DIDZAꞌ DXIꞌA BUZÚAJËꞌ JUAN
Bönniꞌ naꞌ nazíꞌi lëꞌ Didzaꞌ gúlajëꞌ bönachi
1
Cateꞌ gusí lo,
zíꞌatëlö cateꞌ siꞌ gataꞌ yödzölió,
niꞌ zoa cazëꞌ Bönniꞌ lëꞌ Didzaꞌ,
ateꞌ Bönniꞌ naꞌ náquiëꞌ Didzaꞌ zóalenëꞌ Dios,
ateꞌ Didzaꞌ naꞌ naca caz Dios.
2 Bönniꞌ naꞌ náquiëꞌ Didzaꞌ zóalenëꞌ Dios cateꞌ niꞌ gusí lo siꞌ rataꞌ yödzölió.
La Palabra (Juan 1.1-18)
3 Lu nëꞌë Bönniꞌ ni,
Dios benëꞌ yúguꞌtë le dë,
en bitiꞌ bi dë le nunëꞌ Dios le cabí benëꞌ lu nëꞌë Bönniꞌ naꞌ.
4 Dë caz queëꞌ yöl-laꞌ naꞌbán,
ateꞌ yöl-laꞌ naꞌbán naꞌ naca ca tu beníꞌ le ruzeníꞌ lu icja ládxiꞌdoꞌgaca bönachi.
5 Ruzeníꞌ beníꞌ naꞌ ga naca chul-la que dul-laꞌ,
pero bitiꞌ caꞌ sequiꞌ le chul-la naꞌ usulu beníꞌ naꞌ.
6 Dios gusö́l-lëꞌë ni tu bönniꞌ lëꞌ Juan.
7 Bidëꞌ bönniꞌ ni para gáquiëꞌ nu gun ba nalí.
Bidëꞌ para gunëꞌ ba nalí queëꞌ Bönniꞌ naꞌ náquiëꞌ beníꞌ,
para tséjlëꞌgaca yúguꞌtë bönachi Dios niꞌa que lë naꞌ runëꞌ ba nalí.
8 Bitiꞌ náquiëꞌ Juan beníꞌ naꞌ,
pero bidëꞌ para gunëꞌ ba nalí queëꞌ Bönniꞌ naꞌ náquiëꞌ beníꞌ.
9 Bönniꞌ naꞌ náquiëꞌ beníꞌ le naca idú niꞌ raziëꞌ yödzölió ni,
ateꞌ ruzeniꞌë lu icja ládxiꞌdoꞌgaca yúguꞌtë bönachi.
10 Bönniꞌ naꞌ náquiëꞌ beníꞌ bidxinëꞌ yödzölió ni,
ateꞌ lu nëꞌë Lëꞌ Dios benëꞌ yödzölió ni,
pero bönachi yödzölió bitiꞌ buluꞌúnbëꞌë Lëꞌ.
11 Bidxinëꞌ ga nequi queëꞌ,
pero bitiꞌ caꞌ gulaꞌzíꞌ lu náꞌagaquiëꞌ Lëꞌ bönniꞌ nabábalenëꞌ.
12 Yúguꞌtë bönniꞌ gulaꞌzíꞌ lu náꞌagaquiëꞌ Lëꞌ,
bönniꞌ niꞌ gulaꞌyéajlëꞌë Jesús,
Lëꞌ benëꞌ ga dë lu náꞌagaquiëꞌ ilácagaquiëꞌ zxíꞌinëꞌ Dios.
13 Bönniꞌ ni nácagaquiëꞌ zxíꞌinëꞌ Dios,
calëga tuꞌ nácagaquiëꞌ zxíꞌinëꞌ nu bönniꞌ,
en calëga tuꞌ nálajgaquiëꞌ niꞌa que le rizë́ ládxëꞌë nu bönniꞌ,
o niꞌa que tu le rë́ꞌënëꞌ nu bönniꞌ,
pero nácagaquiëꞌ caní tuꞌ naca le rë́ꞌëni quézinëꞌ Dios.
14 Bönniꞌ naꞌ náquiëꞌ Didzaꞌ guljëꞌ bönachi,
en tu chíꞌisö guzóalenëꞌ rëꞌu,
idú dzágagaca Lëꞌ le ruzáꞌ ládxëꞌë Dios queë́ruꞌ,
en le naca idútë li.
Biléꞌetuꞌ yöl-laꞌ zxön queëꞌ,
ateꞌ yöl-laꞌ zxön queëꞌ naꞌ naca le ruíꞌi queë́biꞌ biꞌi laꞌs dui que,
Nu naꞌ naca Xúzibiꞌ.
15 Juan naꞌ benëꞌ ba nalí queëꞌ Bönniꞌ naꞌ,
en bëꞌë zidzaj didzaꞌ,
rnnëꞌ:
―Bönniꞌ ni náquiëꞌ Nu naꞌ gudíxjöꞌa que,
gunníaꞌ:
Bönniꞌ siꞌ záꞌtëlëꞌ ca nedaꞌ nayë́pisëtërëꞌ ca nedaꞌ,
tuꞌ zoa cazëꞌ Lëꞌ zíꞌalö ca nedaꞌ.
16 Le naca idú queëꞌ buzíꞌiruꞌ xibé yúguꞌtëruꞌ,
lë naꞌ buzáꞌ ládxëꞌë queë́ruꞌ Dios,
en ziánrö caꞌ le ruzáꞌ ládxëꞌë queë́ruꞌ.
17 Bidxín queë́ruꞌ xibá queëꞌ Dios lu nëꞌë Moisés,
pero le ruzáꞌ ládxëꞌë queë́ruꞌ Dios,
en le naca idútë li bilaꞌdxín queë́ruꞌ lu nëꞌë Jesucristo.
18 Catu caz nu biléꞌe Dios,
pero Lëꞌ,
laꞌs dui Zxíꞌinëꞌ Dios,
Bönniꞌ naꞌ nadxíꞌideꞌenëꞌ Dios Xuz,
Bönniꞌ ni naꞌ benëꞌ ga núnbëꞌëruꞌ-nëꞌ Dios.
Le benëꞌ ba nalí Juan, bönniꞌ buquilëꞌ bönachi nisa, ca náquiëꞌ Jesús
19 Lë ni naca le benëꞌ ba nalí Juan,
cateꞌ niꞌ bönniꞌ judío unná bëꞌ nacuꞌë Jerusalén gulaꞌsö́l-lëꞌë yuguꞌ bixúz,
en bönniꞌ nabábagaquiëꞌ Leví,
nupa ni nácagaca niꞌa náꞌagaquiëꞌ bixúz,
para ilaꞌnábinëꞌ Juan naꞌ,
ilaꞌnnë́ꞌ:
―¿Nuzxi bönniꞌ liꞌ?
Juan el Bautista identifica al Mesías (Juan 1.19-34)
20 Yálajdoꞌ bëꞌë didzaꞌ Juan,
en bitiꞌ gudáꞌbaguiëꞌ,
pero gudíxjöꞌë catëz naca,
rnnëꞌ:
―Bitiꞌ nacaꞌ Cristo,
Bönniꞌ naꞌ guzxíꞌ lu nëꞌë Dios isö́l-lëꞌë queë́ruꞌ.
21 Níꞌirö gulaꞌnábinëꞌ lëꞌ leyúbölö,
tëꞌ lëꞌ:
―¿Nuzxi caz liꞌ?
¿Naruꞌ nacuꞌ liꞌ Elías,
bönniꞌ bëꞌë didzaꞌ uláz queëꞌ Dios dza niꞌtë?
Gunnë́ꞌ Juan:
―Bitiꞌ nacaꞌ.
Níꞌirö tëꞌ lëꞌ:
―¿Naruꞌ nacuꞌ liꞌ bönniꞌ naꞌ ral-laꞌ guídëꞌ guꞌë didzaꞌ uláz queëꞌ Dios?
Bubiꞌë didzaꞌ Juan,
rnnëꞌ:
―Calëga nedaꞌ.
22 Níꞌirö tëꞌ lëꞌ:
―¿Nuzxi caz nacuꞌ?
Gudíxjöiꞌi netuꞌ para gaca usiyöntuꞌ nupa gulaꞌsö́l-laꞌ netuꞌ.
¿Bizxi rnnoꞌ liꞌ nuzxi nacuꞌ?
23 Bubiꞌë didzaꞌ Juan,
rëꞌ légaquiëꞌ:
―Nedaꞌ nacaꞌ bönniꞌ naꞌ,
nazúaj lu guichi láꞌayi ca naca queëꞌ,
rnna:
Riyö́n chiꞌi nu rulidza lu lataj cáꞌasö,
rnna:
Buliꞌbéaj li nöza para idxín Xanruꞌ queë́liꞌ.
Caní gunnë́ꞌ Isaías,
bönniꞌ naꞌ bëꞌë didzaꞌ uláz queëꞌ Dios.
24 Yuguꞌ bönniꞌ ni nácagaquiëꞌ bönniꞌ yudoꞌ fariseo nasö́l-laꞌgaquiëꞌ bönniꞌ judío unná bëꞌ.
25 Gulaꞌnábinëꞌ Juan,
tëꞌ lëꞌ:
―¿Bizx que ruquiluꞌ bönachi nisa channö cabí nacuꞌ liꞌ Cristo,
en bitiꞌ nacuꞌ Elías,
en calëga bönniꞌ naꞌ ral-laꞌ guídëꞌ guꞌë didzaꞌ uláz queëꞌ Dios?
26 Bubiꞌë didzaꞌ Juan naꞌ,
rëꞌ légaquiëꞌ:
―Nedaꞌ ruquilaꞌ bönachi nisa lu nisa,
pero gatsaj láhuiꞌlö ga zóaliꞌ zoëꞌ tu bönniꞌ bitiꞌ núnbëꞌëliꞌ-nëꞌ.
27 Bönniꞌ ni náquiëꞌ Bönniꞌ naꞌ siꞌ záꞌtëlëꞌ ca nedaꞌ,
en nayë́pisëtërëꞌ ca nedaꞌ,
ateꞌ bitiꞌ nacaꞌ nedaꞌ lesacaꞌ ulecjaꞌ xiráchuëꞌ nudë́ꞌë.
28 Yúguꞌtë lë ni guca lu xiyú yödzö Betábara,
ga naca iaꞌtsöláꞌa yegu Jordán,
zacaꞌ ga rilén gubidza,
ga niꞌ buquilëꞌ Juan bönachi nisa.
Jesús náquiëꞌ ca böꞌcuꞌ zxílaꞌdoꞌ tutiëꞌ-baꞌ lahuëꞌ Dios tuꞌ nözi dul-laꞌ
29 Dza buropi niꞌ Juan biléꞌenëꞌ Jesús,
zëꞌë ga zoëꞌ,
ateꞌ rnnëꞌ:
―Buliꞌyútsöcaꞌ.
Bönniꞌ ni náquiëꞌ böꞌcuꞌ zxílaꞌdoꞌ queëꞌ Dios,
gátiëꞌ para ugǘëꞌ dul-laꞌ nabágaꞌgaca bönachi yödzölió.
30 Lëꞌ náquiëꞌ bönniꞌ naꞌ gunníaꞌ queëꞌ:
“Siꞌ záꞌtëlëꞌ ca nedaꞌ tu bönniꞌ,
nayë́pisëtërëꞌ ca nedaꞌ,
tuꞌ zoa cazëꞌ zíꞌalö ca nedaꞌ.”
31 Nedaꞌ bitiꞌ bénbëꞌa-nëꞌ zíꞌalö,
pero bidaꞌ,
ruquilaꞌ bönachi nisa para ilúnbëꞌe bönachi Israel Lëꞌ.
32 Benëꞌ ba nalí Juan ca naca queëꞌ Jesús,
rnnëꞌ:
―Biléꞌedaꞌ-nëꞌ Dios Böꞌ Láꞌayi,
bötjëꞌ birúajëꞌ yehuaꞌ yubá,
gunë́ꞌë ca rináꞌabaꞌ guꞌdödoꞌ,
ateꞌ bidxinëꞌ ga zoëꞌ Jesús,
en bugáꞌanalenëꞌ Lëꞌ.
33 Bitiꞌ bénbeꞌedaꞌ Lëꞌ zíꞌalö.
Gudxi nedaꞌ Nu naꞌ gusö́l-laꞌ nedaꞌ para uquilaꞌ bönachi nisa,
gunnë́ꞌ:
“Cateꞌ iléꞌenuꞌ-nëꞌ huötjëꞌ Dios Böꞌ Láꞌayi,
tsöjsóalenëꞌ Bönniꞌ naꞌ,
en ugáꞌanalenëꞌ Lëꞌ,
Bönniꞌ ni gunëꞌ le ruluíꞌisö yöl-laꞌ ridila nisa ni,
uchíziëꞌ bönachi Dios Böꞌ Láꞌayi.”
34 Naꞌa,
chibiléꞌedaꞌ lë naꞌ,
en runaꞌ ba nalí queëꞌ Bönniꞌ ni,
náquiëꞌ Zxíꞌinëꞌ Dios.
Yuguꞌ bönniꞌ usëda zíꞌalö queëꞌ Jesús
35 Iaꞌtú dza caꞌ,
leyúbölö zoëꞌ Juan niꞌ,
ateꞌ nacuáꞌlenëꞌ lëꞌ chopëꞌ bönniꞌ dáꞌgaquiëꞌ lëꞌ.
Los seguidores siguen a Jesús (Juan 1.35-51)
―Buliꞌyutsöcaꞌ.
Niꞌ zoëꞌ bönniꞌ naꞌ náquiëꞌ böꞌcuꞌ zxílaꞌdoꞌ queëꞌ Dios,
gatiëꞌ uláz quegaca bönachi dul-laꞌ.
37 Chopëꞌ bönniꞌ naꞌ dáꞌgaquiëꞌ Juan bilaꞌyönnëꞌ didzaꞌ ni bëꞌë lëꞌ,
ateꞌ yöjnógaquiëꞌ Jesús.
38 Níꞌirö buécjëꞌ Jesús,
en buyúëꞌ chopëꞌ ni söjnógaquiëꞌ Lëꞌ,
ateꞌ rëꞌ légaquiëꞌ:
―¿Bizxi riguíljaliꞌ?
Tëꞌ Lëꞌ:
―Bönniꞌ Usedi,
¿gazxi zuꞌ?
39 Bubiꞌë didzaꞌ Jesús,
rëꞌ légaquiëꞌ:
―Guliꞌdá,
uyuliꞌ.
Níꞌirö yöjácalenëꞌ Lëꞌ,
en bilaꞌléꞌenëꞌ ga naꞌ zoëꞌ,
ateꞌ buluꞌgáꞌanalenëꞌ Lëꞌ dza naꞌ,
tuꞌ chizáꞌ ral-la.
40 Andrés,
bö́chëꞌë Simón Pedro,
náquiëꞌ tuëꞌ bönniꞌ chopëꞌ niꞌ bilaꞌyönnëꞌ didzaꞌ bëꞌë Juan,
en yöjnógaquiëꞌ Jesús.
41 Andrés naꞌ,
zíꞌalö yöjdiljëꞌ bönniꞌ bö́chëꞌë,
lëꞌ Simón,
ateꞌ rëꞌ lëꞌ:
―Chibidzö́lituꞌ-nëꞌ Mesías.
Mesías naca tu didzaꞌ hebreo le rnna lu didzaꞌ griego:
Cristo,
ateꞌ lu didzaꞌ xidzaꞌ:
Bönniꞌ nasö́l-lëꞌë Dios.
42 Níꞌirö Andrés naꞌ laꞌ guchëꞌtëꞌ Simón ga naꞌ zoëꞌ Jesús.
Cateꞌ Jesús biléꞌenëꞌ lëꞌ,
rëꞌ lëꞌ:
―Liꞌ nacuꞌ Simón,
zxíꞌinëꞌ Jonás.
Naꞌa,
siꞌ loꞌ Cefas.
Cefas naca caꞌ tu didzaꞌ hebreo le rnna:
Pedro,
lu didzaꞌ xtila,
ateꞌ lu didzaꞌ xidzaꞌ:
Guiö́j.
Jesús rulidzëꞌ Felipe, en Natanael
43 Cateꞌ zaꞌ reníꞌ iaꞌtú dza,
gúꞌunnëꞌ Jesús tsejëꞌ luyú Galilea,
ateꞌ yöjxáquiëꞌ Felipe,
en rëꞌ lëꞌ:
―Gudáꞌ nedaꞌ.
44 Náquiëꞌ Felipe bönniꞌ yödzö Betsaida,
le naca ládzagaquiëꞌ Andrés,
en Pedro.
45 Felipe budzö́linëꞌ Natanael,
en rëꞌ lëꞌ:
―Chibidzö́lituꞌ-nëꞌ bönniꞌ naꞌ buzúajëꞌ Moisés ca naca queëꞌ lu guichi lu xibá queëꞌ Dios,
ateꞌ buluꞌzúajëꞌ caꞌ ca naca queëꞌ bönniꞌ guluꞌë didzaꞌ uláz queëꞌ Dios.
Bönniꞌ ni Jesús,
zxíꞌinëꞌ José,
bönniꞌ yödzö Nazaret.
46 Natanael rëꞌ lëꞌ:
―¿Naruꞌ hualaꞌtsö Nazaret tu le naca dxiꞌa?
Felipe rëꞌ lëꞌ:
―Gudá uyúꞌ.
47 Cateꞌ biléꞌenëꞌ Jesús zëꞌë Natanael naꞌ ga zoëꞌ,
rnnëꞌ:
―Buliꞌyú ni tu bönniꞌ náquiëꞌ idú bönniꞌ Israel,
en bitiꞌ rnnasëꞌ caꞌ bönniꞌ ni.
48 Níꞌirö Natanael gunábinëꞌ Jesús,
rëꞌ Lëꞌ:
―¿Naruꞌ núnbëꞌtsoꞌ nedaꞌ?
Bubiꞌë didzaꞌ Jesús,
rëꞌ lëꞌ:
―Cateꞌ siꞌ ulídzatërëꞌ Felipe liꞌ,
cateꞌ niꞌ zuꞌ zxan yaga higo,
biléꞌedaꞌ liꞌ.
49 Níꞌirö bubiꞌë didzaꞌ Natanael,
rëꞌ Lëꞌ:
―Bönniꞌ Usedi,
Liꞌ nacuꞌ Zxíꞌinëꞌ Dios.
Liꞌ nacuꞌ Nu inná beꞌe bönachi Israel.
50 Bubiꞌë didzaꞌ Jesús,
rëꞌ lëꞌ:
―¿Réajlëꞌtsoꞌ tuꞌ gudxaꞌ liꞌ:
Biléꞌedaꞌ liꞌ zxan yaga higo?
Yuguꞌ le zxö́ntërö ca lë ni hualéꞌenuꞌ.
51 Lëscaꞌ caní rëꞌ Jesús légaquiëꞌ,
rnnëꞌ:
―Le nácatë reaꞌ libíꞌiliꞌ,
iléꞌeliꞌ nayalaj lúzxiba,
en taꞌbenëꞌ,
en tuꞌhuötjëꞌ gubáz láꞌayi queëꞌ Dios ga zoaꞌ nedaꞌ,
Bönniꞌ Guljëꞌ Bönachi.