DIDZAꞌ DXIꞌA BUZÚAJËꞌ MARCOS
Libán benëꞌ Juan, bönniꞌ buquilëꞌ bönachi nisa
1
Caní gusí lo didzaꞌ dxiꞌa ca guca queëꞌ Jesucristo,
Zxíꞌinëꞌ Dios.
2 Budxín lë naꞌ buzúajëꞌ lu guichi Isaías,
bönniꞌ bëꞌë didzaꞌ uláz queëꞌ Dios,
le gunnë́ꞌ Dios:
Buyútsöcaꞌ,
risö́l-laꞌa bönniꞌ gubáz quiaꞌ,
inö́ruëꞌ Loꞌ.
Lëꞌ upë́ꞌë nöza ga töduꞌ.
3 Yön chiꞌë tu bönniꞌ ulidzëꞌ zidzaj lu lataj cáꞌasö,
innë́ꞌ:
“Buliꞌpáꞌa nöza para idxín Xanruꞌ yichaj lázxdoꞌoliꞌ.
Buliꞌbéaj li yuguꞌ nöza lasi ga tödëꞌ.”
4 Caní budxín,
tuꞌ ruquilëꞌ Juan bönachi nisa lu lataj cáꞌasö,
en runëꞌ libán para ilaꞌdila bönachi nisa,
bönniꞌ naꞌ buluꞌbíꞌi ládxiꞌgaquiëꞌ para uniti lahuëꞌ Dios dul-laꞌ nabágaꞌgaquiëꞌ.
5 Bilaꞌrúaj bönachi zián yúguꞌtë yödzö luyú Judea,
encaꞌ yödzö Jerusalén,
en yöjáquiëꞌ ga naꞌ zoëꞌ Juan,
ateꞌ Juan naꞌ buquilëꞌ légaquiëꞌ nisa lu yegu Jordán,
bönniꞌ naꞌ gulaꞌxóalëpëꞌ dul-laꞌ nabágaꞌgaquiëꞌ.
6 Nácuëꞌ Juan lariꞌ néquini lítsaꞌbaꞌ böaꞌ,
en núguëꞌë lëꞌë tu guídi.
Rahuëꞌ-baꞌ bö́chiꞌzu,
en reꞌjëꞌ le zxixi que buzdoꞌ.
7 Runëꞌ Juan libán,
rnnëꞌ:
―Siꞌ zëꞌë bönniꞌ tödi naꞌa,
náparëꞌ yöl-laꞌ unná bëꞌ ca nedaꞌ.
Bitiꞌ nacaꞌ nedaꞌ lesacaꞌ yéchuaꞌ,
para ilecjaꞌ xiráchuëꞌ nudë́ꞌë.
8 Nedaꞌ ruquilaꞌ libíꞌiliꞌ nisa,
pero Lëꞌ gunëꞌ le ruluíꞌisö yöl-laꞌ ridila nisa ni,
uchíziëꞌ libíꞌiliꞌ Dios Böꞌ Láꞌayi.
Ridilëꞌ Jesús nisa
9 Tu dza niꞌ birúajëꞌ Jesús yödzö Nazaret luyú Galilea,
ateꞌ Juan naꞌ buquilëꞌ Lëꞌ nisa lu yegu Jordán.
10 Cateꞌ burúajëꞌ Jesús lu nisa,
laꞌ náꞌasö biléꞌenëꞌ guyalaj lúzxiba,
en ruhuötjëꞌ Dios Böꞌ Láꞌayi,
ruluíꞌi cuinëꞌ ca tubaꞌ guꞌdödoꞌ,
en bidisóalenëꞌ Lëꞌ.
11 Biyö́n chiꞌi nu ruíꞌi didzaꞌ yehuaꞌ yubá,
rnna:
―Liꞌ nacuꞌ Zxíꞌinaꞌ.
Nadxíꞌidaꞌ Liꞌ,
en raza ládxaꞌa Liꞌ.
Rë́ꞌëni tuꞌ xihuiꞌ gun ga ibáguëꞌë Jesús dul-laꞌ
12 Níꞌirö Dios Böꞌ Láꞌayi guchë́ꞌë Jesús bayudxi lu lataj cáꞌasö.
13 Guzóëꞌ Jesús lataj cáꞌasö naꞌ idú choáꞌ dza,
ateꞌ gúꞌuni Satanás tuꞌ xihuiꞌ gun ga ibáguëꞌë Jesús dul-laꞌ.
Guzóëꞌ Jesús ga niꞌ taꞌdabaꞌ böaꞌ guixiꞌ dzö́ꞌöbaꞌ guíꞌadoꞌ.
Yuguꞌ gubáz láꞌayi queëꞌ Dios gulácalenëꞌ Jesús,
en gulaꞌguꞌë le gudahuëꞌ.
Rusédinëꞌ Jesús bönachi luyú Galilea
14 Gudödi gulaꞌguꞌë Juan naꞌ lidxi guíë,
saꞌyéajëꞌ Jesús luyú Galilea.
Runëꞌ libán niꞌ que didzaꞌ dxiꞌa ca rinná bëꞌë Dios.
15 Caní rnnëꞌ:
―Chibidxín dza.
Chizóa idinná bëꞌë Dios.
Buliꞌbíꞌi ládxiꞌliꞌ,
en guliꞌtséajlëꞌ didzaꞌ dxiꞌa ni.
Rulidzëꞌ Jesús tapëꞌ bönniꞌ uzxö́n böla
16 Tsanni niꞌ ridë́ꞌ Jesús raꞌ nísadoꞌ luyú Galilea,
biléꞌenëꞌ Simón len Andrés,
bönniꞌ bö́chëꞌë Simón naꞌ.
Nácagaquiëꞌ uzxö́n böla,
en taꞌchiljëꞌ yöxaj böla quégaquiëꞌ lu nisa naꞌ.
17 Jesús gudxëꞌ légaquiëꞌ,
rnnëꞌ:
―Guliꞌdutáꞌ nedaꞌ,
ateꞌ gunaꞌ ga ichë́ꞌëliꞌ bönachi quiaꞌ nedaꞌ,
gunliꞌ ca runliꞌ rizönliꞌ-baꞌ böla.
18 Laꞌ buluꞌcáꞌanatëꞌ yöxaj quégaquiëꞌ,
en söjácalenëꞌ Jesús.
19 Gudödëꞌ Jesús iaꞌlátiꞌdoꞌ níꞌilö,
ateꞌ biléꞌenëꞌ Jacobo,
en Juan,
yuguꞌ zxíꞌinëꞌ Zebedeo,
nacuꞌë lëꞌe bárcodoꞌ quégaquiëꞌ,
tuꞌúnëꞌ yöxaj böla quégaquiëꞌ.
20 Jesús laꞌ bulidztëꞌ légaquiëꞌ,
ateꞌ buluꞌcáꞌanëꞌ xúzgaquiëꞌ Zebedeo,
dzáguiëꞌ yuguꞌ huen dxin queëꞌ lëꞌe bárcodoꞌ naꞌ,
ateꞌ söjácalenëꞌ Jesús.
Tu bönniꞌ yuꞌu lëꞌ böꞌ xihuiꞌ
21 Bilaꞌdxinëꞌ Jesús,
en yuguꞌ bönniꞌ dáꞌgaquiëꞌ Lëꞌ lu yödzö Capernaum.
Cateꞌ niꞌ naca dza láꞌayi quégaquiëꞌ bönniꞌ judío,
guyáziëꞌ Jesús yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios,
ateꞌ gusí lahuëꞌ rusédinëꞌ nupa nudúbigaca niꞌ.
22 Buluꞌbáninëꞌ ca naꞌ rusédinëꞌ Jesús,
tuꞌ rusédinëꞌ ca runëꞌ tu bönniꞌ dë lu nëꞌë,
en calëga ca tunëꞌ bönniꞌ yudoꞌ usëdi.
23 Zóatëꞌ caꞌ tu bönniꞌ yuꞌu lëꞌ böꞌ xihuiꞌ lu yuꞌu ga naꞌ tuꞌdubëꞌ tuꞌsëdëꞌ queëꞌ Dios,
ateꞌ gurö́dxiꞌë bönniꞌ naꞌ,
rnnëꞌ:
24 ―¿Bizxi rál-laꞌtuꞌ quiuꞌ,
Jesús,
bönniꞌ Nazaret?
¿Zaꞌtsuꞌ usunítiuꞌ netuꞌ?
Núnbëꞌa Liꞌ,
nacuꞌ Bönniꞌ Láꞌayi queëꞌ Dios.
25 Jesús buzenëꞌ le bach,
rnnëꞌ:
―Busayaj ruꞌu,
en burúaj lu bönniꞌ ni.
26 Níꞌirö böꞌ xihuiꞌ naꞌ buxízidaꞌ bönniꞌ naꞌ yuꞌu lëꞌ,
ateꞌ gurö́dxiꞌa zidzaj,
en laꞌ burúajtë.
27 Buluꞌbáninëꞌ yúguꞌtë bönniꞌ nacuꞌë niꞌ,
ateꞌ gulaꞌnabi luzë́ꞌegaquiëꞌ,
taꞌnnë́ꞌ:
―¿Bizxi caz lë ni?
¿Naruꞌ nácatsö xibá cubi?
¡Len yöl-laꞌ unná bëꞌ rinná béꞌenëꞌ yuguꞌ böꞌ xihuiꞌ,
ateꞌ tun ca rnnëꞌ!
28 Laꞌ guzëtë didzaꞌ que yöl-laꞌ huáca queëꞌ Jesús,
ateꞌ bilaꞌyöni bönachi idútë luyú Galilea naꞌ.
Ruúnëꞌ Jesús xináꞌanu nigula queëꞌ Pedro
29 Níꞌirö burúajëꞌ Jesús lu yuꞌu ga naꞌ tuꞌdubëꞌ tuꞌsëdëꞌ queëꞌ Dios,
en laꞌ guyéajlentëꞌ Jacobo,
en Juan,
ateꞌ bilaꞌdxinëꞌ lídxigaquiëꞌ Simón,
en Andrés.
30 Niꞌ dënu xináꞌanu nigula queëꞌ Pedro,
yúꞌunu tu xilá.
Laꞌ gulaꞌguíxjöiꞌitenëꞌ Jesús ca raca queë́nu.
31 Níꞌirö gubíguiꞌë Jesús,
ateꞌ gudélëꞌë náꞌanu,
en guchisëꞌ-nu.
Laꞌ burúajtë tu xilá naꞌ yúꞌunu,
ateꞌ bupáꞌanu le gulahuëꞌ.
Ruúnëꞌ Jesús zián nupa teꞌe
32 Cateꞌ chiridzö́ꞌ,
ca gudxía gubidza,
laꞌ dujuáꞌgacatëꞌ yúguꞌtë nupa teꞌe,
en yuguꞌ bönniꞌ yuꞌu légaquiëꞌ böꞌ xihuiꞌ ga zoëꞌ Jesús.
33 Yúguꞌtë bönachi lu yödzö bilaꞌguírö ga nu riyaza yuꞌu ga naꞌ zoëꞌ Jesús.
34 Jesús bunëꞌ zián nupa teꞌe,
naca zián yödzöhuë́ꞌ téꞌenëꞌ.
Bubéajëꞌ caꞌ zián böꞌ xihuiꞌ yúꞌugaca bönachi naꞌ.
Bitiꞌ bëꞌë lataj ilaꞌnnë́ böꞌ xihuiꞌ naꞌ tuꞌ núnbëꞌgaca Lëꞌ Nu náquiëꞌ.
Runëꞌ libán Jesús luyú Galilea
35 Zíꞌacadoꞌ guyasëꞌ Jesús,
niꞌ naca chul-la.
Burúajëꞌ yödzö naꞌ,
en saꞌyéajëꞌ tu lataj cáꞌasö,
ateꞌ niꞌ bulidzëꞌ Dios.
36 Simón,
en nupa nacuáꞌlen lëꞌ söjdíljagaquiëꞌ Jesús.
37 Cateꞌ yöjxácaꞌgaquiëꞌ Lëꞌ,
tëꞌ Lëꞌ:
―Yúguꞌtë bönachi tuꞌguílaj Liꞌ.
38 Níꞌirö Jesús gudxëꞌ légaquiëꞌ,
rnnëꞌ:
―Uyéajruꞌ yuguꞌ dzaga yödzö,
para gunaꞌ caꞌ libán niꞌ.
Que lë ni naꞌ birúajaꞌ.
39 Caní guca,
gudödëꞌ Jesús idú luyú Galilea,
runëꞌ libán lu yuꞌu gapa tuꞌdubëꞌ bönniꞌ judío,
tuꞌsë́dinëꞌ queëꞌ Dios,
ateꞌ rubéajëꞌ böꞌ xihuiꞌ yúꞌugaca bönachi.
Tu bönniꞌ réꞌenëꞌ huëꞌ nudzuꞌ ruzödi
40 Tu bönniꞌ réꞌenëꞌ huëꞌ nudzuꞌ ruzödi bidxinëꞌ ga zoëꞌ Jesús.
Buzóa zxibëꞌ,
en gútaꞌyuëꞌ lahuëꞌ,
rnnëꞌ:
―Channö rë́ꞌënuꞌ,
huáca unuꞌ nedaꞌ.
41 Jesús buéchiꞌ ládxëꞌë lëꞌ.
Bulí nëꞌë,
gudanëꞌ lëꞌ,
en gudxëꞌ lëꞌ:
―Rë́ꞌëndaꞌ.
Chinuhuöácuꞌ.
42 Ca gunnë́ꞌ caꞌ,
laꞌ bunítitë huëꞌ réꞌenëꞌ,
en böáquiëꞌ dxíꞌadoꞌ.
43 Níꞌirö Jesús buzenëꞌ bach bönniꞌ naꞌ,
en laꞌ busö́l-laꞌtëꞌ lëꞌ.
44 Caní gudxëꞌ lëꞌ:
―Cuntu nu guíoꞌ ca benaꞌ quiuꞌ,
pero guyéaj,
yöjluíꞌi cuinuꞌ lahuëꞌ bixúz,
en yöjnödzaj para le böácanuꞌ liꞌ que yudoꞌ ca naꞌ gunná bëꞌë Moisés,
lë naꞌ uluíꞌi bönachi chinuhuöácuꞌ.
45 Burúajëꞌ bönniꞌ ni,
en gusí lahuëꞌ riguíxjöiꞌinëꞌ bönachi zián ca guca queëꞌ.
Tuꞌ buzë́ꞌ didzaꞌ ni,
bítiꞌrö guca tsáziëꞌ Jesús yálajdoꞌ tu lu yödzö,
pero guzóasëꞌ níꞌilö gapa naca lu lataj cáꞌasö.
Bönachi yúguꞌtë yödzö bilaꞌdxín ga naꞌ zoëꞌ Jesús.