Ridzáꞌ ca naláꞌ lahuëꞌ Jesús
17
Gudödi xopa dza,
Jesús gudélëꞌë Pedro len Jacobo,
en Juan,
bö́chëꞌë Jacobo naꞌ,
en guchë́ꞌë légaquiëꞌ,
ateꞌ yöjáquiëꞌ quez tu lu guíꞌa sibi.
2 Niꞌ bidzáꞌ ca naláꞌ lahuëꞌ Jesús lógaquiëꞌ.
Guyëpi yösa beníꞌ lahuëꞌ Jesús ca ruzeníꞌ gubidza,
ateꞌ lariꞌ nácuëꞌ böáca chiguíchidoꞌos ca beníꞌ.
3 Níꞌirö bilaꞌléꞌenëꞌ bönniꞌ usëda queëꞌ buluíꞌi lógaquiëꞌ Moisés,
en Elías,
ateꞌ tuíꞌilenëꞌ Jesús didzaꞌ.
4 Níꞌirö Pedro rëꞌ Jesús:
―Xan,
naca dxiꞌa zóaruꞌ ni.
Channö rë́ꞌënuꞌ,
gunaꞌ ni tsonna yuꞌu lágaꞌdoꞌ,
tu quiuꞌ,
iaꞌtú queëꞌ Moisés,
en iaꞌtú queëꞌ Elías.
5 Tsanni niꞌ ruꞌë Pedro didzaꞌ ni,
laꞌ gurö́ꞌötë tu böaj beníꞌ le guzxóa légaquiëꞌ,
ateꞌ lu böaj naꞌ biyö́n chiꞌi nu rnna:
―Bönniꞌ ni Zxíꞌini cazaꞌ.
Nadxíꞌidaꞌ-nëꞌ,
en raza ládxaꞌa Lëꞌ.
Buliꞌzë́ nágaliꞌ didzaꞌ guꞌë.
6 Cateꞌ bilaꞌyönnëꞌ bönniꞌ usëda queëꞌ chiꞌi naꞌ,
gulaꞌdzöꞌë gusurúꞌalö,
en guladxi bilaꞌdzö́binëꞌ.
7 Níꞌirö gubíguiꞌë Jesús ga naꞌ nacuꞌë,
ateꞌ gudanëꞌ légaquiëꞌ,
rnnëꞌ:
―Guliꞌchasa.
Bitiꞌ gádxiliꞌ.
8 Cateꞌ gulaꞌchisa lógaquiëꞌ,
en buluꞌyúëꞌ,
cúnturö nu bilaꞌléꞌenëꞌ,
pero tuzëꞌ Jesús.
9 Cateꞌ niꞌ tuꞌdínniëꞌ lu guíꞌa naꞌ,
Jesús gunná béꞌenëꞌ légaquiëꞌ,
rnnëꞌ:
―Cuntu nu guië́liꞌ ca guca lë ni biléꞌeliꞌ cateꞌ ubanraꞌ lu yöl-laꞌ guti nedaꞌ,
Bönniꞌ Guljëꞌ Bönachi.
10 Níꞌirö yuguꞌ bönniꞌ usëda queëꞌ gulaꞌnábinëꞌ Lëꞌ,
taꞌnnë́ꞌ:
―¿Bizx que taꞌnnë́ꞌ bönniꞌ yudoꞌ usëdi run bayudxi uluíꞌi lahuëꞌ Elías zíꞌalö ca uluíꞌi lahuëꞌ Cristo?
11 Bubiꞌë didzaꞌ Jesús,
rëꞌ légaquiëꞌ:
―Le nácatë uluíꞌi lo cazëꞌ zíꞌalö Elías,
en ucáꞌanëꞌ tsahuiꞌ yúguꞌtë.
12 Nedaꞌ reaꞌ libíꞌiliꞌ:
“Chibuluíꞌi lahuëꞌ Elías naꞌ,
pero bitiꞌ buluꞌúnbëꞌë lëꞌ,
ateꞌ yúguꞌtë ca rnnasö quégaquiëꞌ gulunëꞌ queëꞌ.”
Lëscaꞌ caní ilunëꞌ quiaꞌ nedaꞌ,
Bönniꞌ Guljëꞌ Bönachi,
uluꞌsacaꞌ ziꞌë nedaꞌ.
13 Níꞌirö gulaꞌyéajniꞌinëꞌ bönniꞌ usëda queëꞌ,
bë́ꞌlenëꞌ Jesús légaquiëꞌ didzaꞌ ca guca queëꞌ Juan,
bönniꞌ naꞌ buquilëꞌ bönachi nisa.
Ruúnëꞌ-biꞌ Jesús tubiꞌ biꞌi bönniꞌ réꞌebiꞌ xjoteꞌ
14 Cateꞌ bilaꞌdxinëꞌ ga naꞌ nacuáꞌ bönachi zián,
gubíguiꞌë tu bönniꞌ ga zoëꞌ Jesús,
ateꞌ buzóa zxibëꞌ lahuëꞌ Lëꞌ,
15 en rëꞌ Lëꞌ:
―Xan,
buéchiꞌ ladxiꞌ-biꞌ biꞌi bö́nniꞌdoꞌ quiaꞌ,
tuꞌ réꞌebiꞌ xjoteꞌ,
en riguíꞌi rizácaꞌdaꞌabiꞌ,
ateꞌ zián luzuí ridzö́ꞌöbiꞌ lu guíꞌ o lu nisa.
16 Chidiguáꞌa-biꞌ lógaquiëꞌ bönniꞌ usëda quiuꞌ pero bitiꞌ guca uluꞌúnëꞌ-biꞌ.
17 Bubiꞌë didzaꞌ Jesús,
rnnëꞌ:
―Libiꞌiliꞌ,
bönachi cabí réajlëꞌëliꞌ,
en bitiꞌ nácaliꞌ tsahuiꞌ.
¿Gácaꞌxte caz ral-laꞌ sóalenaꞌ libíꞌiliꞌ para tséajlëꞌëliꞌ nedaꞌ?
¿Gácaꞌxte caz ral-laꞌ guáꞌ ilenaꞌ queë́liꞌ?
Guliꞌdiguáꞌ-biꞌ quiaꞌ ni.
18 Níꞌirö Jesús buzenëꞌ le bach böꞌ xihuiꞌ naꞌ yuꞌu lëbiꞌ,
ateꞌ laꞌ burúajtë lëbiꞌ,
ateꞌ laꞌ náꞌasö böácatëbiꞌ biꞌi bö́nniꞌdoꞌ naꞌ.
19 Níꞌirö,
yuguꞌ bönniꞌ usëda queëꞌ Jesús gulaꞌbiguëꞌë quez ga zoëꞌ,
ateꞌ gulaꞌnábinëꞌ Lëꞌ,
taꞌnnë́ꞌ:
―¿Bizx que naꞌ bitiꞌ guca ubéajtuꞌ netuꞌ böꞌ xihuiꞌ naꞌ?
20 Jesús rëꞌ légaquiëꞌ:
―Bitiꞌ guzxéquiꞌliꞌ tuꞌ cabí réajlëꞌëliꞌ Dios idú ládxiꞌliꞌ.
Le nácatë reaꞌ libíꞌiliꞌ,
sal-laꞌ cuídiꞌsö naca yöl-laꞌ réajlëꞌ queë́liꞌ Dios,
nácatë ca tu xisedoꞌ mostaza,
huáca guië́liꞌ guíꞌadoꞌ ni:
“Gucuíta ni,
en yöjsóa níꞌilö”,
ateꞌ laꞌ icuítatë guíꞌadoꞌ naꞌ.
Bitiꞌ bi zoa le cabí gaca gunliꞌ channö réajlëꞌëliꞌ Dios idú ládxiꞌliꞌ.
21 Tu böꞌ xihuiꞌ caní gácasö ubéajliꞌ channö ulídzaliꞌ-nëꞌ Dios,
en gunliꞌ gubasa.
Riguíxjöꞌë Jesús leyúbölö ca siꞌ ilútiëꞌ Lëꞌ
22 Tsanni niꞌ taꞌdë́ꞌ luyú Galilea,
Jesús gudxëꞌ yuguꞌ bönniꞌ usëda queëꞌ,
rnnëꞌ:
―Zoa nu udödi nedaꞌ,
Bönniꞌ Guljëꞌ Bönachi,
lu náꞌagaca bönachi.
23 Ilútiëꞌ nedaꞌ,
pero cateꞌ gaca tsonna dza Dios usubanëꞌ nedaꞌ.
Níꞌirö buluꞌhuíꞌinnëꞌ bönniꞌ usëda queëꞌ.
Jesús riguizxaj lazëꞌ que yudoꞌ
24 Cateꞌ buluꞌdxinëꞌ Jesús,
en yuguꞌ bönniꞌ usëda queëꞌ lu yödzö Capernaum,
bilaꞌdxinëꞌ yuguꞌ bönniꞌ tuꞌquizxjëꞌ bönachi lázagaca que yudoꞌ ga zoëꞌ Pedro,
ateꞌ tëꞌ lëꞌ:
―¿Naruꞌ cabí quizxaj lazëꞌ que yudoꞌ bönniꞌ rusédinëꞌ libíꞌiliꞌ?
25 Bubiꞌë didzaꞌ Pedro,
rnnëꞌ:
―Ön,
huaguizxjëꞌ.
Cateꞌ buáziëꞌ Pedro lu yuꞌu,
Jesús laꞌ bulidztëꞌ lëꞌ,
en rëꞌ lëꞌ:
―¿Nacxi rusacaꞌ quiuꞌ,
Simón?
Bönniꞌ taꞌnná bëꞌë luyú ni,
¿nupxi tuꞌquizxjëꞌ le riguizxaj laz,
en lazxaj que yu?
¿Naruꞌ tuꞌquizxjëꞌ bönachi uládz quégaquiëꞌ o bönachi izáꞌa?
26 Bubiꞌë didzaꞌ Pedro,
rëꞌ Lëꞌ:
―Bönachi izáꞌa tuꞌquizxjëꞌ.
Níꞌirö Jesús rëꞌ lëꞌ:
―Que lë ni naꞌ,
bitiꞌ run bayudxi quizxaj lazaꞌ que yudoꞌ tuꞌ nacaꞌ Zxíꞌinëꞌ Dios ca naꞌ bitiꞌ bi taꞌguízxaj nupa nácagaca bönachi uládz queëꞌ bönniꞌ naꞌ ruquízxjëꞌ.
27 Naꞌa,
para cuntu nu gun leruꞌ,
guyéaj raꞌ nísadoꞌ,
yöjzalaj lu nisa le rizö́ninuꞌ-baꞌ böla,
ateꞌ böla cuejuꞌ-baꞌ zíꞌalö,
guzxíꞌi-baꞌ.
Cateꞌ isaljuꞌ ruáꞌabaꞌ,
niꞌ idzö́linuꞌ tu dumí lásidoꞌ.
Guzxíꞌi le,
ateꞌ gudizxaj lazaꞌ,
en lazuꞌ.