Satanás tuꞌ xihuiꞌ rë́ꞌëni usubagaꞌ Jesús dul-laꞌ
4
Buzë́ꞌë Jesús raꞌ yegu Jordán,
zóalenëꞌ Dios Böꞌ Láꞌayi Lëꞌ,
ateꞌ Dios Böꞌ Láꞌayi naꞌ guchë́ꞌë Jesús lu lataj cáꞌasö.
San Lucas 4:1-30
2 Guzóëꞌ Jesús niꞌ idú ca choáꞌ dza,
ateꞌ gúꞌuni tuꞌ xihuiꞌ usubagaꞌ Jesús dul-laꞌ.
Bitiꞌ bi gudahuëꞌ Jesús yuguꞌ dza naꞌ,
ateꞌ gudödi niꞌ ridunëꞌ.
3 Níꞌirö tuꞌ xihuiꞌ naꞌ gudxi Jesús,
rnna:
―Channö naca cazuꞌ Liꞌ Zxíꞌinëꞌ Dios,
gunnátsöcaꞌ uluꞌhuöáca guiö́j ni yöta xtila.
4 Bubiꞌë didzaꞌ Jesús,
rëꞌ le:
―Nazúaj lu guichi,
rnna:
“Calë́gasö yöta xtila nabánigaca bönachi,
pero nabánigaca caꞌ yúguꞌtë xtídzëꞌë Dios.”
5 Níꞌirö guchë́ꞌ tuꞌ xihuiꞌ naꞌ Jesús ga naca tu lu guíꞌa sibi ateꞌ tu chíꞌidoꞌosö buluíꞌi Lëꞌ yúguꞌtë xilátjagaca nupa taꞌnná bëꞌ yödzölió.
6 Tuꞌ xihuiꞌ naꞌ rë Jesús,
rnna:
―Gunnaꞌ quiuꞌ yúguꞌtë xilátjagaca nupa taꞌnná bëꞌ ni,
en yöl-laꞌ tsahuiꞌ quéguequi,
tuꞌ nadödi lu naꞌa yúguꞌtë lë ni,
ateꞌ nu rë́ꞌënisidaꞌ ruáꞌa que.
7 Channö Liꞌ uzóa zxibuꞌ lahuaꞌ,
en gunuꞌ nedaꞌ zxön,
yúguꞌtë lë ni guequi quiuꞌ.
8 Bubiꞌë didzaꞌ Jesús,
rëꞌ le:
―Gucuita ga zoaꞌ,
Satanás,
tuꞌ nazúaj lu guichi láꞌayi le rë netuꞌ,
rnna:
“Xanuꞌ Dios tseaj ládxuꞌu-nëꞌ,
en tuzëꞌ Lëꞌ gunuꞌ xichinëꞌ.”
9 Níꞌirö tuꞌ xihuiꞌ naꞌ guchë́ꞌ Jesús Jerusalén,
ateꞌ budxía Lëꞌ lu zöꞌö ícjoꞌolö yudoꞌ,
en rë Lëꞌ:
Dios isö́l-lëꞌë gubáz láꞌayi queëꞌ,
ilácalenëꞌ Liꞌ.
11 Lu náꞌagaquiëꞌ uluꞌchisëꞌ Liꞌ para cabí tsöjchéguꞌu guiö́j,
en bitiꞌ gunuꞌ ziꞌ niꞌu.
12 Bubiꞌë didzaꞌ Jesús,
rëꞌ le:
―Nazúaj lu guichi láꞌayi le rë netuꞌ:
“Bitiꞌ siꞌ bëꞌu Xanuꞌ Dios.”
13 Cateꞌ bitiꞌ budzöli tuꞌ xihuiꞌ naꞌ iaꞌtú le siꞌ bëꞌ Jesús,
buzáꞌ ga zoëꞌ tu chíꞌidoꞌ.
Risí lahuëꞌ Jesús runëꞌ xichinëꞌ luyú Galilea
14 Bö́ajëꞌ Jesús luyú Galilea,
dë lu nëꞌë yöl-laꞌ huáca queëꞌ Dios Böꞌ Láꞌayi.
Guzë́ didzaꞌ ca naca queëꞌ,
ateꞌ bilaꞌyöni bönachi nacuáꞌ yúguꞌtë yödzö idú gásibiꞌilö.
15 Busédinëꞌ Jesús bönachi gapa naca lu yuꞌu ga tuꞌdubëꞌ tuꞌsëdëꞌ bönniꞌ judío queëꞌ Dios,
ateꞌ yúguꞌtë bönachi gulún Lëꞌ zxön.
Le benëꞌ Jesús yödzö Nazaret, ga naca ladzëꞌ
16 Níꞌirö budxinëꞌ Jesús yödzö Nazaret ga niꞌ guzxönëꞌ.
Cateꞌ bidxín dza láꞌayi quégaquiëꞌ bönniꞌ judío,
ca run cazëꞌ Jesús,
guyáziëꞌ lu yuꞌu ga tuꞌdubëꞌ tuꞌsëdëꞌ bönniꞌ judío queëꞌ Dios,
ateꞌ guzuínëꞌ para ulabëꞌ tu le nazúaj lu guichi láꞌayi.
17 Buluꞌdödëꞌ lu nëꞌë Jesús guichi ga naꞌ nazúaj didzaꞌ bëꞌë Isaías,
bönniꞌ bëꞌë didzaꞌ uláz queëꞌ Dios.
Cateꞌ gusaljëꞌ guichi naꞌ,
budzö́linëꞌ ga nazúaj lu guichi le rnna:
18 Zóalenëꞌ Böꞌ Láꞌayi queëꞌ Xanruꞌ nedaꞌ
tuꞌ nubéajëꞌ nedaꞌ quez queëꞌ
para usiyöndaꞌ bönachi yechiꞌ didzaꞌ dxiꞌa.
Gusö́l-lëꞌë nedaꞌ para unaꞌ nupa raca ziꞌ ládxiꞌdoꞌguequi,
en usiyöndaꞌ nupa nadzúngaca,
ca gaca uluꞌlágaca,
en únaꞌ bönachi nachul-la lóguequi,
en usöláꞌ bönachi zoa nu run léguequi ziꞌ,
19 en gunaꞌ libán que dza ruzáꞌ ládxëꞌë Xanruꞌ Dios quégaca bönachi.
20 Níꞌirö butubëꞌ Jesús guichi naꞌ,
en buguꞌë le lu nëꞌë bönniꞌ rapa chiꞌë yuguꞌ guichi láꞌayi,
ateꞌ guröꞌë.
Níꞌirö yúguꞌtë nupa nudúbigaca lu yuꞌu naꞌ gulaꞌnáꞌ Jesús .
21 Gusí lahuëꞌ Jesús rëꞌ légaquiëꞌ:
―Naꞌa dza ni zóaliꞌ libíꞌiliꞌ,
rudxín caz le nazúaj lu guichi ni.
22 Yúguꞌtëꞌ gulaꞌnnë́ꞌ dxiꞌa queëꞌ,
en buluꞌbáninëꞌ ca naca didzaꞌ dxiꞌa ruꞌë,
ateꞌ taꞌnnë́ꞌ:
―¿Naruꞌ calëga bönniꞌ ni zxíꞌinëꞌ José?
23 Jesús rëꞌ légaquiëꞌ,
rnnëꞌ:
―Nadxi huëliꞌ nedaꞌ lë ni taꞌnná bönachi,
le rnna:
“Liꞌ,
bönniꞌ ruún bönachi,
bun cuinuꞌ.”
Lëscaꞌ caní huëliꞌ nedaꞌ:
“Yuguꞌ le biyö́nituꞌ benuꞌ Capernaum,
ben caꞌ ga ni naca ladzuꞌ.”
24 Gunnë́ꞌ caꞌ Jesús:
―Le nácatë reaꞌ libíꞌiliꞌ,
channö zoëꞌ nu bönniꞌ ruꞌë didzaꞌ uláz queëꞌ Dios,
bitiꞌ tun bönachi uládz queëꞌ lëꞌ bal.
25 Le nácatë reaꞌ libíꞌiliꞌ,
gulaꞌcuáꞌanu zián nigula uzëbi luyú Israel yuguꞌ dza niꞌ zoëꞌ Elías,
bönniꞌ bëꞌë didzaꞌ uláz queëꞌ Dios,
cateꞌ niꞌ bitiꞌ gulaj guiö́j idú ca tsonna iz yuꞌ xopa beoꞌ,
ateꞌ guca gubín luyú naꞌ,
26 pero Dios bitiꞌ gusö́l-lëꞌë Elías naꞌ ga nacuáꞌanu nigula uzëbi nabábagacanu Israel,
pero gusö́l-lëꞌë lëꞌ ga naꞌ zóanu tu nigula uzëbi lu yödzö Sarepta,
le nababa yödzö Sidón.
27 Lëscaꞌ caní,
gulaꞌcuáꞌ zián nupa teꞌe huëꞌ nudzuꞌ ruzödi luyú Israel dza niꞌ zoëꞌ Eliseo,
bönniꞌ bëꞌë didzaꞌ uláz queëꞌ Dios,
pero bitiꞌ böáquiëꞌ nu bönniꞌ nútsëꞌë ladaj bönachi Israel naꞌ,
pero böáquiëꞌ tuzëꞌ Naamán,
bönniꞌ nababëꞌ luyú Siria.
28 Cateꞌ bilaꞌyönnëꞌ didzaꞌ ni,
gulaꞌlenëꞌ yúguꞌtë bönniꞌ nacuꞌë lu yuꞌu ga naꞌ tuꞌdubëꞌ tuꞌsëdëꞌ queëꞌ Dios.
29 Níꞌirö gulaꞌyasëꞌ,
en buluꞌbéajëꞌ Jesús níꞌilö raꞌ yödzö.
Gulaꞌchë́ꞌë Lëꞌ ga naca lëꞌe guíꞌa guiö́j ga naꞌ dë ládzagaquiëꞌ para uluꞌsuládzuëꞌ Lëꞌ ga naca lëꞌe guíꞌa guiö́j naꞌ.
30 Níꞌirö gudödëꞌ Jesús gatsaj láhuiꞌlö ga naꞌ nacuꞌë,
söhuö́ajtëꞌ.
Tu bönniꞌ yuꞌu lëꞌ böꞌ xihuiꞌ
31 Níꞌirö guyijëꞌ Jesús yödzö Capernaum luyú Galilea,
ateꞌ busédinëꞌ bönachi yuguꞌ dza láꞌayi quégaquiëꞌ bönniꞌ judío.
San Lucas 4:31-44
32 Buluꞌbáninëꞌ ca naca le rusédinëꞌ Jesús légaquiëꞌ,
tuꞌ bëꞌë didzaꞌ ca tu bönniꞌ dë lu nëꞌë yöl-laꞌ unná bëꞌ.
33 Zóatëꞌ caꞌ tu bönniꞌ yuꞌu lëꞌ böꞌ xihuiꞌ lu yuꞌu ga naꞌ tuꞌdubëꞌ tuꞌsëdëꞌ queëꞌ Dios,
ateꞌ bëꞌë zidzaj didzaꞌ,
34 rnnëꞌ:
―¡Busán netuꞌ!
¿Bizxi rálaꞌtuꞌ quiuꞌ,
Jesús,
bönniꞌ Nazaret?
¿Naruꞌ zoꞌo para usunítiuꞌ netuꞌ?
Núnbëꞌa Liꞌ Nu nacuꞌ.
Bönniꞌ Láꞌayi queëꞌ Dios nacuꞌ.
35 Jesús buzenëꞌ le bach böꞌ xihuiꞌ naꞌ,
en rëꞌ le:
―Busayaj ruꞌu,
en burúaj lu bönniꞌ ni.
Níꞌirö böꞌ xihuiꞌ naꞌ gurúꞌuna bönniꞌ naꞌ lu yu lógaca bönachi nacuáꞌ niꞌ.
Burúajtë lu bönniꞌ naꞌ,
en bítiꞌrö bi ben queëꞌ.
36 Buluꞌbáninëꞌ yúguꞌtëꞌ,
en guluꞌë didzaꞌ tuëꞌ len iaꞌtúëꞌ,
taꞌnnë́ꞌ:
―¿Bizxi didzaꞌ ni ruꞌë?
Len yöl-laꞌ unná bëꞌ,
en yöl-laꞌ huáca zxön rinná béꞌenëꞌ yuguꞌ böꞌ xihuiꞌ,
ateꞌ tuꞌrúajtë böꞌ xihuiꞌ naꞌ.
37 Guzë́ didzaꞌ ca naca queëꞌ Jesús,
ateꞌ bilaꞌyöni bönachi yúguꞌtë yödzö idú gásibiꞌilö.
Ruúnëꞌ Jesús xináꞌanu nigula queëꞌ Pedro
38 Níꞌirö guyasëꞌ Jesús,
en burúajëꞌ lu yuꞌu ga naꞌ tuꞌdubëꞌ tuꞌsëdëꞌ queëꞌ Dios,
ateꞌ guyáziëꞌ lidxëꞌ Simón.
Xináꞌanu nigula queëꞌ Simón naꞌ zóanu niꞌ,
en yúꞌunu xilá,
ateꞌ gulátaꞌyuëꞌ lahuëꞌ Jesús únëꞌ-nu.
39 Gubíguiꞌë Jesús ga naꞌ dënu,
ateꞌ bulidzëꞌ huëꞌ xilá naꞌ yúꞌunu.
Laꞌ birúajtë xilá naꞌ yúꞌunu,
ateꞌ laꞌ guyástënu,
en bë́ꞌënu le gulahuëꞌ.
Ruúnëꞌ Jesús zián nupa teꞌe
40 Cateꞌ chiribía gubidza,
yúguꞌtë nupa nacuáꞌlen léguequi nupa naꞌ teꞌe que queë́guequi yödzhuë́ꞌ bilaꞌdxín niꞌ,
ateꞌ dujuáꞌgaca léguequi ga naꞌ zoëꞌ Jesús.
Lëꞌ guxóa nëꞌë nupa naꞌ teꞌe,
en bunëꞌ léguequi.
41 Buluꞌrúaj caꞌ zián böꞌ xihuiꞌ yúꞌugaca bönachi teꞌe naꞌ.
Taꞌbö́dxiꞌa böꞌ xihuiꞌ naꞌ,
taꞌnná:
―Liꞌ nacuꞌ zxíꞌinëꞌ Dios.
Níꞌirö Jesús buzenëꞌ le bach yuguꞌ böꞌ xihuiꞌ naꞌ,
en bitiꞌ bëꞌë lataj ilaꞌnná,
tuꞌ nö́ziguequi náquiëꞌ Cristo.
Runëꞌ Jesús libán luyú Galilea
42 Cateꞌ zaꞌ reníꞌ iaꞌtú dza,
burúajëꞌ Jesús Capernaum naꞌ,
ateꞌ guyijëꞌ tu lataj cáꞌasö.
Bilaꞌdxín bönachi zián niꞌ,
tuꞌguílaj Jesús.
Cateꞌ bilaꞌdxinëꞌ ga naꞌ zoëꞌ,
gulë́ꞌëniguequinëꞌ uluꞌtsenëꞌ Lëꞌ,
para cabí uzë́ꞌë ga naꞌ nacuꞌë.
43 Níꞌirö Jesús gudxëꞌ légaquiëꞌ,
rnnëꞌ:
―Run bayudxi tsejaꞌ gapa nacuáꞌ iaꞌzícaꞌrö yödzö,
tsöjenaꞌ caꞌ libán niꞌ que didzaꞌ dxiꞌa ca rinná bëꞌë Dios.
Que lë ni naꞌ gusö́l-lëꞌë nedaꞌ ni.
44 Caní guca,
benëꞌ libán yuguꞌ yödzö luyú Galilea gapa naca lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios.