DIDZAꞌ DXIꞌA BUZÚAJËꞌ MATEO
Yuguꞌ xuz xinëꞌe gudödi queëꞌ Jesús
1
Ni ruzúajaꞌ lágaquiëꞌ xuz xinëꞌe gudödi queëꞌ Jesucristo.
Nabábagaquiëꞌ David,
encaꞌ Abraham xuz gudödi queëꞌ.
2 Abraham gúquiëꞌ xuzëꞌ Isaac.
Isaac gúquiëꞌ xuzëꞌ Jacob.
Jacob gúquiëꞌ xúzgaquiëꞌ Judá,
en yuguꞌ bönniꞌ bö́chëꞌë.
3 Judá gúquiëꞌ xúzgaquiëꞌ Fares,
en Zara,
ateꞌ Tamar gúcanu xináꞌagaquiëꞌ.
Fares gúquiëꞌ xuzëꞌ Esrom.
Esrom gúquiëꞌ xuzëꞌ Aram.
4 Aram gúquiëꞌ xuzëꞌ Aminadab.
Aminadab gúquiëꞌ xuzëꞌ Naasón.
Naasón gúquiëꞌ xuzëꞌ Salmón.
5 Salmón gúquiëꞌ xuzëꞌ Booz,
ateꞌ Rahab gúcanu xinë́ꞌë.
Booz gúquiëꞌ xuzëꞌ Obed,
ateꞌ Rut gúcanu xinë́ꞌë.
Obed gúquiëꞌ xuzëꞌ Isaí.
6 Isaí gúquiëꞌ xuzëꞌ David.
David naꞌ gunná béꞌenëꞌ bönachi Israel,
ateꞌ butsaga náꞌalenëꞌ-nu nigula naꞌ gúcanu zíꞌalö nigula queëꞌ Urías,
ateꞌ David,
en nigula ni guláquiëꞌ xuz xinë́ꞌë Salomón.
7 Salomón gúquiëꞌ xuzëꞌ Roboam.
Roboam gúquiëꞌ xuzëꞌ Abías.
Abías gúquiëꞌ xuzëꞌ Asa.
8 Asa gúquiëꞌ xuzëꞌ Josafat.
Josafat gúquiëꞌ xuzëꞌ Joram.
Joram gúquiëꞌ xuzëꞌ Uzías.
9 Uzías gúquiëꞌ xuzëꞌ Jotam.
Jotam gúquiëꞌ xuzëꞌ Acaz.
Acaz gúquiëꞌ xuzëꞌ Ezequías.
10 Ezequías gúquiëꞌ xuzëꞌ Manasés.
Manasés gúquiëꞌ xuzëꞌ Amón.
Amón gúquiëꞌ xuzëꞌ Josías.
11 Josías gúquiëꞌ xúzgaquiëꞌ Jeconías,
en yuguꞌ bönniꞌ bö́chëꞌë.
Yuguꞌ bönniꞌ ni gulaꞌcuꞌë dza niꞌ cateꞌ yuguꞌ bönniꞌ Babilonia gulaꞌchë́ꞌë bönachi Israel nadzúngaca lu xiyúgaquiëꞌ.
12 Jeconías gúquiëꞌ xuzëꞌ Salatiel.
Salatiel gúquiëꞌ xuzëꞌ Zorobabel.
13 Zorobabel gúquiëꞌ xuzëꞌ Abiud.
Abiud gúquiëꞌ xuzëꞌ Eliaquim.
Eliaquim gúquiëꞌ xuzëꞌ Azor.
14 Azor gúquiëꞌ xuzëꞌ Sadoc.
Sadoc gúquiëꞌ xuzëꞌ Aquim.
Aquim gúquiëꞌ xuzëꞌ Eliud.
15 Eliud gúquiëꞌ xuzëꞌ Eleazar.
Eleazar gúquiëꞌ xuzëꞌ Matán.
Matán gúquiëꞌ xuzëꞌ Jacob.
16 Jacob gúquiëꞌ xuzëꞌ José.
José ni gúquiëꞌ bönniꞌ queë́nu María,
ateꞌ María ni gúcanu xinë́ꞌë Jesús,
lëꞌ caꞌ Cristo,
Bönniꞌ naꞌ tun löza bönachi judío guídëꞌ idinná béꞌenëꞌ légaquiëꞌ.
17 Caní naca,
gulaca chidáꞌ cöꞌ diꞌa dza ga gusí lo zoëꞌ Abraham ga bidxintë zoëꞌ David,
ateꞌ gulaca caꞌ iaꞌchidáꞌ cöꞌ diꞌa dza ga gusí lo zoëꞌ David ga bidxintë dza yuguꞌ bönniꞌ Babilonia gulaꞌchë́ꞌë bönachi Israel nadzúngaca,
ateꞌ gulaca caꞌ iaꞌchidáꞌ cöꞌ diꞌa dza ga gusí lo dza niꞌ gulaꞌchë́ꞌë léguequi ga bidxintë dza guljëꞌ Cristo.
Yuguꞌ le guca cateꞌ guljëꞌ Jesucristo
18 Caní guca cateꞌ guljëꞌ Jesucristo.
Cateꞌ niꞌ chinazíꞌ lu náꞌabiꞌ María,
xinë́ꞌë Jesucristo utsaga náꞌalenbiꞌ José,
en zíꞌatëlö cateꞌ siꞌ utsaga náꞌalenëꞌ-biꞌ,
en cabí ne sóalenëꞌ-biꞌ,
guyúꞌubiꞌ tubiꞌ bíꞌidoꞌ lë́ꞌëbiꞌ María naꞌ.
Guca caní niꞌa que yöl-laꞌ huáca queëꞌ Dios Böꞌ Láꞌayi.
19 Náquiëꞌ José naꞌ,
bönniꞌ queë́biꞌ María,
bönniꞌ tsahuiꞌ,
pero bitiꞌ gúꞌunnëꞌ uzéguiëꞌ-biꞌ didzaꞌ lógaca bönachi.
Gúꞌunnëꞌ uláꞌalenëꞌ-biꞌ bagáchiꞌsö.
20 Tsanni niꞌ rizáꞌ ládxëꞌë José ca naꞌ gunëꞌ,
buluíꞌi lahuëꞌ gubáz láꞌayi queëꞌ Xanruꞌ lahuëꞌ José lu yëla bë́chigal,
en gudxëꞌ lëꞌ:
―José,
zxíꞌini zxiꞌsóëꞌ David.
Bitiꞌ gádxinuꞌ siꞌu-biꞌ María,
para gácabiꞌ nigula quiuꞌ,
tuꞌ yúꞌubiꞌ biꞌi bö́nniꞌdoꞌ lë́ꞌëbiꞌ niꞌa que yöl-laꞌ huáca queëꞌ Dios Böꞌ Láꞌayi.
21 Gáljabiꞌ tubiꞌ biꞌi bö́nniꞌdoꞌ queë́biꞌ,
ateꞌ guꞌu labiꞌ Jesús,
tuꞌ usölábiꞌ bönachi queë́biꞌ lu dul-laꞌ nabágaꞌgaca.
22 Caní guca yúguꞌtë lë ni para gaca lë naꞌ gunnë́ꞌ Xanruꞌ lu ruꞌë bönniꞌ bëꞌë didzaꞌ uláz queëꞌ Dios,
gunnë́ꞌ:
23 Buliꞌyútsöcaꞌ,
tu nigula raꞌbandoꞌ,
tsúꞌubiꞌ bíꞌidoꞌ lë́ꞌëbiꞌ,
ateꞌ gáljabiꞌ tubiꞌ biꞌi bö́nniꞌdoꞌ,
ateꞌ iluꞌë labiꞌ Emanuel.
Emanuel naca tu didzaꞌ hebreo le rnna:
Len rëꞌu Dios.