Rubanëꞌ Jesús lu yöl-laꞌ guti
16
Cateꞌ chinadödi dza láꞌayi quégaca bönachi judío le naca dza gadxi,
María Magdalena,
en Salomé,
en María,
xinë́ꞌë Jacobo,
taꞌzíꞌinu yuguꞌ le riláꞌ zxixi para tsöjlúꞌugacanu Jesús.
2 Niꞌ naca zíladoꞌ dza risí lo,
yöjácanu raꞌ yeru ba queëꞌ.
Bilaꞌdxinnu niꞌ cateꞌ siꞌ gulén gubidza.
3 Gulaꞌnábinu luzáꞌagacanu:
―¿Nuzxi cúatsö queë́ruꞌ guiö́j naꞌ daꞌ ga nu riyaza ba queëꞌ?
4 Cateꞌ bilaꞌdxinnu niꞌ,
buluꞌyunu,
en bilaꞌléꞌenu chinadúa guiö́j naꞌ,
ateꞌ guiö́j zxön naca.
5 Gulaꞌyúꞌunu yeru ba lëꞌe guíꞌa guiö́j naꞌ,
ateꞌ niꞌ bilaꞌléꞌenu-biꞌ tubiꞌ biꞌi bönniꞌ raꞌbán,
nácabiꞌ gubáz láꞌayi queëꞌ Dios.
Rö́ꞌöbiꞌ tsöláꞌa ibëla lu yeru ba naꞌ,
nácubiꞌ lariꞌ tunna chiguíchidoꞌos.
Guládxideꞌenu.
6 Níꞌirö biꞌi naꞌ gúdxibiꞌ légacanu,
rnnabiꞌ:
―Bítiꞌrö gádxiliꞌ.
Ruguílajliꞌ Jesús,
Bönniꞌ Nazaret,
Bönniꞌ naꞌ gudë́ꞌë lëꞌe yaga cruz.
Chibubanëꞌ.
Bitiꞌ zoëꞌ ni.
Buliꞌyú ga ni gulaꞌguꞌë Lëꞌ.
7 Guliꞌtséaj naꞌa,
guliꞌtsöjtíxjöiꞌi caꞌ yuguꞌ bönniꞌ usëda queëꞌ,
encaꞌ Pedro.
Guië́liꞌ légaquiëꞌ:
“Tsejëꞌ Jesús luyú Galilea zíꞌalö ca libíꞌiliꞌ.
Niꞌ uléꞌeliꞌ-nëꞌ ca naꞌ chigudxi cazëꞌ libíꞌiliꞌ.”
8 Níꞌirö buluꞌrúajnu niꞌ,
buluꞌzxúnnajnu raꞌ yeru ba naꞌ tuꞌ taꞌzxízinu lu yöl-laꞌ radxi ridzöbi quégacanu.
Cuntu nu gulënu caꞌ tuꞌ tádxinu.
Ruluíꞌi lahuëꞌ Jesús lonu María Magdalena
9 Cateꞌ bubanëꞌ Jesús zíladoꞌ dza naꞌ,
buluíꞌi lahuëꞌ zíꞌalö lonu María Magdalena,
nigula naꞌ bubéajëꞌ gadxi böꞌ xihuiꞌ gulaꞌyúꞌu lënu.
10 Guyéajnu yöjtíxjöiꞌinu nupa naꞌ gulaꞌdalen Jesús.
Nupa ni taꞌsëbi ládxiꞌgaca,
en taꞌbödxi yechiꞌ.
11 Cateꞌ bilaꞌyöni didzaꞌ ruíꞌinu,
zoëꞌ nabanëꞌ Jesús,
ateꞌ biléꞌe quézinu Lëꞌ,
bitiꞌ gulaꞌyéajlëꞌ lënu.
Chopëꞌ bönniꞌ usëda queëꞌ Jesús tuꞌléꞌenëꞌ Lëꞌ
12 Gudödi naꞌ,
nadzáꞌalö buluíꞌi lahuëꞌ Jesús lógaquiëꞌ chopëꞌ bönniꞌ usëda queëꞌ yúꞌugaquiëꞌ nöza,
söjáquiëꞌ ga naca ladaj guixiꞌ.
13 Níꞌirö buluꞌdxinëꞌ,
dutíxjöiꞌiguequinëꞌ iaꞌzícaꞌrëꞌ,
ateꞌ ni xtídzaꞌgaquiëꞌ bitiꞌ gulaꞌyéajlëꞌë.
Le riguꞌë Jesús lu náꞌagaquiëꞌ bönniꞌ gubáz queëꞌ
14 Ga yöjsetë,
buluíꞌi lahuëꞌ Jesús lógaquiëꞌ idxinéajtëꞌ tsanni niꞌ taꞌböꞌë tahuëꞌ,
ateꞌ gudil-lëꞌ légaquiëꞌ didzaꞌ tuꞌ cabí taꞌyéajlëꞌë Lëꞌ,
en tuꞌ naca zidi icja ládxiꞌdoꞌgaquiëꞌ,
tuꞌ cabí gulaꞌyéajlëꞌë xtídzaꞌgaca nupa naꞌ bilaꞌléꞌe Lëꞌ nubanëꞌ.
15 Níꞌirö gudxëꞌ légaquiëꞌ,
rnnëꞌ:
―Guliꞌtséaj idútë yödzölió tsöjenliꞌ libán que didzaꞌ dxiꞌa lógaca yúguꞌtë bönachi.
16 Nu tséajlëꞌ nedaꞌ,
en idila nisa,
ulá nu naꞌ,
pero nu bitiꞌ tséajlëꞌ,
irugu que gati nu naꞌ.
17 Le ilaca bëꞌ ni ilunëꞌ bönniꞌ ilaꞌyéajlëꞌë nedaꞌ.
Uluꞌgunëꞌ dxin Laꞌ nedaꞌ,
en uluꞌbéajëꞌ yuguꞌ böꞌ xihuiꞌ yúꞌugaca bönachi,
en iluꞌë didzaꞌ izáꞌa.
18 Channö ilaꞌzönëꞌ-baꞌ bëla síniaꞌ lu náꞌagaquiëꞌ,
o channö ileꞌjëꞌ le nachë́ꞌ yöl-laꞌ guti,
bitiꞌ bi gun quégaquiëꞌ.
Ilaꞌxóa nëꞌë nupa teꞌe,
ateꞌ uluꞌhuöácatë.
Ruhuëpëꞌ Jesús yehuaꞌ yubá
(Lc. 24:50-53; Hc. 1:6‑11)