Tuꞌdödëꞌ Jesús lu nëꞌë Pilato
27
Cateꞌ zaꞌ reníꞌ dza naꞌ,
gulún xtídzaꞌgaquiëꞌ yúguꞌtë bixúz unná bëꞌ len bönniꞌ gula tuꞌzéajniꞌinëꞌ bönniꞌ judío para ilútiëꞌ Jesús.
2 Gulaꞌchë́ꞌë Jesús náguëꞌë,
ateꞌ buluꞌdödëꞌ Lëꞌ lu nëꞌë Poncio Pilato,
bönniꞌ rinná bëꞌë uláz que yödzö Roma.
Ratiëꞌ Judas
3 Cateꞌ chinö́zinëꞌ Judas,
bönniꞌ naꞌ budödëꞌ Jesús lu náꞌagaquiëꞌ bönniꞌ yudoꞌ,
narugu queëꞌ Jesús gátiëꞌ,
buíꞌinnëꞌ,
ateꞌ yöjuꞌë chi uruáꞌ dumí plata naꞌ lu náꞌagaquiëꞌ bixúz unná bëꞌ,
en yuguꞌ bönniꞌ gula naꞌ.
4 Rëꞌ légaquiëꞌ:
―Benaꞌ dul-laꞌ tuꞌ budödaꞌ-nëꞌ bönniꞌ tsahuiꞌ gátiëꞌ.
Níꞌirö tëꞌ lëꞌ:
―Bitiꞌ gun lë ni ga cö́ꞌötuꞌ böniga.
Le ben cazuꞌ liꞌ naꞌ.
5 Níꞌirö gurúꞌunëꞌ Judas yuguꞌ dumí plata naꞌ ga naca chila yudoꞌ,
ateꞌ buzë́ꞌë niꞌ,
en yöjsí yenëꞌ.
6 Buluꞌziꞌë bixúz unná bëꞌ yuguꞌ dumí plata naꞌ,
taꞌnnë́ꞌ:
―Bitiꞌ saꞌyéaj cúꞌuruꞌ dumí ni ga rigúꞌuruꞌ dumí que yudoꞌ,
tuꞌ naca lazxjëꞌ tu bönniꞌ ratiëꞌ bönachi.
7 Níꞌirö gulún xtídzaꞌgaquiëꞌ,
ateꞌ guláꞌuinëꞌ dumí naꞌ tu laꞌ yëla queëꞌ tu bönniꞌ huen röꞌö para gaca ga ilaꞌgáchëꞌë bönniꞌ ziꞌtuꞌ.
8 Que lë ni naꞌ,
ga ridxintë naꞌa dza nazíꞌi le lataj naꞌ,
Laꞌ Yëla Rön.
9 Caní guca ca naꞌ gunnë́ꞌ Jeremías,
bönniꞌ bëꞌë didzaꞌ uláz queëꞌ Dios,
gunnë́ꞌ:
“Gulaꞌguélëꞌë chi uruáꞌ dumí plata naꞌ,
tsca le gulaꞌzéquiꞌnëꞌ bönniꞌ Israel Lëꞌ,
10 ateꞌ dumí naꞌ guláꞌuinëꞌ laꞌ yëla queëꞌ tu bönniꞌ huen röꞌö.
Lë ni buluíꞌinëꞌ Xanaꞌ nedaꞌ.”
Ridxinëꞌ Jesús lahuëꞌ Pilato
11 Cateꞌ buluꞌsudxinëꞌ Jesús lahuëꞌ Pilato,
bönniꞌ naꞌ rinná bëꞌë uláz que yödz Roma,
bönniꞌ ni gunábinëꞌ Jesús,
rëꞌ Lëꞌ:
―¿Nacuꞌ Liꞌ Bönniꞌ inná béꞌenëꞌ bönachi judío?
Jesús rëꞌ lëꞌ:
―Ca nácasö rnnoꞌ.
12 Cateꞌ yuguꞌ bixúz unná bëꞌ len bönniꞌ gula tuꞌzéajniꞌinëꞌ buluꞌzéguiꞌë Jesús didzaꞌ,
bitiꞌ bi didzaꞌ bubiꞌë Jesús.
13 Níꞌirö Pilato rëꞌ Jesús:
―¿Naruꞌ cabí riyö́ntsenuꞌ cateꞌ xö le taꞌnnë́ꞌ quiuꞌ?
14 Jesús bitiꞌ bi didzaꞌ bubiꞌë.
Caní guca,
bubáninëꞌ bönniꞌ unná bëꞌ naꞌ.
Rirugu queëꞌ Jesús gátiëꞌ
15 Cateꞌ naca dza Laní Pascua naꞌ,
dë caz tu le runëꞌ Pilato,
bönniꞌ unná bëꞌ naꞌ,
ca taꞌnaba bönachi rusanëꞌ tuëꞌ bönniꞌ yuꞌë lidxi guíë,
nútiꞌtës nu të́ꞌëni usanëꞌ.
16 Dza naꞌ tu bönniꞌ nabáguëꞌë xíguiaꞌ,
lëꞌ Barrabás,
yuꞌë lidxi guíë niꞌ.
17 Cateꞌ buluꞌdubi bönachi zián niꞌ,
Pilato gunábinëꞌ légaquiëꞌ,
rnnëꞌ:
―¿Nuzxi rë́ꞌëniliꞌ usanaꞌ queë́liꞌ?
¿Naruꞌ Barrabás o Jesús,
Bönniꞌ naꞌ lëꞌ Cristo?
18 Caní gunnë́ꞌ Pilato tuꞌ réquibeꞌenëꞌ buluꞌdödëꞌ bönniꞌ yudoꞌ Jesús lu nëꞌë tuꞌ tuꞌzxéꞌenëꞌ Lëꞌ.
19 Tsanni niꞌ röꞌë Pilato ga naꞌ ruchiꞌa rusörö́ëꞌ,
nigula queëꞌ gusö́l-laꞌnu nu tsöjödxi lëꞌ,
rnna:
―Bitiꞌ bi gunuꞌ queëꞌ bönniꞌ tsahuiꞌ ni,
tuꞌ gúdxideꞌedaꞌ guduyëla lu yëla bë́chigal tuꞌ nö́zinëꞌ Lëꞌ.
20 Yuguꞌ bixúz unná bëꞌ len bönniꞌ gula tuꞌzéajniꞌinëꞌ gulaꞌgúꞌu yö́l-lëꞌë bönachi zián naꞌ para ilaꞌnabi Pilato usanëꞌ Barrabás naꞌ,
ateꞌ gútiëꞌ Jesús.
21 Leyúbölö bëꞌë didzaꞌ bönniꞌ unná bëꞌ naꞌ,
rëꞌ légaquiëꞌ:
―¿Núzxilëꞌ chopëꞌ ni rë́ꞌëniliꞌ usanaꞌ-nëꞌ queë́liꞌ?
Gulaꞌnnë́ꞌ:
―Barrabás.
22 Níꞌirö Pilato gunábinëꞌ légaquiëꞌ,
rnnëꞌ:
―¿Nacxi gunaꞌ queëꞌ Jesús,
bönniꞌ naꞌ lëꞌ Cristo?
Yúguꞌtëꞌ taꞌnnë́ꞌ:
―¡Budë́ꞌë lëꞌe yaga cruz!
23 Níꞌirö bönniꞌ unná bëꞌ naꞌ rëꞌ légaquiëꞌ:
―¿Bizxi döꞌ benëꞌ?
Zídzajrö guluꞌë didzaꞌ,
taꞌnnë́ꞌ:
―¡Budë́ꞌë lëꞌe yaga cruz!
24 Cateꞌ réquibeꞌenëꞌ Pilato bitiꞌ birúaj xtídzëꞌë,
pero gulaꞌdzátsarö bönachi,
níꞌirö gudélëꞌë nisa,
en gudibi nëꞌë lógaquiëꞌ,
rnnëꞌ:
―Bitiꞌ bi xíguiaꞌ nabágaꞌa nedaꞌ tuꞌ nözi yöl-laꞌ guti queëꞌ bönniꞌ tsahuiꞌ ni.
Le gun cázaliꞌ libíꞌiliꞌ lë ni.
25 Buluꞌbíꞌi didzaꞌ yúguꞌtë bönachi niꞌ,
taꞌnná:
―¡Yöl-laꞌ guti queëꞌ bönniꞌ ni ibágaꞌtuꞌ netuꞌ,
en ilaꞌbagaꞌ caꞌ zxíꞌinituꞌ!
26 Caꞌ guca,
Pilato busanëꞌ Barrabás naꞌ lu náꞌagaquiëꞌ.
Níꞌirö gunná béꞌenëꞌ bönniꞌ röjáquiëꞌ gudil-la ilaꞌguínëꞌ Jesús,
ateꞌ gudödi niꞌ budödëꞌ Lëꞌ lu náꞌagaquiëꞌ para uluꞌdë́ꞌë Lëꞌ lëꞌe yaga cruz.
27 Yuguꞌ bönniꞌ röjáquiëꞌ gudil-la nacuꞌë lu nëꞌë bönniꞌ unná bëꞌ naꞌ gulaꞌchë́ꞌë Jesús lu yuꞌu yúlahuiꞌ nazíꞌi le pretorio,
ateꞌ niꞌ buluꞌtubëꞌ yúguꞌtë bönniꞌ röjáquiëꞌ gudil-la nacuꞌë niꞌ ga naꞌ zoëꞌ Jesús.
28 Níꞌirö gulaꞌlecjëꞌ lariꞌ nácuëꞌ Jesús,
en buluꞌgácuëꞌ Lëꞌ tu lariꞌ xiná chul-la,
ca rácugaca nupa taꞌnná bëꞌ.
29 Buluꞌdxíëꞌ icjëꞌ tu le néquini niꞌa nëꞌe yaga yötsiꞌ le naca ca le dxia icjëꞌ bönniꞌ rinná bëꞌë,
en buluꞌzóëꞌ tu guídoꞌ lu nëꞌë ibëla le ruluíꞌi ca tu yaga que bönniꞌ yúlahuiꞌ.
Níꞌirö buluꞌzóa zxibëꞌ lahuëꞌ,
en buluꞌtitjëꞌ Lëꞌ,
taꞌnnë́ꞌ:
―¡Bicaꞌ ba Liꞌ,
rinná béꞌenuꞌ bönachi judío!
30 Níꞌirö buluꞌchejëꞌ Lëꞌ zxönaꞌ,
ateꞌ buluꞌguélëꞌë gui naꞌ,
en gulaꞌguínëꞌ icjëꞌ.
31 Gudödi buluꞌtitjëꞌ Jesús,
gulaꞌlecjëꞌ lariꞌ naꞌ nácuëꞌ,
ateꞌ buluꞌgácuëꞌ Lëꞌ lariꞌ que cazëꞌ.
Níꞌirö gulaꞌchë́ꞌë Lëꞌ para tsöjdáꞌagaquiëꞌ Lëꞌ lëꞌe yaga cruz.
Tuꞌdë́ꞌë Jesús lëꞌe yaga cruz
32 Cateꞌ niꞌ bilaꞌrúajëꞌ bönniꞌ naꞌ,
yöjxácaꞌgaquiëꞌ Simón,
tu bönniꞌ Cirene,
ateꞌ gulunëꞌ ga biꞌë yaga cruz queëꞌ Jesús.
33 Cateꞌ bilaꞌdxinëꞌ lataj nazíꞌi le Gólgota,
le rnna lu didzaꞌ xidzaꞌ,
Lataj Que Bögaꞌ Ícjaruꞌ,
34 buluꞌguiꞌjëꞌ Jesús nupi zi nutsíꞌi zxígalaꞌabaꞌ böaꞌ guixiꞌ.
Cateꞌ buxíꞌi ruꞌë Jesús,
bitiꞌ gúꞌunnëꞌ guíꞌjëꞌ.
35 Cateꞌ chinudáꞌagaquiëꞌ Lëꞌ lëꞌe yaga cruz,
gulaꞌguísiëꞌ lariꞌ nácuëꞌ,
en buluꞌquitjëꞌ lahui le gaca bëꞌ núzxilëꞌ guequi queëꞌ.
Caní guca,
budxín lë naꞌ gunnë́ꞌ bönniꞌ bëꞌë didzaꞌ uláz queëꞌ Dios,
gunnë́ꞌ:
“Gulaꞌguísiëꞌ lariꞌ nácuaꞌ,
en buluꞌquitjëꞌ lahui le gaca bëꞌ.”
36 Níꞌirö gulaꞌböꞌë niꞌ,
tuꞌyúëꞌ Jesús.
37 Lëscaꞌ buluꞌzóëꞌ lëꞌe yaga cruz ícjalëꞌ Jesús tu didzaꞌ le riguixjöꞌ le nabáguëꞌë le rnna caní:
“Bönniꞌ ni Jesús,
Bönniꞌ rinná béꞌenëꞌ bönachi judío.”
38 Ga niꞌ dëꞌë Jesús,
buluꞌdë́ꞌë caꞌ lë́ꞌegaca yaga cruz chopëꞌ bönniꞌ gubán.
Tuëꞌ buluꞌdë́ꞌë cuita lëꞌë ibëla,
en iaꞌtúëꞌ naꞌ cuita lëꞌë yö́göla.
39 Gulaꞌdödëꞌ niꞌ yuguꞌ bönniꞌ buluꞌlidza ziꞌë Jesús,
en buluꞌtá ícjagaquiëꞌ,
tuꞌtitjëꞌ Lëꞌ,
40 taꞌnnë́ꞌ:
―¡Ön,
Liꞌ naꞌ uquínnajuꞌ yudoꞌ,
ateꞌ tsonna dzasö caꞌ uchísatsoꞌ le!
¡Busölá cuinuꞌ naꞌa channö nacuꞌ Liꞌ Zxíꞌinëꞌ Dios!
¡Bö́tjatsöcaꞌ lëꞌe yaga cruz naꞌ!
41 Lëscaꞌ caní buluꞌtitjëꞌ Lëꞌ yuguꞌ bixúz unná bëꞌ len yuguꞌ bönniꞌ yudoꞌ usedi,
en yuguꞌ bönniꞌ yudoꞌ fariseo,
len bönniꞌ gula tuꞌzéajniꞌinëꞌ,
taꞌnnë́ꞌ:
42 ―Yuguꞌ nu yúbölö busölë́ꞌ bönniꞌ ni,
pero bitiꞌ gaca usölá cuinëꞌ.
Channö náquiëꞌ Bönniꞌ inná béꞌenëꞌ bönachi Israel,
huö́tjatsöquiëꞌ naꞌa lëꞌe yaga cruz,
ateꞌ tséajlëꞌëruꞌ Lëꞌ.
43 Lëꞌ buzxöni ládxëꞌë Dios.
Dios usölá cazëꞌ Lëꞌ naꞌa channö raza ládxëꞌë Lëꞌ,
tuꞌ gunnë́ꞌ:
“Zxíꞌinëꞌ Dios nacaꞌ.”
44 Lëscaꞌ caní yuguꞌ bönniꞌ gubán naꞌ dáꞌgaquiëꞌ lë́ꞌegaca yaga cruz ga niꞌ dëꞌë Jesús buluꞌlidza ziꞌë Lëꞌ.
Ratiëꞌ Jesús
45 Cateꞌ bidxín huagubidza,
guchul-la idútë yödzölió ga bidxintë idú ridödi xihuö́.
46 Idú ridödi xihuö́ naꞌ,
bëꞌë zidzaj didzaꞌ Jesús,
rnnëꞌ:
―Elí,
Elí,
¿lama sabactani?
Didzaꞌ ni rnna lu didzaꞌ xidzaꞌ:
“Dios quiaꞌ,
Dios quiaꞌ,
¿bizx que nubéaj ládxuꞌu nedaꞌ?”
47 Cateꞌ nupa nacuáꞌ niꞌ bilaꞌyöni didzaꞌ ni,
taꞌnná:
―Bönniꞌ ni rulidzëꞌ Elías,
bönniꞌ niꞌ bëꞌë didzaꞌ uláz queëꞌ Dios.
48 Laꞌ guxítiꞌtëꞌ tuëꞌ bönniꞌ nútsëꞌë ládjagaquiëꞌ,
en gudélëꞌë tu le bululu rizxupi nisa,
ateꞌ buxúpinëꞌ le nupi zi,
en buzóëꞌ le tu lu gui,
ateꞌ butságuiëꞌ le ruꞌë Jesús para xupëꞌ.
49 Níꞌirö iaꞌzícaꞌrëꞌ bönniꞌ niꞌ taꞌnnë́ꞌ:
―¡Gulö́zagarö!
¡Uyútsöcaꞌruꞌ channö huidëꞌ Elías usölë́ꞌ Lëꞌ!
50 Leyúbölö gurö́dxiꞌë zidzaj Jesús,
ateꞌ burúajtë böꞌ naca cazëꞌ,
gútitëꞌ.
51 Laꞌ náꞌasö birö́zaꞌtë lariꞌ nal-laꞌ lu yudoꞌ,
birúaj choplö,
le gudelaꞌ icjlö ga bidxintë xiníꞌi.
Níꞌirö gudödi budóꞌ zxuꞌ,
en gulaꞌláꞌa guiö́j.
52 Gulaꞌyalaj yeru ba quégaca nupa chinátigaca,
nupa niꞌ gulaꞌyéajlëꞌ Dios,
ateꞌ buluꞌbán bönachi naꞌ.
53 Gudödi bubanëꞌ Jesús,
buluꞌrúajëꞌ bönniꞌ naꞌ yeru ba quégaquiëꞌ,
en gulaꞌyáziëꞌ yödzö láꞌayi Jerusalén,
ga niꞌ bilaꞌléꞌe bönachi zián légaquiëꞌ.
54 Níꞌirö gúdxinëꞌ bönniꞌ naꞌ rinná béꞌenëꞌ bönniꞌ röjáquiëꞌ gudil-la,
encaꞌ yuguꞌ bönniꞌ röjáquiëꞌ gudil-la nacuáꞌlenëꞌ lëꞌ tuꞌyúëꞌ Jesús,
ateꞌ gunnë́ꞌ:
―Le nácatë bönniꞌ ni gúquiëꞌ Zxíꞌinëꞌ Dios.
55 Zíꞌtuꞌsö gulaꞌcuáꞌanu nigula zián tuꞌyunu Jesús,
nigula naꞌ gulaꞌdálennu Jesús cateꞌ niꞌ buzë́ꞌë luyú Galilea,
ateꞌ gulunnu xichinëꞌ,
gulaꞌgúꞌunu le gulahuëꞌ.
56 Lëscaꞌ María Magdalena,
en María,
xináꞌagaquiëꞌ Jacobo,
en José,
nútsaꞌgacanu ládjagacanu,
ateꞌ zóanu caꞌ niꞌ xináꞌagaquiëꞌ yuguꞌ zxíꞌinëꞌ Zebedeo.
Taꞌguꞌë Jesús yeru ba le nadaj lëꞌe guíꞌa guiö́j
57 Cateꞌ chiridzö́ꞌ dza naꞌ,
bidxinëꞌ José,
bönniꞌ Arimatea,
tu bönniꞌ riléꞌenëꞌ yöl-laꞌ tsahuiꞌ queëꞌ,
en dëꞌë caꞌ Jesús.
58 Bönniꞌ ni yöjyúëꞌ Pilato,
en gunabëꞌ lataj uꞌë Jesús.
Níꞌirö Pilato gunná bëꞌë uluꞌnödzjëꞌ queëꞌ Jesús.
59 Guzxiꞌë José Lëꞌ,
en buchö́linëꞌ Lëꞌ tu lariꞌ nazacaꞌ.
60 Níꞌirö guluꞌë Lëꞌ lu yeru ba cubi queëꞌ le naguidjëꞌ lëꞌe guíꞌa guiö́j.
Budë́ꞌë tu guiö́j blaga zxön ga nu riyaza yeru ba naꞌ,
ateꞌ söhuö́jëꞌ.
61 Gulaꞌcuáꞌanu María Magdalena,
en iaꞌtunu María niꞌ,
rö́ꞌgacanu raꞌ yeru ba naꞌ.
Yuguꞌ bönniꞌ röjáquiëꞌ gudil-la tapa chiꞌë ba queëꞌ Jesús
62 Cateꞌ zaꞌ reníꞌ iaꞌtú dza,
gudödi buluꞌpë́ꞌë que dza láꞌayi quégaquiëꞌ bönniꞌ judío,
buluꞌdubëꞌ yuguꞌ bixúz unná bëꞌ,
en yuguꞌ bönniꞌ yudoꞌ fariseo ga zoëꞌ Pilato.
63 Tëꞌ Pilato:
―Bönniꞌ,
röjnetuꞌ bi gunnë́ꞌ bönniꞌ rizíꞌ yëꞌë naꞌ,
cateꞌ niꞌ zoëꞌ nabanëꞌ,
gunnë́ꞌ:
“Cateꞌ gaca tsonna dza ubanaꞌ lu yöl-laꞌ guti.”
64 Que lë ni naꞌ gunná beꞌe nupa ilún chiꞌi ba niꞌ ga idxintë dza bunni,
para cabí ídigaquiëꞌ bönniꞌ usëda queëꞌ chiꞌi dzö́ꞌölö,
en uluꞌbéajëꞌ Lëꞌ.
Níꞌirö ilë́ꞌ bönachi:
“Bubanëꞌ Jesús lu yöl-laꞌ guti.”
Channö caní gaca,
didzaꞌ cabí nácatë ni iluꞌë gúntërö huiáꞌ döꞌ ca ben didzaꞌ cabí nácatë naꞌ guluꞌë zíꞌalö.
65 Pilato gudxëꞌ légaquiëꞌ:
―Ni nacuꞌë bönniꞌ röjáquiëꞌ gudil-la.
Guliꞌchë́ꞌë queë́liꞌ.
Guliꞌtséaj,
guliꞌgún chiꞌi yeru ba naꞌ tsca séquiꞌliꞌ gunliꞌ.
66 Níꞌirö yöjáquiëꞌ niꞌ,
en buluꞌsayjëꞌ dxiꞌa yeru ba naꞌ,
en buluꞌdë́ꞌë lëꞌe guiö́j naꞌ tu le gaca bëꞌ channö isalaj,
ateꞌ buluꞌcáꞌanëꞌ niꞌ bönniꞌ röjáquiëꞌ gudil-la ilún chiꞌë le.