Bönniꞌ taꞌyéajniꞌinëꞌ ridiyúgaquiëꞌ bíꞌidoꞌ Jesús
2
Cateꞌ gúljabiꞌ Jesús lu yödzö Belén,
luyú Judea,
rinná bëꞌë Herodes luyú niꞌ,
ateꞌ bilaꞌdxinëꞌ bönniꞌ taꞌyéajniꞌinëꞌ Jerusalén,
narúajgaquiëꞌ tu yödzö dë sacaꞌ ga rilén gubidza.
2 Gulaꞌnabëꞌ bönniꞌ ni,
taꞌnnë́ꞌ:
―¿Gazxi zóabiꞌ bíꞌidoꞌ naꞌ ral-laꞌ inná béꞌebiꞌ bönachi judío,
bíꞌidoꞌ naꞌ siꞌ gúljabiꞌ?
Cateꞌ niꞌ zóatuꞌ ga rilén gubidza biléꞌetuꞌ-baꞌ bölaj beníꞌ naca bëꞌ chigúlajbiꞌ,
ateꞌ zaꞌtuꞌ ni para tseaj ládxiꞌtuꞌ-biꞌ.
3 Cateꞌ gúquibeꞌenëꞌ Herodes,
bönniꞌ rinná bëꞌë,
lë ni,
gurö́ꞌödëꞌ böniga,
en lëscaꞌ caní gulaꞌbö́ꞌ böniga yúguꞌtë bönachi nacuáꞌ Jerusalén.
4 Níꞌirö Herodes naꞌ bulidzëꞌ yúguꞌtë bixúz unná bëꞌ,
len bönniꞌ yudoꞌ tuꞌsédinëꞌ,
ateꞌ gunábinëꞌ légaquiëꞌ gazxi ral-laꞌ galjëꞌ Cristo,
bönniꞌ naꞌ tunëꞌ löza bönniꞌ judío iláꞌ lahuëꞌ para inná béꞌenëꞌ légaquiëꞌ.
5 Tëꞌ lëꞌ:
―Lu yödzö Belén luyú Judea.
Caní naca tuꞌ buzúajëꞌ tu bönniꞌ bëꞌë didzaꞌ uláz queëꞌ Dios le rnna caní:
6 Bitiꞌ nácarö cáꞌasö yödzö Belén luyú Judá lahuëꞌ Dios
ca nácagaca yödzö gapa nacuáꞌ nupa taꞌnná bëꞌ luyú ni,
tuꞌ irúajëꞌ tu bönniꞌ yödzö Belén,
en gáquiëꞌ lo,
bönniꞌ naꞌ gun chiꞌë bönachi Israel quiaꞌ.
7 Níꞌirö Herodes bulidzëꞌ bagáchiꞌsö bönniꞌ taꞌyéajniꞌinëꞌ naꞌ,
en gunábinëꞌ légaquiëꞌ para inö́zinëꞌ dxiꞌa gácaꞌxte chiguca buluíꞌi lahui bölaj naꞌ bilaꞌléꞌenëꞌ.
8 Níꞌirö gusö́l-lëꞌë légaquiëꞌ tsöjáquiëꞌ Belén.
Rëꞌ légaquiëꞌ:
―Guliꞌtséaj niꞌ,
en guliꞌtsöjnaba dxiꞌa nacxi naca queë́biꞌ bíꞌidoꞌ naꞌ.
Cateꞌ chibidzö́liliꞌ-biꞌ,
ididíxjöiꞌiliꞌ nedaꞌ,
para tsejaꞌ caꞌ nedaꞌ,
tseaj ládxaꞌa-biꞌ.
9 Gudödi bilaꞌyönnëꞌ didzaꞌ bëꞌë Herodes naꞌ,
söjáquiëꞌ bönniꞌ taꞌyéajniꞌinëꞌ naꞌ,
ateꞌ bölaj naꞌ bilaꞌléꞌenëꞌ cateꞌ niꞌ nacuꞌë ládzagaquiëꞌ söjnö́rubaꞌ lógaquiëꞌ ga bidxintë yöjsóa ga naꞌ dëbiꞌ bíꞌidoꞌ naꞌ.
10 Cateꞌ bilaꞌléꞌenëꞌ bölaj naꞌ,
buluꞌdzéjadeꞌenëꞌ.
11 Cateꞌ gulaꞌyáziëꞌ yuꞌu,
bilaꞌléꞌenëꞌ-biꞌ biꞌi bö́nniꞌdoꞌ naꞌ,
zóalenbiꞌ-nu María,
xináꞌabiꞌ.
Buluꞌzóa zxíbigaquiëꞌ lobiꞌ,
en gulaꞌyéaj ládxiꞌgaquiëꞌ-biꞌ.
Gudödi naꞌ gulaꞌsaljëꞌ yuguꞌ yöxaj quégaquiëꞌ,
ateꞌ buluꞌnödzjëꞌ queë́biꞌ oro,
en yalaj,
en nö́ridoꞌ riláꞌ zxixi que yaga mirra.
12 Tuꞌ chibuzéajniꞌinëꞌ Dios légaquiëꞌ lu yëla bë́chigal para cabí tsöjhuö́jquiëꞌ ga zoëꞌ Herodes naꞌ,
que lë ni naꞌ yöjhuö́jquiëꞌ ládzagaquiëꞌ nöza yúbölö.
José, en María, taꞌchë́ꞌë-biꞌ Jesús luyú Egipto
13 Gudödi buluꞌzë́ꞌë yuguꞌ bönniꞌ taꞌyéajniꞌinëꞌ niꞌ,
buluíꞌi lahuëꞌ tuëꞌ gubáz láꞌayi queëꞌ Xanruꞌ lu yëla bë́chigal,
ga naꞌ dëꞌ José,
en rëꞌ lëꞌ:
―Guyaschi.
Guchë́ꞌ-biꞌ bíꞌidoꞌ ni,
encaꞌ xináꞌabiꞌ,
ateꞌ buzxunnaj ni.
Guyéaj luyú Egipto,
ateꞌ ugáꞌanuꞌ niꞌ cateꞌ guië́raꞌ liꞌ iaꞌtú.
Caní gunuꞌ tuꞌ uguiljëꞌ Herodes bíꞌidoꞌ ni para gútiëꞌ-biꞌ.
14 Níꞌirö guyasëꞌ José,
en niꞌ naca chiꞌi dzö́ꞌölö,
guchë́ꞌë-biꞌ bíꞌidoꞌ naꞌ,
encaꞌ xináꞌabiꞌ,
ateꞌ yöjáquiëꞌ luyú Egipto.
15 Buluꞌgáꞌanëꞌ niꞌ cateꞌ gútirëꞌ Herodes.
Caní guca para gaca lë naꞌ gunnë́ꞌ Xanruꞌ Dios lu ruꞌë tu bönniꞌ bëꞌë didzaꞌ uláz queëꞌ,
gunnë́ꞌ:
“Ga naca luyú Egipto bulidzaꞌ Zxíꞌinaꞌ.”
Risö́l-lëꞌë Herodes bönniꞌ ilútiëꞌ-biꞌ biꞌi huë́ꞌënidoꞌ nacuáꞌabiꞌ yödzö Belén
16 Cateꞌ gúquibeꞌenëꞌ Herodes bitiꞌ gulunëꞌ bönniꞌ taꞌyéajniꞌinëꞌ ca rnnëꞌ,
gulénëꞌ,
ateꞌ gunná béꞌenëꞌ bönniꞌ tsöjáquiëꞌ niꞌ para ilútiëꞌ-biꞌ yúguꞌtëbiꞌ biꞌi bö́nniꞌdoꞌ nacuáꞌabiꞌ yödzö Belén,
en idú gásibiꞌilö ga dë Belén naꞌ,
yuguꞌ bíꞌidoꞌ chiyúꞌugacabiꞌ chopa iz,
en bíꞌidoꞌ nahuë́ꞌënigacaröbiꞌ.
Caní benëꞌ ca busáquiëꞌ queëꞌ Herodes naꞌ,
tsca chiguca dza buluíꞌi lahui bölaj naꞌ,
dza naꞌ buluꞌzéajniꞌinëꞌ bönniꞌ taꞌyéajniꞌinëꞌ naꞌ lëꞌ.
17 Caní guca,
bidxín lë naꞌ gunnë́ꞌ Jeremías,
bönniꞌ bëꞌë didzaꞌ uláz queëꞌ Dios,
gunnë́ꞌ:
18 Lu yödzö Ramá riyö́n chíꞌigaca
nupa taꞌbödxi,
en nupa taꞌbödxi yechiꞌ.
Raquel ribö́dxinu niꞌa quégacabiꞌ zxíꞌininu.
Bitiꞌ gaca nu huë tsahuiꞌ lënu,
tuꞌ chinátigacabiꞌ.
19 Gudödi gútiëꞌ Herodes naꞌ,
níꞌirö buluíꞌi lahuëꞌ gubáz láꞌayi naꞌ queëꞌ Xanruꞌ lu yëla bë́chigal lahuëꞌ José ga niꞌ zoëꞌ luyú Egipto,
ateꞌ rëꞌ lëꞌ:
20 ―Guyasa.
Guchë́ꞌ-biꞌ biꞌi bö́nniꞌdoꞌ ni,
encaꞌ xináꞌabiꞌ,
ateꞌ böaj luyú Israel,
tuꞌ chigulátiëꞌ bönniꞌ niꞌ gulë́ꞌënnëꞌ ilútiëꞌ-biꞌ biꞌi bö́nniꞌdoꞌ ni.
21 Níꞌirö guyasëꞌ José,
ateꞌ guchë́ꞌë-biꞌ biꞌi bö́nniꞌdoꞌ naꞌ,
encaꞌ xináꞌabiꞌ,
ateꞌ yöhuö́jquiëꞌ luyú Israel.
22 Cateꞌ gúquibeꞌenëꞌ José rinná bëꞌë Arquelao luyú Judea tuꞌ chigútiëꞌ Herodes,
xuzëꞌ Arquelao naꞌ,
que lë ni naꞌ gúdxinëꞌ José huöjëꞌ niꞌ.
Cateꞌ buzéajniꞌinëꞌ Dios lëꞌ lu yëla bë́chigal,
guyijëꞌ luyú Galilea.
23 Cateꞌ bidxinëꞌ niꞌ,
yöjsóëꞌ lu yödzö Nazaret.
Caní guca para gaca lë naꞌ gulaꞌnnë́ꞌ yuguꞌ bönniꞌ guluꞌë didzaꞌ uláz queëꞌ Dios ca ral-laꞌ gaca queëꞌ Jesús,
siꞌ Lëꞌ,
Bönniꞌ Nazaret.