¿Núzxilö gaca lo?
18
Laꞌ dza níꞌisö bilaꞌdxinëꞌ bönniꞌ usëda queëꞌ Jesús ga zoëꞌ,
ateꞌ gulaꞌnábinëꞌ Lëꞌ,
taꞌnnë́ꞌ:
―¿Núzxilëꞌ bönniꞌ ni gáquiëꞌ lo ga rinná bëꞌë Dios yehuaꞌ yubá?
2 Bulidzëꞌ-biꞌ Jesús tubiꞌ biꞌi bö́nniꞌdoꞌ,
ateꞌ buzóëꞌ-biꞌ gatsaj láhuiꞌlö ga naꞌ nacuꞌë.
3 Níꞌirö rëꞌ légaquiëꞌ:
―Le nácatë reaꞌ libíꞌiliꞌ,
channö cabí huöácaliꞌ ca zeaj nácabiꞌ bíꞌidoꞌ,
bitiꞌ caꞌ tsúꞌuliꞌ ga niꞌ rinná bëꞌë Dios yehuaꞌ yubá.
4 Que lë ni naꞌ,
nútiꞌtës nu gaca nöxaj ladxiꞌ,
en huöáca ca nácabiꞌ bíꞌidoꞌ ni,
nu ni gaca lo ga niꞌ rinná bëꞌë Dios yehuaꞌ yubá.
5 Nútiꞌtës nu gun bal tubiꞌ bíꞌidoꞌ caní tuꞌ néquibiꞌ quiaꞌ,
nedaꞌ caz gun bal.
Le tun ga nu gun dul-laꞌ
6 Gunnë́ꞌ caꞌ Jesús:
―Nu gun ga gunbiꞌ dul-laꞌ tubiꞌ bíꞌidoꞌ caní réajlëꞌëbiꞌ quiaꞌ,
gácarö dxiꞌa queëꞌ bönniꞌ naꞌ laꞌtuꞌ ugalëꞌë guiö́j riyë́tuni yaga yenëꞌ,
ateꞌ tsöjsuladzuꞌ cuinëꞌ lu nísadoꞌ.
7 Bicaꞌ bayechiꞌ bönachi yödzölió ni tun ga gun dul-laꞌ luzë́ꞌeguequi.
Nacuáꞌticaꞌsö le tun ga nu gun dul-laꞌ,
pero bicaꞌ bayechiꞌ nu run ga nu gun dul-laꞌ.
8 ’Que lë ni naꞌ,
channö gun noꞌo o niꞌu ga gunuꞌ dul-laꞌ,
guchugu le,
en gurúꞌuna le.
Gácarö dxiꞌa quiuꞌ tsöjtsáziuꞌ ga suꞌ ibanuꞌ bitiꞌ rizóꞌo o narugu niꞌa noꞌo,
en calëga nacuáꞌ chopa noꞌo,
en chopa niꞌu ateꞌ tsöjtsáziuꞌ lu guíꞌ gabila le catu caz ulu.
9 Channö gun guiö́j loꞌ ga gunuꞌ dul-laꞌ,
guléaj le,
en gurúꞌuna le.
Gácarö dxiꞌa quiuꞌ tsöjtsáziuꞌ ga suꞌ ibanuꞌ,
zoa tuz guiö́j loꞌ,
en calëga nacuáꞌ chopa guiö́j loꞌ,
ateꞌ tsöjtsáziuꞌ lu guíꞌ gabila.
Jesús rucúdzuꞌë didzaꞌ que tu böꞌcuꞌ zxilaꞌ nanítibaꞌ
10 Gunnë́ꞌ caꞌ Jesús:
―Guliꞌgún chiꞌi cuinliꞌ para cabí uzóaliꞌ-biꞌ tsöláꞌalö tubiꞌ bíꞌidoꞌ caní.
Nedaꞌ reaꞌ libíꞌiliꞌ,
gubáz láꞌayi tapa chiꞌë légacabiꞌ nacuáꞌticaꞌsëꞌ lahuëꞌ Xuzaꞌ zoëꞌ yehuaꞌ yubá.
11 Bidaꞌ ni nedaꞌ,
Bönniꞌ Guljëꞌ Bönachi,
para usöláꞌ nu ni naniti.
12 ’¿Nacxi rusácaꞌliꞌ queë́liꞌ?
Tu bönniꞌ,
nacuáꞌabaꞌ tu gayuáꞌ böꞌcuꞌ zxilaꞌ queëꞌ,
channö nítibaꞌ tubaꞌ,
¿naruꞌ cabí ucáꞌanëꞌ-baꞌ tápalalaj yuꞌ chë́nnabaꞌ naꞌ,
ateꞌ tsejëꞌ gapa naca lu guíꞌa,
para tsöjtiljëꞌ-baꞌ böꞌcuꞌ zxílaꞌdoꞌ naꞌ nanítibaꞌ?
13 Channö udzö́linëꞌ-baꞌ,
le nácatë reaꞌ libíꞌiliꞌ,
udzéjarönëꞌ niꞌa queë́baꞌ böꞌcuꞌ zxílaꞌdoꞌ naꞌ ca gunëꞌ quégacabaꞌ iaꞌtápalalaj yuꞌ chë́nnabaꞌ niꞌ bitiꞌ gulaꞌnítibaꞌ.
14 Lëscaꞌ caní,
Xúziruꞌ Dios,
zoëꞌ yehuaꞌ yubá,
bitiꞌ rë́ꞌënëꞌ nítibiꞌ tubiꞌ bíꞌidoꞌ caní.
Ca ral-laꞌ uniti loruꞌ böchiꞌ luzáꞌaruꞌ
(Lc. 17:3)
15 Gunnë́ꞌ caꞌ Jesús:
―Channö böchiꞌ luzóꞌo guáꞌ döꞌ quiuꞌ,
guyéajtsöcaꞌ,
en yöjcáꞌanalenëꞌ tsahuiꞌ laꞌ libíꞌisiliꞌ.
Channö uzë́ náguiëꞌ liꞌ,
chibuguéluꞌu böchiꞌ luzóꞌo.
16 Channö cabí uzë́ náguiëꞌ xtídzuꞌu,
guchë́ꞌë iaꞌtúëꞌ o iaꞌchopëꞌ bönniꞌ para urúaj li xtídzuꞌu lógaquiëꞌ chopa tsonnëꞌ bönniꞌ,
nupa gaca ilún ba nalí que xtídzaꞌliꞌ.
17 Channö cabí uzë́ náguiëꞌ xtídzaꞌgaquiëꞌ,
gudxi caꞌ bönachi tuꞌdubi tuꞌsëdi queëꞌ Dios,
en channö cabí uzë́ náguiëꞌ xtídzaꞌgaca bönachi naꞌ,
níꞌirö bönniꞌ naꞌ gáquiëꞌ quiuꞌ ca tu bönniꞌ bitiꞌ réajlëꞌë Dios,
en ca tu bönniꞌ ruquízxjëꞌ uláz que yödzö ziꞌtuꞌ.
18 ’Le nácatë reaꞌ libíꞌiliꞌ,
yúguꞌtë le inná bë́ꞌëliꞌ lu yödzölió ni,
naca le chigunná bëꞌë Dios yehuaꞌ yubá,
ateꞌ yúguꞌtë le güíꞌiliꞌ lataj lu yödzölió ni,
naca le chibë́ꞌë lataj Dios yehuaꞌ yubá.
19 ’Lëscaꞌ caní reaꞌ libíꞌiliꞌ,
channö chópasiliꞌ gun tuz xtídzaꞌliꞌ lu yödzölió ni ca naca tu le inábiliꞌ-nëꞌ Dios,
gunëꞌ Xuz cazaꞌ Dios,
zoëꞌ yehuaꞌ yubá,
lë naꞌ rinábiliꞌ-nëꞌ.
20 Ga nacuáꞌ chopa tsonna nupa ni nudúbigaca quiaꞌ nedaꞌ,
zoa cazaꞌ nedaꞌ gatsaj láhuiꞌlö ga naꞌ nacuꞌë.
21 Níꞌirö gubíguiꞌë Pedro ga zoëꞌ Jesús,
en gunábinëꞌ Lëꞌ,
rnnëꞌ:
―Xan,
¿bál-laxitë luzuí ral-laꞌ uniti lahuaꞌ böchiꞌ luzáꞌa,
nu naꞌ ruáꞌ döꞌ quiaꞌ?
¿Naruꞌ gadxi luzuí?
22 Jesús rëꞌ lëꞌ:
―Nedaꞌ reaꞌ liꞌ,
calë́gasö gadxi luzuí,
pero idú tsónnalalaj yuꞌ chi cuía le naca gadxi luzuí.
Jesús rucúdzuꞌë didzaꞌ que tu bönniꞌ huen dxin bitiꞌ buniti lahuëꞌ luzë́ꞌë
23 Gunnë́ꞌ caꞌ Jesús:
―Iaꞌstú,
ca gun Nu naꞌ rinná bëꞌ yehuaꞌ yubá naca ca benëꞌ tu bönniꞌ rinná bëꞌë.
Gúꞌunnëꞌ ucáꞌanalenëꞌ tsahuiꞌ yuguꞌ bönniꞌ huen dxin queëꞌ.
24 Cateꞌ gusí lahuëꞌ rucáꞌanalenëꞌ légaquiëꞌ tsahuiꞌ,
dujuáꞌgaquiëꞌ ga zoëꞌ tu bönniꞌ ral-lëꞌë queëꞌ zián gayuáꞌ dumí.
25 Tuꞌ cabí guca quizxjëꞌ,
gunná bëꞌë xanëꞌ idóꞌogaquiëꞌ lëꞌ,
en nigula queëꞌ,
en yuguꞌ biꞌi queëꞌ,
en yúguꞌtë le dë queëꞌ,
ateꞌ níꞌirö gazxaj le ral-lëꞌë queëꞌ xanëꞌ naꞌ.
26 Níꞌirö bönniꞌ huen dxin naꞌ buzóa zxibëꞌ lahuëꞌ xanëꞌ,
en gunábinëꞌ lëꞌ,
rnnëꞌ:
“Xan,
ben zxön ládxuꞌu nedaꞌ.
Huaguizxaj cazaꞌ liꞌ idutë.”
27 Níꞌirö xanëꞌ naꞌ buéchiꞌ ládxëꞌë bönniꞌ huen dxin queëꞌ naꞌ,
en buniti lahuëꞌ lëꞌ lë naꞌ ral-lëꞌë queëꞌ,
ateꞌ busanëꞌ lëꞌ.
28 Cateꞌ burúajëꞌ bönniꞌ huen dxin naꞌ,
laꞌ yöjtságatëꞌ tu bönniꞌ rúnlenëꞌ lëꞌ tsözxö́n dxin,
ateꞌ bönniꞌ naꞌ ral-lëꞌë queëꞌ látiꞌdoꞌos dumí.
Níꞌirö guzxönëꞌ lëꞌ,
en guzxínnajëꞌ yenëꞌ,
ateꞌ rëꞌ lëꞌ:
“Gudízxjatë lë naꞌ ral-luꞌu quiaꞌ.”
29 Níꞌirö luzë́ꞌë naꞌ buzóa zxibëꞌ lahuëꞌ,
en gunaba yechë́ꞌë lahuëꞌ,
rnnëꞌ:
“Ben zxön ládxuꞌu nedaꞌ.
Huaguizxaj cazaꞌ liꞌ idutë.”
30 Bitiꞌ gúꞌunnëꞌ bönniꞌ huen dxin naꞌ,
ateꞌ yöjluꞌë lëꞌ lidxi guíë dza quízxjarëꞌ lë naꞌ ral-lëꞌë queëꞌ.
31 Cateꞌ bilaꞌléꞌenëꞌ lë ni iaꞌzícaꞌrëꞌ huen dxin,
buluꞌhuíꞌinideꞌenëꞌ niꞌa queëꞌ,
ateꞌ yöjtíxjöiꞌiguequinëꞌ xángaquiëꞌ yúguꞌtë lë naꞌ guca.
32 Níꞌirö xángaquiëꞌ bulidzëꞌ bönniꞌ huen dxin naꞌ,
ateꞌ rëꞌ lëꞌ:
“Liꞌ,
huen dxin catsahuiꞌ.
Yúguꞌtë dumí naꞌ gúl-luꞌu quiaꞌ buniti lahuaꞌ liꞌ.
Busúluaꞌ lë naꞌ gúl-luꞌu quiaꞌ tuꞌ gunaba yechuꞌu lahuaꞌ.
33 ¿Naruꞌ cabí ral-laꞌ huéchiꞌ ládxuꞌu caꞌ luzóꞌo ca naꞌ benaꞌ nedaꞌ,
buéchiꞌ ládxaꞌa liꞌ?”
34 Níꞌirö gulédeꞌenëꞌ xanëꞌ,
en budödëꞌ lëꞌ lu náꞌagaca nupa uluꞌsacaꞌ ziꞌ lëꞌ dza quízxjarëꞌ idútë le ral-lëꞌë queëꞌ.
35 Níꞌirö rnnëꞌ Jesús:
―Lëscaꞌ caní gunëꞌ Xuzaꞌ zoëꞌ yehuaꞌ yubá queë́liꞌ channö cabí uniti loliꞌ idú ládxiꞌliꞌ yuguꞌ böchiꞌ luzáꞌaliꞌ.