Rucúdzuꞌë didzaꞌ Jesús ca naca queëꞌ bönniꞌ guz
4
Leyúbölö gusí lahuëꞌ Jesús rusédinëꞌ bönachi ga naca raꞌ nísadoꞌ.
Buluꞌdubi bönachi zián ga zoëꞌ,
ateꞌ gurenëꞌ Jesús tu lëꞌe bárcodoꞌ zxoa lu nisa naꞌ,
en guröꞌë niꞌ,
ateꞌ yúguꞌtë bönachi naꞌ gulaꞌcuáꞌ luyú raꞌ nisa naꞌ.
2 Zián le busédinëꞌ Jesús légaquiëꞌ,
bucúdzuꞌë didzaꞌ.
Tsanni niꞌ rusédinëꞌ légaquiëꞌ,
rnnëꞌ:
3 ―Guliꞌzë́ nágaliꞌ didzaꞌ ni.
Birúajëꞌ tu bönniꞌ guz,
söjë́siëꞌ xisedoꞌ.
4 Tsanni niꞌ rúsiëꞌ,
gulasi bal-la xisedoꞌ naꞌ raꞌ nöza,
ateꞌ bilaꞌdxinbaꞌ biguínnidoꞌ,
gulë́ꞌajbaꞌ le.
5 Gulasi iaꞌbal-la xisedoꞌ naꞌ ga röꞌö guiö́j ga bitiꞌ röꞌö yenniꞌ yu.
Bayö́n gulaꞌlén xisedoꞌ naꞌ tuꞌ cabí röꞌö yenniꞌ yu.
6 Níꞌirö cateꞌ gulén gubidza,
buquexuꞌ le,
ateꞌ gubidxi,
tuꞌ cabí nun luí ga rëꞌ.
7 Gulasi iaꞌbal-la xisedoꞌ naꞌ ga tuꞌlén lubá yötsiꞌ.
Cateꞌ gulaꞌlén xisedoꞌ naꞌ,
buluꞌlén caꞌ lubá yötsiꞌ naꞌ,
en gulaꞌröli le,
ateꞌ lë naꞌ bësiëꞌ bitiꞌ bi bunödzaj.
8 Gulasi iaꞌbal-la xisedoꞌ naꞌ ga naca luyú bëbu,
ateꞌ gulaꞌzxö́n,
en xitsáꞌ raꞌ gulaꞌbö́ꞌ.
Buluꞌnödzaj lë naꞌ bësiëꞌ.
Tu dxiguꞌ xisedoꞌ naꞌ bësiëꞌ bunödzaj iaꞌchí uruáꞌ xisedoꞌ caꞌ.
Iaꞌtú bunödzaj iaꞌtsónnalalaj caꞌ,
ateꞌ iaꞌtú naꞌ bunödzaj iaꞌtú gayuáꞌ caꞌ.
9 Níꞌirö Jesús gudxëꞌ légaquiëꞌ,
rnnëꞌ:
―Nu zoa nagui,
en riyöni ral-laꞌ uzë́ nagui.
Riguíxjöꞌë Jesús bizx que rucúdzuꞌë didzaꞌ
10 Cateꞌ chibugáꞌanëꞌ tuzëꞌ Jesús,
bilaꞌdxín nupa dáꞌgaca Lëꞌ ga zoëꞌ,
núngaca tsözxö́n idxínnutëꞌ bönniꞌ usëda queëꞌ,
ateꞌ gulaꞌnábinëꞌ Lëꞌ bi saꞌyéaj lë naꞌ bucúdzuꞌë didzaꞌ.
11 Jesús gudxëꞌ légaquiëꞌ,
rnnëꞌ:
―Libiꞌiliꞌ nadéliꞌliꞌ tséajniꞌiliꞌ le nagachiꞌ ca rinná bëꞌë Dios,
pero nupa naꞌ bitiꞌ nácagaca tuz len rëꞌu,
ruíꞌilenaꞌ légaquiëꞌ didzaꞌ yuguꞌ le rucúdzuꞌa didzaꞌ.
12 Caní runaꞌ para gaca lë naꞌ nazúaj lu guichi láꞌayi,
rnna:
Uluꞌyúëꞌ,
en bitiꞌ ilaꞌléꞌenëꞌ.
Uluꞌzë́ nágagaquiëꞌ,
en bitiꞌ ilaꞌyéajniꞌinëꞌ.
Bitiꞌ uluꞌbíꞌi ládxiꞌgaquiëꞌ para gaca uniti lahuaꞌ légaquiëꞌ ca naca dul-laꞌ nabágaꞌgaquiëꞌ.
Riguíxjöꞌëꞌ Jesús le bucúdzuꞌë didzaꞌ
13 Jesús gudxëꞌ caꞌ yuguꞌ bönniꞌ dáꞌgaquiëꞌ Lëꞌ,
rnnëꞌ:
―¿Naruꞌ cabí réajniꞌitseliꞌ lë naꞌ bucúdzuꞌa didzaꞌ?
¿Nacxi caz gaca tséajniꞌiliꞌ iaꞌzícaꞌrö le ucúdzuꞌa didzaꞌ?
14 Bönniꞌ guz naꞌ náquiëꞌ nu ruzë́ xtídzëꞌë Dios.
15 ’Nácagaca bal-la bönachi ca xisedoꞌ naꞌ gulasi raꞌ nöza.
Taꞌyönnëꞌ xtídzëꞌë Dios,
en ca taꞌyö́nisinëꞌ caꞌ,
laꞌ zaꞌtë Satanás tuꞌ xihuiꞌ,
en rigúa didzaꞌ naꞌ bidxín lu icja ládxiꞌdoꞌgaquiëꞌ.
16 ’Nácagaca iaꞌbal-la bönachi ca xisedoꞌ naꞌ gulasi ga röꞌö guiö́j.
Taꞌyönnëꞌ didzaꞌ naꞌ,
ateꞌ len yöl-laꞌ rudzeja quégaquiëꞌ taꞌziꞌë le.
17 Bitiꞌ riyaza icja ládxiꞌdoꞌgaquiëꞌ,
ateꞌ tu chíꞌisö taꞌdë́ꞌë le.
Cateꞌ bi raca quégaquiëꞌ,
o zoa nu ribía ladxiꞌ légaquiëꞌ tuꞌ taꞌdë́ꞌë didzaꞌ naꞌ,
laꞌ tuꞌhuö́atë ládxiꞌgaquiëꞌ.
18 ’Nácagaca iaꞌbal-la bönachi ca xisedoꞌ naꞌ gulasi ga naꞌ tuꞌlén lubá yötsiꞌ.
Taꞌyönnëꞌ didzaꞌ naꞌ,
19 pero tuíꞌi ládxiꞌgaquiëꞌ le nácagaca que yödzölió ni.
Nazíꞌ yéꞌeguequinëꞌ tuꞌ nadxíꞌiguequinëꞌ yuguꞌ yöl-laꞌ tsahuiꞌ,
en taꞌzë́ ládxiꞌgaquiëꞌ yuguꞌ le dë.
Taꞌyaza icja ládxiꞌdoꞌgaquiëꞌ yúguꞌtë lë ni,
en tuꞌsuniti didzaꞌ naꞌ,
para cabí gun dxin lu icja ládxiꞌdoꞌgaquiëꞌ.
20 ’Nácagaca iaꞌbal-la bönachi ca xisedoꞌ naꞌ gulasi ga naca luyú bëbu.
Taꞌyönnëꞌ didzaꞌ naꞌ,
en taꞌzíꞌ lu náꞌagaquiëꞌ le,
ateꞌ run dxin lu icja ládxiꞌdoꞌgaquiëꞌ.
Nácagaca bal-la bönachi caní ca xisedoꞌ naꞌ buluꞌnödzaj iaꞌchí uruáꞌ huéaj.
Nácagaca iaꞌbal-lëꞌ ca xisedoꞌ naꞌ buluꞌnödzaj iaꞌtsónnalalaj caꞌ,
ateꞌ nácagaca iaꞌbal-la bönachi ca xisedoꞌ naꞌ buluꞌnödzaj iaꞌtú gayuáꞌ caꞌ.
Rucúdzuꞌë didzaꞌ Jesús que tu le rigúꞌu beníꞌ
21 Jesús gudxëꞌ caꞌ bönniꞌ dáꞌgaquiëꞌ Lëꞌ,
rnnëꞌ:
―¿Naruꞌ rigálaꞌruꞌ guíꞌ,
ateꞌ rudúsiꞌruꞌ le tu guíꞌina,
o rigúꞌuruꞌ le zxani le rátiꞌruꞌ?
Bitiꞌ caꞌ runruꞌ caní.
Ruzóaruꞌ guíꞌ ga naca xitsáꞌ ga cuꞌu beníꞌ.
22 Yúguꞌtë le nagachiꞌ iláꞌ lahui,
ateꞌ yúguꞌtë le raca balándoꞌos ilaꞌrúaj ga lináꞌ.
23 Nu zoa nagui,
en riyöni ral-laꞌ uzë́ nagui.
24 Gudxëꞌ caꞌ légaquiëꞌ:
―Guliꞌgüíꞌ ládxiꞌliꞌ le riyö́niliꞌ.
Ca naca le ruríxiliꞌ,
laꞌ leze urixëꞌ Dios queë́liꞌ,
ateꞌ gunnëꞌ queë́liꞌ iaꞌlatiꞌ.
25 Nu nazíꞌi le zaꞌ que,
guꞌë que iaꞌlatiꞌ,
pero nu bitiꞌ nazíꞌi le,
laꞌs dui le dë que,
udúa.
Rucúdzuꞌë didzaꞌ Jesús ca rizxö́n zxoaꞌ xtila
26 Gunnë́ꞌ caꞌ Jesús:
―Ca raca ni le rinná bëꞌë Dios naca ca raca cateꞌ ruchejëꞌ tu bönniꞌ zxoaꞌ xtila lu yu.
27 Chiꞌi dzö́ꞌölö rásiëꞌ,
en riyasëꞌ cateꞌ zaꞌ reníꞌ.
Taꞌlén zxoaꞌ xtila naꞌ,
en taꞌzxö́n,
pero bitiꞌ nö́zinëꞌ lëꞌ nacxi raca taꞌzxö́n.
28 Laꞌ cuinsi luyú naꞌ ruxö́n le nadúzgaca luyú naꞌ,
zíꞌalö xiyazi,
níꞌirö zaꞌ do que,
en tödi naꞌ cuía xuiꞌi nál-la lu do que.
29 Cateꞌ chinal-la xuiꞌi naꞌ,
laꞌ tséajtëꞌ tsöjchibëꞌ do naꞌ tuꞌ chibidxín dza uziꞌë xuiꞌi.
Rucúdzuꞌë didzaꞌ Jesús ca raca que xisé mostaza
30 Gunnë́ꞌ caꞌ Jesús:
―¿Bizxi caz innaruꞌ ca raca ni le rinná bëꞌë Dios?
¿Bizxi ucúdzuꞌruꞌ didzaꞌ ca raca?
31 Raca ca raca que tu xisedoꞌ mostaza.
Cateꞌ riyaza luyú naca tu xisedoꞌ nácatërö cuidiꞌ ca yúguꞌtë xisedoꞌ dzöꞌö luyú,
32 pero cateꞌ chinadúz,
rilén,
en rizxö́ntërö ca yúguꞌtë guixiꞌ cuan rö́ꞌgaca luyú.
Tsca run yanaꞌ niꞌa nëꞌe,
gaca ilaꞌdxinbaꞌ biguínnidoꞌ,
en uluꞌdxíabaꞌ xicáꞌagacabaꞌ lu zxul-la que.
Ca rugunëꞌ dxin Jesús le rucúdzuꞌë didzaꞌ
33 Caní guca,
busédinëꞌ Jesús légaquiëꞌ,
en ziánrö caꞌ le bucúdzuꞌë didzaꞌ tsca guca ilaꞌyéajniꞌinëꞌ.
34 Yúguꞌtë didzaꞌ bë́ꞌlenëꞌ bönachi bucúdzuꞌë didzaꞌ,
ateꞌ yúguꞌtë didzaꞌ ni buchila láꞌanëꞌ,
buzéajniꞌinëꞌ légacasëꞌ bönniꞌ usëda queëꞌ.
Jesús ribequi dxíëꞌ böꞌ budunuꞌ
35 Laꞌ dza náꞌasö,
cateꞌ ridzö́ꞌ,
Jesús gudxëꞌ yuguꞌ bönniꞌ dáꞌgaquiëꞌ Lëꞌ,
rnnëꞌ:
―Tö́ditsöcaꞌruꞌ iaꞌtsöláꞌa nísadoꞌ ni.
36 Níꞌirö buluꞌláꞌalenëꞌ bönachi zián nacuáꞌ niꞌ,
ateꞌ buluꞌsë́ꞌë bárcodoꞌ ga naꞌ chizóasëꞌ Jesús.
Gulaꞌcuáꞌ caꞌ niꞌ iaꞌzícaꞌrö bárcodoꞌ söjácalen légaquiëꞌ.
37 Gusí lo recja böꞌ budunuꞌ lu nisa naꞌ,
ateꞌ gudáꞌa nisa lëꞌe bárcodoꞌ naꞌ.
Caꞌ guca,
zeaj ridzáꞌ nisa lëꞌe bárcodoꞌ naꞌ.
38 Dëꞌ rásiëꞌ Jesús lu xicúgüëꞌ ga naca xitsáꞌalö lëꞌe bárcodoꞌ naꞌ,
ateꞌ buluꞌsubanëꞌ Lëꞌ.
Tëꞌ Lëꞌ:
―¡Bönniꞌ Usedi!
¿Naruꞌ cabí ruíꞌi ládxiꞌtsoꞌ netuꞌ?
¡Huáti caztuꞌ lu nisa ni!
39 Níꞌirö guyasëꞌ Jesús,
en gunná béꞌenëꞌ böꞌ naꞌ recja,
gunnë́ꞌ:
―Gurö́ꞌö dxi.
Gudxëꞌ caꞌ nisa naꞌ,
gunnë́ꞌ:
―Dxisö guzóa.
Gurö́ꞌö dxi böꞌ naꞌ guyecja,
en guzóa dxi lu nísadoꞌ naꞌ.
40 Níꞌirö Jesús gudxëꞌ yuguꞌ bönniꞌ dáꞌgaquiëꞌ Lëꞌ,
rnnëꞌ:
―¿Bizx que radxi ridzö́biliꞌ caní?
¿Naruꞌ cabí réajlëꞌëliꞌ Dios?
41 Niꞌ tádxinëꞌ gulë́ luzë́ꞌë tuëꞌ iaꞌtúëꞌ:
―¿Nuzxi caz bönniꞌ ni?
¡Tun böꞌ recja,
en nísadoꞌ ca rnna xtídzëꞌë!