Taꞌzönëꞌ Jesús
18
Cateꞌ budxi bëꞌë Jesús yuguꞌ didzaꞌ ni,
birúajëꞌ niꞌ,
ateꞌ saꞌyéajlenëꞌ yuguꞌ bönniꞌ usëda queëꞌ.
Gudödëꞌ iaꞌtsöláꞌa yegu Cedrón,
en bidxinëꞌ ga niꞌ nacuáꞌ yaga olivo caꞌ,
ateꞌ lataj ni guyázalenëꞌ yuguꞌ bönniꞌ usëda queëꞌ.
2 Lëscaꞌ Judas,
bönniꞌ naꞌ udödëꞌ Jesús,
núnbëꞌë laꞌ yëla naꞌ,
tuꞌ butubëꞌ Jesús yuguꞌ bönniꞌ usëda queëꞌ niꞌ zián luzuí.
Jesús traicionado y arrestado (Juan 18.1-14)
3 Níꞌirö guchë́ꞌë Judas tu cöꞌ bönniꞌ röjáquiëꞌ gudil-la,
en yuguꞌ bönniꞌ niꞌa náꞌagaquiëꞌ bixúz unná bëꞌ,
en niꞌa náꞌagaquiëꞌ yuguꞌ bönniꞌ yudoꞌ fariseo,
ateꞌ yöjáquiëꞌ ga niꞌ zoëꞌ Jesús,
nuáꞌagaquiëꞌ yuguꞌ guíꞌ yöri,
en yuguꞌ le tuꞌdíꞌinëꞌ.
4 Níꞌirö,
tuꞌ nö́zinëꞌ Jesús yúguꞌtë le ral-laꞌ gaca queëꞌ,
birúajëꞌ ga niꞌ zoëꞌ,
en rëꞌ légaquiëꞌ:
―¿Nuzxi riguíljaliꞌ?
5 Buluꞌbiꞌë didzaꞌ,
tëꞌ Lëꞌ:
―Jesús,
bönniꞌ Nazaret,
riguíljatuꞌ-nëꞌ.
Jesús rëꞌ légaquiëꞌ:
―Nedaꞌ caz.
Judas,
bönniꞌ naꞌ rudödëꞌ Jesús lu náꞌagaquiëꞌ,
zóalenëꞌ légaquiëꞌ.
6 Cateꞌ Jesús gudxëꞌ légaquiëꞌ:
“Nedaꞌ caz”,
níꞌirö buluꞌbíguëꞌë cusi zxanlö,
en gulaꞌdzöꞌë lu yu.
7 Jesús gunábinëꞌ légaquiëꞌ leyúbölö,
rnnëꞌ:
―¿Nuzxi riguíljaliꞌ?
Tëꞌ Lëꞌ:
―Jesús,
bönniꞌ Nazaret,
riguíljatuꞌ-nëꞌ.
8 Níꞌirö bubiꞌë didzaꞌ Jesús,
rnnëꞌ:
―Chigúdxaꞌ libíꞌiliꞌ:
Nedaꞌ caz.
Channö riguíljaliꞌ nedaꞌ,
guliꞌgüíꞌ-gáquiëꞌ lataj tsöjhuö́jgaquiëꞌ bönniꞌ ni.
9 Caní gunnë́ꞌ Jesús para idxín didzaꞌ naꞌ bëꞌë,
gunnë́ꞌ:
“Nupa ni bennuꞌ quiaꞌ,
nitúëꞌ bitiꞌ bunítiaꞌ-nëꞌ.”
10 Níꞌirö,
tuꞌ nuꞌë Simón Pedro tu guíë tuchiꞌ,
gulecjëꞌ le,
en bentëꞌ huëꞌ Malco,
tu bönniꞌ huen dxin queëꞌ bixúz lo,
guchúguiëꞌ guídi náguiëꞌ ibëla bönniꞌ naꞌ.
11 Níꞌirö Jesús rëꞌ Pedro naꞌ:
―Bugúꞌu guíë tuchiꞌ quiuꞌ lidxi.
¿Naruꞌ cabí ral-laꞌ quíꞌi sacaꞌa lë naꞌ chinunëꞌ Xuzaꞌ ca gaca quiaꞌ?
Ridxinëꞌ Jesús lahuëꞌ bixúz lo
12 Yuguꞌ bönniꞌ naꞌ röjáquiëꞌ gudil-la,
en bönniꞌ naꞌ nacuꞌë lu nëꞌë,
encaꞌ yuguꞌ bönniꞌ niꞌa náꞌagaquiëꞌ bönniꞌ judío unná bëꞌ gulaꞌzönëꞌ Jesús,
en gulúguiꞌë Lëꞌ.
13 Níꞌirö gulaꞌchë́ꞌë Lëꞌ zíꞌalö lahuëꞌ Anás,
tuꞌ náquiëꞌ xtoꞌ zxíꞌinëꞌ Caifás,
bönniꞌ náquiëꞌ bixúz lo iz naꞌ.
14 Náquiëꞌ Caifás bönniꞌ naꞌ buzéajniꞌinëꞌ yuguꞌ bönniꞌ judío unná bëꞌ,
buluíꞌinëꞌ légaquiëꞌ dxíꞌarö gaca gátiëꞌ tuzëꞌ bönniꞌ,
en calëga initi idútë yödzö quégaquiëꞌ.
Rnnëꞌ Pedro: “Bitiꞌ núnbëꞌa-nëꞌ Jesús”
15 Simón Pedro,
en iaꞌtúëꞌ bönniꞌ usëda queëꞌ Jesús yöjáquiëꞌ cúdzuꞌlëꞌ Lëꞌ,
söjnógaquiëꞌ Lëꞌ.
Bönniꞌ usëda ni guyázalenëꞌ Jesús löꞌa que lidxi bixúz lo,
tuꞌ núnbëꞌë bixúz lo naꞌ lëꞌ.
Pedro niega conocer a Jesús y Anás pregunta a Jesús (Juan 18.15-27)
16 Bugáꞌanëꞌ Pedro níꞌilö ga nu riyaza löꞌa naꞌ.
Que lë ni naꞌ burúajëꞌ bönniꞌ usëda naꞌ núnbëꞌë bixúz lo lëꞌ,
ateꞌ bë́ꞌlenëꞌ-nu didzaꞌ nigula naꞌ run chíꞌinu ga nu riyaza löꞌa naꞌ,
ateꞌ benëꞌ ga guyáziëꞌ Pedro löꞌa.
17 Níꞌirö nigula naꞌ run chíꞌinu ga nu riyaza löꞌa rënu Pedro,
rnnanu:
―¿Naruꞌ cabí doꞌo caꞌ liꞌ bönniꞌ ni?
Bubiꞌë didzaꞌ Pedro,
rnnëꞌ:
―Calëga nedaꞌ.
18 Tuꞌ run ziaga,
yuguꞌ bönniꞌ huen dxin,
en yuguꞌ bönniꞌ niꞌa náꞌagaca bönachi yudoꞌ nabéquigaquiëꞌ guíꞌ,
ateꞌ zuíguequinëꞌ raꞌ guíꞌ naꞌ,
en tuꞌtsëꞌe cuíngaquiëꞌ.
Lëscaꞌ Pedro zuílenëꞌ légaquiëꞌ,
rutsëꞌe cuinëꞌ.
Bixúz lo rinabi yúdxinëꞌ Jesús
19 Níꞌirö gunabi yúdxinëꞌ bixúz lo Jesús para inö́zinëꞌ nupxi dáꞌgaca Lëꞌ,
en nacxi naca le rusedinëꞌ Jesús bönachi.
20 Bubiꞌë didzaꞌ Jesús,
rëꞌ lëꞌ:
―Lahuiꞌ lo bë́ꞌlenaꞌ yúguꞌtë bönachi didzaꞌ.
Buseditiquiꞌsidaꞌ légaquiëꞌ gapa naca lu yuꞌu ga tuꞌdubëꞌ tuꞌsëdëꞌ queëꞌ Dios,
encaꞌ chila yudoꞌ,
ga niꞌ tuꞌdubëꞌ yúguꞌtë bönniꞌ judío,
en bitiꞌ bi didzaꞌ bëꞌa bagáchiꞌsö.
21 ¿Bizx que rinabi yúdxinuꞌ nedaꞌ?
Gunabi yudxi nupa niꞌ bilaꞌyöni didzaꞌ bë́ꞌlenaꞌ léguequi.
Nö́zguequi quézinëꞌ bönniꞌ naꞌ didzaꞌ naꞌ bë́ꞌlenaꞌ légaquiëꞌ.
22 Cateꞌ budxi bëꞌë Jesús didzaꞌ ni,
tu bönniꞌ niꞌa náꞌagaca bönachi yudoꞌ gudápëꞌë ruꞌë Jesús,
rnnëꞌ:
―¿Naruꞌ caní rubíꞌitsoꞌ didzaꞌ lahuëꞌ bixúz lo?
23 Bubiꞌë didzaꞌ Jesús,
rëꞌ lëꞌ:
―Channö bitiꞌ gunníaꞌ dxiꞌa,
gudixjöꞌ bízxilö didzaꞌ bëꞌa bitiꞌ naca dxiꞌa,
en channö guca dxiꞌa didzaꞌ bëꞌa,
¿bizx que naꞌ gudápuꞌu nedaꞌ?
24 Níꞌirö Anás naꞌ gusö́l-lëꞌë Jesús náguëꞌë,
ateꞌ buluꞌsudxinëꞌ Lëꞌ lahuëꞌ Caifás,
bönniꞌ náquiëꞌ idú bixúz lo.
Leyúbölö rnnëꞌ Pedro: “Bitiꞌ núnbëꞌa-nëꞌ Jesús”
25 Cateꞌ niꞌ zuínëꞌ Pedro raꞌ guíꞌ rutsëꞌe cuinëꞌ,
yuguꞌ bönniꞌ nacuꞌë niꞌ gulë́ꞌ lëꞌ,
taꞌnnë́ꞌ:
―¿Naruꞌ cabí doꞌo caꞌ liꞌ Jesús naꞌ?
Gudáꞌbaguiëꞌ Pedro,
rnnëꞌ:
―Calëga nedaꞌ.
26 Zoëꞌ niꞌ tu bönniꞌ huen dxin queëꞌ bixúz lo,
náquiëꞌ diꞌa dza queëꞌ bönniꞌ naꞌ Pedro guchúguiëꞌ guídi náguiëꞌ,
ateꞌ bönniꞌ huen dxin naꞌ rëꞌ Pedro:
―¿Naruꞌ cabí biléꞌe quézidaꞌ liꞌ laꞌ yëla niꞌ,
dzaguꞌ-nëꞌ Jesús?
27 Leyúbölö gudáꞌbaguiëꞌ Pedro,
ateꞌ laꞌ gurö́dxitëbaꞌ böra.
Ridxinëꞌ Jesús lahuëꞌ Pilato
28 Níꞌirö gulaꞌchë́ꞌë Jesús,
en buluꞌzë́ꞌë lidxëꞌ Caifás naꞌ,
ateꞌ bilaꞌdxinëꞌ yúlahuiꞌ queëꞌ bönniꞌ yuꞌu lu nëꞌë uláz que yödz Roma,
le nazíꞌi le Pretorio.
Chizáꞌ reníꞌ dza naꞌ,
ateꞌ bitiꞌ gulaꞌyáziëꞌ yuguꞌ bönniꞌ judío yúlahuiꞌ naꞌ,
tuꞌ téquinëꞌ ilaꞌbáguëꞌë xíguiaꞌ channö ilaꞌyáziëꞌ niꞌ,
le gun ga bitiꞌ gaca ilahuëꞌ xtsöꞌ Laní Pascua,
laní naꞌ tuꞌsubanëꞌ ca benëꞌ Dios,
bubéajëꞌ bönachi Israel luyú Egipto.
Pilato le pregunta a Jesús (Juan 18.28-40)
―¿Bizxi ruzéguiꞌliꞌ-nëꞌ bönniꞌ ni didzaꞌ?
30 Buluꞌbiꞌë didzaꞌ,
tëꞌ lëꞌ:
―Laꞌtuꞌ cabí nuꞌë bönniꞌ ni döꞌ,
bitiꞌ udö́dituꞌ-nëꞌ loꞌ.
31 Níꞌirö Pilato rëꞌ légaquiëꞌ,
rnnëꞌ:
―Libíꞌi cázaliꞌ guliꞌchë́ꞌë,
en buliꞌchiꞌa buliꞌsörö́ Lëꞌ ca rinná bëꞌ xibá queë́liꞌ.
Yuguꞌ bönniꞌ judío tëꞌ lëꞌ,
taꞌnnë́ꞌ:
―Bitiꞌ dë lu naꞌtuꞌ nu gútituꞌ.
32 Caní guca para idxín xtídzëꞌë Jesús,
le bëꞌë naca ral-laꞌ gátiëꞌ.
33 Níꞌirö buáziëꞌ Pilato yúlahuiꞌ naꞌ,
ateꞌ bulidzëꞌ Jesús,
en rëꞌ Lëꞌ:
―¿Nacuꞌ Liꞌ Bönniꞌ Rinná Béꞌenëꞌ Bönachi Judío?
34 Bubiꞌë didzaꞌ Jesús,
rëꞌ lëꞌ:
―¿Naruꞌ rácasö quiuꞌ rnnoꞌ caní,
o gulë́ bönachi liꞌ caní ca naca quiaꞌ?
35 Pilato rëꞌ Lëꞌ:
―¿Naruꞌ réquitsenuꞌ nacaꞌ judío?
Yuguꞌ bönniꞌ uládz quiuꞌ,
en yuguꞌ bixúz unná bëꞌ buluꞌdödëꞌ Liꞌ lu naꞌa.
¿Bizxi caz benuꞌ?
36 Níꞌirö bubiꞌë didzaꞌ Jesús,
rëꞌ lëꞌ:
―Rinná bëꞌa nedaꞌ,
pero calëga ca taꞌnná bëꞌ bönachi yödzölió ni.
Laꞌtuꞌ rinná bëꞌa ca taꞌnná bëꞌ bönachi yödzölió,
ilaꞌdil-lëꞌ bönniꞌ dáꞌgaquiëꞌ nedaꞌ,
para cabí iluꞌë lataj nu udödi nedaꞌ lu náꞌagaquiëꞌ bönniꞌ judío.
Ca rinná bëꞌa nedaꞌ bitiꞌ naca ca taꞌnná bëꞌ bönachi yödzölió ni.
37 Níꞌirö Pilato rëꞌ Lëꞌ:
―¿Nácatsoꞌ bönniꞌ rinná bëꞌë?
Bubiꞌë didzaꞌ Jesús,
rëꞌ lëꞌ:
―Nacaꞌ ca naꞌ rnnoꞌ.
Que lë ni naꞌ bidaꞌ ga guljaꞌ yödzölió ni,
para gunaꞌ ba nalí que le naca idútë li.
Yúguꞌtë nupa ni tun le naca idútë li tuꞌzë́ nágagaca didzaꞌ ruáꞌa.
38 Pilato rëꞌ Lëꞌ:
―¿Bizxi naꞌ le naca idútë li?
Taꞌchúguiëꞌ queëꞌ Jesús gátiëꞌ
Cateꞌ budxi gunnë́ꞌ Pilato caní,
burúajëꞌ leyúbölö ga naꞌ nacuꞌë bönniꞌ judío unná bëꞌ naꞌ,
en rëꞌ légaquiëꞌ:
―Bitiꞌ bi döꞌ ridzö́lidaꞌ nuꞌë bönniꞌ ni.
39 Libíꞌiliꞌ dë tu le nulaga loliꞌ runliꞌ cateꞌ raca Laní Pascua ni,
rinábiliꞌ nedaꞌ usanaꞌ-nëꞌ queë́liꞌ tuëꞌ bönniꞌ nadzunëꞌ.
¿Rë́ꞌëniliꞌ usanaꞌ-nëꞌ queë́liꞌ Bönniꞌ Rinná Béꞌenëꞌ Bönachi Judío?
40 Níꞌirö yúguꞌtëꞌ guluꞌë zidzaj didzaꞌ leyúbölö,
taꞌnnë́ꞌ:
―¡Calëga bönniꞌ ni,
pero Barrabás usanuꞌ-nëꞌ queë́tuꞌ!
Barrabás naꞌ náquiëꞌ gubán.