu yö́dzödoꞌ quégaca bönachi Samaria para tsöjpáꞌagaquiëꞌ ga ugáꞌanëꞌ Jesús tu yëla.
53 Yuguꞌ bönniꞌ yödzö naꞌ bitiꞌ gulunëꞌ Jesús bal tuꞌ chinaca queëꞌ saꞌyéajëꞌ Jerusalén.
54 Cateꞌ Jacobo,
en Juan,
bönniꞌ usëda queëꞌ Jesús,
bilaꞌléꞌenëꞌ lë ni,
tëꞌ Lëꞌ:
―Xan,
¿naruꞌ inábatsöcaꞌtuꞌ huötaj guíꞌ le zaꞌ yehuaꞌ yubá,
en usuniti légaquiëꞌ,
guntuꞌ ca naꞌ benëꞌ Elías?
55 Buécjëꞌ Jesús,
en gudil-lëꞌ légaquiëꞌ,
rnnëꞌ:
―Bitiꞌ nö́ziliꞌ bizxi böꞌ dzágui libíꞌiliꞌ.
56 Bidaꞌ ni nedaꞌ,
Bönniꞌ Guljëꞌ Bönachi,
calëga para usunítiaꞌ yöl-laꞌ naꞌbán quégaca bönachi,
pero bidaꞌ dusöláꞌ bönachi.
Níꞌirö yöjáquiëꞌ yödzö yúbölö.
Nupa të́ꞌëni tsöjácalen Jesús
57 Tsanni niꞌ yúꞌugaquiëꞌ nöza Jesús,
en yuguꞌ bönniꞌ dáꞌgaquiëꞌ Lëꞌ,
bidxinëꞌ tu bönniꞌ yödzö Jerusalén,
en rëꞌ Jesús:
―Xan,
rë́ꞌëndaꞌ sáꞌlenaꞌ Liꞌ gátiꞌtës ga tsejuꞌ.
58 Jesús rëꞌ lëꞌ:
―Yúguꞌ bözaꞌ,
nacuáꞌ zxan bulóaj quégacabaꞌ,
ateꞌ biguínnidoꞌ,
dxíagaca xcáꞌagacabaꞌ,
pero nedaꞌ,
Bönniꞌ Guljëꞌ Bönachi,
bitiꞌ dë quiaꞌ ga gátaꞌa uzíꞌ ládxaꞌa.
59 Níꞌirö Jesús gudxëꞌ tu bönniꞌ yúbölö,
rnnëꞌ:
―Gudáꞌ nedaꞌ.
Bönniꞌ ni gudxëꞌ Lëꞌ:
―Xan,
benna nedaꞌ lataj huöjaꞌ lidxaꞌ ga idxinrö dza chibucáchaꞌa-nëꞌ xuzaꞌ.
60 Jesús gudxëꞌ lëꞌ:
―Bëꞌ lataj bönniꞌ chizóa ilátiëꞌ uluꞌcáchëꞌë nupa chinati quégaquiëꞌ,
pero liꞌ,
guyéaj,
yöjén libán ca inná bëꞌë Dios.
61 Níꞌirö bidxinëꞌ iaꞌtúëꞌ caꞌ,
en rëꞌ Jesús:
―Xan,
rë́ꞌëndaꞌ sáꞌlenaꞌ Liꞌ,
pero benna nedaꞌ lataj tsejaꞌ tsöjzégacadaꞌ-nëꞌ didzaꞌ diꞌa dza quiaꞌ.
62 Jesús gudxëꞌ lëꞌ:
―Nútiꞌtës bönniꞌ ruíꞌi ládxëꞌë le raca yödzölió náquiëꞌ ca tu bönniꞌ rugáꞌanëꞌ-baꞌ bëdxi,
en ruyúëꞌ zacaꞌ cúdzuꞌlëꞌ.
Nu run caní bitiꞌ naca lesacaꞌ tsaza ga rinná bëꞌë Dios.