Gun le gulúꞌunu tu nigula yechiꞌ lahuëꞌ Dios
21
Ga naꞌ zoëꞌ Jesús chila yudoꞌ,
guchisa lahuëꞌ,
en riléꞌenëꞌ yuguꞌ bönniꞌ dë yöl-laꞌ tsahuiꞌ quégaquiëꞌ,
taꞌguꞌë dumí lu guíꞌina que dumí gun que yudoꞌ.
San Lucas 21:1-28
2 Biléꞌenëꞌ caꞌ tu nigula yechiꞌ uzë́bidoꞌ,
rigúꞌunu chopa dumí lásidoꞌ,
le nazácaꞌgaca látiꞌdoꞌos.
3 Rnnëꞌ Jesús:
―Le nácatë reaꞌ libíꞌiliꞌ,
tu le zxö́ntërö gulúꞌunu nigula yechiꞌ uzë́bidoꞌ ni ca iaꞌzícaꞌrö bönachi naꞌ taꞌguꞌë dumí.
4 Yúguꞌtëꞌ,
tsca le nadödi bëꞌ dë quégaquiëꞌ,
gulaꞌguꞌë dumí que yudoꞌ,
pero nigula ni,
lu yöl-laꞌ yechiꞌ queë́nu gulúꞌunu idútë le dë queë́nu,
le ral-laꞌ gáhuinu.
Riguíxjöꞌë Jesús ca uluꞌsunítiëꞌ yudoꞌ
5 Nacuáꞌ niꞌ nupa tuíꞌi didzaꞌ ca naca que yudoꞌ naꞌ,
ca naꞌ nazíꞌi biquitaj que,
yuguꞌ guiö́j nazácalëꞌegaca,
en yuguꞌ gundoꞌ nácagaca lachi,
ateꞌ Jesús rëꞌ légaquiëꞌ,
rnnëꞌ:
6 ―Yúguꞌtë lë ni riléꞌeliꞌ,
huadxín dza cateꞌ bítiꞌrö ugáꞌana guiö́j lahui luzë́ꞌe ni,
tuꞌ uluꞌsuniti bönachi yudoꞌ ni.
Le ilaca bëꞌ cateꞌ siꞌ idxín dza údxi
7 Níꞌirö gulaꞌnábinëꞌ Jesús,
taꞌnnë́ꞌ:
―Bönniꞌ Usedi,
¿bátaxi gaca lë ni?
¿Bizxi gaca bëꞌ chizóa gaca caní?
8 Bubiꞌë didzaꞌ Jesús,
rnnëꞌ:
―Guliꞌgún chiꞌi cuinliꞌ,
para cabí nu siꞌ yeꞌe libíꞌiliꞌ,
tuꞌ ilaꞌláꞌgaquiëꞌ bönniꞌ zián,
en ilaꞌzíꞌi lágaquiëꞌ ca leaꞌ nedaꞌ,
ilaꞌnnë́ꞌ nácagaquiëꞌ Cristo,
en ilaꞌnnë́ꞌ:
“Chizáꞌ galaꞌ dza údxi.”
Nedaꞌ reaꞌ libíꞌiliꞌ:
Bitiꞌ tséajlenliꞌ légaquiëꞌ.
9 Cateꞌ yö́niliꞌ raca gudil-la,
en taꞌdáꞌbagaꞌ bönachi yúlahuiꞌ,
bitiꞌ gadxi idzö́biliꞌ,
tuꞌ run bayudxi ilaca le caní,
pero bitiꞌ zuítëni dza údxi.
10 Níꞌirö rëꞌ caꞌ légaquiëꞌ:
―Til-la tu yödzö len iaꞌtú yödzö,
ateꞌ bönachi tu ga nu rinná bëꞌ ilaꞌdíl-lalen bönachi iaꞌtú ga nu rinná bëꞌ.
11 Tö́digaca budóꞌ zxuꞌ,
ateꞌ zián lataj gaca gubín,
en ilatsaj yödzöhuë́ꞌ zxön.
Ilaꞌláꞌ lahui lúzxiba le ilún gadxi bönachi,
en le ilaca bëꞌ.
12 ’Zíꞌatëlö cateꞌ siꞌ ilaca lë ni,
ilaꞌzö́n bönachi libíꞌiliꞌ,
en ilaꞌbía ládxiꞌgaca libíꞌiliꞌ.
Ilaꞌchë́ꞌë libíꞌiliꞌ gapa tuꞌdubëꞌ tuꞌsëdëꞌ queëꞌ Dios para ilútiëꞌ libíꞌiliꞌ,
en ilaꞌguꞌë libíꞌiliꞌ lidxi guíë.
Ilaꞌchë́ꞌë libíꞌiliꞌ lógaquiëꞌ bönniꞌ taꞌnná bëꞌë,
en lógaquiëꞌ bönniꞌ lo,
tuꞌ dáꞌaliꞌ nedaꞌ.
13 Gaca caní queë́liꞌ para séquiꞌliꞌ gunliꞌ ba nalí quiaꞌ nedaꞌ.
14 Tsutsu guliꞌgún ládxiꞌliꞌ,
para cabí cuéqui ícjaliꞌ zíꞌalö nacxi innaliꞌ uláz queë́liꞌ,
15 tuꞌ gunnaꞌ queë́liꞌ didzaꞌ ubíꞌiliꞌ,
en yöl-laꞌ réajniꞌi,
para cabí gaca uluꞌcul-lëꞌ libíꞌiliꞌ,
en para cabí gaca bi ilaꞌnnë́ꞌ que xtídzaꞌliꞌ bönniꞌ niꞌ bitiꞌ ilaꞌléꞌenëꞌ libíꞌiliꞌ dxiꞌa.
16 Níꞌirö xuz quéziliꞌ uluꞌdödëꞌ libíꞌiliꞌ,
en cáꞌanqueze yuguꞌ bönniꞌ böchiꞌ quéziliꞌ,
en yuguꞌ diꞌa dza que quéziliꞌ,
en yuguꞌ böchiꞌ luzë́ꞌe quéziliꞌ,
ateꞌ ilútiëꞌ bál-laliꞌ.
17 Yúguꞌtë bönachi uluꞌzóa libíꞌiliꞌ tsöláꞌalö tuꞌ dáꞌaliꞌ nedaꞌ,
18 pero bitiꞌ initi nitú guitsaꞌ ícjaliꞌ.
19 Channö ugáꞌanaliꞌ tsutsu,
idéliꞌliꞌ yöl-laꞌ naꞌbán idú.
20 ’Cateꞌ iléꞌeliꞌ bönniꞌ röjáquiëꞌ gudil-la nagúꞌugaquiëꞌ lëꞌa Jerusalén,
inö́ziliꞌ chibidxín dza initi yödzö ni.
21 Níꞌirö nupa nacuáꞌ luyú Judea ral-laꞌ ilaꞌzxunnaj ni,
en tsöjaca gapa naca guíꞌadoꞌ,
ateꞌ nupa nacuáꞌ lu yödzö ni ral-laꞌ ilaꞌrúaj ni,
ateꞌ nupa nacuáꞌ laꞌ guixiꞌ,
bitiꞌ ral-laꞌ uluꞌdxín lu yödzö ni.
22 Yuguꞌ dza niꞌ Dios gunëꞌ xíguiaꞌ nupa nacuáꞌ yödzö ni para gaca yúguꞌtë le nazúaj lu guichi láꞌayi ca ral-laꞌ gaca quégaquiëꞌ.
23 Cateꞌ idxín dza niꞌ,
bicaꞌ bayechiꞌ yuguꞌ nigula nuáꞌgacanu-biꞌ bíꞌidoꞌ siꞌ ilaljbiꞌ,
en nigula tuꞌgádxiꞌnu-biꞌ bíꞌidoꞌ,
tuꞌ ilaꞌguíꞌi ilaꞌzácaꞌdaꞌ bönachi nacuáꞌ niꞌ,
ateꞌ Dios gúndëꞌë bönachi niꞌ xíguiaꞌ.
24 Ilátiëꞌ ziánëꞌ lu gudil-la naꞌ,
ateꞌ ilaꞌchë́ꞌë iaꞌbal-lëꞌ nadzúngaquiëꞌ ga ilaꞌdxinëꞌ idútë yödzölió,
ateꞌ yödzö Jerusalén ni,
uluꞌléaj uluꞌlibëꞌ le bönniꞌ ziꞌtuꞌ,
cateꞌ izáꞌarö dza quégaquiëꞌ.
Le ilaca bëꞌ siꞌ huödëꞌ Bönniꞌ Guljëꞌ Bönachi
25 Gunnë́ꞌ caꞌ Jesús:
―Niꞌirö ilaꞌcuáꞌ le ilaca bëꞌ lu gubidza,
en lu beoꞌ,
en yuguꞌ lu bölaj lúzxiba,
ateꞌ luyú ni uluꞌchixi bönachi,
en iládxiguequi,
tuꞌ yön chiꞌi guziúꞌ yu que nísadoꞌ,
en que le riyasa ridxía nisa naꞌ.
26 Uluꞌdú ládxiꞌgaca lu yöl-laꞌ radxi quéguequi tuꞌ ilaꞌzáꞌ ládxiꞌgaca quégaca le ral-laꞌ ilaca lu yödzölió,
en ilaꞌzxizi le naláꞌgaca lúzxiba.
27 Níꞌirö ilaꞌléꞌenëꞌ nedaꞌ,
Bönniꞌ Guljëꞌ Bönachi,
guídaꞌ lu böaj lúzxiba,
dë lu naꞌa yöl-laꞌ unná bëꞌ,
ateꞌ iláꞌ lahui yöl-laꞌ zxön quiaꞌ.
28 Cateꞌ isí lo ilaca lë ni,
buliꞌtipa ládxiꞌliꞌ,
en guliꞌchisa loliꞌ,
tuꞌ chizóa udxinaꞌ nedaꞌ,
para huöáꞌuaꞌ libíꞌiliꞌ.
29 Jesús gudxëꞌ caꞌ légaquiëꞌ tu le bucúdzuꞌë didzaꞌ,
rnnëꞌ:
―Buliꞌyútsöcaꞌ ca raca que yaga higo,
en que bítiꞌtës yaga yúbölö.
San Lucas 21:29-38
30 Cateꞌ riléꞌeliꞌ taꞌlén niꞌa nëꞌe huë́ꞌënidoꞌ,
nöz quéziliꞌ chizáꞌ galaꞌ cusu ba.
31 Lëscaꞌ caní,
cateꞌ iléꞌeliꞌ chitaca yuguꞌ lë ni,
inö́ziliꞌ chizáꞌ galaꞌ dza idinná bëꞌë Dios luyú ni.
32 ’Le nácatë reaꞌ libíꞌiliꞌ,
bitiꞌ ilátigaca bönachi ilaꞌcuáꞌ dza niꞌ cateꞌ ilaca yúguꞌtë lë ni.
33 Ilaꞌdödi que lúzxiba,
en que luyú ni,
pero xtídzaꞌa,
bitiꞌ tödi cáꞌasö,
tuꞌ idxín caz ca rnna.
34 ’Guliꞌgún chiꞌi cuinliꞌ para cabí güíꞌiliꞌ lataj tsaza icja ládxiꞌdoꞌoliꞌ le gun ditaj libíꞌiliꞌ,
lë naꞌ naca yöl-laꞌ rágulëꞌe,
en yöl-laꞌ rizudxi,
en yöl-laꞌ ruúbi ruguíꞌi,
para cateꞌ idxín dza niꞌ,
cabí sóaliꞌ niti ladxiꞌ,
35 en para cabí gaca queë́liꞌ ca tu le rizö́n bönachi,
ca naca le gaca quégaca yúguꞌtë bönachi nacuáꞌ idútë yödzölió.
36 Que lë ni naꞌ,
guliꞌsóa ban ladxiꞌ,
en buliꞌlídzaticaꞌsëꞌ Dios,
para gaca uláliꞌ lu lë naꞌ ral-laꞌ ilaca,
en para cabí utuíꞌiliꞌ cateꞌ idxinliꞌ lahuaꞌ nedaꞌ,
Bönniꞌ Guljëꞌ Bönachi.