Rucúdzuꞌë didzaꞌ Jesús ca naca queëꞌ tu bönniꞌ guz
13
Laꞌ dza níꞌisö birúajëꞌ Jesús niuꞌ yuꞌu,
ateꞌ yöjchöꞌë raꞌ nísadoꞌ.
2 Tuꞌ bilaꞌdxín bönachi zián ga zoëꞌ Jesús,
gurenëꞌ tu lëꞌe bárcodoꞌ,
en guröꞌë niꞌ,
ateꞌ bönachi zián naꞌ gulaꞌcuáꞌ luyú bidxi raꞌ nísadoꞌ naꞌ.
3 Níꞌirö Jesús bë́ꞌlenëꞌ légaquiëꞌ didzaꞌ,
zián le busédinëꞌ légaquiëꞌ.
Bucúdzuꞌë didzaꞌ,
rnnëꞌ:
―Buliꞌyútsöcaꞌ,
birúajëꞌ tu bönniꞌ guz,
söjë́siëꞌ xisedoꞌ.
4 Tsanni niꞌ söjë́siëꞌ,
bal-la xisedoꞌ naꞌ gulasi raꞌ nöza,
ateꞌ bilaꞌdxinbaꞌ biguínnidoꞌ,
en gulë́ꞌajbaꞌ xisedoꞌ naꞌ.
5 Gulasi iaꞌzícaꞌrö xisedoꞌ naꞌ luyú ga röꞌö guiö́j,
ga naꞌ röꞌö látiꞌsö yu,
ateꞌ laꞌ gulaꞌlentë,
tuꞌ cabí rö́ꞌödaꞌ yu niꞌ.
6 Níꞌirö cateꞌ budzáꞌa gubidza,
lë naꞌ bësiëꞌ laꞌ gulaꞌcuáditë,
en gulaꞌbidxi,
tuꞌ cabí dë ga ilún luí.
7 Gulaꞌlén iaꞌzícaꞌrö xisedoꞌ naꞌ ga buluꞌlén lubá yötsiꞌ,
ateꞌ gulaꞌzxö́n lubá yötsiꞌ naꞌ,
en bilaꞌröli lë naꞌ bësiëꞌ,
en gulún ditaj le.
8 Gulasi iaꞌzícaꞌrö xisedoꞌ naꞌ ga naca luyú bëbu,
ateꞌ buluꞌnödzaj.
Bal-la lë naꞌ bësiëꞌ buluꞌnödzaj iaꞌtú gayuáꞌtërö caꞌ.
Iaꞌzícaꞌrö buluꞌnödzaj iaꞌtsónnalalaj caꞌ,
ateꞌ iaꞌzícaꞌrö buluꞌnödzaj iaꞌchí uruáꞌ caꞌ.
9 Nu zoa nagui,
en riyöni,
ral-laꞌ uzë́ nagui.
Le të́ꞌëni ilún le bucúdzuꞌë Jesús didzaꞌ
10 Níꞌirö bilaꞌdxinëꞌ bönniꞌ usëda queëꞌ Jesús ga zoëꞌ,
en gulaꞌnábinëꞌ Lëꞌ,
taꞌnnë́ꞌ:
―¿Bizx que ruíꞌilenuꞌ bönachi didzaꞌ yuguꞌ le rucúdzuꞌu didzaꞌ?
11 Bubiꞌë didzaꞌ Jesús,
en rëꞌ légaquiëꞌ:
―Dios ruꞌë libíꞌiliꞌ lataj tséajniꞌiliꞌ le nagachiꞌ ca rinná bëꞌë Lëꞌ yehuaꞌ yubá,
pero bönachi ni bitiꞌ të́ꞌëni ilaꞌyéajniꞌi.
12 Nu siꞌ xtídzëꞌë,
Dios unödzjëꞌ que iaꞌlatiꞌ,
ateꞌ gátaꞌdaꞌarö que,
pero nu bitiꞌ siꞌ le,
laꞌs dui le dë que udúa.
13 Que lë ni naꞌ ruíꞌilenaꞌ légaquiëꞌ didzaꞌ yuguꞌ le rucúdzuꞌa didzaꞌ,
tuꞌ tuꞌyúëꞌ pero bitiꞌ taꞌléꞌenëꞌ.
Taꞌyönnëꞌ pero bitiꞌ tuꞌzë́ nágagaquiëꞌ,
en bitiꞌ taꞌyéajniꞌinëꞌ.
14 Caní raca quégaquiëꞌ para gaca ca naꞌ gunnë́ꞌ Isaías,
bönniꞌ bëꞌë didzaꞌ uláz queëꞌ Dios,
gunnë́ꞌ:
Le nácatë yö́niliꞌ pero bitiꞌ tséajniꞌiliꞌ.
Uyuliꞌ ináꞌaliꞌ pero bitiꞌ iléꞌeliꞌ.
15 Caní raca tuꞌ nazidi ládxiꞌdoꞌgaca bönniꞌ ni,
en bitiꞌ bi riyaza icja nágagaquiëꞌ.
Nadzudiꞌ guiö́j lógaquiëꞌ,
para cabí ilaꞌléꞌenëꞌ len guiö́j lógaquiëꞌ naꞌ.
Bitiꞌ uluꞌzë́ nágagaquiëꞌ,
en bitiꞌ uluꞌzéajniꞌi ládxiꞌgaquiëꞌ,
en bitiꞌ uluꞌhuöáquiëꞌ quiaꞌ nedaꞌ
para gaca unaꞌ légaquiëꞌ.
16 ’Naꞌa,
bicaꞌ ba libíꞌiliꞌ,
tuꞌ riléꞌe guiö́j loliꞌ,
en riyöni nágaliꞌ.
17 Le nácatë reaꞌ libíꞌiliꞌ,
zián bönniꞌ guluꞌë didzaꞌ uláz queëꞌ Dios en yuguꞌ bönniꞌ tsahuiꞌ gulë́ꞌënnëꞌ ilaꞌléꞌenëꞌ le riléꞌeliꞌ libíꞌiliꞌ pero bitiꞌ bilaꞌléꞌenëꞌ le.
Gulë́ꞌënnëꞌ ilaꞌyönnëꞌ le riyö́niliꞌ libíꞌiliꞌ pero bitiꞌ bilaꞌyönnëꞌ le.
Riguíxjöꞌë Jesús le bucúdzuꞌë didzaꞌ
18 Gunnë́ꞌ caꞌ Jesús:
―Buliꞌzë́ nágaliꞌ ca naca le bucúdzuꞌa didzaꞌ que bönniꞌ guz.
19 Nútiꞌtës nu riyöni didzaꞌ ca rinná bëꞌë Dios yehuaꞌ yubá,
en bitiꞌ réajniꞌi le,
raca que didzaꞌ riyöni nu naꞌ ca guca que xisedoꞌ naꞌ gulasi raꞌ nöza.
Laꞌ zaꞌtë tuꞌ xihuiꞌ,
en rugúa didzaꞌ naꞌ guyúꞌu icja ládxiꞌdaꞌahuëꞌ bönniꞌ naꞌ.
20 Xisedoꞌ naꞌ gulasi luyú ga röꞌö guiö́j ruluíꞌi ca raca queëꞌ bönniꞌ riyönnëꞌ didzaꞌ naꞌ,
en laꞌ ruzëtë náguiëꞌ lu yöl-laꞌ rudzeja queëꞌ,
21 pero ca naꞌ bitiꞌ ridíaꞌ xisedoꞌ naꞌ tuꞌ cabí dë ga gun luí,
lëscaꞌ caní raca queëꞌ bönniꞌ ni.
Cateꞌ idxín tu le usacaꞌ ziꞌ lëꞌ,
ateꞌ ilaꞌbía náꞌgaca bönachi lëꞌ tuꞌ nazíꞌ lu nëꞌë didzaꞌ naꞌ,
laꞌ gácatë chopa ládxëꞌë.
22 Xisedoꞌ naꞌ gulasi ga naꞌ buluꞌlén lubá yötsiꞌ ruluíꞌi ca raca queëꞌ bönniꞌ naꞌ riyönnëꞌ didzaꞌ naꞌ,
pero ruíꞌi ládxëꞌë yuguꞌ le dë yödzölió ni,
ateꞌ nazíꞌ yëꞌë bönniꞌ naꞌ,
tuꞌ ruíꞌi ládxëꞌë yuguꞌ yöl-laꞌ tsahuiꞌ que.
Yuguꞌ lë ni taꞌröli didzaꞌ naꞌ,
en tun ga bitiꞌ gun dxin lu icja ládxiꞌdaꞌahuëꞌ.
23 Xisedoꞌ naꞌ gulasi luyú bëbu ruluíꞌi ca raca queëꞌ bönniꞌ riyönnëꞌ didzaꞌ naꞌ,
en réajniꞌinëꞌ le,
ateꞌ run dxin didzaꞌ naꞌ lu icja ládxiꞌdaꞌahuëꞌ.
Nácagaca bal-la bönachi ca xisedoꞌ naꞌ buluꞌnödzaj iaꞌtú gayuáꞌtërö caꞌ.
Nácagaca iaꞌzícaꞌrö bönachi ca xisedoꞌ naꞌ buluꞌnödzaj iaꞌtsónnalalaj caꞌ,
ateꞌ nácagaca iaꞌzícaꞌrö bönachi ca xisedoꞌ naꞌ buluꞌnödzaj iaꞌchí uruáꞌ caꞌ.
Tu guíxiꞌdoꞌ cané le naláꞌ ca riláꞌ yöla zxoaꞌ xtila
24 Iaꞌtú le bucúdzuꞌë didzaꞌ Jesús,
ateꞌ rëꞌ légaquiëꞌ:
―Ca gaca cate idxín ni le rinná bëꞌë Dios yehuaꞌ yubá naca ca guca que xisedoꞌ dxiꞌa le guzëꞌ tu bönniꞌ ga naca lu xiyúëꞌ.
25 Tsanni naꞌ tasiëꞌ bönniꞌ nacuꞌë lidxëꞌ,
bidxín tu nu bitiꞌ riléꞌe xan yuꞌu naꞌ dxiꞌa,
ateꞌ yöjöza lu xiyúëꞌ xisedoꞌ guíxiꞌdoꞌ cané le naláꞌ ca naca yöla zxoaꞌ xtila,
ateꞌ böaj xilataj.
26 Cateꞌ gulén zxoaꞌ xtila naꞌ,
en gurö́ꞌö do que,
ga naꞌ dxía xuiꞌi,
níꞌirö gulaca bëꞌ guíxiꞌdoꞌ cané naꞌ.
27 Níꞌirö bilaꞌdxinëꞌ bönniꞌ huen dxin ga zoëꞌ bönniꞌ xan laꞌ yëla naꞌ,
en tëꞌ lëꞌ:
“Xan,
channö guzuꞌ xisedoꞌ dxiꞌa lu yu quiuꞌ,
¿nacxi guca gulaꞌlén guíxiꞌdoꞌ cané naꞌ?”
28 Xan yu naꞌ gudxëꞌ légaquiëꞌ,
rnnëꞌ:
“Tu bönniꞌ bitiꞌ riléꞌenëꞌ nedaꞌ dxiꞌa benëꞌ caní.”
Níꞌirö gulaꞌnábinëꞌ huen dxin queëꞌ lëꞌ,
taꞌnnë́ꞌ:
“¿Ba rë́ꞌënuꞌ tséajtuꞌ tsöjö́lajtuꞌ guíxiꞌdoꞌ cané naꞌ?”
29 Xángaquiëꞌ rëꞌ légaquiëꞌ:
“¡Bitiꞌ caꞌ!
Nadx caꞌ cateꞌ iládzuꞌliꞌ guíxiꞌdoꞌ cané naꞌ,
iládzuꞌlentëliꞌ caꞌ yöla zxoaꞌ xtila.
30 Gácarö dxiꞌa güíꞌiliꞌ lataj ilaꞌzxö́ngarö tsözxö́n cateꞌ idxinrö dza tsöjtúbiruꞌ le,
ateꞌ níꞌirö guíaꞌ nupa uluꞌtubi le:
Buliꞌtubi zíꞌalö guíxiꞌdoꞌ cané naꞌ,
en guliꞌgugaꞌ tsöjxili huéaj para uzéguiꞌruꞌ le,
ateꞌ níꞌirö utúbiliꞌ zxoaꞌ xtila lu yuꞌu quiaꞌ.”
Rucúdzuꞌë didzaꞌ Jesús ca naca que xisé mostaza
31 Iaꞌtú le bucúdzuꞌë didzaꞌ Jesús,
ateꞌ rëꞌ légaquiëꞌ:
―Ca gaca ga idxín le rinná bëꞌë Dios yehuaꞌ yubá,
gaca ca raca que tu xisé mostaza,
le guzëꞌ tu bönniꞌ ga naca lu xiyúëꞌ.
32 Le nácatë xisé mostaza naꞌ nácatërö cuidiꞌ ca yúguꞌtë xisedoꞌ iaꞌzícaꞌrö,
pero cateꞌ chinadúz,
rizxö́ntërö ca yúguꞌtë guixiꞌ cuan,
en rizxö́n ca naca tu yaga,
ateꞌ taꞌdxinbaꞌ biguínnidoꞌ,
en tunbaꞌ xicáꞌagacabaꞌ lu niꞌa nëꞌe.
Rucúdzuꞌë didzaꞌ Jesús que cúa zi que yöta xtila
33 Iaꞌtú le bucúdzuꞌë didzaꞌ Jesús,
ateꞌ rëꞌ légaquiëꞌ:
―Ca gaca ga idxín le rinná bëꞌë Dios yehuaꞌ yubá gaca ca le run cúa zi que yöta xtila,
le buchíxinu tu nigula len tsonna libixi yöjza zxoaꞌ xtila,
ateꞌ guyazxa idútë cúa naꞌ.
Le rë́ꞌëni gun le rucúdzuꞌë didzaꞌ Jesús
34 Yúguꞌtë lë ni bucúdzuꞌë didzaꞌ Jesús,
le bë́ꞌlenëꞌ bönachi nacuáꞌ niꞌ didzaꞌ,
en bitiꞌ bi didzaꞌ bë́ꞌlenëꞌ légaquiëꞌ le cabí bucúdzuꞌë didzaꞌ.
35 Caní benëꞌ para gaca lë naꞌ buzúajëꞌ lu guichi tu bönniꞌ bëꞌë didzaꞌ uláz queëꞌ Dios,
gunnë́ꞌ:
Guꞌa didzaꞌ yuguꞌ le ucúdzuꞌa didzaꞌ.
Inníaꞌ yuguꞌ le nagachiꞌ cateꞌ niꞌ gusí lo siꞌ gutaꞌ yödzölió.
Riguíxjöꞌë Jesús le bucúdzuꞌë didzaꞌ que guíxiꞌdoꞌ cané
36 Níꞌirö buzenëꞌ Jesús bönachi nacuáꞌ niꞌ didzaꞌ,
en gusö́l-lëꞌë légaquiëꞌ,
ateꞌ guyuꞌë yuꞌu.
Níꞌirö bilaꞌdxinëꞌ bönniꞌ usëda queëꞌ ga zoëꞌ,
en tëꞌ Lëꞌ:
―Gudíxjöiꞌi netuꞌ le rë́ꞌëni inná lë naꞌ bucúdzuꞌu didzaꞌ que guíxiꞌdoꞌ cané le naláꞌ ca naca yöla zxoaꞌ xtila.
37 Bubiꞌë didzaꞌ Jesús,
ateꞌ rëꞌ légaquiëꞌ:
―Bönniꞌ razëꞌ xisedoꞌ dxiꞌa nacaꞌ nedaꞌ,
Bönniꞌ Guljëꞌ Bönachi.
38 Laꞌ yëla naꞌ naca yödzölió ni,
ateꞌ xisedoꞌ dxiꞌa naꞌ tuꞌluíꞌi ca nácagaca nupa nabábagaca ga rinná bëꞌë Dios.
Guíxiꞌdoꞌ cané naꞌ le naláꞌ ca naca yöla zxoaꞌ xtila tuꞌluíꞌi ca nácagaca nupa néquiguequi que tuꞌ xihuiꞌ.
39 Nu naꞌ bitiꞌ riléꞌe dxiꞌa xan laꞌ yëla naꞌ,
en yöjöza guíxiꞌdoꞌ cané naꞌ,
tuꞌ xihuiꞌ caz naca.
Dza uluꞌtubëꞌ naꞌ ruluíꞌi ca gaca dza údxi que yödzölió ni,
ateꞌ nupa naꞌ tuꞌtubi nácagaca gubáz láꞌayi queëꞌ Dios.
40 Ca naꞌ guca,
buluꞌtubëꞌ guíxiꞌdoꞌ cané naꞌ,
en buluꞌzéguiꞌë le lu guíꞌ,
lëscaꞌ caní gaca cateꞌ údxi que yödzölió ni.
41 Nedaꞌ,
Bönniꞌ Guljëꞌ Bönachi,
isö́l-laꞌgacaꞌ-nëꞌ gubáz láꞌayi quiaꞌ,
ateꞌ uluꞌbéajëꞌ ga rinná bëꞌë Dios yúguꞌtë nupa tun ga tun dul-laꞌ luzë́ꞌeguequi,
encaꞌ nupa tuáꞌ döꞌ.
42 Yuguꞌ gubáz láꞌayi naꞌ ilaꞌguꞌë bönniꞌ tuáꞌ döꞌ naꞌ lu guíꞌ gabila.
Niꞌ ilaꞌbödxëꞌ,
en uluꞌtíl-la láyiꞌgaquiëꞌ.
43 Níꞌirö ilaꞌyëpi yösa beníꞌ bönachi tsahuiꞌ,
en ilácagaquiëꞌ ca gubidza ga niꞌ rinná bëꞌë Dios yehuaꞌ yubá.
Nu zoa nagui,
en riyöni ral-laꞌ uzë́ nagui.
Rucúdzuꞌë didzaꞌ Jesús que tu yöl-laꞌ tsahuiꞌ nagachiꞌ
44 Lëscaꞌ caní bucúdzuꞌë didzaꞌ Jesús,
rnnëꞌ:
―Le rinná bëꞌë Dios yehuaꞌ yubá naca ca tu yöl-laꞌ tsahuiꞌ nagachiꞌ tu laꞌ yëla.
Cateꞌ bidzö́linëꞌ tu bönniꞌ le,
bucáchëꞌë le leyúbölö ga naꞌ bigachiꞌ,
ateꞌ lu yöl-laꞌ rudzeja queëꞌ guyijëꞌ,
yöjë́tiꞌë yúguꞌtë le dë queëꞌ ateꞌ gúꞌuëꞌ laꞌ yëla naꞌ para gataꞌ yöl-laꞌ tsahuiꞌ naꞌ queëꞌ.
Rucúdzuꞌë didzaꞌ Jesús que tu bugá le nazácaꞌdaꞌ
45 Gunnë́ꞌ caꞌ Jesús:
―Ca ral-laꞌ së ládxiꞌliꞌ le rinná bëꞌë Dios yehuaꞌ yubá naca ca benëꞌ tu bönniꞌ ráꞌuëꞌ,
en ruútiꞌë,
en riguiljëꞌ bugá nazácaꞌgaca.
46 Cateꞌ bidzö́linëꞌ tu bugá le nazácaꞌdaꞌ,
guyijëꞌ,
yöjë́tiꞌë yúguꞌtë le dë queëꞌ,
ateꞌ gúꞌuëꞌ bugá naꞌ.
Rucúdzuꞌë didzaꞌ Jesús que tu yöxaj böla
47 Lëscaꞌ caní gunnë́ꞌ Jesús:
―Ca gaca ga ridxín le rinná bëꞌë Dios yehuaꞌ yubá,
gaca ca run tu yöxaj böla le taꞌchiljëꞌ bönniꞌ lu nísadoꞌ,
le röjxíꞌ zián böla izáꞌa.
48 Cateꞌ chibidzáꞌ yöxaj naꞌ,
buluꞌbéajëꞌ le luyú bidxi raꞌ nísadoꞌ naꞌ,
ateꞌ gulaꞌböꞌë niꞌ,
en gulaꞌguꞌë-baꞌ yuguꞌ böla dxiꞌa tu lu gaꞌböra,
pero gulaꞌrúꞌunëꞌ-baꞌ yuguꞌ böla cáꞌasö.
49 Lëscaꞌ caní gaca cateꞌ údxi que yödzölió ni.
Ilaꞌrúajëꞌ gubáz láꞌayi queëꞌ Dios,
ateꞌ uluꞌbéajëꞌ quez yuguꞌ bönachi tsahuiꞌ,
ateꞌ uluꞌcuítiëꞌ légaquiëꞌ ladaj bönachi tuáꞌ döꞌ.
50 ’Níꞌirö ilaꞌguꞌë bönachi tuáꞌ döꞌ naꞌ lu guíꞌ gabila.
Niꞌ ilaꞌbödxëꞌ,
en uluꞌtíl-la láyëꞌë.
Yöl-laꞌ tsahuiꞌ le naca gula, en le naca cubi
51 Níꞌirö Jesús gunábinëꞌ yuguꞌ bönniꞌ usëda queëꞌ,
rnnëꞌ:
―¿Ba réajniꞌiliꞌ yúguꞌtë lë ni?
Buluꞌbiꞌë didzaꞌ,
tëꞌ Lëꞌ:
―Ön,
Xan.
52 Jesús gudxëꞌ légaquiëꞌ:
―Cateꞌ tu bönniꞌ yudoꞌ usedi chinazíꞌ lu nëꞌë le rinná bëꞌë Dios yehuaꞌ yubá,
náquiëꞌ ca tu bönniꞌ xan yuꞌu,
rubéajëꞌ ladaj yöl-laꞌ tsahuiꞌ queëꞌ le naca cubi,
en le naca gula,
le nácagaca tsahuiꞌ le ruziꞌë xibé.
Le benëꞌ Jesús lu yödzö Nazaret
53 Cateꞌ budxi bucúdzuꞌë Jesús yuguꞌ didzaꞌ ni,
buzë́ꞌë niꞌ.
54 Cateꞌ budxinëꞌ ladzëꞌ,
busédinëꞌ bönachi nacuáꞌ lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios,
ateꞌ buluꞌbáninë,
taꞌnnë́ꞌ:
―¿Gazxi caz guzëdëꞌ bönniꞌ ni yöl-laꞌ réajniꞌi ni?
¿Nacxi caz naca,
runëꞌ yuguꞌ yöl-laꞌ huáca ni?
55 Náquiëꞌ bönniꞌ ni zxíꞌinëꞌ bönniꞌ gubëdxi yaga,
ateꞌ xinë́ꞌë lënu María.
Náquiëꞌ bö́chiꞌgaquiëꞌ Jacobo,
en José,
en Simón,
en Judas.
56 Lëscaꞌ nigula zanëꞌ nacuáꞌlennu rëꞌu ni.
¿Gazxi caz guzëdëꞌ yúguꞌtë lë ni?
57 Que lë ni naꞌ gulaca chopa ládxiꞌgaquiëꞌ,
ateꞌ buluꞌcáꞌanëꞌ Lëꞌ.
Níꞌirö Jesús gudxëꞌ légaquiëꞌ:
―Yúguꞌtë bönachi tun bal tu bönniꞌ ruꞌë didzaꞌ uláz queëꞌ Dios,
pero bönachi uládz queëꞌ,
en bönachi nacuáꞌ lidxëꞌ bitiꞌ tun lëꞌ bal.
58 Que lë ni naꞌ bitiꞌ benëꞌ Jesús zián yöl-laꞌ huáca niꞌ,
tuꞌ cabí taꞌyéajlëꞌë Lëꞌ.