Tun xtídzaꞌgaquiëꞌ bönniꞌ yudoꞌ ilaꞌzönëꞌ Jesús
14
Iaꞌchopa dza caꞌ gaca Laní Pascua cateꞌ tuꞌsubanëꞌ bönniꞌ judío ca benëꞌ Dios,
bubéajëꞌ xuz xtóꞌogaquiëꞌ luyú Egipto.
Naca laní cateꞌ tahuëꞌ yöta xtila bitiꞌ nazíꞌ cúa zi que.
Taꞌzóa taꞌböꞌë yuguꞌ bixúz unná bëꞌ,
en bönniꞌ yudoꞌ tuꞌsë́dinëꞌ ilaꞌzönëꞌ Jesús bagáchiꞌsö para ilútiëꞌ Lëꞌ.
2 Taꞌnnë́ꞌ:
―Bitiꞌ gaca sönruꞌ-nëꞌ dza laní tuꞌ ilaꞌtsatsa bönachi.
Nigula rigúꞌunu le riláꞌ zxixi icjëꞌ Jesús
3 Zoëꞌ Jesús yödzö Betania,
lu yuꞌu lidxëꞌ Simón,
bönniꞌ güíꞌinëꞌ huëꞌ nudzuꞌ ruzödi.
Tsanni niꞌ röꞌë rahuëꞌ Jesús,
guyázanu tu nigula,
nuáꞌanu tu bö́gaꞌdoꞌ néquini guiö́j zacaꞌ,
yudzu le riláꞌ zxixi que yöj susén lasi idú,
le nazacaꞌ yenniꞌ.
Guláꞌanu bö́gaꞌdoꞌ naꞌ,
en gulúꞌunu le riláꞌ zxixi naꞌ icjëꞌ Jesús.
4 Gulaꞌlélanëꞌ bal-lëꞌ bönniꞌ nacuꞌë niꞌ.
Taꞌnnë́ꞌ laꞌ légacasëꞌ:
―¿Bizx que guca ditaj le zxixi naꞌ?
5 Laꞌtuꞌ nu gutiꞌ lë naꞌ,
huazíꞌ que iaꞌlatiꞌ ca lázxjaruꞌ que tu iz para nu quisi le quégaca bönachi yechiꞌ.
Gulaꞌnnë́dëꞌë queë́nu.
6 Níꞌirö Jesús bëꞌë didzaꞌ,
rnnëꞌ:
―Guliꞌgüíꞌi-nu lataj.
¿Bizx que rinnë́ zíꞌiliꞌ queë́nu?
Naca dxiꞌa le bennu quiaꞌ.
7 Nacuáꞌlenticaꞌsö bönachi yechiꞌ libíꞌiliꞌ,
en bátatiꞌtës guë́ꞌëniliꞌ,
huáca gunliꞌ dxiꞌa quégaquiëꞌ,
pero nedaꞌ bitiꞌ sóaticaꞌsaꞌ ga zóaliꞌ.
8 Tsca le guzxéquiꞌnu bennu nigula ni.
Cateꞌ gulúꞌunu le riláꞌ zxixi ni nedaꞌ,
bupáꞌanu nedaꞌ zíꞌatëlö ca igáchaꞌa yeru ba.
9 Le nácatë reaꞌ libíꞌiliꞌ,
gátiꞌtës ga gaca libán que didzaꞌ dxiꞌa quiaꞌ idú yödzölió,
soa nu quixjöꞌ caꞌ lë ni bennu nigula ni quiaꞌ.
Caní gaca para nu tsöjné lënu.
Rizíꞌ lu nëꞌë Judas udödëꞌ Jesús
10 Níꞌirö birúajëꞌ Judas Iscariote,
bönniꞌ nabábalenëꞌ chínnuëꞌ naꞌ dáꞌgaquiëꞌ Jesús.
Guyijëꞌ ga nacuꞌë bixúz unná bëꞌ para udödëꞌ Jesús lu náꞌagaquiëꞌ.
11 Cateꞌ bilaꞌyönnëꞌ xtídzëꞌë Judas naꞌ,
buluꞌdzéjanëꞌ,
ateꞌ gulaꞌzíꞌ lu náꞌagaquiëꞌ iluꞌë lëꞌ dumí.
Níꞌirö gusí lahuëꞌ Judas rizóa riböꞌë udödëꞌ Jesús lu náꞌagaquiëꞌ.
Le rëꞌaj ráguruꞌ rusubanruꞌ ca gútiëꞌ Xanruꞌ
12 Naca dza risí lo laní cateꞌ tahuëꞌ yöta xtila bitiꞌ nazíꞌi cúa zi que,
dza naꞌ tutiëꞌ-baꞌ böꞌcuꞌ zxílaꞌdoꞌ tahuëꞌ-baꞌ dzöꞌ Laní Pascua naꞌ,
cateꞌ tuꞌsubanëꞌ ca benëꞌ Dios busölë́ꞌ bönachi judío luyú Egipto.
Níꞌirö bönniꞌ usëda queëꞌ Jesús gulaꞌnábinëꞌ Lëꞌ,
taꞌnnë́ꞌ:
―¿Gazxi rë́ꞌënuꞌ tséajtuꞌ tsöjpáꞌatuꞌ le gáguruꞌ xtsöꞌ que Laní Pascua?
13 Níꞌirö Jesús gusö́l-lëꞌë chopëꞌ bönniꞌ usëda queëꞌ,
en rëꞌ légaquiëꞌ:
―Guliꞌtséaj lu yödzö.
Niꞌ huadzágaliꞌ tu bönniꞌ nuꞌë tu röꞌö nisa.
Guliꞌtséajlenëꞌ.
14 Ga naꞌ tsáziëꞌ,
guliꞌguíëꞌ xan yuꞌu naꞌ:
“Rnnëꞌ Bönniꞌ Usedi:
¿Gazxi zoa yuꞌu ga naꞌ gágulengacaꞌ-nëꞌ bönniꞌ usëda quiaꞌ xtsöꞌ que Laní Pascua?”
15 Níꞌirö uluíꞌinëꞌ libíꞌiliꞌ tu yuꞌu zxön ga naca buropi cuía ga chinabáꞌa.
Buliꞌpáꞌa le gáguruꞌ niꞌ.
16 Bilaꞌrúajëꞌ bönniꞌ usëda queëꞌ naꞌ,
en bilaꞌdxinëꞌ lu yödzö,
ateꞌ yöjxácaꞌgaquiëꞌ yúguꞌtë ca naꞌ chigudxëꞌ légaquiëꞌ Jesús.
Buluꞌpë́ꞌë le ilahuëꞌ niꞌ que Laní Pascua.
17 Cateꞌ chizáꞌ ral-la,
bidxinëꞌ Jesús niꞌ,
dzágagaquiëꞌ idxínnutëꞌ bönniꞌ usëda queëꞌ Lëꞌ.
18 Tsanni niꞌ rö́ꞌögaquiëꞌ tahuëꞌ,
bëꞌë didzaꞌ Jesús,
rnnëꞌ:
―Le nácatë reaꞌ libíꞌiliꞌ,
zoa nu dzaga libíꞌiliꞌ,
nu rágulen nedaꞌ tsözxö́n,
nu udödi nedaꞌ lu náꞌagaca bönachi.
19 Níꞌirö buluꞌhuíꞌinnëꞌ,
en gulaꞌsí lógaquiëꞌ tu tuëꞌ tëꞌ Lëꞌ:
―¿Naruꞌ nedaꞌ?
Iaꞌtúëꞌ caꞌ gunnë́ꞌ:
―¿Naruꞌ nedaꞌ?
20 Bubiꞌë didzaꞌ Jesús,
rëꞌ légaquiëꞌ:
―Naca tu nu nutsaꞌ ladaj chínnuliꞌ ni,
bönniꞌ naꞌ nunë́ꞌë nëꞌë tsözxö́n len naꞌa lu yö́ꞌöna.
21 Tsejaꞌ ga gátiaꞌ nedaꞌ,
Bönniꞌ Guljëꞌ Bönachi,
ca naꞌ nazúaj lu guichi láꞌayi ca gaca quiaꞌ,
pero bicaꞌ bayechiꞌ bönniꞌ naꞌ udödëꞌ nedaꞌ lu náꞌagaquiëꞌ bönniꞌ ilútiëꞌ nedaꞌ.
Gácarö dxiꞌa queëꞌ bönniꞌ naꞌ laꞌtuꞌ cabí guljëꞌ.
22 Tsanni niꞌ tahuëꞌ,
gudélëꞌë Jesús yöta xtila.
Gudxëꞌ Dios:
“Xclenuꞌ.”
Buzxuzxjëꞌ le,
en bëꞌë quégaquiëꞌ,
rnnëꞌ:
―Guliꞌgagu.
Lë ni naca bëlaꞌ rön quiaꞌ.
23 Gudélëꞌë caꞌ tu zxígaꞌdoꞌ,
en gudxëꞌ Dios:
“Xclenuꞌ.”
Níꞌirö bëꞌë quégaquiëꞌ,
ateꞌ yúguꞌtëꞌ gulë́ꞌajëꞌ le.
24 Jesús rëꞌ légaquiëꞌ:
―Lë ni xichönaꞌ le run tsutsu didzaꞌ cubi rucáꞌana tsahuiꞌ,
le núnlenëꞌ Dios bönachi.
Rön ni ilalaj niꞌa quégaca bönachi zián.
25 Le nácatë reaꞌ libíꞌiliꞌ,
bítiꞌrö guíꞌjaꞌ xisi uva ga idxinrö dza guíꞌjaꞌ le cubi ga niꞌ rinná bëꞌë Dios.
Jesús rnnëꞌ innë́ꞌ Pedro bitiꞌ núnbëꞌë Lëꞌ
26 Gudödi gulúl-lëꞌ yöl-laꞌ ba,
bilaꞌrúajëꞌ söjáquiëꞌ Guíꞌa Yaga Olivo.
27 Níꞌirö Jesús gudxëꞌ légaquiëꞌ,
rnnëꞌ:
―Yúguꞌtëliꞌ gaca chopa ládxiꞌliꞌ,
ucáꞌanaliꞌ nedaꞌ naꞌa dzöꞌ,
tuꞌ nazúaj lu guichi láꞌayi,
rnna:
“Gutiaꞌ-nëꞌ uyú böꞌcuꞌ zxilaꞌ,
ateꞌ ilásilasibaꞌ böꞌcuꞌ zxilaꞌ naꞌ.”
28 Tödi ubanaꞌ lu yöl-laꞌ guti,
tsejaꞌ luyú Galilea zíꞌalö ca libíꞌiliꞌ.
29 Níꞌirö Pedro gudxëꞌ Jesús,
rnnëꞌ:
―Sal-laꞌ yúguꞌtëꞌ ilaca chopa ládxiꞌgaquiëꞌ,
en uluꞌcáꞌanëꞌ Liꞌ,
bitiꞌ caꞌ gaca chopa ládxaꞌa nedaꞌ.
30 Jesús gudxëꞌ lëꞌ,
rnnëꞌ:
―Le nácatë reaꞌ liꞌ,
laꞌ dzöꞌ nisö,
siꞌ cö́dxilöbaꞌ böra le buropi luzuí,
tsonna luzuí innóꞌ bitiꞌ núnbëꞌu nedaꞌ.
31 Níꞌirö Pedro buzötjëꞌ Dios,
rnnëꞌ:
―Sal-laꞌ gátilenteaꞌ Liꞌ tsözxö́n,
bitiꞌ caꞌ inníaꞌ bitiꞌ núnbëꞌa Liꞌ.
Lëscaꞌ caní gulaꞌnnë́ꞌ yúguꞌtëꞌ.
Jesús rulidzëꞌ Dios laꞌ yëla Getsemaní
32 Níꞌirö Jesús,
en bönniꞌ dáꞌgaquiëꞌ Lëꞌ bilaꞌdxinëꞌ laꞌ yëla Getsemaní,
ateꞌ Jesús gudxëꞌ légaquiëꞌ,
rnnëꞌ:
―Guliꞌcö́ꞌ ni,
tsanni tsejaꞌ nedaꞌ,
tsöjlidzaꞌ-nëꞌ Dios.
33 Jesús guchë́ꞌë Pedro,
en Jacobo,
en Juan,
ateꞌ gusí lahuëꞌ ridzö́binëꞌ,
en risëbi ládxëꞌë.
34 Gudxëꞌ légaquiëꞌ,
rnnëꞌ:
―Huati cazaꞌ lu yöl-laꞌ risëbi ladxiꞌ.
Guliꞌcö́z ni,
en guliꞌnáꞌ yëla.
35 Níꞌirö guzë́ꞌë Jesús iaꞌlátiꞌdoꞌ,
en busudxín lahuëꞌ lu yu,
bulidzëꞌ Dios.
Gunábinëꞌ Lëꞌ,
channö huáca,
ucuítëꞌ queëꞌ le ral-laꞌ quiꞌi sáquëꞌë dza naꞌ.
36 Niꞌ rulidzëꞌ Dios,
rnnëꞌ:
―Xúzaꞌdoꞌ,
yúguꞌtë huáca gunuꞌ Liꞌ.
Gucuíta lë naꞌ ral-laꞌ quiꞌi sacaꞌa,
pero calëga ca rë́ꞌëndaꞌ nedaꞌ,
pero ca rë́ꞌënuꞌ Liꞌ,
gunuꞌ.
37 Níꞌirö bö́ajëꞌ Jesús ga naꞌ nacuꞌë bönniꞌ usëda queëꞌ,
ateꞌ yöjxáquiëꞌ légaquiëꞌ tasiëꞌ.
Gudxëꞌ Pedro:
―Simón,
¿rásitsoꞌ?
¿Naruꞌ cabí rubéajtsoꞌ yëla loꞌ tu chíꞌidoꞌ?
38 Guliꞌnáꞌ yëla,
en buliꞌlidzëꞌ Dios,
inábiliꞌ-nëꞌ para cabí gataꞌ lataj tuꞌ xihuiꞌ idilúꞌu yöl-laꞌ libíꞌiliꞌ.
Le nácatë böꞌ naca cázaliꞌ zoa caz sinaꞌ,
pero lu yöl-laꞌ bönáchisö queë́liꞌ ricuídiꞌliꞌ.
39 Níꞌirö saꞌyéajëꞌ Jesús leyúbölö,
rulidzëꞌ Dios,
en laꞌ tuz ca gunnë́ꞌ.
40 Cateꞌ bö́ajëꞌ leyúbölö ga naꞌ nacuꞌë,
yöjxáquiëꞌ légaquiëꞌ tasiëꞌ tuꞌ nadö́ditë yëla lógaquiëꞌ.
Bitiꞌ nö́zguequinëꞌ bizxi didzaꞌ uluꞌbiꞌë,
le ilë́ꞌ Lëꞌ.
41 Cateꞌ bö́ajëꞌ le bunni luzuí ga naꞌ nacuꞌë,
rëꞌ légaquiëꞌ:
―¿Rásitsaliꞌ?
¿Ruziꞌtsa ládxiꞌliꞌ?
¡Tscaꞌtiꞌ gaz!
¡Chibidxín dza!
¡Buliꞌyútsöcaꞌ,
Nedaꞌ,
Bönniꞌ Guljëꞌ Bönachi,
chinadödaꞌ lu náꞌagaca bönachi dul-laꞌ!
42 ¡Guliꞌchasa,
uyéajruꞌ!
¡Buliꞌyútsöcaꞌ,
chizë́ꞌë bönniꞌ naꞌ udödëꞌ nedaꞌ lu náꞌagaca bönachi!
Taꞌzönëꞌ Jesús
43 Niꞌ ruꞌë Jesús didzaꞌ ni,
bidxinëꞌ Judas,
bönniꞌ nabábalenëꞌ chínnuëꞌ naꞌ dáꞌgaquiëꞌ Jesús,
ateꞌ záꞌlengaquiëꞌ bönniꞌ zián lëꞌ,
nuáꞌagaquiëꞌ guíë tuchiꞌ,
en yaga.
Yuguꞌ bixúz unná bëꞌ,
en yuguꞌ bönniꞌ yudoꞌ usedi,
en bönniꞌ gula tuꞌzéajniꞌinëꞌ nasö́l-laꞌgaquiëꞌ légaquiëꞌ.
44 Judas,
bönniꞌ naꞌ rudödëꞌ Jesús lu náꞌagaquiëꞌ chinuluíꞌinëꞌ légaquiëꞌ tu le gunëꞌ le gaca bëꞌ nu naca Jesús,
gunnë́ꞌ:
―Bönniꞌ naꞌ utsaga lahuaꞌ-nëꞌ,
Lëꞌ naꞌ Jesús.
¡Guliꞌsönëꞌ,
en guliꞌchë́ꞌë!
¡Guliꞌyútsöquiëꞌ!
45 Cateꞌ bidxinëꞌ Judas niꞌ,
laꞌ gubígaꞌtëꞌ ga naꞌ zoëꞌ Jesús,
en gudxëꞌ Lëꞌ:
―Bönniꞌ Usedi,
Bönniꞌ Usedi.
47 Níꞌirö tuëꞌ bönniꞌ niꞌ dëꞌë Jesús guléajëꞌ guíë tuchiꞌ,
en benëꞌ-biꞌ huëꞌ biꞌi huen dxin queëꞌ bixúz lo.
Guchúguiëꞌ guídi nágabiꞌ.
48 Jesús gudxëꞌ bönachi naꞌ,
rnnëꞌ:
―¿Narúajtsaliꞌ nuáꞌaliꞌ guíë tuchiꞌ,
en yaga para sönliꞌ nedaꞌ,
runliꞌ ca runliꞌ cateꞌ rizönliꞌ-nëꞌ gubán?
49 Yuguꞌ dza guzóalenaꞌ libíꞌiliꞌ rusë́digacadaꞌ bönachi ga naca chila yudoꞌ,
ateꞌ bitiꞌ guzxönliꞌ nedaꞌ,
pero raca caní para gaca le nazúaj lu guichi láꞌayi.
50 Níꞌirö yúguꞌtë bönniꞌ usëda queëꞌ Jesús buluꞌcáꞌanëꞌ Leꞌ,
taꞌzxúnnajëꞌ.
Rizxúnnajbiꞌ tubiꞌ biꞌi raꞌbán
51 Zóabiꞌ caꞌ niꞌ tubiꞌ biꞌi raꞌbán söjnobiꞌ Jesús,
nuxóasö cuinbiꞌ tu lariꞌ blagaꞌ.
Yuguꞌ bönniꞌ naꞌ nachë́ꞌgaquiëꞌ Jesús gulaꞌzönëꞌ-biꞌ
52 pero busanbiꞌ lariꞌ naꞌ,
en xiguídisöbiꞌ buzxúnnajbiꞌ.
Ridxinëꞌ Jesús lógaquiëꞌ bönniꞌ yúlahuiꞌ lo
53 Gulaꞌchë́ꞌë Jesús lahuëꞌ bixúz lo,
ateꞌ buluꞌdubëꞌ niꞌ yúguꞌtë bixúz unná bëꞌ,
en bönniꞌ gula tuꞌzéajniꞌinëꞌ,
en yuguꞌ bönniꞌ yudoꞌ usedi.
54 Pedro yöjnahuëꞌ Jesús ziꞌtuꞌ zíꞌtuꞌsö,
en guyáziëꞌ löꞌa lidxi bixúz lo naꞌ,
en gurö́ꞌölenëꞌ tsözxö́n yuguꞌ niꞌa nëꞌë bixúz lo naꞌ,
rutsëꞌe cuinëꞌ raꞌ guíꞌ.
55 Yuguꞌ bixúz unná bëꞌ len yúguꞌtë bönniꞌ yúlahuiꞌ lo buluꞌguiljëꞌ tu le uluꞌsubáguiëꞌ Jesús para gaca ilaꞌchúguiëꞌ queëꞌ gátiëꞌ pero bitiꞌ bi buluꞌdzö́linëꞌ.
56 Bönniꞌ zián gulaꞌnnë́ꞌ queëꞌ Jesús le cabí nácatë,
pero bitiꞌ yöjlö́zagaca le gulaꞌnnë́ꞌ queëꞌ.
57 Níꞌirö gulaꞌzuínëꞌ yuguꞌ bönniꞌ gulaꞌnnë́ꞌ queëꞌ Jesús le cabí nácatë,
taꞌnnë́ꞌ:
58 ―Netuꞌ biyö́nituꞌ didzaꞌ bëꞌë bönniꞌ ni,
gunnë́ꞌ:
“Uquínnajaꞌ yudoꞌ ni,
lë ni nequi lu niꞌa lu naꞌ bönachi,
ateꞌ tsonna dzasö uchisaꞌ iaꞌtú le cabí nequi lu niꞌa lu naꞌ bönachi.”
59 Lëscaꞌ lë ni,
bitiꞌ yöjlö́zagaca xtídzaꞌgaquiëꞌ.
60 Níꞌirö guyasëꞌ bixúz lo naꞌ gatsaj láhuiꞌlö bönachi nacuáꞌ niꞌ,
en gunábinëꞌ Jesús,
rnnëꞌ:
―¿Naruꞌ cabí rubiꞌitsoꞌ didzaꞌ?
¿Bizxi naꞌ taꞌnnë́ꞌ quiuꞌ bönniꞌ ni?
61 Jesús,
dxisö zoëꞌ.
Bitiꞌ bi didzaꞌ rubiꞌë.
Gunábinëꞌ Lëꞌ leyúbölö bixúz lo naꞌ,
rnnëꞌ:
―¿Naruꞌ nacuꞌ Liꞌ Cristo,
Zxíꞌinëꞌ Dios Láꞌayi?
62 Bubiꞌë didzaꞌ Jesús,
rnnëꞌ:
―Nacaꞌ.
Iléꞌeliꞌ nedaꞌ,
Bönniꞌ Guljëꞌ Bönachi,
soaꞌ cöꞌa cuitëꞌ ibëla Dios napa cazëꞌ yöl-laꞌ huáca cateꞌ niꞌ huödaꞌ lu böaj lúzxiba.
63 Níꞌirö bixúz lo naꞌ,
lu yöl-laꞌ rilé queëꞌ guchözëꞌ lariꞌ nácuëꞌ,
rnnëꞌ:
―¿Núzxirö naquíniruꞌ nu quixjöꞌ?
64 ¡Riyö́n quéziliꞌ rucáꞌanëꞌ Dios cáꞌasö len didzaꞌ ruꞌë!
¿Nacxi rusácaꞌliꞌ queë́liꞌ?
Yúguꞌtëꞌ gulaꞌchúguiëꞌ queëꞌ gátiëꞌ.
65 Níꞌirö gulaꞌsí lógaquiëꞌ bal-lëꞌ tuꞌchejëꞌ Jesús zxönaꞌ.
Buluꞌsayjëꞌ lahuëꞌ,
en gulundëꞌ Lëꞌ ziꞌ,
taꞌnnë́ꞌ:
―Gunnë́ yáꞌatsöcaꞌ nuzxi naꞌ bëꞌ Liꞌ.
Yuguꞌ bönniꞌ niꞌa nëꞌë bixúz lo gulaꞌgápëꞌë ruꞌë Jesús.
Rnnëꞌ Pedro bitiꞌ núnbëꞌë Jesús
66 Cateꞌ niꞌ zoëꞌ Pedro löꞌa zxan yuꞌu,
bidxinbiꞌ tubiꞌ biꞌi nigula huen dxin queëꞌ bixúz lo naꞌ ga naꞌ zoëꞌ.
67 Cateꞌ biléꞌebiꞌ Pedro,
röꞌë rutsëꞌe cuinëꞌ raꞌ guíꞌ,
buyubiꞌ lëꞌ,
rnnabiꞌ:
―Doꞌo caꞌ liꞌ Jesús,
bönniꞌ Nazaret naꞌ.
68 Gudáꞌbaguiëꞌ Pedro,
rnnëꞌ:
―Bitiꞌ núnbëꞌa-nëꞌ,
en bitiꞌ nözdaꞌ bizxi naꞌ rnnoꞌ.
Burúajëꞌ Pedro yöjsóëꞌ ga nu riyaza löꞌa.
Níꞌirö gurö́dxibaꞌ böra.
69 Buyubiꞌ lëꞌ leyúbölö biꞌi nigula huen dxin naꞌ,
en gusí lobiꞌ rëbiꞌ nupa nacuáꞌ niꞌ:
―Bönniꞌ ni dzáguiëꞌ légaquiëꞌ.
70 Leyúbölö gudáꞌbaguiëꞌ Pedro.
Iaꞌlatiꞌ gudzé nupa nacuáꞌ niꞌ të Pedro,
taꞌnná:
―Le nácatë dzaguꞌ légaquiëꞌ,
tuꞌ nacuꞌ bönniꞌ Galilea.
Yöl-laꞌ ruíꞌisö quiuꞌ didzaꞌ naca bëꞌu,
tuꞌ tuz ca ruíꞌiliꞌ didzaꞌ.
71 Gusí lahuëꞌ Pedro rudxía döꞌ cuinëꞌ,
en ruzötjëꞌ Dios,
rnnëꞌ:
―Bitiꞌ caꞌ núnbëꞌa-nëꞌ bönniꞌ naꞌ ruíꞌiliꞌ didzaꞌ ca naca queëꞌ.
72 Laꞌ gurö́dxitëbaꞌ böra le buropi luzuí.
Níꞌirö yöjnenëꞌ Pedro didzaꞌ naꞌ bëꞌë Jesús,
gudxëꞌ lëꞌ:
“Ziꞌalö cö́dxibaꞌ böra le buropi luzuí,
tsonna luzuí innóꞌ bitiꞌ núnbëꞌu nedaꞌ.”
Cateꞌ yöjnenëꞌ didzaꞌ ni,
gusí lahuëꞌ ribö́dxidëꞌë.