Juan, bönniꞌ ruquilëꞌ bönachi nisa runëꞌ libán lu lataj cáꞌasö
3
Yuguꞌ lu dza niꞌ buluíꞌi lahuëꞌ Juan,
bönniꞌ naꞌ buquilëꞌ bönachi nisa,
en runëꞌ libán lu lataj cáꞌasö luyú Judea.
2 Juan naꞌ rnnëꞌ:
―Buliꞌbíꞌi ládxiꞌliꞌ,
tuꞌ chizóa idxín dza idinná bëꞌ Nu naꞌ zoa yehuaꞌ yubá luyú ni.
3 Ca naca queëꞌ Juan naꞌ,
buzúajëꞌ Isaías,
bönniꞌ bëꞌë didzaꞌ uláz queëꞌ Dios dza niꞌtë,
le rnna caní:
Riyö́n chiꞌë bönniꞌ rulidzëꞌ lu lataj cáꞌasö,
rnnëꞌ:
“Buliꞌpáꞌa nöza para idxín Xanruꞌ ga zóaliꞌ.
Guliꞌbéaj li yuguꞌ nöza lasi tödëꞌ lu icja ládxidoꞌoliꞌ.”
4 Nácuëꞌ zxëꞌ Juan lariꞌ néquini lítsaꞌbaꞌ böaꞌ,
ateꞌ núguëꞌë lëꞌë le néquini guídi.
Rahuëꞌ-baꞌ bö́chiꞌzu,
en reꞌjëꞌ bidxindoꞌ que buzdoꞌ.
5 Yuguꞌ bönniꞌ yödz Jerusalén len bönachi narúajgaca idú luyú Judea,
en idú gásibiꞌilö ga dë yegu Jordán bilaꞌdxinëꞌ ga zoëꞌ Juan naꞌ.
6 Cateꞌ gulaꞌxóalëpëꞌ dul-laꞌ nabágaꞌgaquiëꞌ,
Juan naꞌ buquilëꞌ légaquiëꞌ nisa lu yegu Jordán naꞌ.
7 Cateꞌ biléꞌenëꞌ Juan taꞌdxinëꞌ zián bönniꞌ yudoꞌ fariseo len yuguꞌ bönniꞌ yudoꞌ saduceo ga zoëꞌ para ilaꞌdilëꞌ nisa,
gudxëꞌ légaquiëꞌ:
―Libiꞌiliꞌ,
diꞌa dza quégacabaꞌ bëla síniaꞌ.
¿Zoa nu buzéajniꞌi libíꞌiliꞌ para izxúnnajliꞌ yöl-laꞌ rusiúdxi naꞌ siꞌ gaca quégaca bönachi?
8 Guliꞌgún le gaca bëꞌ chibubíꞌi ládxiꞌliꞌ.
9 Bitiꞌ cuéqui ícjaliꞌ,
bitiꞌ innaliꞌ nácaliꞌ tsahuiꞌ tuꞌ naca Abraham xuz gudödi queë́liꞌ.
Reaꞌ libíꞌiliꞌ,
huáca gunëꞌ Dios ga uluꞌhuöáca yuguꞌ guiö́j nacuáꞌ ni diꞌa dza queëꞌ Abraham.
10 Chizóa riböza guíë huága para ichugu yuguꞌ yaga le ruluíꞌi ca gaca queë́liꞌ.
Yúguꞌtë yaga bitiꞌ taꞌbía le naca dxiꞌa,
irúgugaca,
ateꞌ ilaꞌguꞌë léguequi lu guíꞌ.
11 Le nácatë nedaꞌ ruquilaꞌ libíꞌiliꞌ nisa lu nisa,
núlöliꞌ chibubíꞌi ládxiꞌliꞌ,
pero Bönniꞌ naꞌ ral-laꞌ guídëꞌ cateꞌ tödi quiaꞌ nedaꞌ,
Lëꞌ gunëꞌ le ruluíꞌisö yöl-laꞌ ridila nisa ni,
uchíziëꞌ libíꞌiliꞌ Dios Böꞌ Láꞌayi len guíꞌ queëꞌ.
Bönniꞌ ni nácatërëꞌ lo ca nedaꞌ,
ateꞌ nedaꞌ bitiꞌ nacaꞌ lesacaꞌ ilecjaꞌ xiráchuëꞌ nudë́ꞌë.
12 Zönëꞌ lu nëꞌë böcö́ꞌ queëꞌ,
le ulúbinëꞌ ga ridxiꞌa zxoaꞌ xtila queëꞌ.
Cuꞌë zxoaꞌ xtila queëꞌ lu yuꞌu ga niꞌ gun chiꞌë le,
pero uzéguiꞌë bëbu que lu guíꞌ,
ateꞌ guíꞌ naꞌ bitiꞌ caꞌ ulu.
Ridileꞌ nisa Jesús
13 Níꞌirö buzë́ꞌë Jesús luyú Galilea,
ateꞌ bidxinëꞌ raꞌ yegu Jordán ga naꞌ zoëꞌ Juan,
para idilëꞌ nisa lu nëꞌë Juan naꞌ.
14 Juan buzáguëꞌë xinözëꞌ,
en rëꞌ Jesús:
―Nedaꞌ ral-laꞌ idilaꞌ nisa lu noꞌo Liꞌ.
¿Zaꞌtsoꞌ Liꞌ quiaꞌ nedaꞌ?
15 Bubiꞌë didzaꞌ Jesús,
rëꞌ lëꞌ:
―Benna lataj naꞌa,
tuꞌ caní ral-laꞌ gunruꞌ idútë le naca tsahuiꞌ.
Níꞌirö Juan bëꞌë Lëꞌ lataj.
16 Cateꞌ chinadilëꞌ Jesús nisa,
laꞌ burúajtëꞌ lu nisa.
Níꞌirö guyalaj lúzxiba lahuëꞌ Jesús,
ateꞌ biléꞌenëꞌ ruhuötjëꞌ Dios Böꞌ Láꞌayi,
en bidxinëꞌ ga naꞌ zoëꞌ,
rinë́ꞌë ca rináꞌabaꞌ guꞌdödoꞌ.
17 Níꞌirö biyö́n chiꞌi nu ruíꞌi didzaꞌ yehuaꞌ yubá,
rnna:
―Bönniꞌ ni náquiëꞌ Zxíꞌinaꞌ.
Nadxíꞌidaꞌ Lëꞌ,
en raza ládxaꞌa Lëꞌ.