Rucúdzuꞌë didzaꞌ Jesús ca gaca quégaca huen dxin bitiꞌ nácagaca tsahuiꞌ
12
Níꞌirö gusí lahuëꞌ Jesús ruíꞌilenëꞌ yuguꞌ bönniꞌ dáꞌgaquiëꞌ Lëꞌ didzaꞌ yuguꞌ le rucúdzuꞌë didzaꞌ,
rnnëꞌ:
―Guzóëꞌ tu bönniꞌ,
budë́ꞌë lubá uva zián ga naca lu xiyúëꞌ.
Guléquiëꞌ lëꞌa que,
en guchö́ꞌönëꞌ tu rögaꞌ guiö́j ga isíëꞌ xisi uva naꞌ.
Budxíëꞌ tu yuꞌu gupa ga naca xitsáꞌ ga nu uyú xiyúëꞌ naꞌ.
’Níꞌirö budödëꞌ xiyúëꞌ naꞌ lu náꞌagaquiëꞌ huen dxin,
ilaꞌziꞌë gatsaj huéaj le unödzaj,
ateꞌ guyijëꞌ yödzö ziꞌtuꞌ.
2 Cateꞌ bidxín dza uluꞌchibëꞌ le ribía,
gusö́l-lëꞌë-biꞌ biꞌi huen dxin tsöjxíꞌibiꞌ lu náꞌagaquiëꞌ huen dxin naꞌ le ral-laꞌ siꞌë xanbiꞌ que le gulaꞌbía lubá uva naꞌ.
3 Níꞌirö yuguꞌ huen dxin naꞌ gulaꞌguélëꞌë-biꞌ biꞌi naꞌ,
en gulundëꞌ-biꞌ ziꞌ,
ateꞌ buluꞌsö́l-lëꞌë-biꞌ cáꞌasöbiꞌ.
4 Níꞌirö bönniꞌ xan luyú naꞌ gusö́l-lëꞌë-biꞌ iaꞌtubiꞌ biꞌi huen dxin queëꞌ,
ateꞌ biꞌi ni buluꞌladxëꞌ-biꞌ guiö́j.
Buluꞌlë́ꞌë ícjabiꞌ.
Guluꞌë döꞌ queë́biꞌ.
5 Níꞌirö bönniꞌ xan luyú naꞌ gusö́l-lëꞌë-biꞌ caꞌ iaꞌtubiꞌ biꞌi huen dxin queëꞌ,
ateꞌ biꞌi ni gulútiëꞌ-biꞌ.
Gusö́l-lëꞌë-biꞌ caꞌ ziánröbiꞌ,
ateꞌ bál-labiꞌ gulúngacadëꞌ-biꞌ ziꞌ,
en iaꞌbál-labiꞌ gulútigaquiëꞌ-biꞌ.
6 ’Cúnturö nu nagáꞌana queëꞌ xan luyú naꞌ.
Nagáꞌanasibiꞌ zxíꞌinëꞌ,
ateꞌ nadxíꞌideꞌenëꞌ-biꞌ.
Ga yöjsetë,
gusö́l-lëꞌë-biꞌ zxíꞌinëꞌ,
rnnëꞌ:
“Ilunëꞌ bal zxíꞌinaꞌ.”
7 Níꞌirö yuguꞌ bönniꞌ huen dxin naꞌ gulaꞌnnë́ꞌ laꞌ légacasëꞌ,
taꞌnnë́ꞌ:
“Biꞌi ni ral-laꞌ guequi queë́biꞌ luyú ni.
Guliꞌdá,
gútiruꞌ-biꞌ,
ateꞌ guequi queë́ruꞌ luyú ni.”
8 Que lë ni naꞌ gulaꞌzönëꞌ-biꞌ,
en gulútiëꞌ-biꞌ.
Gulaꞌrúꞌunëꞌ-biꞌ níꞌilö ga dáꞌgaca lubá uva naꞌ.
9 Níꞌirö Jesús gunábinëꞌ bönniꞌ nacuꞌë niꞌ,
rnnëꞌ:
―¿Nacxi gunëꞌ bönniꞌ xan luyú naꞌ,
channö?
Huidëꞌ,
en gútigaquiëꞌ bönniꞌ huen dxin naꞌ,
ateꞌ udödëꞌ luyú naꞌ lu náꞌgaquiëꞌ bönniꞌ yúbölö.
10 ’¿Naruꞌ cabí nulábaniliꞌ lë naꞌ nazúaj lu guichi láꞌayi?
Caní rnna:
Guiö́j naꞌ gulaꞌrúꞌunëꞌ bönniꞌ tuꞌcuꞌë zöꞌö,
naꞌa naca guiö́j len,
squin zöꞌö.
11 Xanruꞌ Dios benëꞌ ga naca caní ateꞌ rubániruꞌ ca naca lë ni riléꞌeruꞌ.
12 Níꞌirö taꞌzóa taꞌböꞌë ilaꞌzönëꞌ Jesús tuꞌ téquibeꞌenëꞌ bucúdzuꞌë didzaꞌ ca naca quégaquiëꞌ,
pero tádxinëꞌ le ilún bönachi zián nacuáꞌ niꞌ,
en que lë ni naꞌ buluꞌcáꞌanëꞌ Lëꞌ,
söhuö́jgaquiëꞌ.
Ca naca le taꞌguízxaj lázagaca bönachi
13 Gudödi lë ni yuguꞌ bönniꞌ yudoꞌ unná bëꞌ naꞌ gulaꞌsö́l-lëꞌë bal-lëꞌ bönniꞌ yudoꞌ fariseo len bönniꞌ dáꞌgaquiëꞌ Herodes ga zoëꞌ Jesús para ilunëꞌ ga bi innë́ꞌ para gaca uluꞌzéguiëꞌ Lëꞌ didzaꞌ.
14 Bilaꞌdxinëꞌ bönniꞌ ni ga naꞌ zoëꞌ Jesús,
en tëꞌ Lëꞌ:
―Bönniꞌ Usedi,
nö́zituꞌ ruꞌu didzaꞌ idútë li.
Bitiꞌ ruíꞌi ládxuꞌu bi taꞌnnasö bönachi,
tuꞌ cabí ruyusuꞌ le tuꞌluíꞌisö cuínguequi bönachi,
pero rusë́dinuꞌ ca nácatë le rë́ꞌënëꞌ Dios ilún bönachi.
¿Ruíꞌi netuꞌ lataj xibá queëꞌ Moisés quizxaj laztuꞌ le tuꞌquizxjëꞌ uláz queëꞌ César?
¿Naruꞌ uguízxajtuꞌ o bitiꞌ quízxajtuꞌ?
15 Réquibeꞌenëꞌ Jesús tuꞌë didzaꞌ lu yöl-laꞌ riguílaj ladxiꞌ quégaquiëꞌ,
ateꞌ rëꞌ légaquiëꞌ:
―¿Bizx que rubéajliꞌ nedaꞌ didzaꞌ?
Guliꞌdiguáꞌtsöcaꞌ tu dumí ridá para iléꞌedaꞌ le.
16 Diguáꞌagaquiëꞌ le,
ateꞌ Jesús gunábinëꞌ légaquiëꞌ,
rnnëꞌ:
―¿Nuzxi lahui daꞌ lëꞌe ni,
en nuzxi lë ni?
Buluꞌbiꞌë didzaꞌ,
taꞌnnë́ꞌ:
―Queëꞌ César naꞌ.
17 Níꞌirö Jesús gudxëꞌ légaquiëꞌ,
rnnëꞌ:
―Buliꞌnödzaj queëꞌ César le nequi queëꞌ César,
ateꞌ queëꞌ Dios le nequi queëꞌ Dios.
Buluꞌbáninëꞌ ca naca didzaꞌ bubiꞌë Jesús.
Ca naca que yöl-laꞌ rubán lu yöl-laꞌ guti
18 Níꞌirö bilaꞌdxinëꞌ bal-lëꞌ bönniꞌ yudoꞌ saduceo ga zoëꞌ Jesús.
Bönniꞌ ni taꞌnnë́ꞌ bitiꞌ uluꞌbán nupa chinátigaca.
Que lë ni naꞌ gulë́ꞌ Jesús,
taꞌnnë́ꞌ:
19 ―Bönniꞌ Usedi,
Moisés nuzúajëꞌ queë́ruꞌ lu guichi channö gátiëꞌ tu bönniꞌ bitiꞌ zoa biꞌi queëꞌ,
ateꞌ ugáꞌananu nigula queëꞌ,
biꞌi bö́chëꞌë bönniꞌ naꞌ ral-laꞌ utsaga náꞌalenbiꞌ-nu,
en uzóabiꞌ bíꞌidoꞌ gácabiꞌ biꞌi queë́biꞌ bö́chiꞌbiꞌ.
20 Gulaꞌcuáꞌabiꞌ gádxibiꞌ biꞌi nácagacabiꞌ bö́chiꞌgacabiꞌ.
Biꞌi huáca naꞌ butsaga náꞌalenbiꞌ-nu nigula,
ateꞌ gútibiꞌ,
cuntu nu zoa bíꞌidoꞌ queë́biꞌ.
21 Biꞌi buropi naꞌ butsaga náꞌalenbiꞌ-nu nigula uzëbi naꞌ,
ateꞌ gútibiꞌ caꞌ,
cuntu nu zoa bíꞌidoꞌ queë́biꞌ.
Lëscaꞌ caní guca queë́biꞌ biꞌi bunni.
22 Caní guca,
buluꞌtsaga náꞌalenbiꞌ-nu yúguꞌtëbiꞌ,
cuntu nu zoa bíꞌidoꞌ quégacabiꞌ.
Ga yöjsetë,
gútinu caꞌ nigula naꞌ.
23 Naꞌa,
cateꞌ uluꞌbán nupa chinátigaca,
¿núzxilöbiꞌ guéquinu nigula naꞌ queë́biꞌ,
tuꞌ buluꞌtsaga náꞌalenbiꞌ-nu igádxitëbiꞌ?
24 Bubiꞌë didzaꞌ Jesús,
rëꞌ légaquiëꞌ:
―Richíxiliꞌ tuꞌ cabí núnbëꞌëliꞌ le nazúaj lu guichi láꞌayi,
en bitiꞌ nö́ziliꞌ ca naca yöl-laꞌ huáca queëꞌ Dios.
25 Cateꞌ uluꞌbán nupa chinátigaca,
bitiꞌ caꞌ uluꞌtsaga náꞌagaquiëꞌ,
ateꞌ yuguꞌ bönniꞌ bitiꞌ ilaꞌcuáꞌlenëꞌ nigula,
pero ilácagaquiëꞌ ca nácagaquiëꞌ gubáz láꞌayi queëꞌ Dios,
nacuꞌë yehuaꞌ yubá.
26 Naꞌa,
ca naca quégaca nupa chinátigaca channö uluꞌbán,
¿naruꞌ cabí nulábaniliꞌ le buzúajëꞌ lu guichi Moisés?
Ruíꞌi didzaꞌ ca naꞌ bulidzëꞌ Dios lëꞌ lu yaga yö́tsiꞌdoꞌ régui.
Gudxëꞌ lëꞌ:
“Nedaꞌ nacaꞌ Dios queëꞌ Abraham,
en Dios queëꞌ Isaac,
en Dios queëꞌ Jacob.”
Tuꞌ gunnë́ꞌ caní quégaquiëꞌ,
naca bëꞌ nabángaquiëꞌ sal-laꞌ gulátiëꞌ zíꞌalö.
27 Dios náquiëꞌ Dios quégaca nupa nabángaca,
calëga quégaca nupa nátigaca tsaz.
Richíxitëröliꞌ.
Le naca lo le gunná bëꞌë Dios
28 Bidëꞌ caꞌ tu bönniꞌ yudoꞌ usedi ga zoëꞌ Jesús.
Biyönnëꞌ ca naꞌ guluíꞌilenëꞌ Jesús didzaꞌ,
en nö́zinëꞌ dxíꞌadoꞌ bubiꞌë Jesús didzaꞌ.
Que lë ni naꞌ gunábinëꞌ Jesús,
rnnëꞌ:
―¿Bízxilö le gunná bëꞌë Dios nácatërö lo ca yúguꞌtë le gunná bëꞌë?
29 Bubiꞌë didzaꞌ Jesús,
rëꞌ lëꞌ:
―Le gunná bëꞌë le nácatërö lo ca yúguꞌtë naca lë naꞌ rnna:
“Guliꞌyöni bönachi Israel.
Xanruꞌ Dios,
tuzëꞌ Lëꞌ náquiëꞌ Xanruꞌ.
30 Ral-laꞌ idxíꞌinuꞌ Xanuꞌ Dios idú ládxuꞌu,
en lu idú icja ládxiꞌdoꞌo,
en lu idú yöl-laꞌ réajniꞌi quiuꞌ,
en lu idú yöl-laꞌ huáca quiuꞌ.”
Lë ni naca le gunná bëꞌë le nácatërö lo.
31 Le gunná bëꞌë le naca buropi,
lë́bisö ca naca.
Caní rnna:
“Ral-laꞌ idxíꞌinuꞌ luzóꞌo ca nadxíꞌi cuinuꞌ.”
Bitiꞌ caꞌ zoa iaꞌtú le gunná bëꞌë le nácarö lo ca chopa ni gunná bëꞌë.
32 Níꞌirö bönniꞌ yudoꞌ usedi naꞌ gudxëꞌ Jesús,
rnnëꞌ:
―Dxíꞌadoꞌ gunnóꞌ,
Bönniꞌ Usedi.
Le nácatë rnnoꞌ.
Tuzëꞌ náquiëꞌ Dios,
en cúnturö nu zoa naca Dios.
33 Para idxíꞌiruꞌ-nëꞌ Dios idú ládxiꞌruꞌ,
en lu idú yöl-laꞌ réajniꞌi queë́ruꞌ,
en lu idú icja ládxiꞌdoꞌoruꞌ,
en lu idú yöl-laꞌ huáca queë́ruꞌ,
en para idxíꞌiruꞌ luzáꞌaruꞌ ca nadxíꞌi cuinruꞌ,
nácarö lesacaꞌ ca yúguꞌtë böaꞌ bë́dxidoꞌ rútigacaruꞌ-baꞌ lu bucugu láꞌayi queëꞌ Dios,
encaꞌ ca yúguꞌtë böaꞌ bë́dxidoꞌ ruzéguiꞌgacaruꞌ-baꞌ lu bucugu naꞌ.
34 Cateꞌ biyönnëꞌ Jesús dxíꞌadoꞌ rubiꞌë didzaꞌ bönniꞌ ni,
níꞌirö gudxëꞌ lëꞌ,
rnnëꞌ:
―Iaꞌlátiꞌsö riyadzaj quiuꞌ gúnbëꞌu le rinná bëꞌë Dios.
Cúnturö nu burugui bi inábini Jesús.
¿Nuzxi zxíꞌini náquiëꞌ Cristo?
35 Cateꞌ niꞌ rusë́dinëꞌ Jesús bönachi ga naca chila yudoꞌ,
rnnëꞌ:
―¿Bizx que taꞌnnë́ꞌ bönniꞌ yudoꞌ usedi náquiëꞌ Cristo zxíꞌini xiꞌsóëꞌ David?
36 Lë cazëꞌ David naꞌ bëꞌë didzaꞌ,
zóalenëꞌ Dios Böꞌ Láꞌayi lëꞌ,
gunnë́ꞌ:
Xanruꞌ Dios gudxëꞌ Xanaꞌ:
“Gurö́ꞌö cuita lëꞌa ibëla
cateꞌ gunraꞌ ga uluꞌzóa zxíbigaca loꞌ
nupa bitiꞌ taꞌléꞌe Liꞌ dxiꞌa.”
37 ¿Naruꞌ nácatsëꞌ Cristo zxíꞌini xiꞌsóëꞌ David channö lë cazëꞌ David naꞌ rnnëꞌ queëꞌ náquiëꞌ Xanëꞌ?
Bönachi zián nacuáꞌ niꞌ tuꞌzë́ nágagaca Lëꞌ gulaꞌyaza ládxiꞌgaca didzaꞌ ni.
Jesús ruzéguiꞌë didzaꞌ bönniꞌ yudoꞌ tuꞌsë́dinëꞌ
38 Niꞌ rusë́dinëꞌ Jesús yuguꞌ bönniꞌ dáꞌgaquiëꞌ Lëꞌ,
rëꞌ légaquiëꞌ:
―Guliꞌgún chiꞌi cuinliꞌ quégaquiëꞌ bönniꞌ yudoꞌ tuꞌsë́dinëꞌ.
Taꞌyaza ládxiꞌgaquiëꞌ taꞌdë́ꞌ nilö naꞌlö,
nácugaquiëꞌ lariꞌ tunna.
Taꞌyaza ládxiꞌgaquiëꞌ caꞌ tuꞌlidza tsahuiꞌ bönachi légaquiëꞌ gapa naca lu yë́ꞌëyi.
39 Taꞌböꞌë yuguꞌ lataj lo lu yuꞌu ga tuꞌdubëꞌ tuꞌsëdëꞌ queëꞌ Dios,
encaꞌ gapa tuꞌdubëꞌ tëꞌaj tahuëꞌ.
40 Rugúagaquiëꞌ lídxigacanu nigula uzëbi,
en para uluꞌluíꞌisö tsahuiꞌ cuíngaquiëꞌ,
xidzé tuꞌlidzëꞌ Dios.
Bönniꞌ ni,
gúndaꞌrëꞌ Dios légaquiëꞌ xíguiaꞌ.
Le bunö́dzjanu tu nigula uzë́bidoꞌ queëꞌ Dios
41 Tsanni niꞌ röꞌë Jesús chila yudoꞌ ga zoa guíꞌina ga taꞌgúꞌu bönachi dumí que yudóꞌ,
ruyúëꞌ ca tun bönachi taꞌgúꞌu dumí lu guíꞌina.
Dumí zián taꞌguꞌë bönniꞌ dë yöl-laꞌ tsahuiꞌ quégaquiëꞌ.
42 Níꞌirö bidxinnu tu nigula yechiꞌ uzë́bidoꞌ niꞌ,
ateꞌ gulúꞌunu chopa dumí lásidoꞌ,
le nazácaꞌgaca látiꞌdoꞌos.
43 Níꞌirö bulidzëꞌ Jesús yuguꞌ bönniꞌ usëda queëꞌ,
en rëꞌ légaquiëꞌ: