Riguíxjöꞌë Jesús ca siꞌ uluꞌquínnajëꞌ yudoꞌ
13
Cateꞌ burúajëꞌ Jesús chila yudoꞌ,
tuëꞌ bönniꞌ usëda queëꞌ gudxëꞌ Lëꞌ,
rnnëꞌ:
―Bönniꞌ Usedi,
buyútsöcaꞌ náctiga yuguꞌ yuꞌu zxön ni,
en náctiga yuguꞌ guiö́j lëꞌe zöꞌö quéguequi.
2 Bubiꞌë didzaꞌ Jesús,
rëꞌ lëꞌ:
―Riléꞌenuꞌ yuguꞌ yuꞌu zxön ni,
pero bitiꞌ caꞌ ugáꞌana guiö́j lahui luzë́ꞌe ni,
tuꞌ uluꞌquínnaj bönachi léguequi.
Le ilaca bëꞌ cateꞌ siꞌ údxi que yödzölió
3 Níꞌirö yöjáquiëꞌ Jesús,
en yuguꞌ bönniꞌ dáꞌgaquiëꞌ Lëꞌ lu Guíꞌa Yaga Olivo,
guíꞌa naꞌ dë ca dö́dilö raꞌ yudoꞌ.
Cateꞌ chiröꞌë Jesús niꞌ,
laꞌ légacasëꞌ Pedro,
en Jacobo,
en Juan,
en Andrés,
gulë́ꞌ Lëꞌ,
taꞌnnë́ꞌ:
4 ―Gudíxjöiꞌi netuꞌ bátaxi ilaca lë ni.
¿Bizxi gaca bëꞌ chizóa ilaca yúguꞌtë lë ni?
5 Bubiꞌë didzaꞌ Jesús,
rusë́dinëꞌ légaquiëꞌ,
rnnëꞌ:
―Guliꞌgún chiꞌi cuinliꞌ para cabí nu siꞌ yeꞌe libíꞌiliꞌ.
6 Ilaꞌláꞌ lahuëꞌ zián bönniꞌ siꞌ lágaquiëꞌ ca leaꞌ nedaꞌ,
ilaꞌnnë́ꞌ nácagaquiëꞌ Cristo.
Caní ilaꞌzíꞌ yéꞌenëꞌ bönachi zián.
7 ’Níꞌirö cateꞌ yö́niliꞌ raca gudil-la nilö náꞌalö,
bitiꞌ gádxiliꞌ.
Yúguꞌtë lë ni ral-laꞌ ilaca,
pero bitiꞌ ridxini dza údxi.
8 Tu yödzö tíl-lalen iaꞌtú yödzö,
en tu ga nu rinná bëꞌ tsöjtíl-lalen iaꞌtú ga nu rinná bëꞌ.
Zián lataj tödi budóꞌ zxuꞌ,
en tsuꞌu gubín.
Ilaꞌtsatsa bönachi.
Yuguꞌ lë ni ilaca le isí lo ilaꞌguíꞌi ilaꞌzacaꞌ bönachi dza niꞌ.
9 ’Níꞌirö guliꞌgún chiꞌi cuinliꞌ,
tuꞌ uluꞌdödëꞌ libíꞌiliꞌ lu náꞌagaquiëꞌ bönniꞌ yúlahuiꞌ.
Ilaꞌguinëꞌ libíꞌiliꞌ gapa tuꞌdubëꞌ tuꞌsëdëꞌ queëꞌ Dios bönniꞌ judío.
Idxinliꞌ lógaquiëꞌ bönniꞌ taꞌnná béꞌenëꞌ libíꞌiliꞌ,
en lógaquiëꞌ bönniꞌ taꞌnná béꞌenëꞌ yödzö ziꞌtuꞌ.
Ilunëꞌ caní queë́liꞌ tuꞌ dáꞌaliꞌ nedaꞌ,
pero gunliꞌ ba nalí quiaꞌ nedaꞌ niꞌ.
10 Zíꞌalö ca idxín dza údxi,
run bayudxi gaca libán que didzaꞌ dxiꞌa quiaꞌ lógaca bönachi idútë yödzölió.
11 Cateꞌ niꞌ ilaꞌchë́ꞌë libíꞌiliꞌ,
en uluꞌdödëꞌ libíꞌiliꞌ lu náꞌagaquiëꞌ bönniꞌ yúlahuiꞌ,
bitiꞌ güíꞌi ládxiꞌliꞌ bizxi innaliꞌ.
Laꞌ dza níꞌisö Dios gunnëꞌ queë́liꞌ didzaꞌ güíꞌiliꞌ,
ateꞌ lë ni innaliꞌ.
Cateꞌ niꞌ güíꞌiliꞌ didzaꞌ,
calëga libíꞌisiliꞌ naꞌ innaliꞌ,
pero Dios Böꞌ Láꞌayi innë́ꞌ.
12 Uluꞌdödi bönachi laꞌ bö́chiꞌgacasö lu náꞌagaquiëꞌ bönniꞌ ilútiëꞌ légaquiëꞌ.
Yuguꞌ bönniꞌ nacuáꞌabiꞌ biꞌi quégaquiëꞌ uluꞌdödëꞌ laꞌ zxíꞌinigaca cazëꞌ caꞌ,
ateꞌ zxíꞌinigaquiëꞌ naꞌ uluꞌdö́dibiꞌ laꞌ xuz xináꞌagaca cázabiꞌ lu náꞌagaquiëꞌ bönniꞌ ilútiëꞌ légaquiëꞌ.
13 Yúguꞌtë bönachi uluꞌzóa libíꞌiliꞌ tsöláꞌalö tuꞌ dáꞌaliꞌ nedaꞌ,
pero núlöliꞌ guáꞌ ilenliꞌ lë naꞌ ga idxinrö dza údxi,
uláliꞌ.
14 ’Nupa tuꞌlaba didzaꞌ ni ral-laꞌ ilaꞌyéajniꞌi.
Buzúajëꞌ lu guichi Daniel,
bönniꞌ niꞌ bëꞌë didzaꞌ uláz queëꞌ Dios,
le rnna caní:
“Tsaz tu le xihuiꞌ le rucáꞌana cané ga naca laꞌayi.”
Dza níꞌirö ral-laꞌ ilaꞌzxunnaj nupa nacuáꞌ luyú Judea,
en tsöjaca gapa naca lu guíꞌadoꞌ.
15 Nu zoa ícjoꞌolö dza niꞌ ral-laꞌ izxúnnajtë,
en bitiꞌ huötaj zxan yuꞌu para tsöjzxíꞌ bi dë que lu yuꞌu.
16 Nu zoa laꞌ guixiꞌ ral-laꞌ izxúnnajtë,
en bitiꞌ huö́aj tsöjzxíꞌ lariꞌ rixóa yeni.
17 Bicaꞌ bayechiꞌ yuguꞌ nigula dza niꞌ nuáꞌagacanu-biꞌ bíꞌidoꞌ,
encaꞌ nigula tuꞌgádxiꞌnu-biꞌ bíꞌidoꞌ.
18 Buliꞌlidzëꞌ Dios inábiliꞌ-nëꞌ cabí gun bayudxi izxúnnajliꞌ cateꞌ raca beoꞌ ziaga caꞌ.
19 Yuguꞌ dza niꞌ ilaꞌguíꞌi ilaꞌzacaꞌrö bönachi ca le guca zíꞌatëlö cateꞌ siꞌ gutaꞌ yödzölió le benëꞌ Dios ga ridxintë naꞌa dza,
ateꞌ dza záꞌgaca bitiꞌ gaca caní.
20 Laꞌtuꞌ cabí nunëꞌ Dios ga uluꞌhuöáca nabábasö yuguꞌ dza niꞌ,
cuntu nu ulá,
pero tuꞌ nadxíꞌinëꞌ nupa chigurö́ cazëꞌ,
chinunëꞌ queëꞌ gunëꞌ ga uluꞌhuöáca nabábasö yuguꞌ dza niꞌ.
21 ’Naꞌa,
channö nu guíë libíꞌiliꞌ:
“Buliꞌyútsöcaꞌ,
ni zoëꞌ Cristo”,
o inná:
“Buliꞌyútsöcaꞌ,
niꞌ zoëꞌ”,
bitiꞌ caꞌ tséajlëꞌëliꞌ nu naꞌ.
22 Ilaꞌláꞌ lahuëꞌ zián bönniꞌ ilaꞌzíꞌ yéꞌenëꞌ bönachi.
Ilaꞌnnë́ꞌ nácagaquiëꞌ Cristo,
en ilaꞌnnë́ꞌ nácagaquiëꞌ bönniꞌ tuꞌë didzaꞌ uláz queëꞌ Dios.
Uluꞌluíꞌinëꞌ le ilaca bëꞌ,
en ilunëꞌ yuguꞌ yöl-laꞌ huáca zxön.
Hualaꞌzíꞌ yéꞌenëꞌ caꞌ nupa gurö́ cazëꞌ Dios channö ilaꞌzéquiꞌnëꞌ.
23 Níꞌirö libíꞌiliꞌ,
guliꞌsóa ban ladxiꞌ.
Yúguꞌtë chigudxaꞌ libíꞌiliꞌ zíꞌatëlö ca gaca.
Ca huödëꞌ Bönniꞌ Guljëꞌ Bönachi
24 Gunnë́ꞌ caꞌ Jesús:
―Yuguꞌ dza niꞌ,
tödi gaca dza naꞌ ilaꞌguíꞌi ilaꞌzacaꞌ caní bönachi,
ichul-la gubidza,
en bitiꞌ cuꞌu beníꞌ beoꞌ.
25 Ilaꞌguínnaj bölaj lúzxiba,
en ilaꞌzxizi le nál-lagaca naláꞌgaca lúzxiba naꞌ.
26 Níꞌirö ilaꞌléꞌeni nedaꞌ,
Bönniꞌ Guljëꞌ Bönachi,
zaꞌa lu böaj lúzxiba,
napaꞌ yöl-laꞌ huáca zxön,
en yöl-laꞌ beníꞌ quiaꞌ.
27 Isö́l-laꞌgacaꞌ-nëꞌ gubáz láꞌayi quiaꞌ,
ateꞌ uluꞌtubëꞌ bönachi gurö́ cazaꞌ quiaꞌ nacuáꞌ idapa laꞌa yödzölió,
ga naguélaꞌtë luyú bidxi,
ga ridxintë ga naguelaꞌ lúzxiba.
28 ’Guliꞌtséajniꞌi le rusedi yaga higo niꞌ.
Cateꞌ taꞌlén niꞌa nëꞌe huë́ꞌënidoꞌ,
en rubía xilaguiꞌ yulu,
nö́ziliꞌ chizóa idxín beoꞌ cusubá.
29 Lëscaꞌ caní,
cateꞌ iléꞌeliꞌ taca lë ni,
inö́ziliꞌ chizóa idxín dza údxi naꞌ,
en chiridzaga lo.
30 Le nácatë reaꞌ libíꞌiliꞌ,
yúguꞌtë lë ni ilaca zíꞌatëlö ca ilátigaca nupa nacuáꞌ dza naꞌ.
31 Huadödi que lúzxiba,
en que luyú ni,
pero xtídzaꞌa catu caz tödi que.
32 ’Cateꞌ idxín dza niꞌ o rëla niꞌ,
cuntu nu nözi.
Bitiꞌ nö́zguequinëꞌ gubáz láꞌayi nacuꞌë yehuaꞌ yubá,
en bitiꞌ nözdaꞌ nedaꞌ,
Zxíꞌinëꞌ Dios.
Tuzëꞌ Dios Xuz nö́zinëꞌ.
33 Que lë ni naꞌ,
buliꞌsubán ládxiꞌliꞌ.
Guliꞌsóa sinaꞌ,
en buliꞌlidzëꞌ Dios tuꞌ cabí nö́ziliꞌ bizxi dza gaca lë ni.
34 Gaca ca raca cateꞌ saꞌyéajëꞌ ziꞌtuꞌ tu bönniꞌ.
Cateꞌ chizóa uzë́ꞌë lidxëꞌ,
udödëꞌ lu náꞌagaquiëꞌ huen dxin queëꞌ yuguꞌ le dë queëꞌ.
Que queë́gaquiëꞌ guꞌë xichíngaquiëꞌ,
en inná bëꞌë soa ban ladxiꞌ nu zoa huen chiꞌi ga nu riyaza.
35 Guliꞌsóa libíꞌiliꞌ ban ladxiꞌ tuꞌ cabí nö́ziliꞌ bátaxi huödëꞌ xan yuꞌu,
cateꞌ chiridzö́ꞌ,
o gatsaj lahuiꞌ yëla,
o cateꞌ ribö́dxibaꞌ böra,
o zíladoꞌ.
36 Guliꞌgún caní,
para cabí idixáquiëꞌ libíꞌiliꞌ rásiliꞌ channö huödëꞌ tsálidoꞌos.
37 Lë ni reaꞌ libíꞌiliꞌ,
reaꞌ caꞌ yúguꞌtë bönachi:
Guliꞌsóa ban ladxiꞌ.