Rubanëꞌ Jesús lu yöl-laꞌ guti
24
Cateꞌ bidxín dza risí lo iaꞌgadxi dza naꞌ,
cateꞌ niꞌ naca zíladoꞌ,
bilaꞌdxinnu nigula naꞌ raꞌ yeru ba queëꞌ Jesús.
Nuáꞌgacanu yuguꞌ le riláꞌ zxixi,
lë naꞌ chinupáꞌagacanu,
ateꞌ dzágagacanu légacanu iaꞌbál-lanu nigula.
San Lucas 24:1-35
2 Cateꞌ bilaꞌdxinnu niꞌ,
bilaꞌléꞌenu chinadúa guiö́j naꞌ gudáꞌ ga nu riyaza yeru ba queëꞌ.
3 Cateꞌ gulaꞌyázanu yeru ba naꞌ,
bitiꞌ buluꞌdzö́linu zoa Xanruꞌ Jesús niꞌ.
4 Cateꞌ niꞌ taꞌbö́ꞌönu böniga niꞌa que lë ni,
chopëꞌ bönniꞌ nácugaquiëꞌ lariꞌ rëpi yösa beníꞌ laꞌ bilaꞌdxintëꞌ niꞌ,
en gulaꞌzuínëꞌ ga naꞌ nacuáꞌanu.
5 Níꞌirö guládxinu,
en buluꞌzötaj ícjagacanu,
tuꞌyunu lu yu,
ateꞌ chopëꞌ gubáz láꞌayi naꞌ tëꞌ légacanu,
taꞌnnë́ꞌ:
―¿Bizx que ruguílajliꞌ nu zoa nabán xilataj nu nati?
6 Bitiꞌ zoëꞌ ni,
tuꞌ chibubanëꞌ.
Guliꞌtsöjné lë naꞌ chigudxi cazëꞌ libíꞌiliꞌ cateꞌ niꞌ zoëꞌ luyú Galilea.
7 Gunnë́ꞌ:
“Run bayudxi nu udödi nedaꞌ,
Bönniꞌ Guljëꞌ Bönachi,
lu náꞌagaquiëꞌ bönniꞌ dul-laꞌ,
ateꞌ uluꞌdë́ꞌë nedaꞌ lëꞌe yaga cruz,
ateꞌ ubanaꞌ cateꞌ gaca tsonna dza.”
8 Níꞌirö yöjnégacanu didzaꞌ naꞌ bëꞌë Jesús,
9 ateꞌ buluꞌzáꞌanu raꞌ yeru ba naꞌ,
yöjtíxjöiꞌiguequinu idxinéajtëꞌ bönniꞌ gubáz queëꞌ Cristo,
en iaꞌzícaꞌrëꞌ caꞌ,
ca naca lë naꞌ guca.
10 Nigula naꞌ yöjtíxjöiꞌiguequinu bönniꞌ gubáz naꞌ yuguꞌ lë ni,
nácagacanu María Magdalena,
en Juana,
en María,
xinë́ꞌë Jacobo,
en iaꞌbál-lanu nigula naꞌ dzágagacanu légacanu.
11 Guléquinëꞌ bönniꞌ gubáz naꞌ tuíꞌinu didzaꞌ chixi,
en bitiꞌ gulaꞌyéajlëꞌë légacanu.
12 Níꞌirö guyasëꞌ Pedro,
en carelö saꞌyéajëꞌ raꞌ yeru ba naꞌ.
Cateꞌ buyúëꞌ lu ba naꞌ,
biléꞌenëꞌ yuguꞌ láriꞌsö nacuáꞌ niꞌ,
ateꞌ níꞌirö bö́ajëꞌ lidxëꞌ,
rubáninëꞌ ca naca lë naꞌ guca.
Le guca laꞌ nöza ridxintë Emaús
13 Laꞌ dza náꞌasö söjáquiëꞌ chopëꞌ,
yúꞌugaquiëꞌ nöza le ridxintë Emaús,
le röꞌö ca chopa hora rizáꞌaruꞌ Jerusalén.
14 Yúꞌugacasëꞌ caꞌ nöza,
tuꞌë didzaꞌ ca naca yúguꞌtë lë naꞌ guca.
15 Tsanni niꞌ yúꞌugaquiëꞌ nöza,
tuꞌë didzaꞌ laꞌ légacasëꞌ,
gubíguiꞌë galaꞌ Lë cazëꞌ Jesús,
ateꞌ gudálenëꞌ légaquiëꞌ tsözxö́n.
16 Bitiꞌ buluꞌúnbëꞌë Lëꞌ tuꞌ naca ca tu le nabagaꞌ guiö́j lógaquiëꞌ.
17 Níꞌirö Jesús gunábinëꞌ légaquiëꞌ,
rnnëꞌ:
―¿Bizxi didzaꞌ naꞌ ruíꞌiliꞌ laꞌ libíꞌisiliꞌ yúꞌuliꞌ nöza?
¿Bizx que naꞌ ruhuíꞌiniliꞌ?
18 Bubiꞌë didzaꞌ bönniꞌ naꞌ lëꞌ Cleofas,
rëꞌ Lëꞌ:
―¿Nácatsoꞌ bönniꞌ ziꞌtuꞌ lu yödzö Jerusalén,
en tuzuꞌ liꞌ bitiꞌ nö́zinuꞌ lë naꞌ guca néaje nasi niꞌ?
19 Níꞌirö Jesús rëꞌ légaquiëꞌ:
―¿Bizxi naꞌ guca?
Tëꞌ Lëꞌ:
―Lë naꞌ guca queëꞌ Jesús,
bönniꞌ Nazaret.
Gúquiëꞌ bönniꞌ bëꞌë didzaꞌ uláz queëꞌ Dios,
ateꞌ len yöl-laꞌ huáca zxön benëꞌ dxin,
en bëꞌë didzaꞌ lahuëꞌ Dios,
en lógaca yúguꞌtë bönachi.
20 Yuguꞌ bixúz unná bëꞌ,
len bönniꞌ taꞌnná béꞌenëꞌ netuꞌ buluꞌdödëꞌ Lëꞌ,
en gulunëꞌ ga nu guchugu queëꞌ gátiëꞌ,
ateꞌ buluꞌdë́ꞌë Lëꞌ lëꞌe yaga cruz.
21 Netuꞌ bentuꞌ löza gúquiëꞌ Lëꞌ bönniꞌ naꞌ ral-laꞌ huöáꞌuëꞌ bönachi Israel,
pero naꞌa chiguca tsonna dza cateꞌ gulaca lë ni.
22 Iaꞌstú,
bál-lanu nigula nútsaꞌgacanu netuꞌ gulunnu ga gurö́ꞌötuꞌ böniga.
Yöjácanu raꞌ yeru ba queëꞌ cateꞌ siꞌ gulén gubidza naꞌa dza,
23 en cateꞌ bitiꞌ buluꞌdzö́linu Lëꞌ,
buduhuö́jgacanu,
en gulënu netuꞌ bilaꞌléꞌenu yuguꞌ gubáz láꞌayi queëꞌ Dios,
nupa niꞌ gulë́ légacanu zoëꞌ nabanëꞌ Jesús.
24 Níꞌirö bal-lëꞌ bönniꞌ luzáꞌatuꞌ yöjáquiëꞌ raꞌ yeru ba naꞌ,
en bilaꞌléꞌenëꞌ naca ca naꞌ gulaꞌnnanu nigula naꞌ,
pero bitiꞌ bilaꞌléꞌenëꞌ Jesús.
25 Níꞌirö Jesús gudxëꞌ légaquiëꞌ:
―Libiꞌiliꞌ,
bönniꞌ bitiꞌ réajniꞌininëꞌ.
Nazidi icja ládxiꞌdoꞌoliꞌ para cabí tséajlëꞌëliꞌ yúguꞌtë le gulaꞌnnë́ꞌ bönniꞌ guluꞌë didzaꞌ uláz queëꞌ Dios.
26 ¿Naruꞌ cabí ben bayudxi quiꞌi sáquëꞌë Cristo yuguꞌ lë ni,
en tsáziëꞌ ga niꞌ tsë́pisëtërëꞌ?
27 Níꞌirö gusí lahuëꞌ Jesús riguíxjöiꞌinëꞌ légaquiëꞌ yúguꞌtë le ruíꞌi didzaꞌ ca naca queëꞌ le nazúajgaca lu guichi láꞌayi,
ca naꞌ gusí lo bëꞌë didzaꞌ Moisés ga bidxintë yuguꞌ le gulaꞌnnë́ꞌ yúguꞌtë bönniꞌ guluꞌë didzaꞌ uláz queëꞌ Dios.
28 Cateꞌ bilaꞌdxinëꞌ yö́dzödoꞌ ga naꞌ söjáquiëꞌ,
benëꞌ Jesús ca tu bönniꞌ zéajtërëꞌ ziꞌtuꞌ.
29 Gulunëꞌ bayudxi ugáꞌanalenëꞌ légaquiëꞌ,
taꞌnnë́ꞌ:
―Bugáꞌanalen netuꞌ,
tuꞌ chiridzö́ꞌ naꞌa,
en chizóa gal-la.
Níꞌirö guyáziëꞌ Jesús yuꞌu,
en bugáꞌanalenëꞌ légaquiëꞌ.
30 Cateꞌ niꞌ Jesús röꞌë rágulenëꞌ légaquiëꞌ,
gudélëꞌë yöta xtila,
en gudxëꞌ Dios:
“Xclenuꞌ.”
Níꞌirö buzxuzxjëꞌ le,
en bëꞌë quégaquiëꞌ.
31 Laꞌ níꞌisö bidúa lë naꞌ gubagaꞌ guiö́j lógaquiëꞌ,
ateꞌ buluꞌúnbëꞌë Jesús,
ateꞌ Lëꞌ buniti cuinëꞌ lógaquiëꞌ.
32 Níꞌirö gulë́ luzë́ꞌë tuëꞌ iaꞌtúëꞌ:
―¿Naruꞌ cabí böálaꞌticaꞌ ládxiꞌdoꞌoruꞌ tsanni niꞌ ruíꞌilenëꞌ rëꞌu didzaꞌ laꞌ nöza,
en cateꞌ niꞌ ruchila láꞌaniëꞌ le nazúaj lu guichi láꞌayi?
33 Laꞌ níꞌisö gulaꞌzuínëꞌ yöjhuö́jgaquiëꞌ Jerusalén,
ateꞌ yöjxácaꞌgaquiëꞌ nudúbigaquiëꞌ idxinéajtëꞌ bönniꞌ gubáz queëꞌ Jesús,
en nupa nacuáꞌlen légaquiëꞌ.
34 Níꞌirö yuguꞌ bönniꞌ naꞌ nacuꞌë niꞌ gulë́ꞌ chopëꞌ naꞌ:
―Chibubán cazëꞌ Xanruꞌ,
en buluíꞌi lahuëꞌ,
ateꞌ biléꞌenëꞌ Simón Lëꞌ.
35 Níꞌirö chopëꞌ naꞌ gulaꞌguíxjöꞌë ca naꞌ guca quégaquiëꞌ laꞌ nöza,
en ca naꞌ buluꞌúnbëꞌë Jesús cateꞌ niꞌ buzxuzxjëꞌ yöta xtila naꞌ.
Bönniꞌ usëda queëꞌ Jesús tuꞌléꞌenëꞌ Lëꞌ
36 Tsanni niꞌ tuꞌë didzaꞌ ca nácagaca lë ni,
laꞌ yöjsóatëꞌ Jesús gatsaj láhuiꞌlö ga naꞌ nacuꞌë,
ateꞌ rëꞌ légaquiëꞌ:
―Guliꞌsóa dxi ládxiꞌliꞌ.
San Lucas 24:36-53
―¿Bizx que rö́ꞌöliꞌ böniga?
¿Bizx que rizáꞌ ládxiꞌliꞌ yuguꞌ lë ni?
39 Buliꞌyútsöcaꞌ naꞌa,
en niꞌa.
Nedaꞌ caz ni.
Guliꞌcán nedaꞌ,
en buliꞌyú nedaꞌ,
tuꞌ cabí daꞌ bixín bëlaꞌ,
en bitiꞌ yuꞌu dxita ca ni riléꞌeliꞌ naca quiaꞌ nedaꞌ.
40 Niꞌ ruíꞌisëꞌ caꞌ didzaꞌ ni,
buluíꞌinëꞌ légaquiëꞌ nëꞌë,
en niꞌë.
41 Tuꞌ tuꞌdzéjaguequinëꞌ bitiꞌ gulaꞌyéajlëꞌë,
en gulaꞌböꞌë baniga.
Que lë ni naꞌ Jesús gudxëꞌ légaquiëꞌ:
―¿Dë queë́liꞌ ni le gahuaꞌ?
42 Níꞌirö buluꞌnödzjëꞌ queëꞌ látiꞌdoꞌobaꞌ böla chinéguiꞌbaꞌ,
en tu quízxiꞌbaꞌ buz.
43 Guzxiꞌë Jesús le,
en gudahuëꞌ lógaquiëꞌ.
44 Níꞌirö rëꞌ légaquiëꞌ:
―Yúguꞌ lë naꞌ gulaca quiaꞌ gulaca ca naꞌ gudxi cazaꞌ libíꞌiliꞌ cateꞌ niꞌ zóalenaꞌ libíꞌiliꞌ,
gunníaꞌ:
Run bayudxi gaca yúguꞌtë le nazúaj lu guichi lu xibá queëꞌ Moisés,
en le gulaꞌnnë́ꞌ bönniꞌ guluꞌë didzaꞌ uláz queëꞌ Dios,
en le nazúaj lu guichi nazíꞌi le Yuguꞌ Salmo,
ca ral-laꞌ gaca quiaꞌ nedaꞌ.
―Caní nazúaj lu guichi ca run bayudxi gaca queëꞌ Cristo,
quiꞌi sáquëꞌë,
en ubanëꞌ lu yöl-laꞌ guti cateꞌ gaca tsonna dza,
47 ateꞌ idútë yödzölió ral-laꞌ gaca libán ca naca quiaꞌ nedaꞌ para uluꞌbíꞌi ládxiꞌgaca bönachi para uniti lahuëꞌ Dios dul-laꞌ nabágaꞌgaquiëꞌ.
Lu yödzö Jerusalén isí lo gaca libán naꞌ
48 ateꞌ libíꞌi cázaliꞌ naꞌ biléꞌeliꞌ yuguꞌ lë ni ral-laꞌ gunliꞌ ba nalí que.
49 Buliꞌyútsöcaꞌ,
isö́l-laꞌa queë́liꞌ le guzxíꞌ lu nëꞌë Xuzaꞌ gunnëꞌ queë́liꞌ,
pero buliꞌgáꞌanasö Jerusalén cateꞌ idxinrö queë́liꞌ yöl-laꞌ huáca naꞌ zaꞌ yehuaꞌ yubá.
Ruhuëpëꞌ Jesús yehuaꞌ yubá
50 Níꞌirö Jesús guchë́ꞌë yuguꞌ bönniꞌ dáꞌgaquiëꞌ Lëꞌ,
söjáquiëꞌ yödzö Betania,
ateꞌ niꞌ guchisa nëꞌë,
en bulidza tsáhuëꞌë légaquiëꞌ.
51 Tsanni niꞌ rulidza tsáhuiꞌsëꞌ caꞌ légaquiëꞌ,
buzáꞌatëꞌ ga naꞌ nacuꞌë,
buëpëꞌ yehuaꞌ yubá.
52 Gudödi gulaꞌyéaj ládxiꞌgaquiëꞌ Lëꞌ,
lu yöl-laꞌ rudzeja quégaquiëꞌ yöjhuö́jgaquiëꞌ Jerusalén.
53 Gulaꞌcuáꞌticaꞌsëꞌ chila yudoꞌ,
taꞌguꞌë Dios yöl-laꞌ ba,
en tun zxönëꞌ Lëꞌ.
¡Caꞌ naca!