Riyaziëꞌ Jesús yödzö Jerusalén
11
Bilaꞌdxinëꞌ Jesús,
en yuguꞌ bönniꞌ dáꞌgaquiëꞌ Lëꞌ galaꞌ ga dë Jerusalén,
ga naꞌ nacuáꞌ yödzö Betfagé,
en yödzö Betania,
en ga naꞌ dë caꞌ Guíꞌa Yaga Olivo.
Níꞌirö Jesús gusö́l-lëꞌë chopëꞌ bönniꞌ usëda queëꞌ,
2 en rëꞌ légaquiëꞌ:
―Guliꞌtséaj lu yö́dzödoꞌ dë loruꞌ niꞌ,
en cateꞌ tsúꞌuliꞌ niꞌ,
tsöjxácaꞌliꞌ-baꞌ tubaꞌ búrrodoꞌ nágaꞌbaꞌ niꞌ,
en cuntu nu ribíani lëbaꞌ.
Guliꞌsedxi-baꞌ,
en guliꞌchë́ꞌ-baꞌ quiaꞌ ni.
3 Channö nu bi guíë libíꞌiliꞌ tuꞌ runliꞌ lë ni,
guliꞌguíë nu naꞌ:
“Xanruꞌ riquinnëꞌ-baꞌ,
ateꞌ laꞌ usö́l-laꞌtëꞌ-baꞌ quiuꞌ.”
4 Níꞌirö yöjáquiëꞌ,
en yöjxácaꞌgaquiëꞌ-baꞌ búrrodoꞌ naꞌ,
nágaꞌbaꞌ raꞌ nöza ga nu riyaza löꞌa,
ateꞌ gulaꞌsedxëꞌ-baꞌ.
5 Nupa nacuáꞌ niꞌ të légaquiëꞌ:
―¿Bizxi ni runliꞌ?
¿Bizx que risédxiliꞌ-baꞌ búrrodoꞌ naꞌ?
6 Buluꞌbiꞌë didzaꞌ bönniꞌ usëda queëꞌ Jesús,
gulë́ꞌ légaquiëꞌ ca naꞌ chigudxi cazëꞌ Jesús légaquiëꞌ,
ateꞌ guluꞌë légaquiëꞌ lataj.
7 Níꞌirö gulaꞌchë́ꞌë-baꞌ búrrodoꞌ naꞌ ga naꞌ zoëꞌ Jesús.
Gulaꞌxóëꞌ lariꞌ quégaquiëꞌ cúdzuꞌbaꞌ,
ateꞌ Jesús gudxíëꞌ-baꞌ.
8 Zián bönniꞌ nacuꞌë niꞌ gulaꞌchiljëꞌ lariꞌ quégaquiëꞌ gapa naca laꞌ nöza.
Iaꞌbal-la bönachi niꞌ gulaꞌguítsaj zin le buluꞌzxóa laꞌ nöza.
9 Gulaꞌsí lo nupa nanö́rugaca lahuëꞌ Jesús,
en nupa naꞌ záꞌgaca cúdzuꞌlëꞌ tuíꞌi zidzaj didzaꞌ,
taꞌnnë́ꞌ:
―¡Yöl-laꞌ ba!
¡Xanruꞌ Dios gun láꞌayëꞌ Bönniꞌ zëꞌë ni,
nasö́l-lëꞌë Dios Lëꞌ!
10 ¡Dios gun láꞌayëꞌ Bönniꞌ ni siꞌ inná bëꞌë,
ca naꞌ gunná bëꞌë xuz xtóꞌoruꞌ David!
¡Yöl-laꞌ ba Dios!
11 Caní guca,
bidxinëꞌ Jesús Jerusalén,
ateꞌ guyáziëꞌ löꞌa yudoꞌ.
Cateꞌ budxi buyúëꞌ yúguꞌtë le nacuáꞌ idú gásibiꞌilö niꞌ,
burúajëꞌ zacaꞌ yödzö Betania tuꞌ chiridzö́ꞌ,
ateꞌ dzágagaquiëꞌ Lëꞌ yuguꞌ bönniꞌ usëda queëꞌ.
Jesús rulidza ziꞌë tu yaga higo
12 Cateꞌ zaꞌ reníꞌ iaꞌtú dza,
ateꞌ tuꞌrúajëꞌ Jesús,
en yuguꞌ bönniꞌ dáꞌgaquiëꞌ Lëꞌ yödzö Betania,
ridunëꞌ Jesús.
13 Ziꞌtuꞌ biléꞌenëꞌ tu yaga higo dxía xilaguiꞌ.
Gubíguiꞌë ga naꞌ zoa yaga naꞌ channö utsöjxaquiëꞌ latiꞌ le ribía.
Cateꞌ bidxinëꞌ niꞌ bitiꞌ bi yöjxáquiëꞌ le ribía.
Xiláguiꞌsö dxía tuꞌ cabí ridxini dza cuía.
14 Níꞌirö Jesús bulidzëꞌ yaga naꞌ,
rnnëꞌ:
―Bítiꞌrö nu gagu le ribía quiuꞌ.
Yuguꞌ bönniꞌ usëda queëꞌ bilaꞌyönnëꞌ didzaꞌ ni.
Jesús rulatjëꞌ löꞌa yudoꞌ
15 Cateꞌ bilaꞌdxinëꞌ Jesús,
en yuguꞌ bönniꞌ dáꞌgaquiëꞌ Lëꞌ,
yödzö Jerusalén,
guyáziëꞌ Jesús löꞌa yudoꞌ,
en gusí lahuëꞌ rubéajëꞌ níꞌilö nupa tutiꞌ,
en nupa toꞌo lu löꞌa yudoꞌ.
Burixëꞌ yuguꞌ blaga quégaca nupa tuꞌtsáꞌ dumí izáꞌa,
encaꞌ yuguꞌ ga taꞌbö́ꞌ nupa tutiꞌ yuguꞌ guꞌdödoꞌ.
16 Bitiꞌ caꞌ bëꞌë lataj nu bi guáꞌ,
uzóa nöza ga naca löꞌa yudoꞌ.
17 Busë́dinëꞌ nupa nacuáꞌ niꞌ,
rnnëꞌ:
―Nazúaj lu guichi láꞌayi,
rnna:
“Lidxaꞌ siꞌi le,
yuꞌu ga bönachi idútë yödzölió uluꞌlidza Dios.”
Libíꞌiliꞌ chinunliꞌ le ca naca lídxigaca gubán.
18 Cateꞌ yuguꞌ bixúz unná bëꞌ,
en yuguꞌ bönniꞌ yudoꞌ usedi bilaꞌyönnëꞌ didzaꞌ ni,
gulaꞌsí lógaquiëꞌ tuꞌguiljëꞌ nacxi ilútiëꞌ Jesús,
pero tuꞌ tádxinëꞌ le ilún bönachi,
bitiꞌ bi gulunëꞌ queëꞌ,
tuꞌ tuꞌbani yúguꞌtë bönachi ca naca le rusë́dinëꞌ Jesús.
19 Cateꞌ chiridzö́ꞌ burúajëꞌ Jesús lu yödzö naꞌ.
Ribidxi yaga higo bulidza ziꞌë Jesús
20 Cateꞌ zaꞌ reníꞌ iaꞌtú dza,
gulaꞌdödëꞌ Jesús,
en yuguꞌ bönniꞌ dáꞌgaquiëꞌ Lëꞌ ga zoa yaga higo naꞌ bulidza ziꞌë Jesús,
en bilaꞌléꞌenëꞌ le,
chinabidxi idú luí.
21 Níꞌirö yöjnenëꞌ Pedro bi guca,
ateꞌ gudxëꞌ Jesús:
―Bönniꞌ Usedi,
buyútsöcaꞌ.
Chinabidxi yaga higo ni bulidza ziꞌu néaje.
22 Bubiꞌë didzaꞌ Jesús,
rëꞌ légaquiëꞌ:
―Guliꞌtseajlëꞌ Dios.
23 Le nácatë reaꞌ libíꞌiliꞌ,
channö nu bönniꞌ guíëꞌ guíꞌadoꞌ ni:
“Gucuíta ni,
yöjsóa lu nísadoꞌ”,
en bitiꞌ gaca chopa ládxëꞌë bönniꞌ naꞌ,
pero idú ládxëꞌë tseajlëꞌë gunëꞌ Dios ca naꞌ rnnëꞌ,
caꞌ gaca.
24 Que lë ni naꞌ reaꞌ libíꞌiliꞌ:
Yúguꞌtë le inábaliꞌ cateꞌ ulídzaliꞌ-nëꞌ Dios,
guliꞌtséajlëꞌ chibennëꞌ Dios queë́liꞌ lë naꞌ rinábaliꞌ,
ateꞌ gunnëꞌ queë́liꞌ.
25 Cateꞌ niꞌ rulídzaliꞌ-nëꞌ Dios,
channö zoa nu rileliꞌ nu bi ben queë́liꞌ,
buliꞌniti lo nu naꞌ,
para uniti lahuëꞌ caꞌ libíꞌiliꞌ Xúziliꞌ naꞌ zoëꞌ yehuaꞌ yubá ca naca dul-laꞌ nabágaꞌliꞌ.
26 Channö cabí uniti loliꞌ bönachi,
bitiꞌ uniti lahuëꞌ Xúziliꞌ zoëꞌ yehuaꞌ yubá libíꞌiliꞌ dul-laꞌ nabágaꞌliꞌ.
Yöl-laꞌ unná bëꞌ dë lu nëꞌë Jesús
27 Níꞌirö Jesús,
en yuguꞌ bönniꞌ dáꞌgaquiëꞌ Lëꞌ yöjhuö́jgaquiëꞌ Jerusalén.
Cateꞌ niꞌ ridë́ꞌ Jesús ga naca chila yudoꞌ,
bilaꞌdxinëꞌ yuguꞌ bixúz unná bëꞌ,
en yuguꞌ bönniꞌ yudoꞌ usedi,
en bönniꞌ gula tuꞌzéajniꞌinëꞌ,
ga zoëꞌ.
28 Gulaꞌnábinëꞌ Jesús,
taꞌnnë́ꞌ:
―¿Bizxi yöl-laꞌ unná bëꞌ dë lu noꞌo runuꞌ yuguꞌ lë ni?
¿Nuzxi caz budödi lu noꞌo yöl-laꞌ unná bëꞌ gunuꞌ caní?
29 Bubiꞌë didzaꞌ Jesús,
rëꞌ légaquiëꞌ:
―Nedaꞌ caꞌ inábidaꞌ libíꞌiliꞌ tu didzaꞌ.
Channö ubíꞌiliꞌ quiaꞌ didzaꞌ,
níꞌirö guíaꞌ libíꞌiliꞌ bi yöl-laꞌ unná bëꞌ rúnidaꞌ yuguꞌ lë ni.
30 ¿Nuzxi budödi lu nëꞌë Juan uquilëꞌ bönachi nisa?
¿Naruꞌ Dios o bönachi?
Guliꞌnnátsöcaꞌ.
31 Gulaꞌsí lógaquiëꞌ tun xtídzaꞌgaquiëꞌ laꞌ légacasëꞌ,
taꞌnnë́ꞌ:
―Channö innaruꞌ Dios gusö́l-lëꞌë lëꞌ,
guíëꞌ rëꞌu:
“¿Bizx que bitiꞌ guyéajlëꞌëliꞌ lëꞌ?”
32 ¿Naruꞌ guíëtsaruꞌ-nëꞌ:
Gulaꞌsö́l-lëꞌë bönniꞌ lëꞌ?
Caní taꞌzáꞌ ládxiꞌgaquiëꞌ tuꞌ tádxinëꞌ le ilún bönachi zián nacuáꞌ niꞌ tuꞌ téquiguequi yúguꞌtë bönachi naꞌ bëꞌë didzaꞌ Juan naꞌ uláz queëꞌ Dios.
33 Que lë ni naꞌ gulë́ꞌ Jesús:
―Bitiꞌ nöztuꞌ.
Níꞌirö Jesús gudxëꞌ légaquiëꞌ:
―Nedaꞌ caꞌ bitiꞌ quíxjöiꞌidaꞌ libíꞌiliꞌ bi yöl-laꞌ unná bëꞌ dë lu naꞌa rúnidaꞌ yuguꞌ lë ni.