Ridxinëꞌ Jesús lahuëꞌ Pilato, bönniꞌ rinná bëꞌë
15
Niꞌ naca zíladoꞌ,
yuguꞌ bixúz unná bëꞌ len bönniꞌ gula tuꞌzéajniꞌinëꞌ,
en yuguꞌ bönniꞌ yudoꞌ usedi,
en yúguꞌtë bönniꞌ yúlahuiꞌ lo gulún xtídzaꞌgaquiëꞌ.
Níꞌirö gulaꞌchë́ꞌë Jesús náguëꞌë,
en buluꞌdödëꞌ Lëꞌ lu nëꞌë Pilato,
bönniꞌ rinná bëꞌë uláz que yödz Roma.
2 Pilato gunábinëꞌ Jesús,
rnnëꞌ:
―¿Naruꞌ nacuꞌ Liꞌ Bönniꞌ inná béꞌenëꞌ bönachi judío?
Bubiꞌë didzaꞌ Jesús,
rnnëꞌ:
―Ca nácatë rnnoꞌ.
3 Yuguꞌ bixúz unná bëꞌ buluꞌzéguiëꞌ Jesús didzaꞌ le zián.
4 Níꞌirö Pilato gunábinëꞌ Lëꞌ leyúbölö,
rnnëꞌ:
―¿Naruꞌ cabí rubiꞌitsoꞌ didzaꞌ?
Buzë́tsöcaꞌ naguꞌ cateꞌ xö zián le taꞌnnë́ꞌ quiuꞌ.
5 Bitiꞌ bi didzaꞌ bubiꞌë Jesús.
Caꞌ guca,
bubáninëꞌ Pilato.
Taꞌchúguiëꞌ queëꞌ Jesús gátiëꞌ
6 Dë tu le runëꞌ Pilato cateꞌ raca laní naꞌ,
rusanëꞌ lu náꞌagaca bönachi tu bönniꞌ nadzunëꞌ lidxi guíë,
nútiꞌtës nu taꞌnaba.
7 Nadzunëꞌ tu bönniꞌ lëꞌ Barrabás lidxi guíë,
ateꞌ dzágagaquiëꞌ lëꞌ iaꞌbal-lëꞌ luzë́ꞌë,
yuguꞌ bönniꞌ gulútiëꞌ bönachi cateꞌ gulaꞌdáꞌbáguiëꞌ yúlahuiꞌ.
8 Cateꞌ bilaꞌdxín bönachi zián niꞌ,
gulaꞌsí lógaquiëꞌ taꞌnabëꞌ lahuëꞌ Pilato gunëꞌ quégaquiëꞌ ca run cazëꞌ.
9 Bubiꞌë didzaꞌ Pilato,
rnnëꞌ:
―¿Rë́ꞌëniliꞌ usanaꞌ-nëꞌ queë́liꞌ Bönniꞌ Inná Béꞌenëꞌ Bönachi Judío?
10 Caní gunnë́ꞌ Pilato tuꞌ réquibeꞌenëꞌ buluꞌdödëꞌ yuguꞌ bixúz unná bëꞌ Jesús lu nëꞌë tuꞌ tuꞌzxéꞌenëꞌ Lëꞌ.
11 Yuguꞌ bixúz unná bëꞌ naꞌ gulaꞌguꞌë xilá ládxiꞌgaca bönachi zián naꞌ,
para ilaꞌnabëꞌ lahuëꞌ Pilato usanëꞌ lu náꞌagaquiëꞌ Barrabás.
12 Níꞌirö Pilato gunábinëꞌ légaquiëꞌ leyúbölö,
rnnëꞌ:
―¿Bizxi rë́ꞌëniliꞌ gunaꞌ queëꞌ bönniꞌ naꞌ ruíꞌiliꞌ lëꞌ,
Bönniꞌ Inná Béꞌenëꞌ Bönachi Judío?
13 Guluꞌë zidzaj didzaꞌ,
taꞌnnë́ꞌ:
―¡Budë́ꞌë lëꞌe yaga cruz!
14 Gunábinëꞌ Pilato légaquiëꞌ,
rnnëꞌ:
―¿Bizxi caz döꞌ nuꞌë?
Leyúbölö tuꞌë zidzaj didzaꞌ,
taꞌnnë́ꞌ:
―¡Budë́ꞌë lëꞌe yaga cruz!
15 Tuꞌ gúꞌunnëꞌ Pilato gunëꞌ ga ilaꞌyaza ládxiꞌgaca bönachi zián naꞌ,
busanëꞌ Barrabás lu náꞌagaquiëꞌ.
Níꞌirö gunná béꞌenëꞌ nu quin Jesús,
ateꞌ budödëꞌ Lëꞌ lu náꞌagaquiëꞌ bönniꞌ uluꞌdë́ꞌë Lëꞌ lëꞌe yaga cruz.
16 Níꞌirö yuguꞌ bönniꞌ röjáquiëꞌ gudil-la gulaꞌchë́ꞌë Jesús löꞌa yúlahuiꞌ,
ateꞌ buluꞌtubëꞌ luzáꞌagaquiëꞌ niꞌ.
17 Buluꞌgácuëꞌ Jesús tu lariꞌ xiná gul-la,
en gulunëꞌ tu breguiꞌ niꞌa nëꞌe yötsiꞌ,
le buluꞌdxíëꞌ icjëꞌ.
18 Níꞌirö gulaꞌsí lógaquiëꞌ tuꞌlidzëꞌ Jesús,
taꞌnnë́ꞌ:
―¡Yöl-laꞌ ba liꞌ,
rinná béꞌenuꞌ bönachi judío!
19 Gulaꞌguínëꞌ gui icjëꞌ,
en buluꞌchejëꞌ Lëꞌ zxönaꞌ.
Buluꞌzóa zxíbigaquiëꞌ lahuëꞌ,
en lu yöl-laꞌ rutitaj gulunëꞌ Lëꞌ bal.
20 Cateꞌ budxi buluꞌtitjëꞌ Lëꞌ,
buluꞌgǘëꞌ lariꞌ xiná chul-la naꞌ nácuëꞌ ateꞌ buluꞌgácuëꞌ Lëꞌ lariꞌ que cazëꞌ.
Níꞌirö gulaꞌchë́ꞌë Lëꞌ níꞌilö yúlahuiꞌ naꞌ para tsöjdaꞌgaquiëꞌ Lëꞌ lëꞌe yaga cruz.
Tuꞌdë́ꞌë Jesús lëꞌe yaga cruz
21 Gulunëꞌ ga biꞌë tu bönniꞌ Cirene yaga cruz queëꞌ Jesús,
ridö́disëꞌ niꞌ suzë́ꞌë laꞌ guixiꞌ.
Lëꞌ Simón,
xúzgacabiꞌ Alejandro,
en Rufo.
22 Gulaꞌchë́ꞌë Jesús lataj naꞌ nazíꞌi le Gólgota,
tu didzaꞌ hebreo le rnna lu didzaꞌ xidzaꞌ,
Lataj Que Bögaꞌ Ícjaruꞌ.
23 Guluꞌë le guíꞌjëꞌ Jesús xisi uva nutsiꞌ nöri siláꞌ que yaga mirra,
pero Lëꞌ bitiꞌ guꞌë le.
24 Níꞌirö buluꞌdë́ꞌë Jesús lëꞌe yaga cruz,
ateꞌ gulaꞌguísiëꞌ lariꞌ nácuëꞌ,
le gulaꞌzíꞌ que queë́gaquiëꞌ bönniꞌ naꞌ röjáquiëꞌ gudil-la.
Buluꞌbéajëꞌ le gaca bëꞌ para ilaꞌnö́zinëꞌ bízxilö idelaꞌ que queë́gaquiëꞌ.
25 Naca idú xsila cateꞌ buluꞌdë́ꞌë Lëꞌ lëꞌe yaga cruz.
26 Didzaꞌ naꞌ buluꞌzóëꞌ lëꞌe yaga cruz ícjalëꞌ Jesús ca naca le tuꞌquíëꞌ Lëꞌ rnna caní:
“Bönniꞌ Rinná Béꞌenëꞌ Bönachi Judío.”
27 Buluꞌdáꞌlenëꞌ Jesús tsözxö́n lë́ꞌegaca yaga cruz chopëꞌ gubán,
tuëꞌ cuita lëꞌë ibëla,
en iaꞌtúëꞌ cuita lëꞌë yö́göla.
28 Caní guca lë naꞌ nazúaj lu guichi láꞌayi,
rnna:
Gubábalenëꞌ bönniꞌ tuáꞌ döꞌ.
29 Yuguꞌ bönniꞌ taꞌdödëꞌ niꞌ tuꞌlidza ziꞌë Jesús,
en tuꞌtá ícjagaquiëꞌ,
taꞌnnë́ꞌ:
―¡Ön!
¿Naruꞌ uquínnajtsoꞌ yudoꞌ queëꞌ Dios,
ateꞌ tsonna dzasö uchísatsuꞌ le?
30 ¡Busölá cuinuꞌ naꞌa,
en bötaj lëꞌe yaga cruz naꞌ!
31 Lëscaꞌ caní yuguꞌ bixúz unná bëꞌ,
en yuguꞌ bönniꞌ yudoꞌ usedi tuꞌtitjëꞌ Lëꞌ.
Tëꞌ luzáꞌagaquiëꞌ tuëꞌ iaꞌtúëꞌ:
―Bönachi yúbölö busölë́ꞌ,
pero bitiꞌ gaca usölá cuinëꞌ.
32 Taꞌnnë́ꞌ caꞌ:
―¡Ön!
¿Nácatsuꞌ Cristo,
Bönniꞌ Inná Béꞌenëꞌ Bönachi Israel?
¡Bö́tjatsöcaꞌ naꞌa lëꞌe yaga cruz para iléꞌetuꞌ,
ateꞌ tséajlëꞌëtuꞌ Liꞌ!
Yuguꞌ bönniꞌ naꞌ dáꞌgaquiëꞌ tsözxö́n len Lëꞌ lë́ꞌegaca yaga cruz buluꞌlidza ziꞌë caꞌ Lëꞌ.
Le guca cateꞌ gútiëꞌ Jesús
33 Cateꞌ bidxín idú huagubidza,
guchul-la idútë yödzölió.
Guca caní ga bidxintë idú ridödi xihuö́.
34 Idú ridödi xihuö́ naꞌ bëꞌë Jesús zidzaj didzaꞌ,
rnnëꞌ:
―Eloi,
Eloi,
¿lama sabactani?
Didzaꞌ hebreo ni rnna lu didzaꞌ xidzaꞌ:
Dios quiaꞌ,
Dios quiaꞌ,
¿bizx que nubéaj ládxuꞌu nedaꞌ?
35 Yuguꞌ bönniꞌ nacuꞌë niꞌ bilaꞌyönnëꞌ didzaꞌ ni,
ateꞌ taꞌnnë́ꞌ:
―Buliꞌzë́tsöcaꞌ nágaliꞌ.
Elías rulidzëꞌ.
36 Níꞌirö guxítiꞌë tu bönniꞌ nútsëꞌë ládjagaquiëꞌ,
en buxúpinëꞌ nupi zi tu le bululu rëꞌaj nisa.
Budë́ꞌë le lahui gui,
en bëꞌë le xupëꞌ Jesús,
rnnëꞌ:
―Cö́ztsöcaꞌruꞌ,
uyuruꞌ channö huidëꞌ Elías uzötjëꞌ Lëꞌ.
37 Gurö́dxiꞌë zidzaj Jesús,
en laꞌ gútitëꞌ.
38 Birözaꞌ lariꞌ yödx nalaꞌ lu yudoꞌ.
Birúaj choplö,
gudelaꞌ icjlö,
en birúajtë zxánilö.
39 Bönniꞌ naꞌ rinná béꞌenëꞌ bönniꞌ röjáquiëꞌ gudil-la zuínëꞌ lahuëꞌ Jesús,
en biléꞌenëꞌ ca naꞌ guca gurö́dxiꞌë Jesús,
en laꞌ gútitëꞌ,
ateꞌ gunnë́ꞌ:
―Le nácatë bönniꞌ ni gúquiëꞌ Zxíꞌinëꞌ Dios.
40 Nacuáꞌanu caꞌ niꞌ nigula,
zíꞌtuꞌsö tuꞌyunu.
Nútsaꞌgacanu ládjagacanu María Magdalena,
en Salomé,
en María,
xináꞌagacabiꞌ Jacobo cuidiꞌ,
en José.
41 Nigula ni yöjácalennu Jesús cateꞌ niꞌ gudë́ꞌ luyú Galilea,
en gulácalennu Lëꞌ,
gulaꞌgúꞌunu le gulahuëꞌ.
Nacuáꞌanu caꞌ niꞌ iaꞌbál-lanu nigula zián gulaꞌzáꞌlennu Lëꞌ lu yödzö Jerusalén.
Taꞌguꞌë Jesús yeru ba
42 Chizáꞌ ral-la,
en naca dza tuꞌpë́ꞌë,
dza siꞌ idxín dza láꞌayi quégaquiëꞌ bönniꞌ judío.
43 Que lë ni naꞌ bidëꞌ José,
bönniꞌ yödzö Arimatea,
bönniꞌ lo ládjagaquiëꞌ bönniꞌ yúlahuiꞌ lo.
Ribözëꞌ caꞌ dza idinná bëꞌë Dios.
Idú ládxëꞌë guyáziëꞌ ga naꞌ zoëꞌ Pilato,
en gunábinëꞌ lëꞌ guꞌë lëꞌ lataj uꞌë Jesús.
44 Bubáninëꞌ Pilato tuꞌ gunnë́ꞌ chigútiëꞌ Jesús,
ateꞌ bulidzëꞌ bönniꞌ naꞌ rinná béꞌenëꞌ bönniꞌ röjáquiëꞌ gudil-la para inábinëꞌ lëꞌ channö chinátiëꞌ Jesús.
45 Cateꞌ biyönnëꞌ ca naꞌ gunnë́ꞌ bönniꞌ naꞌ rinná béꞌenëꞌ bönniꞌ röjáquiëꞌ gudil-la,
bëꞌë José lataj uꞌë Jesús.
46 Níꞌirö José naꞌ gúꞌuëꞌ tu lariꞌ xtila dxíꞌadoꞌ,
ateꞌ buzötjëꞌ Jesús lëꞌe yaga cruz,
en buchö́linëꞌ Lëꞌ lariꞌ naꞌ.
Níꞌirö guluꞌë Lëꞌ yeru ba nadaj lëꞌe guíꞌa guiö́j.
Budë́ꞌë tu guiö́j blaga zxön ga nu riyaza ba naꞌ.
47 María Magdalena,
en María,
xinë́ꞌë José tuꞌyunu ga naꞌ taꞌguꞌë Jesús.