Tun xtídzaꞌgaquiëꞌ bönniꞌ yudoꞌ ilaꞌzönëꞌ Jesús
―Nöz quéziliꞌ iaꞌchopa dza idxín Laní Pascua,
ateꞌ dza naꞌ nedaꞌ,
Bönniꞌ Guljëꞌ Bönachi,
uluꞌdödëꞌ nedaꞌ lu náꞌagaca nupa uluꞌdáꞌ nedaꞌ lëꞌe yaga cruz.
3 Níꞌirö bilaꞌdxinëꞌ yuguꞌ bixúz unná bëꞌ len yuguꞌ bönniꞌ yudoꞌ usedi,
en bönniꞌ gula tuꞌzéajniꞌinëꞌ bönachi judío,
ateꞌ buluꞌdubëꞌ ga naca löꞌa lidxi bixúz lo,
lëꞌ Caifás.
4 Niꞌ gulún xtídzaꞌgaquiëꞌ ilaꞌzönëꞌ Jesús,
lu yöl-laꞌ rizíꞌ yëꞌ quégaquiëꞌ,
para ilútiëꞌ Lëꞌ.
5 Taꞌnnë́ꞌ:
―Bitiꞌ gunruꞌ lë ni dza laní,
para cabí ilaꞌdzatsa bönachi.
Tu nigula rigúꞌunu le riláꞌ zxixi icjëꞌ Jesús
6 Cateꞌ niꞌ zoëꞌ Jesús lu yödzö Betania lu yuꞌu lidxëꞌ Simón,
bönniꞌ naꞌ güíꞌinëꞌ huëꞌ nudzuꞌ ruzödi,
7 bidxinnu cúdzuꞌlëꞌ Jesús tu nigula,
nuáꞌanu tu bö́gaꞌdoꞌ néquini guiö́j nazacaꞌ,
en yudzu tu le riláꞌ zxixi le nazácaꞌdaꞌ,
ateꞌ gulúꞌunu le icjëꞌ Jesús cateꞌ niꞌ röꞌë rahuëꞌ.
8 Cateꞌ bilaꞌléꞌenëꞌ bönniꞌ usëda queëꞌ Jesús lë ni,
gulaꞌlenëꞌ,
taꞌnnë́ꞌ:
―¿Bizx que réqui ditaj lë ni?
9 Guca nu gutiꞌ lë ni,
en siꞌ dumí zián para gácalenruꞌ yuguꞌ bönachi yechiꞌ.
10 Cateꞌ biyönnëꞌ Jesús lë ni,
rëꞌ légaquiëꞌ:
―¿Bizx que rnnëliꞌ queë́nu nigula ni?
Tsahuiꞌ naca le bennu quiaꞌ.
11 Yuguꞌ bönachi yechiꞌ ilaꞌcuáꞌlenticaꞌsö libíꞌiliꞌ,
pero nedaꞌ bitiꞌ ugáꞌanalenticaꞌsaꞌ libíꞌiliꞌ.
12 Le bennu nigula ni,
gulúꞌunu nedaꞌ le riláꞌ zxixi ni,
naca le rupáꞌanu nedaꞌ para dza igáchaꞌa yeru ba.
13 Le nácatë reaꞌ libíꞌiliꞌ,
gátiꞌtës luyú yödzölió ga gaca libán que didzaꞌ dxiꞌa ni,
lëscaꞌ ilaꞌguixjöꞌ bönachi le bennu nigula ni quiaꞌ para nu tsöjné lënu.
Rizíꞌ lu nëꞌë Judas udödëꞌ Jesús lu náꞌagaquiëꞌ bönniꞌ unná bëꞌ
14 Níꞌirö guyijëꞌ Judas Iscariote ga naꞌ nacuꞌë bixúz unná bëꞌ.
Náquiëꞌ bönniꞌ dzáguiëꞌ chínnuëꞌ naꞌ dáꞌgaquiëꞌ Jesús,
15 ateꞌ gudxëꞌ légaquiëꞌ:
―¿Bizxi gúnnaliꞌ quiaꞌ channö nedaꞌ udödaꞌ-nëꞌ Jesús lu náꞌaliꞌ?
Buluꞌgáꞌanalenëꞌ lëꞌ tsahuiꞌ iluꞌë lëꞌ chi uruáꞌ dumí plata.
16 Níꞌirö gusí lahuëꞌ Judas naꞌ risí riböꞌë udödëꞌ Jesús lu náꞌagaquiëꞌ.
Le ráguruꞌ le rusáꞌ ládxiꞌruꞌ ca gútiëꞌ Xanruꞌ
17 Cateꞌ naca dza risí lo laní quégaquiëꞌ bönniꞌ judío cateꞌ tahuëꞌ yöta xtila le cabí nazíꞌi cúa zi que,
gulaꞌbíguiꞌë bönniꞌ usëda queëꞌ Jesús ga zoëꞌ,
en tëꞌ Lëꞌ:
―¿Gazxi rë́ꞌënuꞌ tsöjpáꞌatuꞌ queë́ruꞌ para gáguruꞌ-baꞌ böꞌcuꞌ zxílaꞌdoꞌ dzöꞌ Laní Pascua?
18 Jesús rëꞌ légaquiëꞌ:
―Guliꞌtséajtsöcaꞌ yödzö niꞌ ga naꞌ zoëꞌ tu bönniꞌ,
en guliꞌguíëꞌ:
“Bönniꞌ rusédinëꞌ netuꞌ rnnëꞌ:
Chizáꞌ galaꞌ dza quiaꞌ.
Lu yuꞌu lidxuꞌ gágulengacaꞌ-nëꞌ bönniꞌ usëda quiaꞌ böꞌcuꞌ zxílaꞌdoꞌ dzöꞌ Laní Pascua.”
19 Níꞌirö gulunëꞌ bönniꞌ usëda queëꞌ ca naꞌ gunná béꞌenëꞌ Jesús légaquiëꞌ,
ateꞌ buluꞌpë́ꞌë le ilahuëꞌ dzöꞌ Laní Pascua.
20 Cateꞌ chigudzö́ꞌ dza naꞌ,
Jesús gurö́ꞌlenëꞌ idxínnutëꞌ bönniꞌ usëda queëꞌ tahuëꞌ.
21 Tsanni niꞌ tahuëꞌ,
Jesús rëꞌ légaquiëꞌ:
―Le nácatë reaꞌ libíꞌiliꞌ,
tu nu nutsaꞌ ládjaliꞌ ni udödi nedaꞌ.
22 Níꞌirö buluꞌhuíꞌini ládxiꞌgaquiëꞌ,
en gulaꞌnábinëꞌ Jesús tu tuëꞌ,
taꞌnnë́ꞌ:
―Xan,
¿naruꞌ nedaꞌ?
23 Bubiꞌë didzaꞌ Jesús,
rnnëꞌ:
―Bönniꞌ ni runë́ꞌ nëꞌë tsözxö́n len naꞌa lu yö́ꞌöna,
bönniꞌ ni udödëꞌ nedaꞌ.
24 Le nácatë nedaꞌ,
Bönniꞌ Guljëꞌ Bönachi,
uyijaꞌ ga gátiaꞌ ca naꞌ nazúaj lu guichi láꞌayi ca ral-laꞌ gaca quiaꞌ,
pero bicaꞌ bayechiꞌ nu naꞌ udödi nedaꞌ gátiaꞌ.
Gácarö dxiꞌa queëꞌ bönniꞌ naꞌ laꞌ cabí guljëꞌ.
25 Níꞌirö bubiꞌë didzaꞌ Judas,
bönniꞌ naꞌ udödëꞌ Jesús,
rnnëꞌ:
―Bönniꞌ Usedi,
¿naruꞌ nedaꞌ?
Jesús rëꞌ lëꞌ:
―Ön,
liꞌ naꞌ.
26 Tsanni niꞌ tahuëꞌ,
gudélëꞌë Jesús yöta xtila,
en gudxëꞌ Dios:
“Xclenuꞌ.”
Níꞌirö buzxuzxjëꞌ le,
en bunödzjëꞌ quégaquiëꞌ bönniꞌ usëda queëꞌ,
rnnëꞌ:
―Guliꞌsíꞌ,
guliꞌgagu.
Lë ni le naca cazaꞌ.
Ca benaꞌ que yöta xtila ni ruluíꞌi ca gaca que le naca cazaꞌ.
27 Gudélëꞌë caꞌ tu zxígaꞌdoꞌ,
en gudxëꞌ Dios:
“Xclenuꞌ.”
Níꞌirö bunödzjëꞌ caꞌ quégaquiëꞌ,
rnnëꞌ:
―Guliꞌguiꞌaj yúguꞌtëliꞌ.
28 Lë ni ruluíꞌi ca naca xichönaꞌ le run tsutsu didzaꞌ cubi rucáꞌana tsahuiꞌ.
Xichönaꞌ naꞌ ilalaj niꞌa quégaca bönachi zián para gaca uniti lahuëꞌ Dios yuguꞌ dul-laꞌ nabágaꞌgaquiëꞌ.
29 Reaꞌ caꞌ libíꞌiliꞌ,
bítiꞌrö guíꞌjaꞌ xisi le ribía lubá uva ni cateꞌ idxinrö dza niꞌ guíꞌjalenaꞌ libíꞌiliꞌ tu le cubi ga niꞌ rinná bëꞌë Xuzaꞌ.
Jesús rnnëꞌ innë́ꞌ Pedro bitiꞌ núnbëꞌë Lëꞌ
30 Cateꞌ budxi gulúl-lëꞌ yöl-laꞌ ba queëꞌ Dios,
yöjáquiëꞌ lu Guíꞌa Yaga Olivo.
31 Níꞌirö Jesús rëꞌ légaquiëꞌ:
―Yúguꞌtëliꞌ gaca chopa ládxiꞌliꞌ,
en ucáꞌanaliꞌ nedaꞌ naꞌa dzöꞌ ni,
tuꞌ nazúaj lu guichi láꞌayi ca gaca quiaꞌ,
le rnna:
“Gunaꞌ ga gátiëꞌ Bönniꞌ Uyú Böꞌcuꞌ Zxilaꞌ,
ateꞌ ilásilasibaꞌ böꞌcuꞌ zxilaꞌ naꞌ.”
32 Cateꞌ ubanaꞌ lu yöl-laꞌ guti,
níꞌirö tséajaꞌ tsöjnö́ruaꞌ loliꞌ sacaꞌ luyú Galilea.
33 Níꞌirö bubiꞌë didzaꞌ Pedro,
en rëꞌ Jesús:
―Salaꞌ ilaca chopa ládxiꞌgaquiëꞌ,
en uluꞌcáꞌanëꞌ yúguꞌtëꞌ Liꞌ,
nedaꞌ bitiꞌ gaca chopa ládxaꞌa,
bitiꞌ ucáꞌanaꞌ Liꞌ.
34 Jesús gudxëꞌ lëꞌ:
―Le nácatë reaꞌ liꞌ,
naꞌa dzöꞌ ni,
cateꞌ siꞌ cö́dxilöbaꞌ böra,
liꞌ innóꞌ tsonna luzuí bitiꞌ núnbëꞌu nedaꞌ.
35 Níꞌirö Pedro gudxëꞌ Jesús:
―Sal-laꞌ gátilenteaꞌ Liꞌ,
bitiꞌ caꞌ inníaꞌ bitiꞌ núnbëꞌa Liꞌ.
Lëscaꞌ caní gulaꞌnnë́ꞌ yúguꞌtë bönniꞌ usëda queëꞌ.
Jesús rulidzëꞌ Dios laꞌ yëla Getsemaní
36 Níꞌirö Jesús bidxínlenëꞌ légaquiëꞌ laꞌ yëla Getsemaní,
ateꞌ gudxëꞌ yuguꞌ bönniꞌ usëda queëꞌ naꞌ,
rnnëꞌ:
―Guliꞌcö́ꞌtsöcaꞌ ni tsanni tséajaꞌ iaꞌlatiꞌ níꞌilö,
tsöjlidzaꞌ-nëꞌ Dios.
37 Jesús guchë́ꞌë Pedro len iropëꞌ zxíꞌinëꞌ Zebedeo,
ateꞌ gusí lahuëꞌ ruhuíꞌinnëꞌ,
en risëbi ládxëꞌë.
38 Níꞌirö Jesús gudxëꞌ légaquiëꞌ:
―Ruhuíꞌini ládxaꞌa,
en huáti cazaꞌ lu yöl-laꞌ risëbi ladxiꞌ.
Guliꞌgáꞌana ni,
en guliꞌnáꞌ yëla tsözxö́n len nedaꞌ.
39 Gudödëꞌ Jesús iaꞌlátiꞌdoꞌ níꞌilö,
ateꞌ niꞌ biyéchuëꞌ.
Busudxín lahuëꞌ lu yu,
en bulidzëꞌ Dios,
gunnë́ꞌ:
―Xuzaꞌ,
channö huáca,
ben ga bitiꞌ gun bayudxi quiꞌi sacaꞌa lë ni,
calëga ca rë́ꞌëndaꞌ nedaꞌ,
pero ca rë́ꞌënuꞌ Liꞌ gunuꞌ.
40 Cateꞌ budxinëꞌ Jesús ga naꞌ nacuꞌë bönniꞌ usëda queëꞌ,
yöjxáquiëꞌ légaquiëꞌ tasiëꞌ,
ateꞌ rëꞌ Pedro:
―¿Naruꞌ cabí gúcatsö ináꞌalenuꞌ nedaꞌ tsözxö́n yëla tu chíꞌidoꞌ?
41 Guliꞌnáꞌ yëla,
en buliꞌlidzëꞌ Dios inábiliꞌ-nëꞌ gácalenëꞌ libíꞌiliꞌ,
para cabí güíꞌiliꞌ Satanás tuꞌ xihuiꞌ lataj siꞌ bëꞌ libíꞌiliꞌ le xihuiꞌ.
Böꞌ naca cázaliꞌ nasínaꞌticaꞌsö,
pero lu yöl-laꞌ bönáchisö queë́liꞌ nacuídiꞌliꞌ.
42 Níꞌirö guyijëꞌ Jesús le buropi luzuí,
en bulidzëꞌ Dios,
rnnëꞌ:
―Xuz,
channö cabí gaca gunuꞌ ga bitiꞌ quiꞌi sacaꞌa lë ni,
ben ca raza ládxuꞌu Liꞌ.
43 Cateꞌ bö́ajëꞌ,
leyúbölö buduxaquiëꞌ légaquiëꞌ tasiëꞌ tuꞌ nadö́dirö yëla guiö́j lógaquiëꞌ.
44 Níꞌirö bucáꞌanëꞌ Jesús légaquiëꞌ,
ateꞌ guyijëꞌ leyúbölö,
en bulidzëꞌ Dios le bunni luzuí,
ateꞌ tuz ca gunnë́ꞌ zíꞌalö rnnëꞌ.
45 Leyúbölö bö́ajëꞌ ga naꞌ nacuꞌë bönniꞌ usëda queëꞌ,
en rëꞌ légaquiëꞌ:
―¿Rásitsaliꞌ naꞌa,
en ruziꞌtsö ládxiꞌliꞌ?
Buliꞌyútsöcaꞌ,
chibudzaga lo.
Nedaꞌ,
Bönniꞌ Guljëꞌ Bönachi,
chinadödaꞌ lu náꞌagaquiëꞌ bönniꞌ dul-laꞌ.
46 ¡Guliꞌchasa,
uyéajruꞌ!
Buliꞌyútsöcaꞌ,
bönniꞌ naꞌ rudödëꞌ nedaꞌ chibidxinëꞌ ni.
Taꞌchë́ꞌë Jesús nadzunëꞌ
47 Tsanni niꞌ ruꞌë Jesús didzaꞌ ni,
Judas,
bönniꞌ nabábalenëꞌ idxínnutëꞌ naꞌ,
laꞌ bidxintëꞌ niꞌ,
ateꞌ dzágagaquiëꞌ bönniꞌ zián lëꞌ,
nuáꞌagaquiëꞌ guíë tuchiꞌ,
en yuguꞌ yágadoꞌ.
Yuguꞌ bixúz unná bëꞌ,
en bönniꞌ gula tuꞌzéajniꞌinëꞌ bönachi judío nasö́l-laꞌgaquiëꞌ légaquiëꞌ.
48 Judas,
bönniꞌ naꞌ rudödëꞌ Jesús,
chibuluíꞌinëꞌ légaquiëꞌ tu le gunëꞌ le gaca bëꞌ nu naca Jesús,
gunnë́ꞌ:
―Bönniꞌ naꞌ utsaga lahuaꞌ-nëꞌ,
Lëꞌ naꞌ Jesús.
Guliꞌsönëꞌ.
49 Níꞌirö gubíguiꞌë Judas ga naꞌ zoëꞌ Jesús,
rnnëꞌ:
―Padiux,
Bönniꞌ Usedi.
―Böchaꞌa,
¿bizxi huen zoꞌo ni?
Níꞌirö gulaꞌbiguëꞌë bönniꞌ naꞌ,
ateꞌ gulaꞌzönëꞌ Jesús.
51 Tuëꞌ bönniꞌ dzáguiëꞌ Jesús gulecjëꞌ guíë tuchiꞌ queëꞌ,
en benëꞌ huëꞌ,
guchúguiëꞌ guídi náguiëꞌ bönniꞌ huen dxin queëꞌ bixúz lo.
52 Jesús gudxëꞌ lëꞌ:
―Bugúꞌ guíë tuchiꞌ quiuꞌ lidxi.
Yúguꞌtë nupa tuꞌdíꞌini guíë tuchiꞌ,
lu guíë tuchiꞌ ilátigaca.
53 ¿Naruꞌ cabí nö́zinuꞌ huáca ulidzaꞌ Xuzaꞌ,
ateꞌ Lëꞌ laꞌ isö́l-laꞌtëꞌ ziántërö ca chinnu cöꞌ gubáz láꞌayi le naca zián gáyuꞌë tu cöꞌ huéaj?
54 Channö gunaꞌ caní,
¿nacxi gaca udxín le nazúaj lu guichi láꞌayi,
le rnna caní ral-laꞌ gaca quiaꞌ?
55 Níꞌirö Jesús gudxëꞌ yuguꞌ bönniꞌ niꞌ:
―¿Birúajtsaliꞌ nuáꞌaliꞌ guíë tuchiꞌ,
en yágadoꞌ para sönliꞌ nedaꞌ ca runliꞌ rizönliꞌ-nëꞌ gubán?
Yuguꞌ dza guröꞌa loliꞌ ga naca lu chila yudoꞌ,
en busédigacadaꞌ bönachi,
pero bitiꞌ guzxönliꞌ nedaꞌ.
56 Raca caní yúguꞌtë lë ni para udxín le nazúaj lu guichi láꞌayi,
ca naꞌ gulaꞌnnë́ꞌ bönniꞌ guluꞌë didzaꞌ uláz queëꞌ Dios.
Níꞌirö yúguꞌtë bönniꞌ usëda queëꞌ Jesús buluꞌcáꞌanëꞌ Lëꞌ,
en buluꞌzxúnnajëꞌ niꞌ.
Ridxinëꞌ Jesús lógaquiëꞌ bönniꞌ yudoꞌ
57 Níꞌirö yuguꞌ bönniꞌ naꞌ zö́ngaquiëꞌ Jesús gulaꞌchë́ꞌë Lëꞌ,
ateꞌ bilaꞌdxinëꞌ lahuëꞌ Caifás,
bixúz lo,
ga niꞌ nudúbigaquiëꞌ caꞌ yuguꞌ bönniꞌ yudoꞌ usedi len bönniꞌ gula tuꞌzéajniꞌinëꞌ.
58 Pedro söjnáhuëꞌ Jesús ziꞌtuꞌ zíꞌtuꞌsö,
en bidxinëꞌ ga naca löꞌa lidxi bixúz lo naꞌ,
para iléꞌenëꞌ nacxi utságuiëꞌ Jesús.
59 Yuguꞌ bixúz unná bëꞌ len bönniꞌ gula tuꞌzéajniꞌinëꞌ,
en bönniꞌ yudoꞌ tuꞌchiꞌa tuꞌsörö́ëꞌ,
buluꞌguiljëꞌ nu uzegui Jesús didzaꞌ sal-laꞌ siꞌ yëꞌë bönniꞌ naꞌ,
para gaca ilaꞌchúguiëꞌ queëꞌ gátiëꞌ.
60 Cuntu nu bilaꞌdzö́linëꞌ sal-laꞌ bilaꞌdxinëꞌ bönniꞌ zián,
en gulaꞌnnë́ꞌ queëꞌ le cabí nácatë.
Ga búdxitë bilaꞌdxinëꞌ chopëꞌ bönniꞌ,
ateꞌ lu yöl-laꞌ rizíꞌ yëꞌ quégaquiëꞌ gulaꞌnnë́ꞌ queëꞌ,
61 taꞌnnë́ꞌ:
―Bönniꞌ ni gunnë́ꞌ:
“Huaca uquínnajaꞌ yudoꞌ queëꞌ Dios,
ateꞌ uchisaꞌ le iaꞌtsonna dzasö.”
62 Níꞌirö guzuínëꞌ bixúz lo naꞌ,
en rëꞌ Jesús:
―¿Naruꞌ cabí rubíꞌitsoꞌ didzaꞌ?
¿Bizxi caz lë ni taꞌnnë́ꞌ bönniꞌ ni quiuꞌ?
63 Jesús bitiꞌ bi gunnë́ꞌ.
Níꞌirö bixúz lo gudxëꞌ Lëꞌ:
―Niꞌa queëꞌ Xanruꞌ Dios ban rinná béꞌedaꞌ Liꞌ quíxjöꞌu le nácatë.
Gudíxjöiꞌi netuꞌ channö nacuꞌ Liꞌ Cristo,
Zxíꞌinëꞌ Dios.
64 Jesús rëꞌ lëꞌ:
―Ca naꞌ rnnoꞌ nacaꞌ.
Le nácatë reaꞌ libíꞌiliꞌ,
iléꞌeliꞌ nedaꞌ,
Bönniꞌ Guljëꞌ Bönachi,
röꞌa cuita lëꞌë ibëla Dios,
ga niꞌ dë lu naꞌa yöl-laꞌ unná bëꞌ,
ateꞌ guídaꞌ lu böaj lúzxiba,
en idxinaꞌ ga zóaliꞌ.
65 Níꞌirö lu yöl-laꞌ rilé queëꞌ guchözëꞌ bixúz lo lariꞌ nácuëꞌ,
rnnëꞌ:
―¡Gunnë́ ziꞌë bönniꞌ ni queëꞌ Dios!
¿Núzxirö naquíniruꞌ nu innë́ queëꞌ bönniꞌ ni?
Chibiyö́n quéziliꞌ didzaꞌ ziꞌ bëꞌë queëꞌ Dios.
66 ¿Nacxi rusácaꞌliꞌ queë́liꞌ?
Buluꞌbiꞌë didzaꞌ,
gulaꞌnnë́ꞌ:
―Nabáguëꞌë xíguiaꞌ gátiëꞌ.
67 Níꞌirö buluꞌchejëꞌ zxönaꞌ lahuëꞌ Jesús,
en guluꞌë döꞌ queëꞌ.
Gulaꞌgápëꞌë ruꞌë Jesús iaꞌzícaꞌrëꞌ,
68 en tëꞌ Lëꞌ:
―¿Nácatsoꞌ Liꞌ Cristo?
Gunnë́yaꞌatsöcaꞌ naꞌa,
¿nuzxi naꞌ gudapaꞌ Liꞌ?
Pedro rnnëꞌ: “Bitiꞌ núnbëꞌa-nëꞌ Jesús”
69 Tsanni niꞌ gulaca lë naꞌ,
röꞌë Pedro lö́ꞌalö,
ateꞌ bidxinnu tunu nigula huen dxin ga naꞌ zoëꞌ,
ateꞌ rnnanu:
―Lëscaꞌ liꞌ gudálenuꞌ Jesús,
bönniꞌ Galilea naꞌ.
70 Gudáꞌbaguëꞌë Pedro lógaca bönachi nacuáꞌ niꞌ,
rnnëꞌ:
―Bitiꞌ nözdaꞌ nuzxi que naꞌ ruꞌu didzaꞌ.
71 Cateꞌ birúajëꞌ Pedro ga nu riyaza löꞌa,
biléꞌenu-nëꞌ iaꞌtunu nigula,
ateꞌ gúdxinu nupa nacuáꞌ niꞌ:
―Bönniꞌ ni gudálenëꞌ caꞌ Jesús,
bönniꞌ Nazaret naꞌ.
72 Leyúbölö gudáꞌbaguëꞌë Pedro,
en buzötjëꞌ Dios,
rnnëꞌ:
―Bitiꞌ caꞌ núnbëꞌa-nëꞌ bönniꞌ ni.
73 Iáꞌlátiꞌdoꞌos gudzé,
gulaꞌbigaꞌ nupa nacuáꞌ niꞌ ga naꞌ zoëꞌ Pedro,
en tëꞌ lëꞌ:
―Le nácatë liꞌ nunuꞌ caꞌ tsözxö́n légaquiëꞌ tuꞌ naca bëꞌu yöl-laꞌ ruíꞌisö quiuꞌ didzaꞌ.
74 Níꞌirö gusí lahuëꞌ Pedro rudxía döꞌ cuinëꞌ,
en ruzötjëꞌ Dios,
rnnëꞌ:
―Bitiꞌ caꞌ núnbëꞌa-nëꞌ bönniꞌ ni.